Job 41

Mien Bible (Thai Script) © Thailand Bible Society, 2007

← Chapter 40 Jump to: Chapter 42 →

1“โย้บ อ้า! เม่ย ไฮ่ หล่ง ติ๋ว เฒาะ เลวีอาทาน, ไฟ หล่ง ฮลาง โด้ นิ่น เญย เบียด ไฟ?

2เม่ย ไฮ่ หล่ง ฮลาง หธุน นิ่น เญย บะฒอง, ไฟ หล่ง เงา ขวัง นิ่น เญย ฮ่า ป้า ไฟ?

3นิ่น อ๋อย ชะ โท้ เม่ย ค้อ-เลี่ยน เญย ไฟ? นิ่น อ๋อย หล่ง ส่วน เญย หว่า เหธา เม่ย ก๊อง?

4นิ่น อ๋อย เหธา เม่ย เหลียบ แหง่ง หว่า, แล์ง เหยียด ลิ์ว โหฒว เม่ย เญย โน่ว?

5เม่ย ไฮ่ เฒาะ นิ่น ต๋อง เหนาะ หล่ง อะหฑย่าว, ไฟ โด้ เจี๊ยน ฮลาง เคน ดั๊ว เม่ย เญย เซียะ-หลุน อะเฮน้ย ไฟ?

6เฒาะ เบย์า เมี่ยน ต้อ นิ่น ต้าย ก๊อง จ๋า-ฒิ่น, แซง-เอ๋ย เมี่ยน ฯฒฯ เฒาะ นิ่น ปุน ฆอย ไฟ?

7เม่ย ไฮ่ หล่ง ธัง-โฟว หธุน นิ่น เญย ด๊บ, ไฟ หล่ง ฑบ เบย์า ธัง ฑบ นิ่น เญย มฆ้อง ไฟ?

8หล่ง เม่ย เญย ปั์ว มัวะ นิ่น, หาย หฒั่น จั๋ง หฒุ เม่ย เหธา นิ่น เบ๊าะ จ๋า, เม่ย เหยียด ลิ์ว ไม้ แอ๋ง โหฒว อ๊ะ.

9เมี่ยน ม่าย ลั่ม ฮนั้ม อ๋อย เฒาะ นิ่น มป่า ไม้ เฒ์ย อ๊ะ, ตาน ปวัด นิ่น ฮนั้ง, ต๊าม มับ อ๊ะ, คีง เหฌี่ย เดา.

10ไม้ ม่าย หาย เต้า เธี้ยว เก๋า ธัวะ นิ่น. วั้ว หญู่ง, หาย เต้า ไฮ่ เยียม เยีย เญย หฑะเฮมียน โซ้ว ตุ๊ ว้วน?

11ม่าย หาย เต้า ปุน หาย หญู่ง เยีย, ต้ง เยีย อ๋อย หฒุ วิ่น ปุน นิ่น? ลู่ง เดี๊ย เญย หม่าน หมวด เหยียด ฒู้ง เซ เยีย เญย.

12“เยีย หย่า ไม้ เญี์ยน เจี๊ยน ไม้ ก๊อง เถา นิ่น เญย ปั์ว-เหฒา, ไฟ นิ่น เญย ต้ม ชะ ไฟ นิ่น เญย ซิน เหลี่ยว.

13หาย เต้า ไฮ่ เธี้ย นิ่น เญย กะเหญี่ย วั้ว เหยี่ยม ลุย? หาย เต้า ไฮ่ ฑบ เปียะ นิ่น เญย อี เหยี่ยม เฮลียะ-ลุย?

14หาย เต้า ไฮ่ แมะ ฆอย นิ่น เญย ฑุ่ย แป๋ง? ฮวีง ก๋อม นิ่น เญย ฑุ่ย เญย ญ่า แฮะ เมี่ยน กั้ม เหฑีย ไห่.

15นิ่น เญย ติ ต์าน เญย เจี๋ย เป๋น เหยียด เลี์ยว เหยียด เลี์ยว ฮนั้ง ท้อง-ป้าย นอ, นิด เจี๊ยน จ๋า หมะ เญย, กั๊บ เจี๊ยน ดิบ เญย ฮนั้ง หละเปย๊ย นอ แหง่ง.

16น้าย เต๋ย เจี๋ย เหยียด คว้าย กั๊บ เหยียด คว้าย ดิบ ไห่, เฉีย ฒู้ง ไม้ ไฮ่ เจี๋ย บุด๋ง-ฉัง.

17เจี๋ย กิ๊ด เจี๊ยน จ๋า, เหยียด คว้าย ลับ เหยียด คว้าย, ไม้ ไฮ่ แมะ ไม้ ฆอย.

18นิ่น ธิ้ว ฯฒฯ ม่าย ฌัง หฌับ ตั้ง ธ้วด ต้าย. นิ่น เญย มฒีง ฮนั้ง ลู่ง ดอม เฑี้ยว เญย ฌัง-หล่าง.

19นิ่น เญย ฑุ่ย ธ้วด โต์ว ฮนั้ง โต์ว-ป๊า, หย่า ม่าย โต์ว-ฟีง ได๋ ธ้วด.

20นิ่น เญย บะฒอง ธ้วด โต์ว-เสียว, ฮนั้ง แธง เบว๋ย เหธา เหฒียะ เจี๊ยน เญย หลัวะ ติ แกว๊ง นอ.

21นิ่น ปย๊ม เฉีย ปุน โต์ว-ถาน เหฒียะ, นิ่น เญย ฑุ่ย ธ้วด โต์ว-เบียด.

22นิ่น เญย จาง หฒะเก้ง เฮ้น ไห่, ตะฟ่าน ปวั้ง นิ่น วั้ว เต๋ย กั้ม เหฑีย! ไห่.

23นิ่น เญย อ๊อ-ฑิว ธิ เจี๊ยน จ๋า เหฒียด เญย, แหง่ง เญย, ฮนั้ง โต๋ ต้าย เญย เฮลียะ นอ, ฆั้ม ไม้ ต์ง.

24นิ่น เญย เฮญี้ยว แหง่ง ฮนั้ง หละเปย๊ย, ฮนั้ง กะเดี๊ย แหมง หม่อ.

25นิ่น เจี์ย ซิน, เมี่ยน เฮ้น เมี่ยน กั้ม เหฑีย, นิ่น โหฒว เธี้ยว, นิ่น บัว เฮญี้ยว หว่าย เหฑ่ง.

26ไม้ กุ๊น หล่ง หฑุ ด๊าว ฑบ, หย่า ห่อย ไม้ หฒุ นิ่น, เลี่ยม ฑบ เญย ธัง เหธา ปิว เญย ธัง หย่า ห่อย ไม้ หฒุ นิ่น.

27เหว่ย นิ่น นอ, เฮลียะ ต๋อง เบย้า ฆ้าว, ต้ง ซิ ต๋อง เดี๋ยง-ลัด.

28ฟอง แฮะ ไม้ ตุ๊ นิ่น เปย๋า, ปู๋ง หละเปย๊ย เญย ด๊บ-ฮลาง เหว่ย นิ่น ต๋อง เบย้า ฆ้าว กอน.

29เดี๋ยง-ด๋น ต๋อง เบย้า ฆ้าว กอน, นิ่น หย่า จั๊ด ปิว ธัง เญย เฉีย บุย.

30กะเซีย โด๊ะ เญย เจี๋ย ไหล่ ฮนั้ง เนีย-มอ ฮู้. นิ่น ลุ่ย เจี๊ยน กัน ววม-ปั่ม เจี๋ย ฮนั้ง เญว่ย เบย้า เญย จา-สี่.

31นิ่น ปุน โด เญย ววม เบว๋ย ฮนั้ง แธง เบว๋ย, ปุน ค้อย ฮนั้ง แธง กะญั์ว เญย เดีย-โย่ว.

32นิ่น เจี๋ย มี่ง เญย เจ๊า ฆะฮ้า แหมง ธ้วด ฌัง หฌับๆ เญย, เมี่ยน ฯฒฯ ฮนั้ม ต้าย ค้อย โด เญย ต๋อง ม่าย บะเปยย แปะ.

33เยียม ลู่ง เดี๊ย ไม้ ม่าย หาย หญู่ง ฮนั้ง นิ่น. นิ่น เป๋น เหฒย ธ้วด เญย กะน้าย, หย่า ไม้ กั้ม เหฑีย หาย หญู่ง.

34นิ่น หมั่ง หญู่งๆ เยียม ฮลัง เญย กะน้าย. นิ่น โหฒว หฒวัง เฮยี่ย ฒ่อย เญย ฮู่ง.”

← Chapter 40 Jump to: Chapter 42 →