Job 38 — Mien Bible (Thai Script) © Thailand Bible Society, 2007

1วั้ว หฒั่น เฒี้ยว เยียม หฑยาว-หฒุ่น เตา โย้บ เญย หว่า. นิ่น ก๊อง,

2“น้าย ต้ง หาย เต้า หล่ง ไม้ ม่าย ว่วน ฒาง เญย หว่า ปุน เยีย เญย หฒะเอ๋ย มวั่ง มี่ง?

3เม่ย อ๋อย หฒุ หลิ่ว เล์ย เหฒียง ฮนั้ง เต้า จุน-เฒ้ย เมี่ยน. เยีย อ๋อย หน่าย เม่ย, เม่ย หย่า อ๋อย หฒุ เตา เยีย.

4“เยีย เหลียบ ป้าม เกน เญย กอน-โด๊ะ วั้ว หฒั่น, เม่ย เยียม หาย? สี ก๊อง เม่ย ฮิ้ว, บั๋ว เยีย ม่าะ!

5หาย เต้า ตี่ง เดา ล่ม หาย โฮล? ต๋าย เม่ย ฮิ้ว เญย ซ่าะ? หาย เต้า แปง ฮลาง เดาะ?

6เดา เญย กอน-โด๊ะ เหลียบ เยียม หาย หญู่ง กู้ หงว่าย? หาย เต้า อัน ป้าม เกน เญย เก๊าะ เก้า หล่ง เจี๊ยน เจี๋ย วั้ว นอม หละเปย๊ย?

7วั้ว หฒั่น ลู่ง ดอม เญย เหฮลย ล่ม ฑ่อย ป๋าว ฑูง, หฒวัง ฟิน-เมี่ยน เฌียน-โย่ว เญย เห่ว.

8“ค้อย เญย ววม แป๊ด ธ้วด ฮนั้ง กู้งว์า ธ้วด มา เญย กะเซีย วั้ว หฒั่น, หาย เต้า กวน แก้ง ตั๊ง เจี๊ยน ค้อย?

9เซ เยีย หล่ง บ๋วน ปวัง เจี๊ยน ค้อย, หย่า หล่ง หฮมวัง โฮ์ เปว เจี๊ยน นิ่น.

10เยีย ตี่ง ค้อย เญย กั๊บ-จ๋าย, อัน เจี๊ยน แก้ง เหธา แก้ง ซอน,

11หย่า ก๊อง, ‘เม่ย ต้าย เถา น้าย ฮนั้ง, ไม้ ตู๋ง เจี๋ย ด่าง, เม่ย เฮ้น ไห่ เญย ววม-หล่าง อ๋อย หฒุ ตี้ง เหฌี่ย น้าย.’

12“โย้บ อ่า, เยียม เม่ย เญย เสย เฒ้ย เม่ย ตุ๊ หัด เจี๋ย ลู่ง ดอม, หย่า ปุน ลู่ง ดอม เฑี้ยว ฮิ้ว ตุ๊ นิ่น เญย ต๋อง,

13เหว่ย ปุน นิ่น ไฮ่ หฒิว จ่ม ลู่ง กอน, หย่า หฒุ่น เอ๊าะ เมี่ยน ธ้วด นิ่น ปี๋ง เญย ต๋อง?

14เดา-เป้ย ก๊อย เหยี่ยน ฮนั้ง เบ๊าะ เจี๊ยน เหยียน เญย ปะไน่ เนีย, หม่าน หมวด หิ่น ธ้วด เม่ง เญย ฮนั้ง ลุย-โหว นอ.

15เอ๊าะ เมี่ยน เญย ฌัง หฒุ เฒาะ ฆอย, ฯฒฯ ตั๊ง เจี๊ยน ไม้ ปุน นิ่น บัว โหฒว โตะ เญย สี่.

16“เม่ย เปียะ เจี๋ย เถา ค้อย เญย ญ่วน, ไฟ ยั่ง เจี๋ย ค้อย-โด๊ะ โด เจี๋ย เญย ต๋อง ไฟ?

17ม่าย หาย เต้า ปุน เม่ย ฮิ้ว ตุ๊ หฒุ ไต่ เญย แก้ง? เยี่ยม เกน หฮมวัง เญย ต๋อง เญย แก้ง เม่ย ปวัด เจี๋ย เญย ไฟ?

18เม่ย ฮิ้ว ตุ๊ เดา-เป้ย ด่ง หาย จั๊ง ไฟ? เม่ย ฮิ้ว ตุ๊ น้าย เต๋ย เหยียด ฒู้ง นอ, ก๊อง บั๋ว เยีย ม่าะ!

19“ฌัง เยียม เญย ต๋อง ยั่ง หาย มี่ง? หฮมวัง เยียม เญย ต๋อง เยียม หาย?

20เม่ย ไฮ่ ต้อ นิ่น มี่ง เถา นิ่น เญย ต๋อง, เหว่ย ปุน เม่ย ฮิ้ว ตุ๊ มี่ง นิ่น เญย เปย๊า วั้ว ติ้ว เจ๊า ไฟ?

21เม่ย หฒะเก้ง ฮิ้ว เญย, เหว่ย หฒุ เหฒย ป้าม เกน วั้ว หฒั่น เม่ย ฒู้ง ธ้วด เสย ต้าย อ๊ะ. เม่ย เยียม เญย ฮนอย-เหญียะ เก้ง ธั้ม ไห่.

22“เม่ย เปียะ เจี๋ย ซอง เญย ลั์ม, ไฟ ปวัด เจี๋ย เปาะ เญย ลั์ม ไฟ?

23เยีย เลี่ยว เจี๊ยน ซอง เหธา เปาะ เหว่ย เหฒะ หน่าน เญย เฒี่ยง โห่, เหว่ย เบ๊าะ จ๋า เหธา เบ๊าะ ต้ม จ๋า เญย ฮนอย.

24มี่ง เถา ฌัง ปุน ฆอย เญย ต๋อง เยียม หาย? ไฟ มี่ง เถา ตง ปูง เญย หฑยาว ปุน หฑาน ปวั๊ง เดา-เป้ย เญย ต๋อง เยียม หาย?

25“หาย เต้า เหว่ย ต้ม บยู่ง เว้ด ววม-หฒวน, หย่า คอย เจ๊า ปุน บะหลี่ง โต์ว?

26หาย เต้า ปุน บยู่ง ตุ้ย เหฌี่ย ไม้ ม่าย เมี่ยน เยียม เญย เดา, เหธา ไม้ ม่าย เมี่ยน เยียม เญย เต่ย-ปูง-ฮวาง?

27หาย เต้า ปุน เดา-ฮวาง เดา-ฆาย ตุ๊ ววม เก๋า เหว่ย ยู์ง เดา ธ้วด เมี้ย-แมง?

28บยู่ง ม่าย เตีย เญย ไฟ? ไฟ หาย เต้า ยู์ง บยู่ง-ซุ้ย เดี๊ยบ?

29หาย เต้า โหฒว ซอง เญย มา? ลู่ง หฒั่ง เญย บยู่ง-ซุ้ย กิ๊ด, หาย เต้า ยู์ง ต้าย?

30ววม แหง่ง มี่ง ฮนั้ง หละเปย๊ย, ค้อย เญย ววม-หมิ่น หย่า กิ๊ด เป๋น ซอง.

31“เม่ย ไฮ่ เฒาะ เสี่ย มั์ว-เซียะ เหฮลย โด้ เจี๊ยน, ไฟ ไจ๊ ฆอย ฟาม-ธีง เหฮลย เญย ฮลาง ไฟ?

32เม่ย ไฮ่ ต้อ เหฮลย-กวั้น หฒิว นิ่น บัว เญย เกว๋ย, ไฟ ต้อ ปะเต๊า เหฮลย เหธา กัน นิ่น เญย เหฮลย ไฟ?

33เม่ย ฮิ้ว ตุ๊ ลู่ง เญย เล์ย-หลัด ไฟ? เม่ย ไฮ่ ปุน น้าย เต๋ย เล์ย-หลัด กุ๊น ลู่ง เดี๊ย ไฟ?

34“เม่ย ไฮ่ เห่ว บ๋วน ตุ้ย บยู่ง เหฌี่ย เหยียม เจี๊ยน เม่ย ไฟ?

35เม่ย ไฮ่ พ้าย บะหลี่ง เหฌี่ย, บะหลี่ง ฯฒฯ บั๋ว เม่ย, ‘เยีย บัว เยียม น้าย’?

36หาย เต้า ปุน เมี่ยน เญย เฮญี้ยว ม่าย ธง-เม่ง, หย่า ปุน เฮญี้ยว ม่าย ว่วน ฒาง?

37หาย เต้า ม่าย ธง-เม่ง ซ้าว บ๋วน? ไฟ หาย เต้า ไฮ่ โต๋ ธ้วด ลู่ง เญย ววม-อ๋ง,

38ปุน เนีย-บูง กิ๊ด เป๋น ดุ้น, เนีย-ดุ้น หย่า กิ๊ด เจี๊ยน จ๋า?

39“เซี่ยน บ๊าบ เจี๊ยน เยียม นิ่น บัว เญย ค้วด ไฟ เยียม เบว์ย เญย ต๋อง ฒั้ว, เม่ย ไฮ่ ล์อ กะน้าย ปุน หญั่น, ไฟ ปุน เซี่ยน หลุน ตุ๊ หญั่น เป๊ว?

41เหนาะ อา หลาย ไม้ ม่าย กะน้าย หญั่น เจี๋ย น้าย เจี๋ย วั้ว, นิ่น เญย ตอน เห่ว โท้ ทิน-ฮู่ง เถง. หาย เต้า ล์อ กะน้าย ปุน เหนาะ อา หญั่น?