Job 28

Mien Bible (Thai Script) © Thailand Bible Society, 2007

← Chapter 27 Jump to: Chapter 29 →

1“เฒียน อ๊ะ, ม่าย เว้ด ญ่าน เญย เธี้ยง, หย่า ม่าย ต๋อง สิน เจียม.

2เฮลียะ เยียม เดา-เดี๊ย เว้ด ธ้วด ต้าย, ต้ง หย่า เยียม หละเปย๊ย สิน ต้าย.

3เมี่ยน ปุน หฮมวัง เญย ต๋อง ทิ้ว เป๋น ฌัง. นิ่น บัว ฒิ่ม ล์อ เยียม โก เจี๋ย เญย ต๋อง, เยียม มับ หฮมวัง เญย ต๋อง เว้ด ธ้วด หละเปย๊ย.

4นิ่น บัว เยียม เล่ย เมี่ยน เญย ต๋อง โก เญย, เว้ด เดา-เดี๊ย เญย ค้วด, เจี๋ย เจ๊า เญย เมี่ยน ฒู้ง ไม้ จั๋ง นิ่น บัว. นิ่น บัว เล่ย ตุ๊ เมี่ยน โก, เยียม ค้วด กะญั์ว นั้น เจี๊ยน ฮลาง เดี๋ยว มี่ง เดี๋ยว ต้าย.

5เดา-เป้ย แอ๊ะ, ธ้วด ล่าง หฒิ, มป่า เดา-เดี๊ย หลุ่น เหฑ่ง ฮนั้ง หฒุ โต์ว ปั๊ว นอ.

6เดา-เดี๊ย เญย หละเปย๊ย ม่าย หละเปย๊ย-จ๋าย บั๊ว เญย, หละเปย๊ย กะญั์ว หย่า ม่าย เจียม-บ๊วน.

7“วั้ว ติ้ว เจ๊า ไม้ ม่าย หาย นอม ต้ม จ๊าง ฮิ้ว, ต้ม จ๊าง-ง่ง เญย มฒีง หย่า ไม้ ปวัด เจี๋ย.

8เธี้ยว เญย เฮยี่ย ฒ่อย ไม้ ธ้าย เจี๋ย, เซี่ยน หย่า ไม้ ยั่ง เจี๋ย วั้ว.

9“เมี่ยน ซูง ปั์ว เบ๊าะ แหง่ง ไห่ เญย หละเปย๊ย, เว้ด บง เหฌี่ย เถา กอน.

10นิ่น เยียม หละเปย๊ย-แบ๋ง กะญั์ว เว้ด เจ๊า, นิ่น เญย มฒีง ตุ๊ ปวัด หญู่งๆ จ๋าย เญย กะน้าย.

11นิ่น แฒะ เจี๊ยน ววม-ญ่วน, ไม้ ปุน ววม สาม ธ้วด, ปุน ปี๋ง เจี๊ยน เญย กะน้าย ธ้วด ต้าย เยียม ฌัง.

12“มป่า ธง-เม่ง แอ๊ะ, อ๋อย หฒุ มี่ง หาย เดา ล์อ? ว่วน ฒาง เญย ต๋อง เยียม หาย?

13เมี่ยน ไม้ ฮิ้ว ตุ๊ ธง-เม่ง เญย จ๋า-ฒิ่น, เยียม ย่าง เกน ล์อ ไม้ ปวัด.

14เดา-เดี๊ย เญย ววม ก๊อง, ‘ธง-เม่ง ไม้ เยียม เยีย กะญั์ว.’ ค้อย หย่า ก๊อง, ‘ธง-เม่ง ไม้ เหธา เยีย เยียม.’

15“หล่ง เจียม ม์าย หย่า ไม้ ตุ๊, หย่า ไม้ ไฮ่ เฑียง ญ่าน หฒี่ นิ่น เญย จ๋า-ฒิ่น.

16โอฟี เญย เจียม เหธา จ๋าย ไห่ เญย หละเปย๊ย-เจี๊ยะ แปะ ไฟ บั๊ว เญย หละเปย๊ย-จ๋าย หย่า ม์าย ไม้ ดุ๊ด,

17เจียม เหธา จ๋าย เญย กี๋ง หย่า เป๊ย ไม้ เถา. หย่า ไม้ ไฮ่ หล่ง เฒียน เจียม เญย จา-สี่ ม์าย ดุ๊ด.

18เลี่ยม ไม้ หฒุ ก๊อง เถา เยียม ค้อย จ๋าย เญย หละเปย๊ย ไฟ ฑัง เจี๋ย เญย กี๋ง, ธง-เม่ง เญย จ๋า-ฒิ่น เซ เก้า จ๋าย เจี๋ย จ๋าย เญย หละเปย๊ย-โฒว.

19เอทีโอเปีย ยั่ง อู๊ง เญย หละเปย๊ย-จ๋าย หย่า ไม้ ไฮ่ เป๊ย ไม้ เถา, เฒียน เจียม เญย จ๋า-ฒิ่น หย่า เป๊ย ไม้ หฒ่าย อ๊ะ.

20วั้ว หญู่ง ธง-เม่ง เยียม หาย ต้าย? ว่วน ฒาง เญย ต๋อง เยียม หาย?

21ธง-เม่ง เซ ปี๋ง เจี๊ยน เหยียด ฒู้ง ม่าย แหม่ง เญย กะน้าย เญย มฒีง, หย่า เกม เจี๊ยน เยียม ด๊าม-ลู่ง เญย เหนาะ.

22หฒุ เหมียด เญย ต๋อง เหธา เยี่ยม เกน ก๊อง, ‘เยีย บัว เญย มน่อม ไฮ์ เต๋ย หว่า-หฑยาว ก๊อง เถา ธง-เม่ง.’

23“ทิน-ฮู่ง เม่ง แปะ ล์อ ธง-เม่ง วั้ว ติ้ว เจ๊า, หย่า ฮิ้ว ตุ๊ ธง-เม่ง เยียม เญย ต๋อง.

24เหว่ย หฒุ นิ่น หมั่ง เถา จ่ม เดา-เป้ย, หย่า ปวัด เยียม ลู่ง เดี๊ย เญย หญู่งๆ.

25ทิน-ฮู่ง ปุน หฑยาว ม่าย เฮนี้ย-ต้าว วั้ว หฒั่น, หย่า หล่ง กะน้าย ฮลาว ววม,

26นิ่น พ้าย เหฒียง บยู่ง เญย โสว โหม่ว, หย่า ตี่ง บะหลี่ง โต์ว เญย เจ๊า,

27วั้ว หฒั่น นิ่น ปวัด ธง-เม่ง หย่า ก๊อง เซ หลง เญย. นิ่น เหลียบ เจี์ย หย่า ฒ่า หมั่ง.

28ทิน-ฮู่ง ก๊อง บั๋ว เมี่ยน, ‘อ๋อย หฒุ ท่าย เฒี้ยว, น้าย เซ ธง-เม่ง. หย่า อ๋อย หฒุ กวั่ง เอ๊าะ สี่, น้าย เซ ว่วน ฒาง.’”

← Chapter 27 Jump to: Chapter 29 →