Job 34

Mien Bible (Thai Script) © Thailand Bible Society, 2007

← Chapter 33 Jump to: Chapter 35 →

1เอลีฮู แอ๋ง ก๊อง,

2“เม่ย บัว ธง-เม่ง เญย เมี่ยน อ้า! หมวัง เยีย เญย หว่า ม่าะ! เม่ย บัว ม่าย ว่วน ฒาง เญย เมี่ยน, โท้ แปง มน่อม หมวัง เยีย,

3เหว่ย หฒุ มน่อม เสย หว่า ฮนั้ง เบียด เสย หญั่น ฮบ เญย เหมวย.

4บัว อ๋อย หฒุ กิ๊น หาย หญู่ง เซ หอบ เญย, บัว กั้น อ๋อย หฒุ ตี่ง หาย หญู่ง เซ หลง เญย.

5“โย้บ ก๊อง, ‘เยีย ไม้ โหฒว ต่อง, มป่า ทิน-ฮู่ง ไม้ ปุน เยีย ตุ๊ แป้ง ฟิม เญย เล์ย.

6ไม้ กุ๊น เยีย โหฒว ตุ๊ หอบ, เยีย หฒุ ฝุน เป๋น ก๊อง-แปะ เญย เมี่ยน. ไม้ กุ๊น เยีย ไม้ ม่าย ฒุ์ย, เยีย หฒุ มุน, หฒ่อ ไม้ ไฮ่ หลง.’

7ม่าย หาย ล่าน เมี่ยน ฮนั้ง โย้บ เตี๊ย ตุ๊ เมี่ยน ฮว้วด ด่ง ฮบ ววม เห่.

8นิ่น เหธา เอ๊าะ เมี่ยน โหฒว ต่อย, หย่า เหธา เมี่ยน หว่าย เมี่ยน จวั่ง เจ๊า ยั่ง.

9เหว่ย หฒุ นิ่น ก๊อง, ‘เมี่ยน อะเฮน้ย กัน ทิน-ฮู่ง ไฮ่ เถง นิ่น ตุ๊ หาย หญู่ง หลง?’

10“เหว่ย น้าย เม่ย บัว เมี่ยน ไกว เมี่ยน อ้า! หมวัง เยีย ม่าะ! ทิน-ฮู่ง หฒะเก้ง! ไม้ ไฮ่ โหฒว เอ๊าะ สี่. เน่น เจี๋ย วั้ว เต้า ฒู้ง ไม้ ไฮ่ โหฒว ต่อง.

11นิ่น หฒิว เมี่ยน โหฒว เญย วิ่น ปุน นิ่น บัว, ปุน เมี่ยน ตุ๊ ผุย นิ่น บัว โหฒว เญย เจ๊า.

12เฒียน เญย, ทิน-ฮู่ง ฒู้ง ไม้ โหฒว หว่าย สี่. เน่น เจี๋ย วั้ว เต้า ไม้ อ๋าว แป้ง ฟิม เญย เจ๊า เพียน.

13หาย เต้า ออน ทิน-ฮู่ง กุ๊น เดา-เป้ย? ไฟ หาย เต้า พ้าย นิ่น กุ๊น ก๋อม ลู่ง เดี๊ย?

14สี ก๊อง ทิน-ฮู่ง ตี่ง เฮญี้ยว เซียว นิ่น ปุน เมี่ยน ม่าย แหม่ง เญย เฉีย หฑวน เกวย นิ่น กั้น,

15ตะฟ่าน ม่าย แหม่ง เญย กะน้าย ฯฒฯ เลี่ยม เฒ่ย ไต่, ป้าม เมี่ยน หฒุ หฑวน เป๋น เนีย-บูง.

16“สี ก๊อง เม่ย เม่ง แปะ, หมวัง เยีย เญย หว่า ม่าะ! โท้ หมวัง เยีย ก๊อง.

17หาย เต้า ฑอง แป้ง ฟิม เญย เจ๊า หอบ หฒุ กุ๊น เญย ไฟ? เม่ย อ๋อย ตี่ง แป้ง ฟิม เญย, ม่าย ต้ม ชะ เญย ทิน-ฮู่ง ม่าย ฒุ์ย ไฟ?

18ทิน-ฮู่ง ก๊อง บั๋ว ฮู่ง เตี๋ย, ‘เม่ย เซ ไม้ ลั่ม หล่ง,’ หย่า ก๊อง บั๋ว โหฒว โฮล เญย เมี่ยน, ‘เม่ย เซ เอ๊าะ ไห่.’

19นิ่น ไม้ หมั่ง ต้ม เจียน เญย เฮมียน, หย่า ไม้ ฝุน ปุ๊ด-ฒ่อย เมี่ยน เก้า หล่ง เจี๊ยน เมี่ยน จ่ม เมี่ยน, เหว่ย หฒุ นิ่น บัว เหยียด ฒู้ง เซ ทิน-ฮู่ง เญย ปั์ว เหฒย ต้าย เญย.

20ด๊าม ม์วน เญย เฒี่ยง โห่, ดุ ตั้ง ฮนั้ง เมี่ยน ฯฒฯ ไต่. แปะ ฝีง หฒุ ดั่น ต์ง, หฒุ เหมียด เหฑ่ง หมี่ อ๊ะ. เฮ้น วั้ว เต๋ย หฒุ เฒาะ มี่ง หย่า ไม้ เฒ์ย ป้าม เมี่ยน เญย ปั์ว โหฒว.

21ทิน-ฮู่ง หมั่ง เจี๊ยน เมี่ยน เญย เจ๊า, หย่า ปวัด เมี่ยน เญย นอมๆ เหฒา-เบี่ย.

22ไม้ ม่าย ฮมัด เจี๊ยะ ไฟ มับ หฮมวัง เญย ต๋อง ปุน โหฒว เอ๊าะ เญย เมี่ยน ปี๋ง ตุ๊ เบว์ย.

23ทิน-ฮู่ง ฒู้ง ไม้ หฒุ ตี่ง เฒี่ยง โห่ ปุน เมี่ยน มี่ง เยียม นิ่น เญย หฑะเฮมียน หฒุ เซี้ยม.

24นิ่น เบ๊าะ ป่าย ม่าย ชะ เญย เมี่ยน หย่า ไม้ หฒุ ฒ่า หน่าย ด่าง. นิ่น แอ๋ง เหลียบ กั้น เต๋ย เมี่ยน ตี๊ นิ่น บัว.

25ฮนั้ง หน่าย, นิ่น ฮิ้ว ตุ๊ นิ่น บัว โหฒว เญย สี่ ฯฒฯ ลู่ง ม์วน หฒั่น ถุย นิ่น บัว เญย เหว่ย เหมียด เหฑ่ง หมี่ อ๊ะ.

26หลาย นิ่น บัว โหฒว เญย เอ๊าะ สี่ นิ่น ตอง เจี๊ยน หฒวัง เมี่ยน เบ๊าะ นิ่น บัว,

27เหว่ย หฒุ นิ่น บัว มี่ง เพียน ไม้ กัน นิ่น, หย่า ไม้ ท่าย เหยียด เต๋ย นิ่น เญย โต์-เล์ย.

28เหว่ย น้าย นิ่น บัว ปุน เมี่ยน จ่ม เมี่ยน เญย เฉีย มี่ง เถา ทิน-ฮู่ง วั้ว. หฒุ โค้ว เห่ว เญย เมี่ยน เญย เฉีย, นิ่น หย่า ไฮ์ หมี่ อ๊ะ.

29สี ก๊อง นิ่น เซ้ก เหฑียะ, หาย เต้า ไฮ่ ตี่ง นิ่น ม่าย ฒุ์ย? นิ่น ปวัง เจี๊ยน นิ่น เญย เฮมียน, หาย เต้า ไฮ่ หมั่ง ตุ๊ ปวัด นิ่น? ไม้ กุ๊น นิ่น โหฒว ปุน เหยียด กั๊วะ ไฟ เหยียด ล่าน เมี่ยน, ฒู้ง ฟี่ ฮนั้ง เญย,

30เหว่ย ปุน ไม้ กัน ทิน-ฮู่ง เญย เมี่ยน ไม้ ตุ๊ กุ๊น, หย่า ไม้ ตุ๊ แฒง โขว ฮลบ แปะ ฝีง.

31“สี ก๊อง ม่าย เต้า เมี่ยน ก๊อง บั๋ว ทิน-ฮู่ง ‘เยีย หฒุ เบ๊าะ หฌาว ลิ์ว, เยียม น้าย มี่ง เยีย ไม้ โหฒว ต่อง.

32เยีย หมั่ง ไม้ ปวัด เญย โท้ เม่ย หฌาว เยีย. สี ก๊อง เยีย โหฒว ฒุ์ย, เยียม น้าย มี่ง เยีย ไม้ โหฒว อ๊ะ.’

33ทิน-ฮู่ง อ๋อย หฒุ หฒิว เม่ย อ๋อย เญย วิ่น ปุน เม่ย, เหว่ย หฒุ เม่ย เฆ่ม นิ่น โหฒว เญย สี่. เม่ย กั้น อ๋อย หฒุ กิ๊น, ไม้ เฒ์ย เยีย. เหว่ย น้าย หฒิว เม่ย ฮิ้ว เญย กุ๊น ก๊อง อ๊ะ.

34“ธง-เม่ง เมี่ยน อ๋อย ก๊อง บั๋ว เยีย, หมวัง เยีย วั้ว เต๋ย เมี่ยน ไกว เมี่ยน อ๋อย ก๊อง,

35“โย้บ ก๊อง หว่า หย่า ไม้ ฮิ้ว หาย หญู่ง, นิ่น เญย หว่า ไม้ ม่าย กอน-แป๋ง.

36เฝย ตุ๊ ปุน โย้บ หฒุ เสย เถา เดี๊ย. เหว่ย หฒุ นิ่น เตา เญย หว่า ฮนั้ง เอ๊าะ เมี่ยน นอ.

37นิ่น แหง่ง ทิน-ฮู่ง แอ๋ง จา นิ่น เญย ฒุ์ย, นิ่น เยียม เยีย บัว บุด๋ง ไบ๋ ปั์ว ก๊อง หว่า ธั้ม เญย ฮว้วด ทิน-ฮู่ง.”

← Chapter 33 Jump to: Chapter 35 →