Job 37

Mien Bible (Thai Script) © Thailand Bible Society, 2007

← Chapter 36 Jump to: Chapter 38 →

1“น้าย เต๋ย สี่ ปุน เยีย เญย บะฑิว ต์ง บกๆ เญย, ดั่น หฒุ เยีย เญย ว่วน ได๋, ต๊าม มับ เหฑ่ง.

2หมวัง ม่าะ! หมวัง ทิน-ฮู่ง เญย เฉีย บุย ฮนั้ง บะอง นอ, หมวัง เยียม นิ่น เญย ฑุ่ย ธ้วด ฌุ่นๆ เญย เฉีย.

3นิ่น ปู๋ง บะหลี่ง ธ้วด ปวั๊ง ลู่ง เดี๊ย, นิ่น เญย บะหลี่ง มี่ง จ่ม ลู่ง กอน.

4ฆะฮ้า ม่าย นิ่น เญย เฉีย ฌุ่น เจี๊ยน ต้าย, นิ่น ม่าย ฮ่าง ต้าว เญย เฉีย ฮนั้ง บะอง นอ บุย, นิ่น เญย เฉีย บุย วั้ว หฒั่น, นิ่น ไม้ ตั๊ง เจี๊ยน บะหลี่ง.

5ทิน-ฮู่ง เญย เฉีย บุย ธ้วด ไฮ์ บัวะ ฮ่อง ไห่. นิ่น โหฒว โฮล ไห่ เญย สี่, เยีย บัว ฒู้ง ไม้ ไฮ่ เปียะ เฮญี้ยว.

6เหว่ย หฒุ นิ่น บั๋ว ซอง, ‘ตุ้ย เหฌี่ย เดา-เป้ย ม่าะ!’ หย่า บั๋ว บยู่ง เหธา บยู่ง-หฑยาว, ‘อ๋อย หฒุ เฮ้น อ๊ะ.’

7นิ่น ปุน เต้าๆ เมี่ยน เญย ปั์ว ตี้ง เหฌี่ย, เหว่ย ปุน เหฒย ต้าย เญย หม่าน เมี่ยน ฮิ้ว ตุ๊ นิ่น เญย กง.

8เฮยี่ย ฒ่อย เปียะ นิ่น บัว เญย ฒุ่น, หย่า เยียม นิ่น บัว เญย ค้วด กะญั์ว.

9หฑยาว-เจี๊ยะ เยียม น่าม ปูง ธ้วด ต้าย, จวั๊ง เญย เฉีย เยียม ป๊ะ ปูง เญย หฑยาว ธ้วด.

10ทิน-ฮู่ง เญย เฉีย ปุน ววม กิ๊ด ซอง, ววม-ทาน หย่า กิ๊ด แหง่ง เหฑ่ง.

11นิ่น ปุน บ๋วน-โฮ์ ม่าย ววม ปวั๊ง เหฑ่ง, ปุน บะหลี่ง เยียม บ๋วน ฟ้าด ธ้วด.

12หฒิว ทิน-ฮู่ง พ้าย, นิ่น บัว กวิ้น มี่ง กวิ้น ต้าย, โย่ว ก๋อม ลู่ง เดี๊ย โหฒว เหฒียง เอย เจี๊ยน นิ่น หัด เญย เหยียด ฒู้ง.

13นิ่น ปุน น้าย เต๋ย เจ๊า ธ้วด ต้าย เหว่ย ตี่ง ฒุ์ย ไฟ เหว่ย ยู์ง เดา-เป้ย, ไฟ เหว่ย หฒุ นิ่น เหฒียบ ฒัวะ เญย ฮนั้ม เมี่ยน.

14“โย้บ อ้า! ตี้ง เจี๊ยน หลงๆ เญย หมวัง เถา ทิน-ฮู่ง โหฒว บัวะ ฮ่อง เญย สี่.

15เม่ย ฮิ้ว เญย ไฟ? ทิน-ฮู่ง ฮนั้ง หาย นอ หัด น้าย เต๋ย กะน้าย, ปุน บะหลี่ง เยียม บ๋วน กะญั์ว หฒิว ธ้วด?

16เม่ย ฮิ้ว ตุ๊ บ๋วน ฮนั้ง หาย นอ เบี้ยว เจี๊ยน ด๊าม-ลู่ง เญย ไฟ? เซ ม่าย ตุ้น ยุ่น เญย ว่วน ฒาง วั้ว เต้า โหฒว เญย บัวะ ฮ่อง สี่.

17น่าม ปูง เญย หฑยาว ปุน เดา จอม หฒ่งๆ เญย, เม่ย ยัวะ, ลุย-โหว ฮนั้ง โต์ว นอ จอม.

18เม่ย ไฮ่ ฮนั้ง ทิน-ฮู่ง ธอง ลู่ง, หย่า ปุน ลู่ง แหง่ง ฮนั้ง ฑ้าด ต้าย เญย ต้ง ซิ กี๋ง ไฟ?

19“โท้ หฌาว เยีย บัว, เยีย บัว อ๋อย หฒุ ฮนั้ง หาย นอ เหธา ทิน-ฮู่ง ก๊อง. เยีย บัว เฮญี้ยว หฮงง, ฮนั้ม ไม้ ธ้วด หว่า ก๊อง.

20อ๋อย หฒุ บั๋ว นิ่น, เยีย อ๋อย เหธา นิ่น ก๊อง หว่า ไฟ? ม่าย หาย ล่าน เมี่ยน กั้น อ๋อย โท้ หฒุ เหมียด?

21อี้ หฒั่น หฑยาว ป่วน บ๋วน มี่ง, ลู่ง ฯฒฯ ฑัง, ฌัง แอ๊ง เจี๊ยน, ป้าม เมี่ยน ฯฒฯ ไม้ ไฮ่ หมั่ง ลู่ง เญย ฌัง.

22เยียม ป๊ะ ปูง ม่าย ฌัง-หล่าง ธ้วด ฮนั้ง เจียม นอ, ทิน-ฮู่ง ต้าย หย่า ม่าย กั้ม เหฑีย เญย ฮ่าง ต้าว.

23“เยีย บัว ไม้ ไฮ่ มี่ง นิด ฟัด เน่น เจี๋ย วั้ว เต้า. นิ่น ม่าย ต้ม ชะ, ม่าย แป้ง ฟิม, นิ่น โหฒว ตุ๊ หอบ ไห่, หย่า ไม้ เหฒย เมี่ยน.

24เหว่ย น้าย เมี่ยน ท่าย นิ่น. ตะฟ่าน เธง กั้น ม่าย ธง-เม่ง เญย เมี่ยน นิ่น ไม้ ท่าย อ๊ะ.”

← Chapter 36 Jump to: Chapter 38 →