Matthew 10

Mien Bible (Thai Script) © Thailand Bible Society, 2007

1เยซู เห่ว นิ่น เญย เหฒียบ เหญ่ย เต้า ไซ-ก๋อ ต้าย ฒุ้น, จิว หัด ม์า ปุน นิ่น บัว ไฮ่ หฒุ่น เฮยี่ย ไกว๊ เมี้ยน ธ้วด หย่า ไฮ่ หฒ่อ หญู่งๆ แป่ง หลง.

2น้าย เต๋ย เหฒียบ เหญ่ย เต้า กง-โฒ่ เญย บั๋ว เซ ม่าย ฮนั้ง น้าย. ตะเยี้ยด เต้า เห่ว ซีโมน, แอ๋ง ม่าย นอม บั๋ว เห่ว ปีเต. แอ๋ง ม่าย นิ่น เญย โย์ว, อันดาลู. ม่าย เสเบดี เญย ตอน, ยากอบ, เหธา ยากอบ เญย โย์ว, โยฮัน.

3ม่าย ฟีลิบ เหธา บาโทโลมิว, ม่าย โทมัด เหธา เซียว โฑว วั้ว เต้า มัดทาย, ม่าย อันเฟอัด เญย ตอน, ยากอบ, เหธา ทัดเดอัด.

4ม่าย ฮนั้ม กั๊วะ หฒั่ง วั้ว เต้า ซีโมน. หย่า ม่าย หม่าย เยซู วั้ว เต้า ยูดาด อิสะคาลิโอด.

5เยซู พ้าย น้าย เต๋ย เหฒียบ เหญ่ย เต้า กง-โฒ่ ธ้วด มี่ง วั้ว หฒั่น, นิ่น หย่า หฌาว เหฒียง. นิ่น ก๊อง, “ไม้ ตู๋ง มี่ง หาย ฝีง จั๋น เญย เต่ย-ปูง. หย่า ไม้ ตู๋ง เปียะ สะมาเลีย เต่ย-ปูง เญย หาย นอม มู้ง.

6ขูง อ๋อย หฒุ มี่ง ล์อ อิสะลาเอน เมี่ยน. นิ่น บัว เซ ฮนั้ง ตี๋ง ล่าย เญย ปะกี ยู่ง นอ.

7เม่ย บัว เหยียด ปิ่น มี่ง เหยียด ปิ่น ฒุ่น บั๋ว เมี่ยน, ‘ทิน-ฮู่ง ต้าย โหฒว เฒี้ยว กุ๊น เมี่ยน เญย เฒี่ยง โห่ เถา ฟัด อ๊ะ.’

8อ๋อย หฒุ หฒ่อ แป่ง, เห่ว ไต่ มี่ง เญย เมี่ยน นั่ง ต้าย, หฒ่อ หลง ปุ๊ด ก้ม ฮู้ แป่ง เญย เมี่ยน, หย่า หฒุ่น เมี้ยน ธ้วด. เม่ย บัว แปะๆ ตุ๊ ต้าย เญย หย่า อ๋อย หฒุ แปะๆ ปุน.

9เม่ย บัว เญย ญ่าน บัวะ, ไม้ ตู๋ง ตั๊บ เจียม ไฟ ญ่าน ไฟ ต้ง ฒิ่น ต้อ มี่ง.

10ธ้วด เจ๊า, ไม้ หฒุ ต้อ บัวะ ตั๊บ กะน้าย, ไม้ ตู๋ง ต้อ ลุย-เหยี่ยน, ไฟ เฮ่, ไฟ ปย๊า-บย่า. กง-เมี่ยน หอบ หฒุ ตุ๊ นิ่น เฉียม หล่ง เญย กะน้าย.

11“เม่ย บัว เปียะ หาย นอม ล์าง, หาย นอม มู้ง, อ๋อย หฒุ สัม หมั่ง ก๋า, เยียม วั้ว ม่าย หาย เต้า ผุย ตุ๊ เม่ย บัว ฮิด นิ่น เญย เปย๊า. ฮิด หาย เต้า เญย เปย๊า, อ๋อย หฒุ ฮิด เถา แอ๋ง ธ้วด วั้ว นอม ต๋อง.

12เปียะ เปย๊า วั้ว หฒั่น, อ๋อย หฒุ โท้ ทิน-ฮู่ง ปุน แป้ง ออน วั้ว ป่วน เมี่ยน.

13สี ก๊อง วั้ว ป่วน เมี่ยน อะเฮน้ย ฒิบ เม่ย บัว นอ, ปุน เม่ย บัว โท้ เญย แป้ง ออน เยียม วั้ว นอม เปย๊า. สี ก๊อง นิ่น บัว ไม้ ฒิบ เม่ย บัว นอ, อ๋อย หฒุ เซียว เม่ย บัว โท้ เญย แป้ง ออน หฑวน.

14หาย นอม เปย๊า ไฟ หาย นอม มู้ง ไม้ ฒิบ เม่ย บัว ไฟ ไม้ หมวัง เม่ย บัว เญย หว่า, อ๋อย หฒุ ธ้วด วั้ว นอม ต๋อง หย่า เฝง กั๊วะ เหฒา เญย เนีย-บูง กวั่ง วั้ว.

15เยีย ก๊อง เฒียน บั๋ว เม่ย บัว, เถา เซี้ยม ฒุ์ย วั้ว ฮนอย, โสโดม ฒี่ง เหธา โกโมลา ฒี่ง อ๋อย หฒุ ตี่ง ฒุ์ย ฒู้ง เก้า เฮง วั้ว นอม มู้ง.

16“หมวัง หลง โอ่. เยีย พ้าย เม่ย บัว ธ้วด มี่ง, เซ ฮนั้ง ปู๋ง ปะกี ยู่ง เปียะ เฮยี่ย จู๊ กวั้น กะญั์ว นอ. เม่ย บัว อ๋อย หฒุ ฮนั้ง นาง นอ ไกว. หย่า ฮนั้ง แปะ ก๊บ นอ ส่วน.

17อ๋อย หฒุ ไฝ ฟิม. เมี่ยน อ๋อย เฒาะ เม่ย บัว ต้อ มี่ง กุ๊น สี่ หวุ่ย. เยียม นิ่น บัว เญย หวุ่ย ต้อง นิ่น บัว หย่า อ๋อย หล่ง ปย๊า-ปิน เบ๊าะ เม่ย บัว.

18เม่ย บัว หลาย เยีย อ๋อย หฒุ เมี่ยน ต้อ เม่ย บัว มี่ง เยียม หฒูง เหธา ฮู่ง เตี๋ย เญย หฑะเฮมียน เหว่ย คู้ เฝียน โหฒว ฒอง-เหฒง ปุน นิ่น บัว เหธา จั๋น หมวัง.

19นิ่น บัว ต้อ มี่ง ฒ่า หน่าย วั้ว หฒั่น, ไม้ ตู๋ง เฑ่า อ๋อย หฒุ ก๊อง หาย หญู่ง ไฟ อ๋อย หฒุ ฮนั้ง หาย นอ ก๊อง. เถา เฒี่ยง โห่, ต้ง เม่ย บัว อ๋อย หฒุ ก๊อง เญย หว่า, ทิน-ฮู่ง อ๋อย ปุน เม่ย บัว ก๊อง,

20เหว่ย หฒุ ไม้ เฒ์ย เม่ย บัว กั้น ฮนั้ม ธ้วด หว่า ก๊อง. เม่ย บัว เญย หฒั่ง เตี๋ย เญย สีง ลี่ง กั้น หล่ง เม่ย บัว ก๊อง.

21“มั์ว-ตอน ต่อย, ล่าน อ๋อย เฒาะ ล่าน จิว ปุน เมี่ยน ไต๋. เตีย หย่า อ๋อย เฒาะ นิ่น เญย ฝุเจว๊ย จิว ปุน เมี่ยน ไต๋. ฝุเจว๊ย เหธา เตี๋ย หม่า หย่า อ๋อย เป๋น วิน, ฯฒฯ จิว ปุน เมี่ยน ไต๋.

22เหว่ย เยีย, หฒวัง เมี่ยน อ๋อย ฑอง เม่ย บัว, มป่า หาย เต้า เตี๊ย ตุ๊ เถา ต้าว ฯฒฯ ตุ๊ เหฌียว อ๊ะ.

23เม่ย บัว เยียม เหยียด นอม มู้ง หฒุ เมี่ยน โหฒว โตะ, อ๋อย หฒุ เปย๋า มี่ง กั้น นอม มู้ง. เยีย ก๊อง เฒียน บั๋ว เม่ย บัว, เม่ย บัว มี่ง อิสะลาเอน เต่ย-ปูง เญย นอมๆ ล์าง โหฒว เม่ย บัว เญย กง ไม้ แก้ง เหฒียง, เยีย, ป้าม เมี่ยน เญย ตอน, ฯฒฯ เถา อ๊ะ.

24“เหาะ แซง ไม้ เก้า โฮล นิ่น เญย ฟิน-แซง. โน่ว ไม้ เก้า โฮล นิ่น เญย เฒี้ยว.

25สี ก๊อง เหาะ แซง ไฮ่ ตุ๊ ฮนั้ง นิ่น เญย ฟิน-แซง, โน่ว ไฮ่ ตุ๊ ฮนั้ง นิ่น เญย เฒี้ยว, อ๋อย หฒุ ปวั๊ง เฮญี้ยว อ๊ะ. สี ก๊อง เปย๊า-เฒี้ยว หฒุ เมี่ยน เห่ว โหฒว เบเอนเซบูน เมี้ยน, เปย๊า ฒง เมี่ยน เหยียด เฒย อ๋อย หฒุ เมี่ยน เห่ว เก้า หว่าย เจี๋ย เญย บั๋ว.

26“ฮนั้ง หน่าย, ไม้ ตู๋ง กั้ม เหฑีย เมี่ยน. ไม้ ม่าย หาย หญู่ง เกม เจี๊ยน ไม้ หฒุ ธ้วด ย่าง. ไม้ ม่าย หาย หญู่ง ปี๋ง เจี๊ยน, เมี่ยน ไม้ ไฮ่ ฮิ้ว.

27เยีย เยียม หฮมวัง ฒง ปี๋ง เจี๊ยน บั๋ว เม่ย บัว เญย สี่, เม่ย บัว อ๋อย หฒุ เยียม ฌัง ฒง ก๊อง ธ้วด ต้าย. เม่ย บัว เยียม มน่อม กอน ไฮ์ เญย หว่า-ซับ, อ๋อย หฒุ เยียม วั้ว เปย๊า-ง่อ ฒุ่น บั๋ว เมี่ยน.

28ไม้ ตู๋ง กั้ม เหฑีย เมี่ยน. นิ่น บัว ไฮ่ ไต๋ ซิน มป่า ไม้ ไฮ่ ไต๋ ลี่ง ว่วน. ต๋าว หฑวน อ๋อย หฒุ กั้ม เหฑีย ทิน-ฮู่ง. ทิน-ฮู่ง ไฮ่ ปุน เลี่ยม ซิน เลี่ยม ลี่ง ว่วน ด๊อด เต่ย หญัวะ หฒุ เหมียด.

29อี นอม เหนาะ เหมย หม่าย ตุ๊ เหยียด นอม ต้ง ฒิ่น ฮนั้ง. มป่า ธ้วด ลิ์ว เม่ย บัว เญย หฒั่ง เตี๋ย เญย เอ๋ย, เหยียด นอม เหนาะ เหมย ไม้ ด๊อด เหฌี่ย เดา.

30เลี่ยม เม่ย บัว เญย บะเปยย ฒู้ง ซ้าว เหฑ่ง หมี่ อ๊ะ.

31ฮนั้ง หน่าย ไม้ ตู๋ง กั้ม เหฑีย. เม่ย บัว ฒู้ง เก้า จ๋าย เจี๋ย เหนาะ เหมย ธั้ม.

32“หาย เต้า ตอง หฒวัง เหญี่ยม เยีย, เยีย เยียม เยีย เญย ทิน-ต้อง เตี๋ย เญย หฑะเฮมียน หย่า อ๋อย เหญี่ยม วั้ว เต้า.

33มป่า หาย เต้า ตอง หฒวัง ไม้ เหญี่ยม เยีย, เยีย เยียม เยีย เญย ทิน-ต้อง เตี๋ย เญย หฑะเฮมียน หย่า ไม้ เหญี่ยม วั้ว เต้า.

34“ไม้ ตู๋ง ฮนั้ม เยีย ต้าย เหว่ย ปุน ป้าม เกน ถาย-แป้ง. เยีย ไม้ เฒ์ย ต้าย เหว่ย ปุน ป้าม เกน ถาย-แป้ง, เยีย ต้อ หฑุ ด๊าว ต้าย.

35เยีย ต้าย เหว่ย ปุน “‘ตอน เหธา เตีย ไม้ หอบ, เซียะ เหธา มา ไม้ หอบ, บวั์ง เหธา มา-ปั่ว ไม้ หอบ.

36เปย๊า ฒง เมี่ยน ฯฒฯ เป๋น กั้น เญย วิน-วั้ง อ๊ะ.’

37“หาย เต้า ฮนั้ม เตี๋ย หม่า เก้า ธั้ม นิ่น ฮนั้ม เยีย, เซ ไม้ ผุย กัน เยีย โหฒว ไซ-ก๋อ. หาย เต้า ฮนั้ม นิ่น เญย น่าม โญ์ว เก้า ธั้ม นิ่น ฮนั้ม เยีย, วั้ว เต้า หย่า ไม้ ผุย โหฒว เยีย เญย ไซ-ก๋อ.

38หาย เต้า ไม้ ดาม เจี๊ยน นิ่น กั้น เญย เหฒียบ หฑั่ง จ๋า กัน เจี๊ยน เยีย มี่ง, วั้ว เต้า ไม้ ผุย โหฒว เยีย เญย ไซ-ก๋อ.

39หาย เต้า ขูง อ๋อย โก๋ว นิ่น กั้น เญย แหม่ง, วั้ว เต้า ฯฒฯ หฒุ กวั่ง นิ่น เญย แหม่ง. มป่า หาย เต้า เหว่ย เยีย กวั่ง นิ่น เญย แหม่ง, วั้ว เต้า ฯฒฯ ตุ๊ แหม่ง เฒี่ยง อ๊ะ.

40“หาย เต้า ฒิบ เม่ย บัว, นิ่น หย่า ฒิบ เยีย. หาย เต้า ฒิบ เยีย, นิ่น หย่า ฒิบ พ้าย เยีย ต้าย วั้ว เต้า.

41หาย เต้า ฒิบ เต้า โต่ว หว่า เมี่ยน เหว่ย หฒุ นิ่น โหฒว โต่ว หว่า เมี่ยน, วั้ว เต้า ฯฒฯ ตุ๊ ฒิบ ฒี่ง เหญ่ย ฮนั้ง โต่ว หว่า เมี่ยน ฒิบ เญย ฒี่ง เหญ่ย นอ. หาย เต้า ฒิบ คู้ เมี่ยน เหว่ย หฒุ นิ่น โหฒว คู้ เมี่ยน, วั้ว เต้า ฯฒฯ ตุ๊ ฒิบ ฒี่ง เหญ่ย ฮนั้ง คู้ เมี่ยน ฒิบ นอ.

42เยีย ก๊อง เฒียน บั๋ว เม่ย บัว, หาย เต้า ปุน เคาะ ววม-หนัม เหยียด เต้า น้าย เต๋ย ไฝ เจี๋ย เญย ไซ-ก๋อ ฮบ เหว่ย หฒุ นิ่น โหฒว เยีย เญย ไซ-ก๋อ, วั้ว เต้า เญย ฒี่ง เหญ่ย หฒะเก้ง ไม้ ไฮ่ ด๊อด.”

← Chapter 9 Jump to: Chapter 11 →