Matthew 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1วั้ว หฒั่น, ม่าย เต๋ย ฟาลิสี เมี่ยน เหธา หฌาว เล์ย เญย ฟิน-แซง เยียม เยลูซาเลม ฒี่ง ต้าย ล์อ เยซู ฯฒฯ หน่าย,

2“เม่ย เญย ไซ-ก๋อ บัว เหว่ย หาย ติ่ว ไม้ กัน บัว เญย อง-ถาย เญย เอย-โต้ว? นิ่น บัว ไม้ เอย เจี๊ยน เล์ย หฑาว ปั์ว ด่าง หธีง ต้าย หญั่น หฮนาง.”

3เยซู เตา, “เม่ย บัว เหว่ย หาย ติ่ว ป์าม ทิน-ฮู่ง เญย เล์ย-หลัด, เหว่ย กัน เม่ย บัว กั้น เญย เอย-โต้ว ฮนั้ง?

4ทิน-ฮู่ง ก๊อง, ‘อ๋อย หฒุ ถง หนิ่ม เม่ย บัว เญย เตี๋ย หม่า.’ หย่า ก๊อง, ‘หาย เต้า เหฒียว นิ่น เญย เตีย ไฟ มา, อ๋อย หฒุ ไต๋ วั้ว เต้า กวั่ง.’

5มป่า เม่ย บัว ก๊อง, ‘สี ก๊อง หาย เต้า เมี่ยน ก๊อง บั๋ว นิ่น เญย เตีย ไฟ นิ่น เญย มา, “เยีย ม่าย ไฮ่ เถง ตุ๊ เม่ย บัว เญย หาย หญู่ง กะน้าย เยีย ฝูง ปุน ทิน-ฮู่ง หมี่ อ๊ะ,”

6นิ่น ฯฒฯ ไม้ หฒุ ถง หนิ่ม นิ่น เญย เตี๋ย หม่า. เม่ย บัว ฮนั้ง หน่าย กัน เม่ย บัว เญย เอย-โต้ว โหฒว เซ โหฒว ปุน ทิน-ฮู่ง เญย หว่า ไม้ ลั่ม หล่ง.

7เป้ย หฒะ เฮญี้ยว ฌ้วด เญย เมี่ยน อ้า! อิสะยา โต่ว ทิน-ฮู่ง เญย หว่า วั้ว หฒั่น นิ่น ก๊อง ตุ๊ เม่ย บัว เฒียน ไห่ อ๊ะ. นิ่น ก๊อง,

8‘น้าย เต๋ย เมี่ยน หล่ง ฑุ่ย ท่าย เยีย, มป่า นิ่น บัว เญย เฮญี้ยว เล่ย ตุ๊ เยีย โก ไห่.

9นิ่น บัว หฒั่ง เยีย เซ ไม้ ลั่ม หล่ง. นิ่น บัว เฒาะ เมี่ยน กั้น เหลียบ ต้าย เญย เล์ย ต๋อง เยีย เญย เล์ย หฌาว.’”

10เยซู เห่ว หฒวัง เมี่ยน ต้าย ฒุ้น ฯฒฯ บั๋ว นิ่น บัว, “เม่ย บัว หมวัง หลง, หย่า อ๋อย หฒุ เปียะ เฮญี้ยว.

11หญั่น เปียะ ฑุ่ย เญย กะน้าย ไม้ ไฮ่ ปุน เมี่ยน ม่าย หวุย. เซ ต้ง เยียม ฑุ่ย ธ้วด เญย ปุน เมี่ยน ม่าย หวุย ฮนั้ง.”

12ไซ-ก๋อ บัว ฯฒฯ ต้าย บั๋ว เยซู, “ไซ-เตี๋ย ฮิ้ว เญย ไฟ? ไซ-เตี๋ย ก๊อง วั้ว โจ๋ว หว่า ฟาลิสี เมี่ยน บัวะ ไม้ ตุ๊.”

13เยซู เตา, “โม์ว หญู่ง กะน้าย ไม้ เฒ์ย เยีย เญย ทิน-ต้อง เตี๋ย หฒวัง เญย นอ, ฒู้ง อ๋อย หฒุ แปง ธ้วด เหฑ่ง.

14เซว่ย ปิ่น นิ่น บัว อ๊ะ. นิ่น บัว โหฒว ต้อ เจ๊า เญย เมี่ยน มป่า มฒีง แม่ง เญย. สี ก๊อง มฒีง แม่ง เญย เมี่ยน เคน มฒีง แม่ง เญย เมี่ยน, อี เต้า ฒู้ง หฒุ ด๊อด ค้วด อ๊ะ.”

15ปีเต ก๊อง, “โท้ ไซ-เตี๋ย พ้อ เม่ง น้าย ติ้ว หว่า-เป๊ย ปุน เยีย บัว ฮิ้ว โอ่.”

16เยซู ก๊อง, “เม่ย บัว เถา อี้ หฒั่น หธ่อ ฮนั้ง วั้ว เต๋ย เมี่ยน นอ ไม้ เม่ง แปะ?

17เม่ย บัว ไม้ ฮิ้ว ตุ๊ ไฟ? เมี่ยน หญั่น หาย หญู่ง เปียะ ฑุ่ย ฯฒฯ เหฌี่ย กะเซีย. ฆะฮ้า ฯฒฯ ปู๋ง ธ้วด หมี่ อ๊ะ.

18มป่า เยียม ฑุ่ย ธ้วด เญย, เซ เยียม เฮญี้ยว ฮนั้ม ธ้วด ต้าย. ต้ง น้าย หญู่ง อ๊ะ, ปุน เมี่ยน ม่าย หวุย.

19เหว่ย หฒุ เยียม เมี่ยน เญย เฮญี้ยว ไฮ่ ฮนั้ม ธ้วด หว่าย เญย สี่, ไต๋ เมี่ยน, เหฮยียน เอ๊า เหฮยียน โหฆ, เหฮยียน เซียะ เหฮยียน ตอน, โหฒว หฒะ, โหฒว จ๊า ฒอง-เหฒง, ก๊อง โตะ เมี่ยน.

20ต้ง น้าย เต๋ย สี่ ปุน เมี่ยน ม่าย หวุย. ไม้ เฒ์ย หลาย หญั่น หฮนาง ไม้ หฑาว ปั์ว ด่าง เมี่ยน หธีง ต้าย ม่าย หวุย.”

21เยซู ธ้วด วั้ว นอม ต๋อง แอ๋ง มี่ง ไทละ เหธา ไซดอน ฒี่ง เญย เต่ย.

22เยียม วั้ว ม่าย เต้า คานาอัน มเซียะ ตอน ต้าย เห่ว เจี๊ยน ก๊อง, “ต้ม ก๋อ อ้า! ดาวิด เญย เฒ้ย-ฟุน อ้า! ค้อ-เลี่ยน เยีย ม่าะ! เยีย เญย เซียะ หฒุ เมี้ยน มัวะ โค้ว ไห่.”

23มป่า เยซู ไม้ เตา เหยียด โจ๋ว นิ่น. ไซ-ก๋อ บัว ฯฒฯ ต้าย โท้ เยซู, “หฒุ่น นิ่น เปย๋า ฆอย ม่าะ! นิ่น เห่ว เจี๊ยน กัน เจี๊ยน บัว ต้าย.”

24เยซู เตา, “ทิน-ฮู่ง พ้าย เยีย ต้าย ล์อ อิสะลาเอน เมี่ยน ฮนั้ง. นิ่น บัว เซ ฮนั้ง ตี๋ง ล่าย เญย ปะกี ยู่ง นอ.”

25น้าย เต้า มเซียะ ตอน ฯฒฯ เกว่ย เหฌี่ย เยซู เญย หฑะเฮมียน หย่า ก๊อง, “ต้ม ก๋อ อ้า! โท้ เถง เยีย ม่าะ!”

26เยซู เตา, “เฒาะ ฝุเจว๊ย เญย หฮนาง ฒอย ปุน จู๊ หญั่น เซ ไม้ หอบ.”

27วั้ว เต้า จั๋น- มวั์ง เตา, “ต้ม ก๋อ อ่า, เฒ์ย เญย. มป่า เลี่ยม จู๊ มต้าย เยียม นิ่น บัว เญย เฒี้ยว เญย เตี้ย เดี๊ย เฑ์า หฮนาง-เฮม้ย- ด๊อด หญั่น.”

28เยซู ฯฒฯ เตา นิ่น, “เม่ย น้าย เต้า ต่อ หฒะเก้ง เสียน ตุ๊ หลง ไห่. เอย เม่ย อ๋อย หล่ง เญย, เม่ย ฯฒฯ ตุ๊ อ๊ะ.” วั้ว เต้า จั๋น- มวั์ง เญย เซียะ ต๋อย วั้ว นอม เฒี่ยง โห่ ฯฒฯ หลง หมี่ อ๊ะ.

29เยซู ธ้วด วั้ว นอม ต๋อง, มี่ง เถา กาลิลี ค้อย-ตอน เฮลน แอ๋ง ฝาว บง-ไอ๊ เฒว์ย เจี๊ยน.

30ม่าย เมี่ยน ธั้ม เญย ต้าย ล์อ นิ่น หย่า ต้อ เจี๊ยน เหฒา ไบ เญย, มฒีง แม่ง เญย, ปั์ว-เหฒา หว่าย เญย, กะน้าย-หฮงง ไม้ ไฮ่ ก๊อง หว่า เญย, แอ๋ง เหธา ปุ๊ด-แป่ง เมี่ยน ธั้ม เญย ต้าย เถา เยซู วั้ว, อัน เจี๊ยน เยซู เญย เหฒา-เฮลน. เยซู หย่า หฒ่อ หลง เหฑ่ง.

31หฒวัง เมี่ยน บัวะ ฮ่อง ไห่, ปวัด กะน้าย-หฮงง ไฮ่ ก๊อง หว่า. ปั์ว-เหฒา หว่าย เญย เมี่ยน หย่า หลง หมี่ อ๊ะ. เหฒา ไบ เญย เมี่ยน ไฮ่ ยั่ง เจ๊า อ๊ะ. มฒีง แม่ง เญย ไฮ่ หมั่ง ตุ๊ ปวัด. หฒวัง เมี่ยน ฯฒฯ เธง อิสะลาเอน เมี่ยน เญย ทิน-ฮู่ง.

32เยซู เห่ว นิ่น เญย ไซ-ก๋อ บัว ต้าย นิ่น วั้ว หย่า บั๋ว นิ่น บัว, “เยีย ไฮ์ ค้อ-เลี่ยน ไห่ น้าย เต๋ย เมี่ยน. นิ่น บัว ต้าย เหธา เยีย เยียม ตุ๊ ปัว ฮนอย อ๊ะ. อี้ หฒั่น หย่า ไม้ ม่าย หาย หญู่ง หญั่น. เยีย ไม้ อ๋อย ปุน นิ่น บัว เฮญี้ยว เซีย เจี๊ยน หฑวน. เฑ่า เหย เถา ด๊าม-เจ๊า เมา ไห่, ไฮ่ คีง มเปย.”

33ไซ-ก๋อ บัว ก๊อง, “เยียม น้าย เต่ย-ปูง-ฮวาง เยีย บัว ฮนั้ง หาย นอ ไฮ่ ล์อ ตุ๊ กะน้าย เก๋า หวุย ด่ง หน่าย ธั้ม เญย เมี่ยน เป๊ว?”

34เยซู หน่าย นิ่น บัว, “เม่ย บัว ม่าย บัวะ เหฒีย นอม ฌั้ว?” นิ่น บัว เตา, “ม่าย เสี่ย นอม ฌั้ว เหธา อี เหฒีย เต้า เบย์า-ตอน ฮนั้ง.”

35เยซู ฯฒฯ เห่ว หฒวัง เมี่ยน เฒว์ย เจี๊ยน วั้ว เดา.

36นิ่น เฒาะ วั้ว เต๋ย เสี่ย นอม ฌั้ว เหธา วั้ว เต๋ย เบย์า ต้าย แล์ง ฒี่ง ทิน-ฮู่ง. แล์ง ฒี่ง ลิ์ว ฯฒฯ แมะ ฆอย ปุน นิ่น เญย ไซ-ก๋อ. ไซ-ก๋อ บัว แอ๋ง ต้อ มี่ง ปุน หฒวัง เมี่ยน หญั่น.

37หฒวัง เมี่ยน หญั่น เป๊ว เหฑ่ง. หญั่น ลิ์ว, ไซ-ก๋อ บัว มี่ง เซียว เหฒ่ง วั้ว เต๋ย ตั๊บ ปวั๊ง เสี่ย นอม ดาน.

38หญั่น เญย เมี่ยน, ตาน มจั่ง ตอน ฮนั้ง, ม่าย เปยย ธิน ล่าน. มเซียะ ตอน เหธา ฝุเจว๊ย ไม้ ฝุน.

39เยซู เห่ว หฒวัง เมี่ยน หฑวน เหฑ่ง. นิ่น ฯฒฯ เปียะ ฑั้ง มี่ง มากาดาน เต่ย-ปูง.

← Chapter 14 Jump to: Chapter 16 →