Matthew 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1วั้ว หฒั่น กุ๊น กาลิลี แซ้ง วั้ว เต้า เฮโล้ด ฮู่ง หมวัง ไฮ์ เยซู เญย เจ๊า-โหล่ว

2ฯฒฯ บั๋ว นิ่น เญย ซิน-เฮลน เมี่ยน, “น้าย เต้า ด่ง หาย ฒู้ง ต้ง เถง เมี่ยน เจี๋ย ววม เญย เล์ย วั้ว เต้า โยฮัน แอ๋ง นั่ง ต้าย อ๊ะ, นิ่น หธีง ต้าย ม่าย น้าย หญู่ง ชะ โหฒว บัวะ ฮ่อง เญย สี่.”

3ฒิ่น ด่าง เฮโล้ด, หลาย นิ่น เญย โย์ว ฟีลิบ เญย เอ๊า, เฮโลเดียด, เฒาะ โยฮัน โด้ เจี๊ยน ต้อ มี่ง หววน โล่,

4เหว่ย หฒุ โยฮัน หฒั่นๆ ก๊อง บั๋ว เฮโล้ด, “เม่ย ไม้ ม่าย เล์ย หล่ง เฮโลเดียด โหฒว เอ๊า.”

5เฮโล้ด ฯฒฯ เจี์ย เฮญี้ยว อ๋อย ไต๋ โยฮัน มป่า นิ่น กั้ม เหฑีย แปะ ฝีง เหว่ย หฒุ ยิวไท เมี่ยน ท่าย โยฮัน โหฒว เต้า โต่ว หว่า เมี่ยน.

6โหฒว เกา, เถา เฮโล้ด เญย ซี่ เญี้ยด-ฮนอย, เฮโลเดียด เญย เซียะ เยียม หฒวัง แคะ เมี่ยน เญย หฑะเฮมียน หธัง เหย. เฮโล้ด เก้ง อะเฮน้ย ไห่

7ฯฒฯ แล์ง หว่า ปุน วั้ว เต้า เซียะ, “ไม้ กุ๊น เม่ย อ๋อย หล่ง หาย หญู่ง, เยีย แล์ง ปุน เม่ย อ๊ะ.”

8น้าย เต้า เซียะ หฒิว นิ่น เญย มา บั๋ว เญย หว่า ก๊อง, “โท้ อี้ หฒั่น เฒาะ เถง เมี่ยน เจี๋ย ววม เญย เล์ย วั้ว เต้า โยฮัน เญย มฆ้อง อัน เจี๊ยน เทาะ-เสียน ต้อ ต้าย ปุน เยีย โอ่.”

9เฮโล้ด ฮู่ง เฑ่า ไห่ มป่า หลาย นิ่น ตอง เจี๊ยน แคะ เมี่ยน แล์ง ลิ์ว แหง่ง หว่า นิ่น ฯฒฯ เหฌี่ย หลี่ง เอย วั้ว เต้า เซียะ เญย หว่า โหฒว.

10นิ่น พ้าย เมี่ยน มี่ง วั้ว โล่ ฮงะ ดุ๊ด โยฮัน เญย มฆ้อง.

11นิ่น บัว เฒาะ มฆ้อง ต้าย อัน เจี๊ยน เทาะ-เสียน โป้ว ต้าย ปุน วั้ว เต้า เซียะ. เซียะ หย่า จิว ปุน นิ่น เญย มา.

12โยฮัน เญย ไซ-ก๋อ บัว มี่ง เฒาะ เซย ต้อ มี่ง หฒัง. หฒัง ลิ์ว, นิ่น บัว ฯฒฯ มี่ง บั๋ว เยซู หมี่ อ๊ะ.

13เยซู ไฮ์ ลิ์ว น้าย เต๋ย สี่, นิ่น กั้น ฯฒฯ เปียะ ฑั้ง ธ้วด วั้ว แอ๋ง มี่ง เล่ง เญย ต๋อง. หฒวัง เมี่ยน ฮิ้ว ตุ๊ ฯฒฯ ธ้วด นิ่น บัว เญย มู้ง ยั่ง เจ๊า กัน เจี๊ยน เยซู มี่ง.

14เยซู ธ้วด ฑั้ง ฝาว เบี๋ยน มี่ง, ปวัด เมี่ยน ธั้ม ไห่. นิ่น ไฮ์ ค้อ-เลี่ยน ไห่ นิ่น บัว, ฯฒฯ หฒ่อ หลง เหฑ่ง นิ่น บัว เญย แป่ง.

15ลู่ง ม์าน-หฮมวัง, ไซ-ก๋อ บัว ต้าย บั๋ว เยซู, “ลู่ง อ๊า ลั่ม หฮมวัง อ๊ะ. น้าย หย่า เล่ง เญย ต๋อง. โท้ บั๋ว หฒวัง เมี่ยน มี่ง อ๊ะ. นิ่น บัว ฯฒฯ ไฮ่ มี่ง ม่าย ล์าง เญย ต๋อง ม์าย หญั่น.”

16เยซู เตา, “นิ่น บัว ไม้ หฒุ มี่ง เหลาะ. เม่ย บัว กั้น ล์อ ปุน นิ่น บัว หญั่น ม่าะ!”

17ไซ-ก๋อ บัว ก๊อง, “เยียม น้าย เยีย บัว ขูง ม่าย ปยา นอม ฌั้ว เหธา อี เต้า เบย์า ฮนั้ง.”

18เยซู ก๊อง, “เฒาะ ต้าย ปุน เยีย.”

19เยซู เห่ว หฒวัง เมี่ยน เฒว์ย เจี๊ยน ม่าย เมี้ย เญย ต๋อง. นิ่น แอ๋ง เฒาะ วั้ว เต๋ย ปยา นอม ฌั้ว เหธา อี เต้า เบย์า ต้าย, เธา เฮมียน หมั่ง ลู่ง, แล์ง ฒี่ง ทิน-ฮู่ง ลิ์ว ฯฒฯ แมะ ฆอย ปุน ไซ-ก๋อ. ไซ-ก๋อ บัว ต้อ มี่ง ปุน หฒวัง เมี่ยน หญั่น.

20หฒวัง เมี่ยน หญั่น เป๊ว เหฑ่ง. เหฒ่ง เหฌี่ย วั้ว เต๋ย, ไซ-ก๋อ บัว เซียว ต้าย ตุ๊ เหฒียบ เหญ่ย ดาน ปวั๊ง.

21หญั่น เญย เมี่ยน, ตาน มจั่ง ตอน ฮนั้ง, ม่าย เล่ย ไม้ โก ปยา ธิน เต้า. มเซียะ ตอน เหธา ฝุเจว๊ย ไม้ ฝุน.

22เยซู ฯฒฯ เป๊ะ ไซ-ก๋อ บัว เปียะ ฑั้ง มี่ง ด่าง, เจี๋ย วั้ว หง่าน หฒิ ค้อย-ตอน. นิ่น กั้น เยียม วั้ว เห่ว เมี่ยน ปุน หฑาน หฑวน เหฑ่ง.

23หฒวัง เมี่ยน หฑาน เหฑ่ง, เยซู กั้น ฝาว บง-ไอ๊ มี่ง เต๋า เก๋า. ลู่ง ม์าน-หฮมวัง อ๊ะ, เยซู กั้น หธ่อ เยียม วั้ว เญย.

24ต๋อย วั้ว นอม เฒี่ยง โห่ ไซ-ก๋อ บัว เญย ฑั้ง เล่ย เบี๋ยน โก ไห่ อ๊ะ. ฑั้ง หฒุ ววม-หล่าง เมี้ยด มี่ง เมี้ยด ต้าย เญย, หลาย หฑยาว ดู่ง เจี๊ยน.

25ลู่ง อ๊า ลั่ม ฌัง, ปัว นอม เถา จุ๊ นอม เฒี่ยง โห่ บุด๋ง, เยซู ยั่ง ววม-หมิ่น มี่ง ไซ-ก๋อ บัว วั้ว.

26ไซ-ก๋อ บัว ปวัด นิ่น ยั่ง ววม-หมิ่น ต้าย, นิ่น บัว ฯฒฯ กั้ม เหฑีย! ไห่. นิ่น บัว ก๊อง, “อ๊า, น้าย จั๋น-ไต่ ฌ์อย ซ่าะ!” ฯฒฯ แฮะ นิ่น บัว ไว์ๆ เญย เห่ว.

27เยซู เลี่ยม เฒ่ย ก๊อง บั๋ว นิ่น บัว, “กุ๊น ปู๋ง เฮญี้ยว ม่าะ! เซ ต้ง เยีย, ไม้ ตู๋ง กั้ม เหฑีย.”

28ปีเต ฯฒฯ ก๊อง, “เฒี้ยว อ้า! สี ก๊อง เฒ์ย เม่ย นอ, เห่ว เยีย ยั่ง ววม-หมิ่น มี่ง เม่ย หน่าย.”

29เยซู ก๊อง, “ต้าย ม่าะ!” ปีเต ฯฒฯ ธ้วด ฑั้ง ยั่ง ววม-หมิ่น หูง เจี๊ยน เยซู มี่ง.

30มป่า ปีเต ปวัด หฑยาว โฮล, แฮะ นิ่น กั้ม เหฑีย ไห่ ฯฒฯ เฒ่ม เจี๊ยน เหฌี่ย. นิ่น เห่ว, “เฒี้ยว อ้า! เฒี้ยว! เหฌียว เยีย ม่าะ!”

31เยซู เลี่ยม เฒ่ย ซูง ปั์ว นั้น เจี๊ยน นิ่น หย่า ก๊อง, “เม่ย เสียน ตุ๊ เฮย ไห่. เม่ย เญย เฮญี้ยว เหว่ย หาย ติ่ว บู้ง เบี๊ยน?”

32นิ่น บัว อี เต้า เปียะ ฑั้ง. หฑยาว เฒียง หน่าย ตี้ง หมี่ อ๊ะ.

33เยียม ฑั้ง วั้ว เต๋ย ฯฒฯ ป๋าย เยซู. นิ่น บัว ก๊อง, “เฒี้ยว อ้า! เม่ย หฒะเก้ง ทิน-ฮู่ง เญย ตอน อ๊ะ.”

34นิ่น บัว เจี๋ย วั้ว หง่าน หฒิ ค้อย-ตอน ฯฒฯ เถา เกนเนซาเล้ด เต่ย.

35เยียม วั้ว นอม ต๋อง เมี่ยน เฒียะ ตุ๊ เยซู ฯฒฯ ปุน หว่า มี่ง ก๋อม วั้ว นอม ห่อง หฒั่ง. เมี่ยน ฯฒฯ ต้อ เหยียด ฒู้ง แป่ง เมี่ยน เถา เยซู วั้ว

36โท้ เยซู ปุน แป่ง เมี่ยน ขูง ฮลัว หฒุ นิ่น เญย ลุย-จั๊วะ. หาย เต้า ฮลัว หฒุ, แป่ง ฯฒฯ หลง หมี่ อ๊ะ.

← Chapter 13 Jump to: Chapter 15 →