Matthew 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1“ไม้ ตู๋ง ตี่ง เมี่ยน เญย ฒุ์ย, ทิน-ฮู่ง ฯฒฯ ไม้ ตี่ง เม่ย บัว เญย ฒุ์ย,

2เหว่ย หฒุ เม่ย บัว ฮนั้ง หาย นอ ตี่ง เมี่ยน เญย ฒุ์ย, ทิน-ฮู่ง หย่า ฮนั้ง วั้ว นอ ตี่ง เม่ย บัว เญย ฒุ์ย อ๊ะ. เม่ย บัว หล่ง หาย หญู่ง ฮลาว ปุน เมี่ยน, ทิน-ฮู่ง หย่า หล่ง วั้ว หญู่ง ฮลาว ปุน เม่ย บัว.

3“เม่ย เหว่ย หาย ติ่ว ปวัด เม่ย เญย ก๋อ-โย์ว เญย มฒีง ม่าย หละฟับ หย่า ไม้ ฮนั้ม เถา เม่ย กั้น เญย มฒีง ม่าย หฆัน เดี๋ยง?

4กั้น เญย มฒีง ม่าย หฆัน เดี๋ยง, เม่ย ฝู่ง ไฮ่ บั๋ว เม่ย เญย ก๋อ-โย์ว, ‘ก๋อ อ่า, เยีย เถง ก๋อ ปัน ธ้วด มฒีง เญย หละฟับ โอ่.’

5เป้ย หฒะ เฮญี้ยว ฌ้วด เญย เมี่ยน อ้า! อ๋อย หฒุ เฒาะ ธ้วด กั้น เญย มฒีง วั้ว หฆัน เดี๋ยง ด่าง หธีง ต้าย ไฮ่ หมั่ง ตุ๊ เฒียน เถง ก๋อ-โย์ว ปัน ธ้วด มฒีง เญย หละฟับ.

6“ไม้ ตู๋ง เฒาะ ธีง-เหฑ่ง เญย กะน้าย ปุน จู๊. กั้ม เหฑีย จู๊ ไฮ่ ต๋าว ซิน ต้าย หงาด เม่ย บัว. หย่า ไม้ ตู๋ง เฒาะ จ๋าย เญย หละเปย๊ย-โฒว ฒอย ปุน ตู์ง. ตู์ง ขูง อ๋อย ธ้าย หว่าย ฮนั้ง.

7“อ๋อย หฒุ โท้ ฯฒฯ ตุ๊, อ๋อย หฒุ ล์อ ฯฒฯ ปวัด, อ๋อย หฒุ แง้ง แก้ง, แก้ง ฯฒฯ ฆอย.

8เหว่ย หฒุ หาย เต้า โท้ ฯฒฯ ตุ๊, หาย เต้า ล์อ ฯฒฯ ปวัด. หาย เต้า แง้ง แก้ง, แก้ง ฯฒฯ ฆอย.

9“เม่ย บัว หาย เต้า เมี่ยน, นิ่น เญย ตอน โท้ ฌั้ว, เม่ย อ๋อย ปุน หละเปย๊ย นิ่น ไฟ?

10ตอน โท้ เบย์า, เม่ย อ๋อย ปุน นาง นิ่น ไฟ?

11เม่ย บัว ด่ง หน่าย หว่าย เญย เมี่ยน ฒู้ง ฮิ้ว ตุ๊ ปุน หลง เญย กะน้าย เม่ย บัว เญย ฝุเจว๊ย, เม่ย บัว เญย ทิน-ต้อง เตี๋ย เหยียด เฒย อ๋อย ปุน หลง เญย กะน้าย โท้ นิ่น วั้ว เต๋ย เมี่ยน.

12“เม่ย บัว อ๋อย เมี่ยน ฮนั้ง หาย นอ โหฒว ปุน เม่ย บัว, เม่ย บัว หย่า อ๋อย หฒุ ฮนั้ง วั้ว นอ โหฒว ปุน เมี่ยน. โมเซ เญย เล์ย เหธา โต่ว หว่า เมี่ยน หฌาว เญย หว่า, ฑุด ฒุ้น ก๊อง เซ ต้ง น้าย อ๊ะ.

13“อ๋อย หฒุ เปียะ เหบ วั้ว เต้า แก้ง, เหว่ย หฒุ ต้อ เมี่ยน มี่ง หฒุ เหมียด วั้ว เต้า แก้ง จั๊ง เญย. เจ๊า หย่า คู่ ยั่ง เญย. ยั่ง วั้ว ติ้ว เจ๊า เญย เมี่ยน ธั้ม ไห่.

14มป่า เปียะ มี่ง ตุ๊ เหยียด ลิ์ว เญย แหม่ง วั้ว เต้า แก้ง เซ เหบ เญย. เจ๊า หย่า อะ ตุ๊ ยั่ง. ล์อ ปวัด วั้ว ติ้ว เจ๊า เญย เมี่ยน โหฒะ.

15“อ๋อย หฒุ บู้ง เจี๊ยน จ๊า โต่ว หว่า เมี่ยน. นิ่น บัว ต้าย ล์อ เม่ย บัว วั้ว หฒั่น, เป้ย หฒั่ง ฮนั้ง ปะกี ยู่ง, มป่า นิ่น บัว เญย เฮญี้ยว เธี้ยว ฮนั้ง เฮยี่ย จู๊ นอ.

16เม่ย บัว สัม หมั่ง นิ่น บัว โหฒว เญย สี่ เม่ย บัว ฯฒฯ ฮิ้ว ตุ๊ นิ่น บัว อ๊ะ. เดี๋ยง-ฌิ้ม ไม้ ไฮ่ เฒี่ยง อะหงุ่น เปี๊ยว. มู้ง ลง ฌิ้ม หย่า ไม้ ไฮ่ เฒี่ยง ง่ง หญอ เปี๊ยว.

17เดี๋ยง หลง เฒี่ยง หลง เญย เปี๊ยว. เดี๋ยง ไม้ เป๋น เฒี่ยง ไม้ เป๋น เญย เปี๊ยว.

18เดี๋ยง หลง ไม้ ไฮ่ เฒี่ยง ไม้ เป๋น เญย เปี๊ยว. ไม้ เป๋น เญย เดี๋ยง ไม้ ไฮ่ เฒี่ยง หลง เญย เปี๊ยว.

19หาย ติ้ว เดี๋ยง เฒี่ยง เปี๊ยว ไม้ เป๋น, ฒู้ง หฒุ ก๋อย กวั่ง ปั๊ว โต์ว.

20ฮนั้ง หน่าย, เม่ย บัว ปวัด นิ่น บัว โหฒว เญย สี่ เม่ย บัว ฯฒฯ เฒียะ ตุ๊ จ๊า โต่ว หว่า เมี่ยน อ๊ะ.

21“เห่ว เจี๊ยน เยีย, ‘เฒี้ยว อ้า! เฒี้ยว!’ วั้ว เต๋ย เมี่ยน, ไม้ เฒ์ย เต้าๆ ไฮ่ ตุ๊ เปียะ ทิน-ฮู่ง เญย กั๊วะ. ขูง ต้ง เอย เยีย เญย ทิน-ต้อง เตี๋ย เญย เอ๋ย โหฒว วั้ว เต๋ย ตุ๊ เปียะ ฮนั้ง.

22เถา เซี้ยม ฒุ์ย วั้ว ฮนอย เมี่ยน ธั้ม เญย อ๋อย บั๋ว เยีย, ‘เฒี้ยว อ้า! เฒี้ยว! เยีย บัว เต๊ง เม่ย เญย บั๋ว โต่ว ทิน-ฮู่ง เญย หว่า, หย่า หฒุ่น เมี้ยน ธ้วด, หย่า โหฒว เจี๋ย บัวะ ฮ่อง เญย สี่ ธั้ม.’

23วั้ว หฒั่น เยีย อ๋อย ก๊อง บั๋ว นิ่น บัว, ‘เยีย เลี่ยม ไม้ ฮิ้ว ตุ๊ เม่ย บัว นีอา. เม่ย บัว โหฒว หว่าย เญย เมี่ยน ก๊าน เปย๋า ฆอย ม่าะ!’

24“ฮนั้ง น้าย, หาย เต้า ไฮ์ ลิ์ว เยีย น้าย เต๋ย หว่า, หย่า เอย เจี๊ยน โหฒว, เซ ฮนั้ง เหยียด เต้า ธง-เม่ง เญย เมี่ยน ก๊ม เปย๊า หละเปย๊ย-แป้ง กู้ หงว่าย.

25ตุ้ย ต้ม บยู่ง, ววม โฮล กว๊าด, ป์อง ต้ม หฑยาว ป่วน เปย๊า, เปย๊า หย่า ไม้ บาง, เหว่ย หฒุ ก๊ม หละเปย๊ย-แป้ง กู้ หงว่าย.

26“มป่า หาย เต้า ไฮ์ ลิ์ว เยีย น้าย เต๋ย หว่า หย่า ไม้ เอย เจี๊ยน โหฒว, ฯฒฯ ฮนั้ง เต้า เมี่ยน หฮงง เมี่ยน นอ. น้าย เต้า ก๊ม เปย๊า เยียม ซา-เฒียว กู้ หงว่าย.

27ตุ้ย ต้ม บยู่ง, ววม โฮล กว๊าด, ป์อง ต้ม หฑยาว ป่วน เปย๊า, เปย๊า ฯฒฯ บาง. ล์ม! ล์ม เญย บาง หมี่ อ๊ะ.”

28เยซู ก๊อง ลิ์ว น้าย เต๋ย หว่า, หฒวัง เมี่ยน บัวะ ฮ่อง ไห่ นิ่น หฌาว เญย หว่า,

29เหว่ย หฒุ นิ่น หฌาว ไม้ ฮนั้ง นิ่น บัว เญย หฌาว เล์ย ฟิน-แซง. นิ่น เญย หว่า ม่าย หัด ม์า ไห่.

← Chapter 6 Jump to: Chapter 8 →