Matthew 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1เจี๋ย ลิ์ว จุ๊ ฮนอย, เยซู ต้อ เจี๊ยน ปีเต, ยากอบ เหธา ยากอบ เญย โย์ว, โยฮัน, ฝาว นอม บง-ฮลัง, เล่ง เญย ต๋อง.

2ไซ-ก๋อ บัว หมั่ง เจี๊ยน เยซู วั้ว หฒั่น, ปวัด เยซู ทิ้ว เหฑ่ง ฝัง เฒ้ย หมี่ อ๊ะ. นิ่น เญย เฮมียน ฮนั้ง บะฮนอย นอ ฌัง. นิ่น เญย ลุย-โหว หย่า ฌัง ไห่, บ๊บ แปะ เญย, แฒ่งๆ วั้ว.

3น้าย เต๋ย ปัว เต้า ไซ-ก๋อ แอ๋ง ปวัด โมเซ เหธา เอลียา หิ่น ธ้วด ต้าย เหธา เยซู ก๊อง หว่า.

4ปีเต ฯฒฯ ก๊อง บั๋ว เยซู, “เฒี้ยว อ้า! เยีย บัว เยียม น้าย เก้ง หลง ไห่. สี ก๊อง เฒี้ยว อ๋อย นอ, เยีย โหฒว ปัว นอม ลิ่ว. โหฒว นอม ปุน เม่ย, โหฒว นอม ปุน โมเซ, แอ๋ง โหฒว นอม ปุน เอลียา.”

5ปีเต หธ่อ ก๊อง เจี๊ยน หว่า วั้ว หฒั่น, ม่าย ต๊อ บ๋วน ฌัง เญย ต้าย อม เจี๊ยน นิ่น บัว. แอ๋ง ม่าย เฉีย เยียม วั้ว บ๋วน ก๊อง, “น้าย เซ เยีย เญย ตอน- ฮนั้ม. เยีย อะเฮน้ย ไห่ นิ่น. หมวัง นิ่น ม่าะ!”

6ไซ-ก๋อ บัว ไฮ์ น้าย เต๋ย เฉีย, นิ่น บัว หฒะเก้ง! กั้ม เหฑีย ไห่, ฯฒฯ บ๊าบ เหฌี่ย เดา มี่ง.

7เยซู มี่ง ฮลัว นิ่น บัว หย่า ก๊อง, “เจี์ย ซิน ต้าย, ไม้ ตู๋ง กั้ม เหฑีย.”

8นิ่น บัว ฯฒฯ เธา เฮมียน หมั่ง, ไม้ ปวัด หาย เต้า. ขูง ปวัด เยซู เยียม วั้ว ฮนั้ง.

9เยียม บง เหฌี่ย วั้ว หฒั่น, เยซู แหนะ หว่า ไซ-ก๋อ บัว. นิ่น ก๊อง, “ธิน-หม่าน ไม้ ตู๋ง ก๊อง น้าย เต๋ย หิ่น ย่าง เญย สี่. ฒั้ว เยีย, ป้าม เมี่ยน เญย ตอน, ไต่ มี่ง, ทิน-ฮู่ง แอ๋ง ปุน เยีย นั่ง ต้าย หธีง ต้าย ก๊อง.”

10ไซ-ก๋อ บัว หน่าย เยซู, “หฌาว เล์ย เญย ฟิน-แซง เหว่ย หาย ติ่ว ก๊อง เอลียา อ๋อย หฒุ ต้าย ด่าง?”

11เยซู เตา, “เอลียา หฒะเก้ง อ๋อย ต้าย หลิ่ว เล์ย เหฒียง หญู่งๆ ฮนั้ง โล์ วั้ว นอ.

12มป่า เยีย บั๋ว เม่ย บัว, เอลียา ฒู้ง ต้าย ลิ์ว อ๊ะ. เมี่ยน หย่า เฒียะ ไม้ ตุ๊ นิ่น, เซว่ย เอ๋ย โหฒว ปุน นิ่น. เยีย, ป้าม เมี่ยน เญย ตอน, หย่า ฟี่ ฮนั้ง เญย อ๋อย หฒุ เมี่ยน โหฒว โตะ ห่อย.”

13ต้ง วั้ว หฒั่น ไซ-ก๋อ บัว หธีง ต้าย เม่ง แปะ เยซู ก๊อง เญย หว่า ก๊อง หฒุ เถง เมี่ยน เจี๋ย ววม เญย เล์ย วั้ว เต้า โยฮัน.

14นิ่น บัว หฑวน เถา หฒวัง เมี่ยน วั้ว, ม่าย ล่าน เมี่ยน ต้าย ล์อ เยซู, เกว่ย เหฌี่ย เยซู เญย หฑะเฮมียน

15หย่า ก๊อง, “ต้ม ก๋อ อ่า, โท้ ค้อ-เลี่ยน เยีย เญย ตอน. นิ่น ปุ๊ด ตู์ง-ดิน, เธียว ตุ๊ โค้ว ไห่, หฒั่นๆ คีง เปียะ โต์ว-เหฑ่า หย่า ด๊อด ววม.

16เยีย ต้อ นิ่น ต้าย ล์อ เม่ย เญย ไซ-ก๋อ มป่า นิ่น บัว ไม้ ไฮ่ หฒ่อ ไม้ หลง.”

17เยซู เตา, “เม่ย บัว อี้ จ๋า เญย เมี่ยน อ้า! เม่ย บัว หฒะเก้ง ไม้ เสียน, มน่อม หย่า โฮ์ ไห่. เยีย อ๋อย หฒุ เหธา เม่ย บัว เยียม ด่ง หาย เล่า? เยีย อ๋อย หฒุ เญี์ยน ตุ๊ เม่ย บัว เถา หาย หฒั่น? ต้อ วั้ว เต้า ตอน ต้าย เยีย น้าย ม่าะ!”

18เยซู หัด เมี้ยน, เมี้ยน ฯฒฯ ธ้วด หมี่ อ๊ะ. วั้ว เต้า ตอน เลี่ยม เฒ่ย หลง เหฑ่ง หมี่ อ๊ะ.

19ฆะฮ้า ไซ-ก๋อ บัว ต้าย ปี๋ง เจี๊ยน หน่าย เยซู, “เยีย บัว เหว่ย หาย ติ่ว หฒุ่น วั้ว เต้า เมี้ยน ไม้ ธ้วด?”

20เยซู เตา, “เซ เหว่ย หฒุ เม่ย บัว เญย เสียน ฟิม ไฝ ไห่. เยีย ก๊อง เฒียน บั๋ว เม่ย บัว, สี ก๊อง เม่ย บัว เญย เสียน ฟิม ล่ม เหยียด นอม ไล-จ๋าย ญิม นอ, เม่ย บัว ไฮ่ บั๋ว น้าย นอม บง, ‘เยียม น้าย ซุ้ย มี่ง เยียม วั้ว ม่าะ!’ บง ฯฒฯ ซุ้ย อ๊ะ. ไม้ ม่าย หาย หญู่ง เม่ย บัว ไม้ ไฮ่ โหฒว.

21มป่า ขูง ม่าย ดุ หญู่ง หฒะเอ๋ย ฮนั้ง ไฮ่ หฒุ่น น้าย หญู่ง เมี้ยน ธ้วด. อ๋อย หฒุ เต๋า เก๋า, หย่า เฒย ไม้ หญั่น หาย หญู่ง หธีง ต้าย ไฮ่ หฒุ่น ตุ๊ ธ้วด.”

22ไซ- ก๋อ บัว เหยียด ฒู้ง ต้าย กั๊บ ฒุ้น เยียม กาลิลี แซ้ง วั้ว หฒั่น, เยซู บั๋ว นิ่น บัว, “เยีย, ป้าม เมี่ยน เญย ตอน, ฒู้ง อ๋อย หฒุ จิว ปุน เมี่ยน.

23นิ่น บัว อ๋อย ไต๋ เยีย, มป่า ฆะฮ้า ปัว ฮนอย ทิน-ฮู่ง แอ๋ง ปุน เยีย นั่ง ต้าย.” ไซ-ก๋อ บัว ไฮ์ นิ่น ฮนั้ง น้าย นอ ก๊อง ฯฒฯ เฑ่า ไห่.

24เยซู เหธา นิ่น เญย ไซ-ก๋อ บัว มี่ง เถา คาเปนาอุม มู้ง วั้ว หฒั่น, เซียว หฒั่ง ทิน-ฮู่ง เญย เปย๊า เญย โฑว-ฒิ่น วั้ว เต๋ย เมี่ยน ต้าย หน่าย ปีเต, “เม่ย เญย ไซ-เตี๋ย ไม้ ธ้วด หฒั่ง ทิน-ฮู่ง เญย เปย๊า เญย โฑว-ฒิ่น ไฟ?”

25ปีเต เตา, “ธ้วด เญย.” ปีเต เปียะ เปย๊า มี่ง วั้ว หฒั่น, เยซู ฒู้ง ก๊อง ด่าง หมี่ อ๊ะ. นิ่น หน่าย, “ซีโมน อ่า, เม่ย ฮนั้ง หาย นอ ฮนั้ม? หาย เต้า อ๋อย หฒุ ธ้วด ล่าง ฒิ่น เหธา โฑว-ฒิ่น ปุน น้าย ป้าม เกน เญย ฮู่ง เตี๋ย? เซ กั้น เญย ตอน ไฟ แปะ ฝีง?”

26ปีเต เตา, “แปะ ฝีง ธ้วด.” เยซู ก๊อง, “วั้ว หญู่ง, นิ่น กั้น เญย ตอน ไม้ หฒุ ธ้วด.

27มป่า บัว ไม้ อ๋อย หฒิ ฒุ์ย น้าย เต๋ย เมี่ยน. เม่ย มี่ง วั้ว ค้อย-ตอน บัด เบย์า. บัด ตุ๊ ต้าว เต้า เบย์า, ฯฒฯ แมะ ฆอย เบย์า เญย ฑุ่ย, ปวัด นอม ฒิ่น, ต้อ มี่ง ปุน นิ่น บัว เก๋า เม่ย เหธา เยีย ธ้วด เญย โฑว-ฒิ่น.”

← Chapter 16 Jump to: Chapter 18 →