Matthew 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1เยซู ก๊อง ลิ์ว น้าย เต๋ย หว่า ฯฒฯ ธ้วด กาลิลี แซ้ง มี่ง ยูเดีย แซ้ง เจี๋ย วั้ว หง่าน หฒิ จอแดน ด้าย.

2เมี่ยน ธั้ม ไห่ กัน เจี๊ยน เยซู มี่ง, นิ่น ฯฒฯ เยียม วั้ว หฒ่อ หลง นิ่น บัว เญย แป่ง.

3ม่าย เต๋ย ฟาลิสี เมี่ยน ต้าย เสย เยซู ฯฒฯ หน่าย, “ไม้ กุ๊น โหฆ เหว่ย หาย หญู่ง กอน-แป๋ง เล่ย นิ่น เญย เอ๊า, เซ หอบ บัว เญย เล์ย ไฟ?”

4เยซู เตา, “เม่ย บัว ไม้ โตะ เจี๋ย น้าย โต่ว กีง-โซว ไฟ? ‘ฒิ่น ด่าง ทิน-ฮู่ง เหฒย ลู่ง เหฒย เดา วั้ว หฒั่น, นิ่น เหฒย ธ้วด เมี่ยน ต้าย เป๋น มจั่ง มเซียะ.’

5ทิน-ฮู่ง หย่า ก๊อง, ‘เหว่ย น้าย มจั่ง ตอน ตอง จา, เล่ย นิ่น เญย เตี๋ย หม่า, เหธา นิ่น เญย เอ๊า กั๊บ เจี๊ยน. อี เต้า ฯฒฯ เป๋น เหยียด นอม ซิน หมี่ อ๊ะ.

6ฮนั้ง หน่าย นิ่น บัว ไม้ เฒ์ย อี เต้า อ๊ะ. เป๋น เหยียด เต้า ฮนั้ง. เหว่ย น้าย, ทิน-ฮู่ง กั๊บ ต้าย เญย ไธ-ต๋อย, เมี่ยน ไม้ ตู๋ง แธะ ฆอย.”

7ฟาลิสี เมี่ยน แอ๋ง หน่าย เยซู, “วั้ว หญู่ง, โมเซ เหว่ย หาย ติ่ว บั๋ว โหฆ ปุน เฒ้ย เล่ย ไธ โซว นิ่น เญย เอ๊า ฯฒฯ เห่ว เอ๊า มี่ง อ๊ะ?”

8เยซู เตา, “เซ หลาย เม่ย บัว เฮญี้ยว แหง่ง ไห่ โมเซ หธีง ต้าย ปุน เม่ย บัว ไฮ่ เล่ย ตุ๊ เม่ย บัว เญย เอ๊า. มป่า ฒิ่น ด่าง, เหฒย ลู่ง เหฒย เดา วั้ว หฒั่น, ไม้ เฒ์ย ฮนั้ง หน่าย.

9เยีย บั๋ว เม่ย บัว, หาย เต้า เล่ย นิ่น เญย เอ๊า, หย่า ไม้ เฒ์ย หลาย นิ่น เญย เอ๊า เหฮยียน โหฆ นอ, แอ๋ง มี่ง หล่ง เซียง-เอ๊า, นิ่น เซ เหฮยียน เอ๊า ฮนั้ง.”

10ไซ-ก๋อ บัว ก๊อง บั๋ว เยซู, “สี ก๊อง หล่ง เอ๊า หล่ง โหฆ เญย เจ๊า ฮนั้ง หน่าย นอ, เหยียด ลิ์ว ไม้ ตู๋ง หล่ง เก้า หลง.”

11เยซู เตา, “น้าย เต๋ย หฌาว เญย หว่า, ไม้ เฒ์ย เต้าๆ ไฮ่ เอย เจี๊ยน โหฒว. ขูง ต้ง ตุ๊ ทิน-ฮู่ง เญย เอน เญย เมี่ยน ไฮ่ เอย เจี๊ยน โหฒว ฮนั้ง.

12เหว่ย หฒุ ม่าย ธั้ม-ติ่ว เจ๊า ปุน เมี่ยน ไม้ ไฮ่ ตอง จา. ม่าย เต๋ย ธ้วด เสย เฒี่ยง เหฒี่ยว ไม้ ไฮ่ ตอง จา. ม่าย เต๋ย หฒุ เมี่ยน อิม โต๊ มี่ง. ม่าย เต๋ย เหว่ย โหฒว ทิน-ฮู่ง เญย กั๊วะ เญย กง ไม้ ตอง จา. หาย เต้า ไฮ่ เอย เจี๊ยน น้าย เต๋ย หว่า, อ๋อย หฒุ เอย เจี๊ยน โหฒว อ๊ะ.”

13ม่าย เต๋ย เมี่ยน ต้อ ฝุเจว๊ย ต้าย ล์อ เยซู, อ๋อย เยซู มาน เจี๊ยน นิ่น บัว, เถง นิ่น บัว เต๋า เก๋า. มป่า ไซ-ก๋อ บัว ก๊อง-เหม น้าย เต๋ย เมี่ยน.

14เยซู ก๊อง, “กุ๊น ปุน ฝุเจว๊ย ต้าย ล์อ เยีย, ไม้ ตู๋ง ล่าน นิ่น บัว ซา. เหว่ย หฒุ หาย เต้า หล่ง ทิน-ฮู่ง โหฒว เฒี้ยว กุ๊น นิ่น, วั้ว เต้า เซ ฮนั้ง น้าย เต๋ย ฝุเจว๊ย นอ.”

15เยซู มาน ลิ์ว น้าย เต๋ย ฝุเจว๊ย นิ่น ฯฒฯ มี่ง หมี่ อ๊ะ.

16ม่าย หฑุ่น ม่าย เต้า เมี่ยน ต้าย หน่าย เยซู, “ฟิน-แซง อ่า, เยีย หอบ หฒุ โหฒว หาย หญู่ง หลง เญย สี่ หธีง ตุ๊ เหยียด ลิ์ว เญย แหม่ง?”

17เยซู เตา, “เม่ย เหว่ย หาย ติ่ว หน่าย เยีย เถา หลง เญย สี่? ขูง ม่าย ดุ เต้า หลง ฮนั้ง. สี ก๊อง เม่ย อ๋อย ตุ๊ เหยียด ลิ์ว เญย แหม่ง, อ๋อย หฒุ เอย เจี๊ยน เล์ย-หลัด โหฒว.”

18วั้ว เต้า หน่าย, “หาย เต๋ย เล์ย-หลัด?” เยซู เตา, “ไม้ ตู๋ง ไต๋ เมี่ยน, ไม้ ตู๋ง เหฮยียน เอ๊า, ไม้ ตู๋ง โหฒว หฒะ หย่า ไม้ ตู๋ง โหฒว จ๊า ฒอง-เหฒง.

19อ๋อย หฒุ ถง หนิ่ม เม่ย เญย เตี๋ย หม่า, หย่า ฮนั้ม เมี่ยน ฮนั้ง ฮนั้ม กั้น นอ.”

20วั้ว เต้า เมี่ยน หลุน เมี่ยน ก๊อง, “น้าย เต๋ย เหยียด ฒู้ง เญย เล์ย เยีย หมวัง เหฑ่ง อ๊ะ. แอ๋ง ธา หาย หญู่ง อ๋อย หฒุ โหฒว ไฟ?”

21เยซู บั๋ว นิ่น, “สี ก๊อง เม่ย อ๋อย โหฒว ตุ้น ยุ่น เญย เมี่ยน, อ๋อย หฒุ มี่ง หม่าย เหฑ่ง เม่ย ม่าย เญย กะน้าย, เฒาะ วั้ว เต๋ย ญ่าน ปุน เมี่ยน จ่ม เมี่ยน. ฮนั้ง น้าย เม่ย ฯฒฯ ม่าย จ๋าย เญย กะน้าย เซียว เจี๊ยน วั้ว ทิน-ต้อง. โหฒว ลิ์ว, ต้าย กัน เยีย โอ่.”

22วั้ว เต้า เมี่ยน หลุน เมี่ยน ไฮ์ น้าย เต๋ย หว่า, นิ่น เฒียง หน่าย เฑ่าๆ เญย มี่ง หมี่ อ๊ะ, เหว่ย หฒุ นิ่น ม่าย จา-ตี้ง โฮ์ ไห่.

23เยซู แอ๋ง ก๊อง บั๋ว นิ่น เญย ไซ-ก๋อ, “เยีย ก๊อง เฒียน บั๋ว เม่ย บัว, ปุ๊ด-ฒ่อย เมี่ยน อะ ตุ๊ เปียะ ทิน-ฮู่ง เญย กั๊วะ.

24เยีย แอ๋ง ก๊อง หฑุ่น บั๋ว เม่ย บัว, ล่อ ท่อ หธุน เจี๋ย ซิม-บยุ่ย หธ่อ เก้า ฮู่ง เห่ ปุ๊ด-ฒ่อย เมี่ยน เปียะ ทิน-ฮู่ง เญย กั๊วะ.”

25ไซ-ก๋อ บัว ไฮ์ ลิ์ว น้าย เต๋ย หว่า นิ่น บัว บัวะ ฮ่อง ไห่ อ๊ะ. นิ่น บัว หน่าย ก๋า, “วั้ว หญู่ง, หาย เต้า ไฮ่ ตุ๊ เหฌียว?”

26เยซู หมั่ง เจี๊ยน นิ่น บัว หย่า ก๊อง, “เมี่ยน ไม้ ไฮ่ เหฌียว กั้น มป่า หม่าน สี่ ทิน-ฮู่ง ไฮ่ โหฒว ตุ๊ เญย.”

27ปีเต ฯฒฯ ก๊อง, “ไซ-เตี๋ย อ้า! เยีย บัว กวั่ง เหฑ่ง หญู่งๆ ต้าย กัน เม่ย. วั้ว หญู่ง, เยีย บัว ไฮ่ ตุ๊ หาย หญู่ง?”

28เยซู บั๋ว นิ่น บัว, “เยีย ก๊อง เฒียน บั๋ว เม่ย บัว, ม่าย เซียง-ลู่ง เซียง-เดา วั้ว หฒั่น, เยีย, ป้าม เมี่ยน เญย ตอน, เฒว์ย เจี๊ยน เยีย ฌัง-หล่าง เญย เหว่ย เญย เฒี่ยง โห่, เม่ย บัว กัน เยีย เญย เมี่ยน ฯฒฯ ตุ๊ เฒว์ย เจี๊ยน เหฒียบ เหญ่ย นอม เหว่ย เซี้ยม วั้ว เต๋ย เหฒียบ เหญ่ย ฝีง อิสะลาเอน เมี่ยน.

29หาย เต้า เหว่ย เยีย กวั่ง นิ่น เญย เปย๊า, มั์ว-ต่อย, เตี๋ย หม่า, ฝุเจว๊ย ไฟ ลี่ง เต่ย, วั้ว เต้า กวั่ง เหยียด โก๊ว ฯฒฯ ตุ๊ เหยียด แป๊ะ โก๊ว หย่า ตุ๊ เหยียด ลิ์ว เญย แหม่ง.

30มป่า ม่าย โหฒว โฮล เญย เมี่ยน ธั้ม อ๋อย หฒุ โหฒว ไฝ. โหฒว ไฝ เญย ม่าย ธั้ม หย่า ตุ๊ โหฒว โฮล.

← Chapter 18 Jump to: Chapter 20 →