Matthew 18

Mien Bible (Thai Script) © Thailand Bible Society, 2007

← Chapter 17 Jump to: Chapter 19 →

1วั้ว หฒั่น ไซ-ก๋อ บัว ต้าย หน่าย เยซู, “เยียม ทิน-ฮู่ง เญย กั๊วะ, หาย เต้า ตุ๊ โหฒว เก้า โฮล เจี๋ย?”

2เยซู ฯฒฯ เห่ว เต้า ฝุเจว๊ย ต้าย ปุน นิ่น โซ้ว เจี๊ยน นิ่น บัว เญย บุด๋ง

3หย่า ก๊อง, “เยีย ก๊อง เฒียน บั๋ว เม่ย บัว, ธ้วด ลิ์ว เม่ย บัว ก๊อย เฮญี้ยว ฯฒฯ ฮนั้ง ฝุเจว๊ย นอ, เม่ย บัว เหยียด ลิ์ว ไม้ ตุ๊ เปียะ ทิน-ฮู่ง เญย กั๊วะ.

4หาย เต้า เหญี่ยม กั้น โหฒว ไฝ ฮนั้ง น้าย เต้า ฝุเจว๊ย, เยียม ทิน-ฮู่ง เญย กั๊วะ ต้ง น้าย เต้า โหฒว โฮล เจี๋ย.

5หาย เต้า เต๊ง เยีย เญย บั๋ว ฒิบ เต้า ฝุเจว๊ย ฮนั้ง น้าย เต้า ฝุเจว๊ย นอ, วั้ว เต้า หย่า ฒิบ เยีย.

6“มป่า สี ก๊อง หาย เต้า ดั๊ว เหยียด เต้า น้าย เต๋ย เสียน เยีย เญย ฝุเจว๊ย-ไฝ ป์าม ฒุ์ย, อ๋อย หฒุ เฒาะ ต้ม หม่อ ดิ๋ว เจี๊ยน วั้ว เต้า เญย จาง ปู๋ง เหฌี่ย ค้อย, โด เญย ต๋อง, เหฒียม ไต่ เก้า หลง.

7หลาย ดั๊ว เมี่ยน ป์าม ฒุ์ย เญย สี่, ป้าม เกน ฯฒฯ หฒุ โค้ว อ๊ะ. ดั๊ว เมี่ยน เญย สี่ หฒั่นๆ อ๋อย ธ้วด, มป่า โหฒว กอน ดั๊ว เมี่ยน วั้ว เต้า ฒู้ง อ๋อย หฒุ โค้ว อ๊ะ.

8“สี ก๊อง เม่ย เญย ปั์ว ไฟ เหฒา ดั๊ว เม่ย ป์าม ฒุ์ย, อ๋อย หฒุ ฮงะ กวั่ง. หว่าย เต๋ย ฝัง ไฟ โหฒะ เจี๊ยะ ปั์ว-เหฒา มป่า ตุ๊ เหยียด ลิ์ว เญย แหม่ง หธ่อ เก้า หลง ม่าย อี เจี๊ยะ ปั์ว อี เจี๊ยะ เหฒา มป่า หฒุ ฒอย เปียะ เหยียด ลิ์ว เหฒียะ เจี๊ยน เญย โต์ว.

9สี ก๊อง เม่ย เญย มฒีง ดั๊ว เม่ย ป์าม ฒุ์ย, อ๋อย หฒุ เกว๋ย กวั่ง มี่ง. โหฒะ นอม มฒีง มป่า ตุ๊ เหยียด ลิ์ว เญย แหม่ง หธ่อ เก้า หลง ม่าย อี นอม มฒีง หย่า หฒุ ฒอย เปียะ เต่ย หญัวะ เญย โต์ว.

10“อ๋อย หฒุ ไฝ ฟิม, ไม้ ตู๋ง หมั่ง เผีย เหยียด เต้า น้าย เต๋ย ไฝ เญย ฝุเจว๊ย. เยีย บั๋ว เม่ย บัว, น้าย เต๋ย ฝุเจว๊ย เญย ฟิน-เมี่ยน เยียม ทิน-ต้อง, หฒั่นๆ เยียม เยีย เญย ทิน-ต้อง เตี๋ย เญย หฑะเฮมียน.

11เหว่ย หฒุ เยีย, ป้าม เมี่ยน เญย ตอน, ต้าย เหฌียว ตี๋ง ล่าย เญย เมี่ยน.

12“เม่ย บัว ฮนั้ง หาย นอ ฮนั้ม? สี ก๊อง ม่าย ล่าน เมี่ยน ม่าย เหยียด แป๊ะ เต้า ปะกี ยู่ง, ตี๋ง ล่าย เต้า, นิ่น ฮนั้ง หาย นอ โหฒว? นิ่น ไม้ เฒ์ย กวั่ง เจี๊ยน วั้ว เต๋ย จั๊ว เหฒียบ จั๊ว เต้า เยียม วั้ว บง หญั่น เมี้ย, แอ๋ง มี่ง ล์อ ตี๋ง ล่าย วั้ว เต้า ไฟ?

13เยีย บั๋ว เฒียน เม่ย บัว, ล์อ ปวัด น้าย เต้า ปะกี ยู่ง, นิ่น อะเฮน้ย ไห่. เก้า อะเฮน้ย เจี๋ย วั้ว เต๋ย จั๊ว เหฒียบ จั๊ว เต้า ไม้ ตี๋ง ล่าย เญย ปะกี ยู่ง.

14ฟี่ ฮนั้ง เญย, เม่ย บัว เญย ทิน-ต้อง เตี๋ย ไม้ อ๋อย เหยียด เต้า น้าย เต๋ย ไฝ เญย ฝุเจว๊ย ตี๋ง ล่าย.

15“สี ก๊อง เม่ย เญย ก๋อ-โย์ว โหฒว ต่อง เม่ย, เม่ย กั้น อ๋อย หฒุ มี่ง ล์อ นิ่น, ปี๋ง เจี๊ยน บั๋ว นิ่น, นิ่น โหฒว ต่อง เญย สี่. สี ก๊อง นิ่น หมวัง เม่ย เญย หว่า นอ, เม่ย ฯฒฯ ตุ๊ นิ่น แอ๋ง โหฒว ก๋อ-โย์ว.

16สี ก๊อง นิ่น ไม้ หมวัง, เม่ย ฯฒฯ อ๋อย หฒุ ล์อ เจี๊ยน เหยียด เต้า ไฟ อี เต้า เหธา เม่ย มี่ง เถง หมวัง หว่า ฯฒฯ ไฮ่ เฒาะ โจ๋วๆ หว่า โหฒว ฒอง-เหฒง.

17สี ก๊อง วั้ว เต้า หธ่อ ไม้ หมวัง นิ่น บัว นอ, อ๋อย หฒุ เฒาะ น้าย เต๋ย สี่ บั๋ว เหฑ่ง จิว-ปาง. นิ่น หธ่อ ไม้ คั้ง หมวัง จิว-ปาง นอ, อ๋อย หฒุ ฝุน นิ่น เซ ฮนั้ง ไม้ เสียน เญย เมี่ยน ไฟ เถง โลมา ฮู่ง จา เซียว โฑว เญย เมี่ยน.

18“เยีย บั๋ว เฒียน เม่ย บัว, เม่ย บัว เยียม ป้าม เกน โด้ หาย หญู่ง, เยียม วั้ว ทิน-ต้อง วั้ว หญู่ง หย่า หฒุ โด้ อ๊ะ. เม่ย บัว เยียม ป้าม เกน ปู๋ง หาย หญู่ง, เยียม วั้ว ทิน-ต้อง หย่า ปู๋ง วั้ว หญู่ง อ๊ะ.

19“เยีย แอ๋ง บั๋ว เม่ย บัว, สี ก๊อง เม่ย บัว เยียม น้าย ป้าม เกน ม่าย อี ล่าน เมี่ยน ต้ง เฮญี้ยว กั๊บ เอ๋ย เต๋า เก๋า โท้ หาย หญู่ง, เยีย เญย ทิน-ต้อง เตี๋ย ฒู้ง เหว่ย เม่ย บัว โหฒว เหฒียง เหฑ่ง.

20เหว่ย หฒุ ไม้ กุ๊น เยียม หาย นอม ต๋อง, ม่าย อี ปัว ล่าน เมี่ยน เต๊ง เยีย เญย บั๋ว กั๊บ ฒุ้น, เยีย ฯฒฯ เยียม นิ่น บัว บุด๋ง.”

21ปีเต แอ๋ง ต้าย หน่าย ก๋า เยซู, “เฒี้ยว อ่า, สี ก๊อง เยีย เญย ก๋อ-โย์ว หฒั่นๆ ต่อง เยีย, เยีย อ๋อย หฒุ กวั่ง บัวะ เหฒีย หฑุ่น ปุน นิ่น? เถา เสี่ย หฑุ่น อ๊ะ ไฟ?”

22เยซู เตา, “เยีย ไม้ เฒ์ย ก๊อง กวั่ง เสี่ย หฑุ่น ฮนั้ง. อ๋อย หฒุ กวั่ง เธี้ยด เหฒียบ เญย เสี่ย หฑุ่น.

23“เหว่ย หฒุ ทิน-ฮู่ง โหฒว เฒี้ยว กุ๊น เมี่ยน เซ ฮนั้ง น้าย. ม่าย เต้า ฮู่ง เตี๋ย อ๋อย เหธา นิ่น เญย โปว ฝุน แฒะ.

24ฝุน เจี๊ยน แฒะ วั้ว หฒั่น, เมี่ยน ต้อ เต้า โปว เปียะ ต้าย. วั้ว เต้า โปว เฉียม ฮู่ง เตี๋ย เหฒีย แป๊ะ หว่าน นอม ฒิ่น,

25หย่า ไม้ ม่าย ญ่าน จ๊าว. ฮู่ง เตี๋ย ฯฒฯ เห่ว เมี่ยน ต้อ วั้ว เต้า โปว มี่ง หม่าย ปุน เมี่ยน โหฒว โน่ว. เลี่ยม นิ่น เญย เอ๊า-เจว๊ย เหธา นิ่น ม่าย เญย เหยียด ฒู้ง กะน้าย ต้อ มี่ง หม่าย เหฑ่ง, ต้าย จ๊าว ซูง แฒะ.

26“วั้ว เต้า โปว ฯฒฯ เกว่ย เหฌี่ย ชะ โท้ นิ่น, ‘โท้ เฒี้ยว เซีย เยีย, ฒั้ว เยีย ล์อ ตุ๊ ต้าย, เยีย เก้ง อ๋อย หฒุ จ๊าว เถา ซูง เหฑ่ง.’

27วั้ว เต้า โปว เญย เฒี้ยว ค้อ-เลี่ยน ไห่ นิ่น ฯฒฯ กวั่ง นิ่น เญย แฒะ, ปู๋ง นิ่น หฑวน หมี่ อ๊ะ.

28“หน่าย เต้า โปว ธ้วด มี่ง หย่า ปวั้ง หฒุ เต้า โหฒว โปว ต่อย. น้าย เต้า โปว เฉียม นิ่น อี เหฒีย นอม ฒิ่น ฮนั้ง, มป่า นิ่น เลี่ยม เฒ่ย โก้ เจี๊ยน น้าย เต้า เญย จาง หย่า ก๊อง, ‘ก๊าน จ๊าว เม่ย เฉียม เยีย เญย แฒะ ม่าะ!’

29วั้ว เต้า โหฒว โปว ต่อย ฯฒฯ เกว่ย เหฌี่ย ชะ โท้ นิ่น, ‘โท้ เม่ย เซีย เยีย, เยีย เก้ง จ๊าว เญย เหลาะ.’

30มป่า นิ่น ไม้ คั้ง, หย่า ต้อ วั้ว เต้า โปว มี่ง หววน เจี๊ยน โล่ ฒั้ว นิ่น จ๊าว ซูง แฒะ.

31“แอ๋ง ม่าย เต๋ย ล่ม ฑ่อย โหฒว โปว ต่อย ปวัด น้าย เต๋ย สี่ ธ้วด, ไฮ์ เฮญี้ยว ไม้ หลง เหยียด เต๋ย, ฯฒฯ มี่ง บั๋ว นิ่น บัว เญย เฒี้ยว.

32วั้ว เต้า โปว เญย เฒี้ยว ฯฒฯ เห่ว นิ่น ต้าย หย่า ก๊อง, ‘เม่ย หน่าย เต้า หว่าย ไห่ เญย โน่ว เก๊า อ้า! เม่ย ชะ โท้ เยีย, เยีย ฯฒฯ กวั่ง เหฑ่ง เม่ย เฉียม เยีย เญย แฒะ.

33เม่ย หอบ หฒุ ค้อ-เลี่ยน เม่ย เญย โหฒว โปว ต่อย ฮนั้ง เยีย ค้อ-เลี่ยน เม่ย นอ ซา.’

34นิ่น เญย เฒี้ยว เฉีย เจี์ย! ไห่ ฯฒฯ เห่ว กุ๊น โล่ เจียน ต้อ น้าย เต้า โปว มี่ง เหฒย เถา นิ่น จ๊าว ซูง แฒะ.”

35เยซู แอ๋ง ก๊อง เซ้ด เมว์ย หว่า. “สี ก๊อง เม่ย บัว โม์ว ล่าน เมี่ยน ไม้ หล่ง เฮญี้ยว กวั่ง ก๋อ-โย์ว โหฒว ต่อง เม่ย บัว เญย สี่, เยีย เญย ทิน-ต้อง เตี๋ย หย่า ฟี่ ฮนั้ง เญย ไม้ กวั่ง ปุน เม่ย บัว.”

← Chapter 17 Jump to: Chapter 19 →