Matthew 28

Mien Bible (Thai Script) © Thailand Bible Society, 2007

← Chapter 27 Jump to:

1เจี๋ย ลิ์ว ตี้ง กง ฮนอย, เปียะ วั้ว นอม เล์ย-ป๋าย เญย ตะเยี้ยด ฮนอย, ลู่ง อ๊า ลั่ม เต๋ย ฌัง, มักดาลา มู้ง วั้ว เต้า มาลียา, แอ๋ง เหธา กั้น เต้า มาลียา มี่ง หมั่ง โฒ้ว.

2เลี่ยม เฒ่ย เดา ต์ง เสย เญย. ม่าย เต้า เฒี้ยว เญย ฟิน-เมี่ยน เหฌี่ย ต้าย ทุย ฆอย แบะ โฒ้ว-แก้ง วั้ว คว้าย หละเปย๊ย, ฯฒฯ เฒว์ย เจี๊ยน วั้ว คว้าย หละเปย๊ย กู้ หงว่าย.

3ปวัด นิ่น เญย ฝัง เฒ้ย ฮนั้ง บะหลี่ง นอ ฌัง. ลุย-โหว บ๊บ แปะ เญย, ฮนั้ง ซอง นอ.

4ฒั้ว โฒ้ว เญย แปง เก้ง! กั้ม เหฑีย ไห่, ซิน หฒิน เหฑ่ง ฯฒฯ คีง วั้ว เดา มี่ง, ฮนั้ง ไต่ หมี่ อ๊ะ นอ.

5ฟิน-เมี่ยน ก๊อง บั๋ว วั้ว เต๋ย มเซียะ ตอน, “ไม้ ตู๋ง กั้ม เหฑีย โอ่. เยีย ฮิ้ว ตุ๊ เม่ย บัว ล์อ ต้ง หฒุ ตีง เหฒียบ หฑั่ง จ๋า ไต่ วั้ว เต้า เยซู.

6มป่า นิ่น ไม้ เยียม น้าย. นิ่น เอย นิ่น กั้น ก๊อง เญย หว่า นั่ง ต้าย อ๊ะ. ต้าย หมั่ง เมี่ยน อัน นิ่น วั้ว นอม ต๋อง ม่าะ!

7หมั่ง ลิ์ว, ก๊าน มี่ง บั๋ว นิ่น เญย ไซ-ก๋อ, ‘นิ่น นั่ง ต้าย อ๊ะ. นิ่น มี่ง กาลิลี ด่าง เม่ย บัว. มี่ง เถา วั้ว เม่ย บัว ฯฒฯ ตุ๊ ปวัด นิ่น อ๊ะ.’ จั๋ง เจี๊ยน เยีย บั๋ว ลิ์ว เม่ย บัว น้าย เต๋ย หว่า โอ่.”

8วั้ว เต๋ย มเซียะ ตอน เยียม วั้ว โฒ้ว ฯฒฯ ฮวางๆ ฒางๆ เญย ถิว มี่ง บั๋ว ไซ-ก๋อ. นิ่น บัว ไฮ์ กั้ม เหฑีย เญย โหย่ว ไฮ์ เฌียน-โย่ว ไห่.

9ถิว เจี๊ยน มี่ง เกา, เยซู เลี่ยม เฒ่ย ต้าย ปวั้ง นิ่น บัว หย่า ก๊อง, “แป้ง ออน เญย ซ่าะ?” วั้ว เต๋ย มเซียะ ตอน ฯฒฯ มี่ง นั้น เจี๊ยน เยซู เญย เหฒา หย่า ป๋าย นิ่น.

10เยซู บั๋ว นิ่น บัว, “เม่ย บัว ไม้ ตู๋ง กั้ม เหฑีย. มี่ง บั๋ว เยีย เญย ก๋อ-โย์ว มี่ง กาลิลี แซ้ง โอ่. เยียม วั้ว นิ่น บัว ฯฒฯ ตุ๊ ปวัด เยีย.”

11วั้ว เต๋ย มเซียะ ตอน กัน เจี๊ยน เจ๊า มี่ง วั้ว หฒั่น, ม่าย เต๋ย ฒั้ว โฒ้ว เญย แปง แอ๋ง หฑวน วั้ว ฒี่ง บั๋ว ไซ เมี่ยน เปย๊ย นิ่น บัว ปวัด ธ้วด ต้าย เญย หญู่งๆ สี่.

12ไซ เมี่ยน เปย๊ย เหธา เมี่ยน โก๋ กั๊บ ฒุ้น ธ่าง ล่าง. ธ่าง ล่าง ลิ์ว, ฯฒฯ เฒาะ ญ่าน ธั้ม เญย ฑุ์ย ปุน แปง

13หย่า ก๊อง, “เม่ย บัว อ๋อย หฒุ ก๊อง, ‘ลู่ง ม์วน หฒั่น เม่ย บัว มฌ่อม มี่ง, นิ่น เญย ไซ-ก๋อ ต้าย หนิ่ม เยซู เญย เซย หมี่ อ๊ะ.’

14สี ก๊อง น้าย เต๋ย สี่ ซีง เถา ปีล้าด หฒูง เญย มน่อม เยีย บัว ฯฒฯ เถง เม่ย บัว ไจ๊. เม่ย บัว กุ๊น ปู๋ง เฮญี้ยว.”

15แปง ฒิบ วั้ว เต๋ย ญ่าน หย่า เอย เจี๊ยน ไซ เมี่ยน เปย๊ย เหธา เมี่ยน โก๋ เญย หว่า โหฒว. น้าย เต๋ย เจ๊า-โหล่ว เถา อี้ หฒั่น ยิวไท เมี่ยน หธ่อ ก๊อง เจี๊ยน เยียม เญย.

16วั้ว เต๋ย เหฒียบ เยี้ยด เต้า ไซ-ก๋อ มี่ง กาลิลี แซ้ง, เถา เยซู เห่ว นิ่น บัว มี่ง วั้ว นอม บง.

17เยี้ยด ปวัด เยซู นิ่น บัว ฯฒฯ เกว่ย เหฌี่ย ป๋าย นิ่น. มป่า ม่าย เต๋ย หธ่อ เฮญี้ยว ไม้ ตี่ง.

18เยซู ต้าย ฟัด เต๋ย บั๋ว นิ่น บัว, “เยียม ลู่ง เยียม เดา เญย เหยียด ฒู้ง หัด ม์า ทิน-ฮู่ง จิว ปุน เยีย หมี่ อ๊ะ.

19เหว่ย น้าย, เม่ย บัว อ๋อย หฒุ มี่ง หฌาว หม่าน ฝีง เมี่ยน โหฒว เยีย เญย ไซ-ก๋อ. อ๋อย หฒุ เต๊ง เตีย, ตอน เหธา สีง ลี่ง เญย บั๋ว เถง นิ่น บัว เจี๋ย ววม เญย เล์ย,

20หย่า หฌาว นิ่น บัว เอย เหฑ่ง เยีย บั๋ว เม่ย บัว โหฒว เญย หญู่งๆ. จั๋ง เจี๊ยน โอ่. เยีย เหยียด ลิ์ว เหธา เม่ย บัว เยียม เถา ป้าม เกน เญย เซ้ด เมว์ย.”

← Chapter 27 Jump to: