Matthew 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1เยซู เยียม บง เหฌี่ย ต้าย วั้ว หฒั่น, ม่าย เมี่ยน ธั้ม! เญย กัน เจี๊ยน นิ่น มี่ง.

2ม่าย ล่าน เมี่ยน ปุ๊ด ก้ม ฮู้ แป่ง ต้าย เกว่ย เหฌี่ย เยซู เญย หฑะเฮมียน. นิ่น ก๊อง, “ต้ม ก๋อ อ่า, สี ก๊อง เม่ย อ๋อย นอ, เม่ย ไฮ่ หฒ่อ หลง เยีย เญย แป่ง.”

3เยซู ซูง ปั์ว มาน เจี๊ยน วั้ว ล่าน เมี่ยน หย่า ก๊อง, “เยีย อ๋อย หฒ่อ เญย. เม่ย หลง ต้าย ม่าะ!” วั้ว ล่าน เมี่ยน เญย แป่ง ฯฒฯ เลี่ยม เฒ่ย หลง หมี่ อ๊ะ.

4เยซู แอ๋ง ก๊อง บั๋ว นิ่น, “ไม้ ตู๋ง บั๋ว หาย เต้า โอ่. แปง หฒะ เญย มี่ง ไซ เมี่ยน วั้ว ปุน นิ่น ฒ่า หมั่ง. หมั่ง ลิ์ว, อ๋อย หฒุ เอย โมเซ เฟี้ย เญย เล์ย ต้อ แซง-คู้ มี่ง เหฒี่ย ปุน ทิน-ฮู่ง เหว่ย สา เม่ย เญย หวุย, โหฒว ฒอง-เหฒง ปุน นิ่น บัว ฮิ้ว ตุ๊ เม่ย เญย แป่ง หลง เหฑ่ง.”

5เยซู เปียะ คาเปนาอุม มู้ง วั้ว หฒั่น, ม่าย เต้า โลมา แปง-เปย๊ย ต้าย ล์อ นิ่น, โท้ นิ่น เถง.

6แปง-เปย๊ย ก๊อง, “ต้ม ก๋อ อ่า, เยีย เญย โปว ปุ๊ด แป่ง-ไบ, เปว๋ย วั้ว เปย๊า, เตี๊ย ตุ๊ โค้ว ไห่.”

7เยซู ก๊อง, “เยีย อ๋อย มี่ง หฒ่อ นิ่น หลง.”

8แปง-เปย๊ย ก๊อง, “ต้ม ก๋อ กั้น ไม้ หฒุ มี่ง อ๊ะ. เยีย ไม้ ผุย ฒิบ เม่ย เปียะ เยีย เญย เปย๊า. เม่ย ขูง ก๊อง ธ้วด ฮนั้ง, เยีย เญย โปว ฯฒฯ หลง อ๊ะ.

9เยีย กั้น หย่า เยียม ต้ม แปง-เปย๊ย เญย ปั์ว-เดี๊ย, หย่า ม่าย แปง ธั้ม เยียม เยีย เญย กะเดี๊ย แหมง. เยีย เห่ว น้าย เต้า มี่ง, นิ่น ฯฒฯ มี่ง, เห่ว วั้ว เต้า ต้าย, นิ่น ฯฒฯ ต้าย. เห่ว เยีย เญย โน่ว โหฒว น้าย, นิ่น ฯฒฯ โหฒว อ๊ะ.”

10เยซู ไฮ์ น้าย เต๋ย หว่า นิ่น บัวะ ฮ่อง ไห่ ฯฒฯ บั๋ว กัน นิ่น ต้าย วั้ว เต๋ย เมี่ยน, “เยีย ก๊อง เฒียน บั๋ว เม่ย บัว, เยีย ไม้ ปวัด เจี๋ย เมี่ยน เสียน ด่ง น้าย หลง. เลี่ยม อิสะลาเอน เมี่ยน หย่า ไม้ ม่าย เหยียด เต้า.

11เยีย หย่า บั๋ว เม่ย บัว, ม่าย เมี่ยน ธั้ม เญย เยียม ตง ปูง เหธา ไฟ ปูง อ๋อย ต้าย เยียม ทิน-ฮู่ง เญย กั๊วะ เหธา อับลาฮัม, อีสัก เหธา ยาโค้บ จวั่ง เตี้ย หญั่น หฮนาง.

12มป่า หอบ หฒุ เป๋น ทิน-ฮู่ง เญย กั๊วะ เญย เมี่ยน วั้ว เต๋ย, ต๋าว หฑวน หฒุ หฒุ่น ธ้วด กะเหญี่ย หฮมวัง เญย ต๋อง, เยียม วั้ว ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย.”

13เยซู แอ๋ง บั๋ว แปง-เปย๊ย, “กุ๊น หฑวน เปย๊า อ๊ะ. เอย เม่ย เสียน เญย, หฒะเก้ง อ๋อย ฮนั้ง น้าย นอ ธ้วด ต้าย อ๊ะ.” ต๋อย วั้ว นอม เฒี่ยง โห่ นิ่น เญย โปว ฯฒฯ หลง หมี่ อ๊ะ.

14เยซู เปียะ ปีเต เญย เปย๊า, ปวัด ปีเต เญย มา-เตี๊ย ปุ๊ด แป่ง, ซิน จอม เญย, เปว๋ย เจี๊ยน วั้ว โหธว.

15เยซู นั้น นิ่น เญย ปั์ว, ซิน ฯฒฯ ล่าง หมี่ อ๊ะ. นิ่น ฯฒฯ เจี์ย ซิน ต้าย ฟู-สู เยซู.

16ลู่ง ม์าน-หฮมวัง, ม่าย เมี่ยน ต้อ หฒุ เมี้ยน มัวะ เญย เมี่ยน ธั้ม เญย ต้าย ล์อ เยซู. เยซู ก๊อง ดุ โจ๋ว หว่า ฮนั้ง ฯฒฯ หฒุ่น เมี้ยน ธ้วด เหฑ่ง หมี่ อ๊ะ. เต้าๆ เญย แป่ง หย่า หฒ่อ หลง เหฑ่ง.

17นิ่น ฮนั้ง น้าย โหฒว เหว่ย ปุน นิ่น โหฒว เญย สี่ ธ้วด ต้าย ต๋อย โต่ว หว่า เมี่ยน, อิสะยา, ก๊อง เญย หว่า. อิสะยา ก๊อง, “นิ่น ดาม เยีย บัว เญย แป่ง ถง, หย่า เถย เยีย บัว เญย เหฒะ หน่าน.”

18เยซู ปวัด เมี่ยน ธั้ม เว่ย ก๋อม นิ่น, ฯฒฯ บั๋ว ไซ-ก๋อ บัว ต้อ นิ่น เจี๋ย วั้ว หง่าน หฒิ ค้อย-ตอน.

19วั้ว หฒั่น ม่าย เต้า หฌาว เล์ย เญย ฟิน-แซง ต้าย ล์อ เยซู. นิ่น ก๊อง, “ฟิน-แซง อ้า! ไม้ กุ๊น ฟิน-แซง มี่ง หาย, เยีย อ๋อย กัน เม่ย มี่ง อ๊ะ.”

20เยซู ก๊อง บั๋ว นิ่น, “เฮยี่ย จู๊ ม่าย แบ๋ง-ค้วด เยียม, เหนาะ หย่า ม่าย เล์า, มป่า เยีย, ป้าม เมี่ยน เญย ตอน, ไม้ ม่าย ต๋อง เปว๋ย ฮิด ขวน.”

21แอ๋ง ม่าย เต้า ไซ-ก๋อ บั๋ว เยซู, “ต้ม ก๋อ อ่า, เยีย โท้ หฑวน มี่ง ปย๊บ เยีย เญย เตีย ด่าง.”

22เยซู เตา, “เซว่ย จั๋น-ไต่ กั้น ปย๊บ นิ่น บัว กั้น เญย จั๋น-ไต่ อ๊ะ. กัน เจี๊ยน เยีย ต้าย ม่าะ!”

23เยซู เปียะ ฑั้ง, ไซ-ก๋อ บัว หย่า กัน เจี๊ยน เปียะ.

24แฑง เจี๊ยน ฑั้ง มี่ง เกา, เลี่ยม เฒ่ย ป์อง กอง ต้ม หฑยาว, ป่วน ววม เจี์ย หล่าง ฆ์ม เปียะ ฑั้ง. มป่า เยซู เปว๋ย มฌ่อม หมี่ อ๊ะ.

25ไซ-ก๋อ บัว มี่ง เห่ว นิ่น เญีย ต้าย. นิ่น บัว ก๊อง, “เฒี้ยว อ้า! เฒี้ยว! ก๊าน เหฌียว แหม่ง โอ๊! ด๊อด ววม ไต่ อ๊ะโล่ะ!”

26เยซู เตา, “เม่ย บัว เหว่ย หาย ติ่ว ด่ง หน่าย กั้ม เหฑีย? เม่ย บัว เสียน ตุ๊ เฮย ไห่ เว่ะ!” เยซู ฯฒฯ เจี์ย ซิน ต้าย หัด หฑยาว เหธา ววม-หล่าง. ต้ม หฑยาว ฯฒฯ ตี้ง หมี่ อ๊ะ. ววม-หล่าง หย่า ฮ้าบ. หาย หญู่ง หย่า เซ้ก เหฑ่ง หมี่ อ๊ะ.

27ไซ-ก๋อ บัว บัวะ ฮ่อง ไห่ หย่า ก๊อง, “น้าย หาย หญู่ง เมี่ยน เอ้าะ? เลี่ยม หฑยาว เหธา ววม-หล่าง หย่า หมวัง นิ่น เญย หว่า.”

28เยซู เจี๋ย วั้ว หง่าน หฒิ ค้อย-ตอน เถา กาดาลา เต่ย. ม่าย อี เต้า เมี่ยน เยียม โฒ้ว-เก้ม ธ้วด ต้าย ปวั้ง หฒุ เยซู. น้าย เต๋ย อี เต้า เมี่ยน ม่าย เมี้ยน เยียม นิ่น บัว เญย ซิน, นิ่น บัว ฯฒฯ เธี้ยว ไห่. ไม้ ม่าย หาย เต้า ก๊าม ยั่ง วั้ว ติ้ว เจ๊า.

29น้าย เต๋ย อี เต้า เมี่ยน เลี่ยม เฒ่ย เห่ว บุย เญย, “ทิน-ฮู่ง เญย ตอน อ้า! เม่ย ต้าย เยีย บัว น้าย โหฒว หาย หญู่ง? เฒี่ยง โห่ ไม้ แก้ง เถา เม่ย ต้าย เหฒย เยีย บัว ไฟ?”

30ม่าย เหยียด ต้ม กวั้น ตู์ง เล่ย วั้ว โก เต๋ย เญย ล์อ หญั่น.

31น้าย เต๋ย เมี้ยน ฯฒฯ โท้ เยซู, “เม่ย หฒุ่น เยีย บัว ธ้วด นอ, ปุน เยีย บัว มี่ง เปียะ วั้ว กวั้น ตู์ง ม่าะ!”

32เยซู ก๊อง, “มี่ง อ๊ะ!” เมี้ยน ฯฒฯ ธ้วด วั้ว เต๋ย อี เต้า เมี่ยน มี่ง เปียะ ตู์ง เหฑ่ง. เฒี่ยง กวั้น ตู์ง ฯฒฯ ถิว เหฌี่ย ขัม ด๊อด ววม เหฒียม ไต่ เหฑ่ง หมี่ อ๊ะ.

33ยู์ง ตู์ง เญย เมี่ยน เปย๋า เปียะ มู้ง มี่ง, ก๊อง เหฑ่ง เหยียด ฒู้ง ธ้วด ต้าย เญย สี่ เหธา ฒิ่น ด่าง ม่าย เมี้ยน เยียม ซิน วั้ว เต๋ย อี เต้า เมี่ยน เญย เจ๊า-โหล่ว.

34เหยียด ฒี่ง เมี่ยน ฯฒฯ ธ้วด มี่ง ล์อ เยซู. ล์อ ปวัด, นิ่น บัว ชะ โท้ เยซู ธ้วด นิ่น บัว เญย เต่ย-จ๋าย มี่ง.

← Chapter 7 Jump to: Chapter 9 →