Matthew 12

Mien Bible (Thai Script) © Thailand Bible Society, 2007

1ฆะฮ้า ไม้ หนั่ง เล่า, ม่าย นอม ตี้ง กง ฮนอย, เยซู เจี๋ย เมี่ยน เญย เบย้า เด่ย. นิ่น เญย ไซ-ก๋อ บัว เฮญี้ยว เซีย, ฯฒฯ เนี้ยด เบย้า ต๊อ หญั่น.

2ฟาลิสี เมี่ยน ปวัด ฯฒฯ ก๊อง บั๋ว เยซู, “หมั่ง ก๋า, เม่ย เญย ไซ-ก๋อ บัว ฮนั้ง น้าย นอ โหฒว, นิ่น บัว โหฒว ต่อง ตี้ง กง ฮนอย เญย เล์ย.”

3เยซู เตา, “เม่ย บัว ไม้ โตะ เจี๋ย น้าย เต๋ย เจ๊า ไฟ? ดาวิด ฮู่ง เหธา กัน นิ่น วั้ว เต๋ย เมี่ยน เฮญี้ยว เซีย เญย เฒี่ยง โห่, นิ่น บัว ฮนั้ง หาย นอ โหฒว?

4ดาวิด เปียะ หฒั่ง ทิน-ฮู่ง เญย ด๊บ-ลิ่ว เฒาะ เก๋ง ทิน-ฮู่ง วั้ว เต๋ย ฌั้ว หญั่น. นิ่น เหธา นิ่น เญย เมี่ยน หย่า ไม้ ม่าย เล์ย หญั่น วั้ว เต๋ย ฌั้ว. ขูง ม่าย ไซ เมี่ยน กั้น ม่าย เล์ย หญั่น ฮนั้ง.

5เม่ย บัว หย่า ไม้ โตะ เจี๋ย โมเซ เญย เล์ย-หลัด ไฟ? โม์ว นอม ตี้ง กง ฮนอย, ไซ เมี่ยน เยียม หฒั่ง ทิน-ฮู่ง เญย เปย๊า โหฒว ต่อง ตี้ง กง ฮนอย เญย เล์ย มป่า นิ่น บัว ไม้ ม่าย ฒุ์ย.

6เยีย บั๋ว เม่ย บัว, เยียม น้าย ม่าย เต้า เก้า โฮล เจี๋ย หฒั่ง ทิน-ฮู่ง เญย เปย๊า.

7กีง-โซว ก๊อง, ‘เยีย อ๋อย เมี่ยน ม่าย เฮญี้ยว ค้อ-เลี่ยน เมี่ยน, ไม้ เฒ์ย อ๋อย เมี่ยน ต้อ แซง-คู้ ต้าย เหฒี่ย เยีย.’ สี ก๊อง เม่ย บัว หฒะเก้ง เม่ง แปะ น้าย โจ๋ว หว่า เญย เอ๋ย เล์ย, เม่ย บัว ไม้ เฒาะ ไม้ โหฒว ต่อง เญย เมี่ยน ตี่ง ฒุ์ย,

8เหว่ย หฒุ เยีย, ป้าม เมี่ยน เญย ตอน, โหฒว ตี้ง กง ฮนอย เญย เฒี้ยว.”

9เยซู ธ้วด วั้ว นอม ต๋อง แอ๋ง มี่ง เปียะ นอม หวุ่ย ต้อง.

10เยียม วั้ว ม่าย เต้า เมี่ยน ม่าย เจี๊ยะ ปั์ว หว่าย. ม่าย เต๋ย เมี่ยน อ๋อย ล์อ เจ๊า โก๋ เยซู, นิ่น บัว ฯฒฯ หน่าย ก๋า, “หล่ง ตี้ง กง ฮนอย หฒ่อ แป่ง เซ ต่อง บัว เญย เล์ย ไฟ ไม้ ต่อง?”

11เยซู เตา, “สี ก๊อง เม่ย บัว หาย เต้า ม่าย เต้า ปะกี ยู่ง, ตี้ง กง ฮนอย วั้ว เต้า ปะกี ยู่ง ด๊อด ค้วด มี่ง, เม่ย บัว ไม้ เฒ์ย มี่ง เฒาะ นิ่น แปง ธ้วด ต้าย ไฟ?

12เหยียด ล่าน เมี่ยน เซ เก้า จ๋าย เจี๋ย เหยียด เต้า ปะกี ยู่ง. ฮนั้ง หน่าย, เล์ย-หลัด ปุน บัว หล่ง ตี้ง กง ฮนอย โหฒว คู้ สี่ ตุ๊ เญย.”

13เยซู ฯฒฯ ก๊อง บั๋ว ปั์ว หว่าย วั้ว เต้า เมี่ยน, “ซูง เม่ย เญย ปั์ว ธ้วด ต้าย ม่าะ!” นิ่น ฯฒฯ ซูง ปั์ว ธ้วด ต้าย. นิ่น เญย ปั์ว ฯฒฯ หลง เหฑ่ง ฮนั้ง หลง วั้ว เจี๊ยะ นอ.

14ฟาลิสี เมี่ยน ฯฒฯ ธ้วด มี่ง ธ่าง ล่าง ฮนั้ง หาย นอ ไฮ่ ไต๋ เยซู.

15เยซู ฮิ้ว ตุ๊ นิ่น บัว ฮนั้ง น้าย นอ ต๊า หฒะเอ๋ย, นิ่น ฯฒฯ ธ้วด วั้ว นอม ต๋อง หมี่ อ๊ะ. เมี่ยน ธั้ม เญย กัน เจี๊ยน นิ่น มี่ง. เยซู หย่า หฒ่อ หลง เหฑ่ง เต้าๆ เญย แป่ง,

16แอ๋ง หัด นิ่น บัว ไม้ ตู๋ง ก๊อง บั๋ว เมี่ยน นิ่น ต้ง หาย เต้า.

17นิ่น ฮนั้ง น้าย นอ โหฒว เหว่ย ปุน สี่ ธ้วด ต้าย ต๋อย โต่ว หว่า เมี่ยน, อิสะยา, โต่ว ต้าย เญย หว่า.

18อิสะยา ก๊อง, “หมั่ง ม่าะ! น้าย เซ เยีย เญย โปว, ต้ง เยีย กิ๊น ต้าย วั้ว เต้า. เยีย ฮนั้ม ไห่ นิ่น. นิ่น หย่า หอบ เยีย เญย เฮญี้ยว ไห่. เยีย อ๋อย เฒาะ เยีย เญย สีง ลี่ง เหธย ปุน นิ่น. นิ่น อ๋อย ฒุ่น เยีย โหฒว แป้ง ฟิม เญย เจ๊า ปุน หม่าน ฝีง หมวัง.

19นิ่น ไม้ แฑง จ๋า หย่า ไม้ เห่ว เฉีย บุย, หย่า ไม้ ม่าย หาย เต้า ไฮ์ นิ่น เยียม จาย-ห่อง เญย เฉีย.

20หลัวะ ติ แกว๊ง ต๊บ มี่ง, นิ่น หย่า ไม้ อ๊าว ดุ๊ด, ตัง-โธ้ กั๋น เญย เสียว นิ่น หย่า ไม้ ปย๊ม ไต่. นิ่น อ๋อย ฮนั้ง น้าย โหฒว เจี๊ยน มี่ง เถา แป้ง ฟิม เญย เจ๊า ฮี่ง.

21หม่าน ฝีง เมี่ยน หย่า อ๋อย เสียน เขา นิ่น ฯฒฯ ม่าย ลั่ม ฮนั้ม ต๋อง อ๊ะ.”

22วั้ว หฒั่น เมี่ยน ต้อ เต้า เมี่ยน ต้าย ล์อ เยซู. น้าย เต้า เมี่ยน หฒุ เมี้ยน มัวะ นิ่น มฒีง แม่ง หย่า มัวะ นิ่น หฮงง, ไม้ ไฮ่ ก๊อง หว่า. เยซู ฯฒฯ หฒ่อ หลง ต้าย, ไฮ่ ก๊อง หว่า อ๊ะ. มฒีง หย่า ไฮ่ หมั่ง ตุ๊ ปวัด อ๊ะ.

23หฒวัง เมี่ยน บัวะ ฮ่อง ไห่ เยซู โหฒว เญย สี่. ล่าน หน่าย ล่าน, “น้าย เต้า เก้ง ดาวิด ฮู่ง เญย เฒ้ย-ฟุน ไฟ นี?”

24ฟาลิสี เมี่ยน ไฮ์ น้าย เต๋ย สี่, นิ่น บัว ก๊อง, “น้าย ล่าน เมี่ยน ไฮ่ หฒุ่น เมี้ยน ธ้วด เซ หลาย นิ่น หล่ง เมี้ยน เญย ฮู่ง, เบเอนเซบูน, เญย หลี่ง หฒุ่น ฮนั้ง.”

25เยซู ฮิ้ว ตุ๊ นิ่น บัว ฮนั้ง หาย นอ ฮนั้ม, นิ่น ฯฒฯ ก๊อง, “หาย นอม กั๊วะ ปุน ฆอย โหฒว เหฒีย เจ๊า, กั้น เญย กั๊วะ หฒั่ง เมี่ยน เหธา กั้น เญย กั๊วะ หฒั่ง เมี่ยน เบ๊าะ จ๋า, วั้ว นอม กั๊วะ ฯฒฯ ป่าย เหฑ่ง อ๊ะ. หาย นอม มู้ง ไฟ หาย เปย๊า เมี่ยน ไม้ ต้ง เฮญี้ยว, ปุน ฆอย, น้าย กวั้น เหธา วั้ว กวั้น เบ๊าะ จ๋า, ฯฒฯ ป่าย หมี่ อ๊ะ.

26ฮนั้ง หน่าย, สี ก๊อง ซาตาน หฒุ่น ซาตาน ธ้วด, น้าย ปุน ธีง นิ่น เญย กั๊วะ ปุน ฆอย. นิ่น เญย กั๊วะ ฮนั้ง หาย นอ ไฮ่ เยียม ตุ๊ ว้วน?

27เม่ย บัว ก๊อง เยีย หล่ง เบเอนเซบูน เมี้ยน เญย หลี่ง หฒุ่น เมี้ยน ธ้วด. วั้ว หญู่ง เม่ย บัว เญย ไซ-ก๋อ นี? นิ่น บัว หล่ง หาย เต้า เญย หลี่ง หฒุ่น เมี้ยน ธ้วด? เม่ย บัว เญย ไซ-ก๋อ โหฒว เญย สี่ ปุน ธีง เม่ย บัว ต่อง อ๊ะ.

28เยีย เขา ทิน-ฮู่ง เญย สีง ลี่ง หฒุ่น เมี้ยน ธ้วด. น้าย ปุน ธีง ทิน-ฮู่ง ต้าย เยียม เม่ย บัว บุด๋ง โหฒว เฒี้ยว อ๊ะ.

29“ฮนั้ง หาย นอ ไฮ่ เปียะ เมี่ยน เฮ้น เมี่ยน เญย เปย๊า ธ้าง นิ่น เญย กะน้าย? อ๋อย หฒุ โด้ เจี๊ยน วั้ว เต้า เมี่ยน เฮ้น เมี่ยน ด่าง หธีง ต้าย ไฮ่ ธ้าง ตุ๊ นิ่น เญย กะน้าย.

30“หาย เต้า ไม้ กัน เยีย เซ เหธา เยีย ต๋อย-เตก. หาย เต้า ไม้ เถง เยีย เซียว ฒุ้น, วั้ว เต้า โหฒว ปุน หฑาน เหฑ่ง หมี่ อ๊ะ.

31เหว่ย น้าย เยีย บั๋ว เม่ย บัว, เมี่ยน ป์าม เญย เหยียด ฒู้ง ฒุ์ย, เหธา ก๊อง คี เญย เหยียด ฒู้ง หว่า, ทิน-ฮู่ง ไฮ่ กวั่ง เหฑ่ง. มป่า หาย เต้า ก๊อง คี สีง ลี่ง, ทิน-ฮู่ง ไม้ กวั่ง วั้ว เต้า เญย ฒุ์ย อ๊ะ.

32หาย เต้า ก๊อง โตะ เยีย, ป้าม เมี่ยน เญย ตอน, ทิน-ฮู่ง ฯฒฯ กวั่ง วั้ว เต้า เญย ฒุ์ย. มป่า หาย เต้า ก๊อง โตะ สีง ลี่ง, ทิน-ฮู่ง ไม้ กวั่ง วั้ว เต้า เญย ฒุ์ย ไม้ กุ๊น เยียม น้าย กิ๊ด ลู่ง เดี๊ย ไฟ ฆะฮ้า วั้ว กิ๊ด ลู่ง เดี๊ย.

33“สี ก๊อง เดี๋ยง หลง ฯฒฯ เฒี่ยง เปี๊ยว หลง. ไม้ เป๋น เญย เดี๋ยง เฒี่ยง เปี๊ยว ไม้ เป๋น. ปวัด หาย หญู่ง เปี๊ยว ฯฒฯ ฮิ้ว ตุ๊ เป๋น หาย หญู่ง เดี๋ยง.

34เม่ย บัว หน่าย ดุย นาง-โตะ เญย ป๊วน อ้า! เม่ย บัว เฮญี้ยว หว่าย เญย เมี่ยน ฮนั้ง หาย นอ ไฮ่ ก๊อง คู้ หว่า? เหว่ย หฒุ เฮญี้ยว ฒ่าง ปวั๊ง หาย หญู่ง, ฑุ่ย ฯฒฯ ก๊อง ธ้วด วั้ว หญู่ง อ๊ะ.

35คู้ เมี่ยน เญย เฮญี้ยว เซียว หลง เญย กะน้าย, เฒาะ ธ้วด ต้าย เญย หย่า หลง. หว่าย เญย เมี่ยน เซียว หว่าย เญย กะน้าย, เฒาะ ธ้วด ต้าย เญย หย่า หว่าย.

36“เยีย บั๋ว เม่ย บัว, เถา เซี้ยม ฒุ์ย วั้ว ฮนอย, โม์ว ล่าน เมี่ยน ก๊อง เญย โจ๋วๆ เฮ่น หว่า, เก๊าะ-เมี่ยน กั้น อ๋อย หฒุ ดาม-ตอง.

37ทิน-ฮู่ง อ๋อย หล่ง เม่ย กั้น เญย หว่า ตี่ง เม่ย ม่าย ฒุ์ย ไฟ ไม้ ม่าย ฒุ์ย.”

38วั้ว หฒั่น ม่าย เต๋ย หฌาว เล์ย เญย ฟิน-แซง เหธา ฟาลิสี เมี่ยน ก๊อง บั๋ว เยซู, “ฟิน-แซง อ่า, เยีย บัว อ๋อย ปวัด นอม เม่ย ปุน ต้าย เญย จั๋ง-โห่.”

39เยซู ก๊อง, “อี้ จ๋า เญย เมี่ยน หว่าย ไห่, ม่าย เฮยี่ย เฮญี้ยว. เม่ย บัว โท้ จั๋ง-โห่ มป่า ธ้วด ลิ์ว โต่ว หว่า เมี่ยน, โยนา, เญย จั๋ง-โห่, กั้น นอม เม่ย บัว ไม้ ตุ๊ หมั่ง อ๊ะ.

40โยนา เยียม ต้ม เบย์า เญย กะเซีย ปัว ฮนอย ปัว ม์วน, ป้าม เมี่ยน เญย ตอน ฟี่ ฮนั้ง เญย อ๋อย หฒุ เยียม เดา-เดี๊ย ปัว ฮนอย ปัว ม์วน.

41เถา ทิน-ฮู่ง เซี้ยม ฒุ์ย วั้ว ฮนอย, นินะเว เมี่ยน อ๋อย โซ้ว เจี์ย ต้าย โก๋ อี้ จ๋า เมี่ยน, เหว่ย หฒุ โยนา มี่ง ฒุ่น โต์ วั้ว หฒั่น, นิ่น บัว ฒู้ง ก๊อย เฮญี้ยว กวั่ง ฒุ์ย หมี่ อ๊ะ. หมั่ง ม่าะ! อี้ หฒั่น เยียม น้าย หธ่อ ม่าย เต้า เก้า โฮล เจี๋ย โยนา.

42เถา ทิน-ฮู่ง เซี้ยม ฒุ์ย วั้ว ฮนอย, เยียม น่าม ปูง วั้ว เต้า ฮู่ง หม่า อ๋อย โซ้ว เจี์ย ต้าย โก๋ อี้ จ๋า เมี่ยน, เหว่ย หฒุ วั้ว เต้า ฮู่ง หม่า เยียม ลู่ง กอน ต้าย หมวัง ซาโลมอน ฮู่ง ธง-เม่ง เญย หว่า. หมั่ง ม่าะ! อี้ หฒั่น เยียม น้าย ม่าย เต้า เก้า โฮล เจี๋ย ซาโลมอน.

43“เฮยี่ย ไกว๊ เมี้ยน เยียม เมี่ยน เญย ซิน ธ้วด ต้าย วั้ว หฒั่น นิ่น โย่ว เจี๊ยน เต่ย-ปูง-ฮ์าน มี่ง ล์อ ต๋อง ฮิด. มี่ง เกา, ล์อ ไม้ ตุ๊ ต๋อง ฮิด.

44เมี้ยน ฯฒฯ ก๊อง, ‘อา, เยีย อ๋อย หฑวน เยีย เญย โล์-เปย๊า เยียม อ๊ะ.’ นิ่น ฯฒฯ หฑวน มี่ง ปวัด นิ่น เญย โล์-เปย๊า พ้วด ฌัง เหฑ่ง, เบ่น ซูง, เฮ่นๆ วั้ว.

45นิ่น ฯฒฯ แอ๋ง มี่ง ล์อ เสี่ย เต้า เมี้ยน เก้า เธี้ยว เจี๋ย นิ่น ต้าย. นิ่น บัว ฯฒฯ เปียะ วั้ว เต้า เมี่ยน เญย ซิน เยียม. วั้ว เต้า เมี่ยน ฯฒฯ เก้า โค้ว ฒิ่น ด่าง อ๊ะ. เม่ย บัว น้าย ต่อย เฮญี้ยว หว่าย เญย เมี่ยน หย่า อ๋อย หฒุ ฮนั้ง หน่าย.”

46เยซู หธ่อ เหธา หฒวัง เมี่ยน ก๊อง เจี๊ยน หว่า วั้ว หฒั่น, เยซู เญย มา เหธา นิ่น เญย โย์ว บัว เถา อ๊ะ, โซ้ว กะเหญี่ย แหมง อ๋อย เหธา เยซู ก๊อง หว่า.

47ม่าย เต้า เยียม วั้ว เญย เมี่ยน ฯฒฯ บั๋ว เยซู, “เม่ย เญย มา เหธา เม่ย เญย โย์ว บัว โซ้ว เจี๊ยน กะเหญี่ย แหมง, อ๋อย เหธา เม่ย ก๊อง หว่า.”

48เยซู เตา, “หาย เต้า โหฒว เยีย เญย มา? หาย เต้า โหฒว เยีย เญย มั์ว-ต่อย?”

49นิ่น ฯฒฯ นุ เจี๊ยน นิ่น เญย ไซ-ก๋อ บัว หย่า ก๊อง, “หมั่ง ม่าะ! น้าย เต๋ย เมี่ยน เซ เยีย เญย มา เหธา เยีย เญย มั์ว-ต่อย.

50หาย เต้า เอย เยีย เญย ทิน-ต้อง เตี๋ย เญย เอ๋ย โหฒว, วั้ว เต้า โหฒว เยีย เญย มั์ว-ต่อย หย่า โหฒว เยีย เญย มา.”

← Chapter 11 Jump to: Chapter 13 →