Matthew 24

Mien Bible (Thai Script) © Thailand Bible Society, 2007

1เยซู เยียม หฒั่ง ทิน-ฮู่ง เญย เปย๊า ธ้วด ต้าย, ยั่ง เจี๊ยน เจ๊า มี่ง วั้ว หฒั่น, ไซ-ก๋อ บัว ต้าย นุ เจี๊ยน หฒั่ง ทิน-ฮู่ง เญย เปย๊า-เฮลน วั้ว เต๋ย เปย๊า เห่ว นิ่น หมั่ง.

2เยซู ก๊อง, “เม่ย บัว ปวัด น้าย เต๋ย เปย๊า เญย ซ่าะ? เยีย บั๋ว เฒียน เม่ย บัว, ม่าย นอม ฮนอย เหยียด ฒู้ง อ๋อย หฒุ แธะ เหฑ่ง. ไม้ ม่าย เหยียด คว้าย หละเปย๊ย ลับ เจี๊ยน อ๊ะ.”

3เยซู เฒว์ย เจี๊ยน กะลั้น บง วั้ว หฒั่น, ไซ-ก๋อ บัว กั้น เหล่ง เจ๊ย ต้าย หน่าย นิ่น, “โท้ บั๋ว เยีย บัว โอ่. น้าย เต๋ย สี่ หาย หฒั่น อ๋อย ธ้วด? ม่าย หาย หญู่ง จั๋ง-โห่ อ๋อย ปุน ธีง เม่ย แอ๋ง อ๋อย ต้าย หย่า ปุน ธีง ป้าม เกน เญย เซ้ด เมว์ย อ๋อย เถา?”

4เยซู เตา, “อ๋อย หฒุ ไฝ ฟิม, ไม้ ตู๋ง หมวัง หาย เต้า ดั๊ว เม่ย บัว.

5ม่าย เมี่ยน ธั้ม เญย อ๋อย หล่ง เยีย เญย บั๋ว ต้าย ก๊อง, ‘เยีย เซ ต้ง กีตู่ วั้ว เต้า อ๊ะ.’ นิ่น บัว ฯฒฯ ดั๊ว เมี่ยน ธั้ม.

6เถา วั้ว หฒั่น เม่ย บัว ตุ๊ ไฮ์ เมี่ยน เบ๊าะ ต้ม จ๋า หย่า ไฮ์ เบ๊าะ ต้ม จ๋า เญย เฝียน, มป่า เม่ย บัว ไม้ ตู๋ง กั้ม เหฑีย. น้าย เต๋ย สี่ ด่ง หาย อ๋อย หฒุ ธ้วด, มป่า เซ้ด เมว์ย เญย ฮนอย-เหญียะ ไม้ แก้ง เถา.

7น้าย ฝีง อ๋อย เหธา วั้ว ฝีง เบ๊าะ จ๋า. น้าย นอม กั๊วะ อ๋อย เหธา วั้ว นอม กั๊วะ เบ๊าะ ต้ม จ๋า. ม่าย เต๋ย ต๋อง อ๋อย หฒุ หง่อ หฮนาง, ม่าย เต๋ย ต๋อง เดา ต์ง.

8น้าย เต๋ย สี่ ธ้วด ต้าย ปุน ธีง เซ้ด เมว์ย เญย ฮนอย-เหญียะ เจี์ย กอน ธ้วด.

9“เถา วั้ว หฒั่น เม่ย บัว ฯฒฯ หฒุ เฒาะ จิว ปุน เมี่ยน โหฒว โตะ หย่า ไต๋ กวั่ง. หลาย เยีย, หม่าน ฝีง อ๋อย ฑอง เม่ย บัว.

10วั้ว หฒั่น เมี่ยน ธั้ม อ๋อย ธ้วด, ไม้ เสียน เยีย. ล่าน อ๋อย เฒาะ ล่าน จิว ปุน วิน-วั้ง. ล่าน หย่า อ๋อย ฑอง ล่าน.

11แอ๋ง ม่าย จ๊า โต่ว หว่า เมี่ยน ธั้ม เญย ธ้วด ต้าย ดั๊ว เมี่ยน ธั้ม.

12ฮยวัง เอ๊าะ เญย สี่ อ๋อย ฟ้าน, เมี่ยน ธั้ม เญย เฮญี้ยว ฯฒฯ หนัม เจี๊ยน เหฌี่ย, ไม้ ฮนั้ม เมี่ยน หย่า ไม้ ฮนั้ม ทิน-ฮู่ง.

13มป่า หาย เต้า เตี๊ย ตุ๊ เถา ต้าว เถา เมว์ย, วั้ว เต้า ฯฒฯ ตุ๊ เหฌียว อ๊ะ.

14ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน ฒู้ง อ๋อย ฒุ่น ปวั๊ง ลู่ง เดี๊ย เหว่ย โหฒว ฒอง-เหฒง ปุน หม่าน ฝีง ฮิ้ว. ฆะฮ้า, เซ้ด เมว์ย เญย ฮนอย-เหญียะ ฯฒฯ เถา อ๊ะ.

15“เม่ย บัว ฯฒฯ ตุ๊ ปวัด โต่ว หว่า เมี่ยน, ดานีเอน, ก๊อง เจี๋ย เญย สี่ ธ้วด. ม่าย โหฒว ปุน หญู่งๆ หว่าย วั้ว เต้า ต้ม เฮยี่ย โหยว เยียม เจี๊ยน ธีง-เหฑ่ง เญย ต๋อง, (โตะ โซว เญย เมี่ยน อ๋อย หฒุ เม่ง แปะ น้าย เต๋ย หว่า.)

16วั้ว หฒั่น, เยียม ยูเดีย แซ้ง วั้ว เต๋ย อ๋อย หฒุ เปย๋า ฝาว บง.

17เมี่ยน เยียม เปย๊า-ง่อ อ๋อย หฒุ ก๊าน เหฌี่ย, เลี่ยม ไม้ ตู๋ง เปียะ เปย๊า เฒาะ หาย หญู่ง ต้อ มี่ง.

18เยียม เด่ย เญย เมี่ยน ไม้ ตู๋ง หฑวน เปย๊า เฒาะ กั้น เญย ต้ม ลุย.

19เยียม วั้ว เต๋ย ฮนอย-เหญียะ ม่าย เจี๊ยน ซิน เญย, เหธา ม่าย กู้งว์า ฮบ หญอ เญย มเซียะ ตอน หฒะเก้ง หฒุ โค้ว อ๊ะ.

20เม่ย บัว อ๋อย หฒุ โท้ ทิน-ฮู่ง, เถา เปย๋า เญย เฒี่ยง โห่ ไม้ ตู๋ง ปุน ต๋อย หฒุ ตง-เกน ฮนอย ไฟ ต๋อย หฒุ ตี้ง กง ฮนอย.

21เหว่ย หฒุ เถา วั้ว หฒั่น ม่าย ต้ม เหฒะ หน่าน. เยียม เหฒย ลู่ง เหฒย เดา ต้าย ไม้ ม่าย เจี๋ย ด่ง น้าย หฑุ่น เซียม. ยั่ง น้าย เจี๋ย เหยียด ลิ์ว หย่า ไม้ ม่าย อ๊ะ.

22สี ก๊อง ทิน-ฮู่ง ไม้ ปุน วั้ว เต๋ย ฮนอย-เหญียะ โหฒะ เหฌี่ย เต๋ย, ไม้ ม่าย หาย เต้า ตุ๊ แหม่ง ธ้วด. เซ เหว่ย ทิน-ฮู่ง กิ๊น ต้าย เญย เมี่ยน นิ่น หธีง ต้าย อ๋อย ปุน วั้ว เต๋ย ฮนอย-เหญียะ โหฒะ เหฌี่ย.

23“วั้ว หฒั่น, สี ก๊อง หาย เต้า บั๋ว เม่ย บัว, ‘หมั่ง ก๋า, กีตู่ เยียม น้าย!’ ไฟ ‘กีตู่ เยียม วั้ว!’ ไม้ ตู๋ง เสียน.

24เหว่ย หฒุ ม่าย เมี่ยน ก๊อง นิ่น บัว โหฒว กีตู่ มป่า จ๊า เญย, แอ๋ง ม่าย จ๊า โต่ว หว่า เมี่ยน อ๋อย ธ้วด ต้าย. นิ่น บัว อ๋อย โหฒว ต้ม จั๋ง-โห่ เหธา บัวะ ฮ่อง เญย สี่ ดั๊ว เมี่ยน. สี ก๊อง ไฮ่ ดั๊ว ตุ๊ หฒุ นอ, นิ่น บัว อ๋อย เลี่ยม ทิน-ฮู่ง กิ๊น ต้าย เญย เมี่ยน ดั๊ว.

25หมวัง โอ่. น้าย เต๋ย สี่ ไม้ แก้ง ธ้วด เยีย จา-ด่าง บั๋ว เหฒียง เม่ย บัว.

26“ฮนั้ง หน่าย, สี ก๊อง ม่าย เมี่ยน บั๋ว เม่ย บัว, ‘หมั่ง ม่าะ! นิ่น เยียม วั้ว เต่ย-ปูง-ฮวาง,’ ไม้ ตู๋ง ธ้วด มี่ง ล์อ. เมี่ยน แอ๋ง ก๊อง, ‘หมั่ง ม่าะ! นิ่น เยียม เปย๊า กะญั์ว,’ ไม้ ตู๋ง เสียน.

27เหว่ย หฒุ ป์อง บะหลี่ง เยียม ตง ปูง หฌับ ตั้ง, ฌัง มี่ง เถา ไฟ ปูง ฮนั้ง หาย นอ, เยีย, ป้าม เมี่ยน เญย ตอน, แอ๋ง ต้าย วั้ว หฒั่น หย่า อ๋อย ฮนั้ง วั้ว นอ.

28กะน้าย-ไต่ เยียม หาย, ต้ม จ๊าง-ง่ง หย่า เยียม วั้ว อ๊ะ.

29“วั้ว เต๋ย ฮนอย เญย เหฒะ หน่าน เยี้ยด เจี๋ย ลิ์ว, ‘บะฮนอย ฯฒฯ เจี๊ยะ มี่ง, หฮลา หย่า ไม้ หฒิว ฌัง อ๊ะ. หฒวัง เหฮลย เยียม วั้ว ลู่ง อ๋อย ด๊อด เหฌี่ย ต้าย. เยียม ลู่ง ม่าย ชะ เญย กะน้าย ฒู้ง หฒุ ดั่น ต์ง.’

30“วั้ว หฒั่น เยีย, ป้าม เมี่ยน เญย ตอน, เญย จั๋ง-โห่ อ๋อย เยียม วั้ว ลู่ง ธ้วด ต้าย. ลู่ง เดี๊ย หม่าน ฝีง เมี่ยน ฯฒฯ ปู๋ง-ซีง ปู๋ง-เฉีย เญย เญี้ยม. นิ่น บัว ตุ๊ ปวัด เยีย, ป้าม เมี่ยน เญย ตอน, ม่าย ชะ เหธา ต้ม ฌัง-หล่าง เยียม วั้ว บ๋วน เหฌี่ย ต้าย.

31ม่าย หฑัด เญย เฉีย บุย, เยีย ฯฒฯ พ้าย เยีย เญย ฟิน-เมี่ยน มี่ง เถา เปยย ปูง หฑยาว, เยียม น้าย ปูง ลู่ง กอน มี่ง เถา วั้ว ปูง ลู่ง กอน, เซียว ฒุ้น เยีย กิ๊น ต้าย เญย เมี่ยน.

32“เม่ย บัว อ๋อย หฒุ หล่ง ง่ง หญอ เดี๋ยง โหะ เหยียด ติ่ว. ปวัด เดี๋ยง ธ้วด หธุน, ฆอย น่อม หลุน, เม่ย บัว ฯฒฯ ฮิ้ว ตุ๊ อ๊า ลั่ม เต๋ย เปียะ ห่า เกว๋ย หมี่ อ๊ะ.

33ฟี่ ฮนั้ง เญย, เม่ย บัว ปวัด น้าย เต๋ย เหยียด ฒู้ง สี่ ธ้วด วั้ว หฒั่น, เม่ย บัว ฯฒฯ ฮิ้ว ตุ๊ เยีย, ป้าม เมี่ยน เญย ตอน, เถา ฟัด อ๊ะ, ฒู้ง เยียม เจี๊ยน แก้ง ด่าง อ๊ะ.

34เยีย ก๊อง เฒียน บั๋ว เม่ย บัว, น้าย ต่อย เมี่ยน เกวย เสย ไม้ แก้ง เหฑ่ง, น้าย เต๋ย เหยียด ฒู้ง สี่ ฯฒฯ ธ้วด ต้าย อ๊ะ.

35ลู่ง เดา อ๋อย เจี๋ย เหฑ่ง, มป่า เยีย เญย หว่า เหยียด ลิ์ว ไม้ เจี๋ย.

36“วั้ว นอม ฮนอย, วั้ว นอม เฒี่ยง โห่, ไม้ ม่าย หาย เต้า ฮิ้ว. เลี่ยม ทิน-ต้อง เญย ฟิน-เมี่ยน ไม้ ฮิ้ว. ตอน หย่า ไม้ ฮิ้ว. ขูง หฒั่ง เตี๋ย กั้น ฮิ้ว ฮนั้ง.

37โนยา เญย ลู่ง เดี๊ย ฮนั้ง หาย นอ, เยีย, ป้าม เมี่ยน เญย ตอน, แอ๋ง ต้าย วั้ว หฒั่น หย่า อ๋อย หฒุ ฮนั้ง วั้ว นอ.

38บยู่ง-ซุ้ย-อิ๋ม ไม้ แก้ง เหยียม ลู่ง เดี๊ย วั้ว หฒั่น, เมี่ยน หญั่น หย่า ฮบ, ปู๋ง เซียะ, ก๊อง เอ๊า โหฒว ธีง-จา, เถา โนยา เปียะ ฑั้ง วั้ว ฮนอย.

39นิ่น บัว เลี่ยม ไม้ ฮิ้ว บยู่ง-ซุ้ย-อิ๋ม อ๋อย เหยียม เถา ววม กว๊าด นิ่น บัว มี่ง เหฑ่ง. เยีย, ป้าม เมี่ยน เญย ตอน, แอ๋ง ต้าย วั้ว หฒั่น หย่า อ๋อย ฮนั้ง หน่าย นอ.

40วั้ว หฒั่น ม่าย อี ล่าน เมี่ยน เยียม วั้ว เด่ย โหฒว กง. อ๋อย ฒิบ ล่าน มี่ง, กวั่ง ล่าน เยียม วั้ว.

41ม่าย อี เต้า มเซียะ ตอน หม่อ แหมะ. อ๋อย ฒิบ เต้า มี่ง, กวั่ง เต้า เยียม วั้ว.

42“เหว่ย น้าย เม่ย บัว อ๋อย หฒุ กีง เฮญี้ยว บู้ง เจี๊ยน, เหว่ย หฒุ เม่ย บัว ไม้ ฮิ้ว ตุ๊ เม่ย บัว เญย เฒี้ยว หาย ฮนอย ต้าย.

43น้าย เม่ย บัว ฮิ้ว ตุ๊ เญย. สี ก๊อง เปย๊า-เฒี้ยว ฮิ้ว ตุ๊ ลู่ง ม์วน หฒั่น จั๋น-หฒะ หาย นอม เฒี่ยง โห่ ต้าย, นิ่น ฯฒฯ กีง เฮญี้ยว ฒั้ว เจี๊ยน, ไม้ ปุน จั๋น-หฒะ เปียะ เปย๊า.

44ฮนั้ง หน่าย, เม่ย บัว อ๋อย หฒุ หลิ่ว เล์ย เหฒียง, หฒั่นๆ ฒั้ว เจี๊ยน, เหว่ย หฒุ เม่ย บัว เลี่ยม จั๋ง ไม้ หฒ่าย เญย เฒี่ยง โห่, เยีย, ป้าม เมี่ยน เญย ตอน, ฯฒฯ เถา อ๊ะ.

45“วั้ว หญู่ง, หาย เต้า โหฒว เฮญี้ยว หฒีง, ธง-เม่ง เญย โปว? วั้ว เต้า แอ๊ะ, เฒี้ยว พ้าย โก๋ว นิ่น เญย เปย๊า ฒง เมี่ยน หย่า หฒิว เฒี่ยง โห่ เฒาะ เหยียด หฒวัง โปว เญย ป่วน หญั่น ฮบ ปุน นิ่น บัว.

46เฒี้ยว หฑวน ต้าย ปวัด น้าย เต้า โปว โหฒว ตุ๊ หฒีง, โปว ฯฒฯ เฌียน-โย่ว อ๊ะ.

47เยีย บั๋ว เฒียน เม่ย บัว, เฒี้ยว อ๋อย ปุน น้าย เต้า โปว โก๋ว เหฑ่ง นิ่น เญย เหยียด ฒู้ง จา-ตี้ง.

48มป่า สี ก๊อง วั้ว เต้า โปว ไม้ เป๋น, นิ่น เยียม เฮญี้ยว ฮนั้ม, ‘อา, เยีย เญย เฒี้ยว ไม้ แก้ง หฑวน เซี้ยบ.’

49นิ่น ฯฒฯ ต์ง ซิน เบ๊าะ นิ่น เญย โหฒว โปว ต่อย หย่า เหธา ฮบ ติ๊ว ฆวิน เญย เมี่ยน จวั่ง หญั่น จวั่ง ฮบ.

50โปว จั๋ง ไม้ หฒ่าย เญย ฮนอย, จั๋ง ไม้ หฒ่าย เญย เฒี่ยง โห่, นิ่น เญย เฒี้ยว ฯฒฯ หฑวน ต้าย อ๊ะ.

51เฒี้ยว อ๋อย ตี่ง นิ่น เญย ฒุ์ย เฮนี้ย เญย, หฒุ่น นิ่น มี่ง เหธา เป้ย หฒะ เฮญี้ยว ฌ้วด เญย เมี่ยน เยียม, ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย.”

← Chapter 23 Jump to: Chapter 25 →