Matthew 25

Mien Bible (Thai Script) © Thailand Bible Society, 2007

1“ทิน-ฮู่ง ต้าย โหฒว เฒี้ยว กุ๊น เมี่ยน วั้ว หฒั่น, เป๊ย เหฒียบ เต้า เซียะ-ตอน โป้ว เจี๊ยน โย่ว ตัง ธ้วด มี่ง ฒิบ เซียง-ล่าง นอ.

2วั้ว เต๋ย เซียะ-ตอน, ม่าย ปยา เต้า หฮงง, ม่าย ปยา เต้า ไกว.

3หฮงง วั้ว เต๋ย, โป้ว เจี๊ยน ตัง มี่ง มป่า ไม้ ต้อ โย่ว มี่ง บู้ง.

4ไกว วั้ว เต๋ย, โป้ว เจี๊ยน ตัง แอ๋ง เฒาะ โย่ว ตั๊บ แป้ง ต้อ เจี๊ยน มี่ง.

5วั้ว เต๋ย เซียะ-ตอน ฒั้ว เล่า เญย, ไม้ ปวัด เซียง-ล่าง ต้าย ฯฒฯ มฌ่อม ตะฮงัด, เฒียง หน่าย มฌ่อม เหฑ่ง.

6“เถา ด๊าม ม์วน, ม่าย เฉีย เห่ว เจี๊ยน ก๊อง, ‘เซียง-ล่าง เถา อ๊า โล่ะ! ต้าย ฒิบ นิ่น อ๊ะ.’

7“วั้ว เต๋ย เหฒียบ เต้า เซียะ-ตอน เญีย ต้าย หลิ่ว เล์ย นิ่น บัว เญย ตัง.

8หฮงง วั้ว เต๋ย บั๋ว ไกว วั้ว เต๋ย, ‘โท้ ปุน เต๋ย โย่ว เยีย บัว. เยีย บัว เญย ตัง อ๊า ลั่ม ไต่ อ๊ะ.’

9“ไกว วั้ว เต๋ย เตา, ‘กั้ม เหฑีย โย่ว ไม้ เก๋า ปุน เม่ย บัว เหธา เยีย บัว ล่ม ฑ่อย หล่ง. เม่ย บัว อ๋อย หฒุ มี่ง วั้ว หม่าย โย่ว เญย ต๋อง ม์าย.’

10“หฮงง วั้ว เต๋ย เซียะ-ตอน ฯฒฯ มี่ง ม์าย โย่ว ไม้ แก้ง หฑวน, เซียง-ล่าง เถา ต้าย อ๊ะ. หลิ่ว เล์ย เหฒียง วั้ว เต๋ย ปยา เต้า ฯฒฯ กัน เจี๊ยน เซียง-ล่าง เปียะ มี่ง หญั่น ธีง-จา-หฮนาง. แก้ง ฯฒฯ กวน เจี๊ยน อ๊ะ.

11“ฆะฮ้า หฮงง วั้ว เต๋ย เซียะ-ตอน เถา ต้าย ฯฒฯ เห่ว, ‘ต้ม ก๋อ อ่า, ต้ม ก๋อ! คอย แก้ง ปุน เยีย บัว เปียะ โอ่.’

12“เซียง-ล่าง เตา, ‘เยีย ก๊อง เฒียน เญย, เยีย ไม้ ฮิ้ว ตุ๊ เม่ย บัว.’”

13เยซู แอ๋ง ก๊อง เซ้ด เมว์ย หว่า, “ฮนั้ง หน่าย, เม่ย บัว อ๋อย หฒุ กีง เฮญี้ยว บู้ง เจี๊ยน, เหว่ย หฒุ เม่ย บัว ไม้ ฮิ้ว ตุ๊ วั้ว นอม ฮนอย, วั้ว นอม เฒี่ยง โห่.

14“ทิน-ฮู่ง โหฒว เฒี้ยว กุ๊น เมี่ยน หย่า ฮนั้ง เต้า เมี่ยน อ๋อย ธ้วด เจ๊า มี่ง โก เญย. นิ่น ฯฒฯ เห่ว นิ่น เญย โปว ต้าย หย่า เฒาะ นิ่น เญย จา-ตี้ง จิว ปุน นิ่น บัว โก๋ว.

15นิ่น เอย เก๊าะ-เมี่ยน เญย ปั้น เหฒ่ย ปุน. ม่าย เต้า นิ่น ปุน ปยา หว่าน ฒิ่น. ม่าย เต้า ปุน อี หว่าน ฒิ่น. ม่าย เต้า ปุน เหยียด หว่าน ฒิ่น. ปุน ลิ์ว, นิ่น ฯฒฯ ธ้วด เจ๊า มี่ง หมี่ อ๊ะ.

16ตุ๊ ฒิบ ปยา หว่าน ฒิ่น วั้ว เต้า เลี่ยม เฒ่ย ธ้วด มี่ง โหฒว แซง-เอ๋ย แอ๋ง หฒ่อน ตุ๊ ปยา หว่าน.

17ตุ๊ ฒิบ อี หว่าน วั้ว เต้า หย่า ฟี่ ฮนั้ง เญย โหฒว, แอ๋ง หฒ่อน ตุ๊ อี หว่าน.

18มป่า ตุ๊ เหยียด หว่าน วั้ว เต้า ธ้วด มี่ง เว้ด ค้วด ปย๊บ เจี๊ยน ปี๋ง นิ่น เญย เฒี้ยว เญย ญ่าน.

19“ฆะฮ้า เล่า เญย, วั้ว เต๋ย โปว เญย เฒี้ยว หฑวน ต้าย ติ๊ม หมั่ง นิ่น บัว เญย แฒะ-ตาน.

20ตุ๊ ปยา หว่าน ฒิ่น วั้ว เต้า แอ๋ง ต้อ เจี๊ยน ปยา หว่าน ด๊าว-ต้าว ปุน นิ่น เญย เฒี้ยว. นิ่น ก๊อง, ‘เฒี้ยว อ่า, เม่ย ปุน ปยา หว่าน ฒิ่น. หมั่ง ก๋า น้าย! เยีย แอ๋ง หฒ่อน ตุ๊ ปยา หว่าน.’

21“นิ่น เญย เฒี้ยว ก๊อง, ‘หลง อ๊ะ. เม่ย เซ หลง ไห่, เฮญี้ยว หฒีง เญย โปว. เต๋ย ป๊า ญ่าน ฮนั้ง เม่ย โก๋ว ตุ๊ ด่ง หน่าย หลง, เยีย อ๋อย ปุน เม่ย โก๋ว ธั้ม เญย. กุ๊น เปียะ ต้าย เหธา เยีย เฌียน-โย่ว ม่าะ!’

22“ตุ๊ อี หว่าน ฒิ่น วั้ว เต้า โปว แอ๋ง เปียะ ต้าย ก๊อง, ‘เฒี้ยว อ่า, เม่ย ปุน อี หว่าน ฒิ่น เยีย. หมั่ง ก๋า น้าย! เยีย แอ๋ง หฒ่อน ตุ๊ อี หว่าน.’

23นิ่น เญย เฒี้ยว ก๊อง, ‘หลง ไห่ อ๊ะ. เม่ย เซ หลง ไห่, เฮญี้ยว หฒีง เญย โปว. เต๋ย ป๊า ญ่าน ฮนั้ง เม่ย โก๋ว ตุ๊ ด่ง น้าย หลง, เยีย อ๋อย ปุน เม่ย โก๋ว ธั้ม. กุ๊น เปียะ ต้าย เหธา เยีย เฌียน-โย่ว อ๊ะ.’

24“ตุ๊ เหยียด หว่าน ฒิ่น วั้ว เต้า โปว เปียะ ต้าย ก๊อง, ‘เฒี้ยว อ่า, เยีย ฮิ้ว ตุ๊ เม่ย ไม้ เซีย หาย เต้า. เม่ย ไม้ ด๊อด ชะ หฒวัง เญย ต๋อง เม่ย หย่า ตุ๊ ก๊าด. ต้ง เม่ย ไม้ ฮ์า ญิม เญย ต๋อง เม่ย หย่า ตุ๊ เซียว.

25เยีย กั้ม เหฑีย ไห่ ฯฒฯ มี่ง เว้ด ค้วด ปย๊บ เจี๊ยน เม่ย เญย ญ่าน. น้าย! เม่ย เญย ญ่าน อ๊ะ.’

26“นิ่น เญย เฒี้ยว ก๊อง, ‘เม่ย หน่าย เต้า หว่าย ไห่, เหลว่ย ไห่ เญย โปว อ้า! เม่ย ฮิ้ว เยีย ไม้ ด๊อด ชะ หฒวัง เญย ต๋อง เยีย ตุ๊ ก๊าด? เยีย ไม้ ฮ์า ญิม เญย ต๋อง หย่า ตุ๊ เซียว?

27วั้ว หญู่ง, เม่ย หอบ หฒุ ต้อ เยีย เญย ญ่าน มี่ง ตั๊บ วั้ว ญ่าน ลั์ม. ฮนั้ง หน่าย, เยีย หฑวน ต้าย เยีย ตุ๊ ป๊วน-ฒิ่น หย่า ตุ๊ เหล่ย ฒิ่น เหธา เจี๊ยน นีอา.’

28“‘เฒาะ นิ่น เญย วั้ว เต๋ย ญ่าน อ๊ะ. แอ๋ง ปุน ม่าย เหฒียบ นอม วั้ว เต้า,

29เหว่ย หฒุ หาย เต้า ม่าย เต๋ย เญย, อ๋อย ทิบ ปุน นิ่น ม่าย เก้า ธั้ม, นิ่น ฯฒฯ ม่าย เหฒ่ง. หาย เต้า ไม้ ม่าย, เลี่ยม นิ่น ม่าย เต๋ย ป๊า เญย, ฒู้ง หฒุ เฒาะ หมี่ อ๊ะ.

30เฒาะ น้าย เต้า ไม้ ลั่ม หล่ง เญย โปว ฒอย กวั่ง กะเหญี่ย หฮมวัง เญย ต๋อง มี่ง. นิ่น อ๋อย หฒุ ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย.’

31“เยีย, ป้าม เมี่ยน เญย ตอน ต้าย โหฒว ฮู่ง วั้ว หฒั่น, ม่าย หฒวัง ฟิน-เมี่ยน หย่า อ๋อย เหธา เจี๊ยน ต้าย. เยีย หย่า อ๋อย เฒว์ย เจี๊ยน เยีย ฌัง-หล่าง เญย เหว่ย.

32หม่าน ฝีง เมี่ยน แอ๋ง ต้าย กั๊บ ฒุ้น เยียม เยีย เญย หฑะเฮมียน. เยีย ฯฒฯ ปุน ฆอย โหฒว อี กวั้น, ฮนั้ง ยู่ง เฒี้ยว ปุน ฆอย นิ่น เญย ปะกี ยู่ง เหธา ยู่ง นอ.

33ปะกี ยู่ง เยียม เยีย เญย บย่าว แหมง, ยู่ง เยียม หฒาย แหมง.

34“ฮู่ง เตี๋ย ฯฒฯ บั๋ว เยียม บย่าว แหมง วั้ว เต๋ย เมี่ยน, ‘เม่ย บัว น้าย เต๋ย เยีย เญย เตีย เหธย ฟุ เญย เมี่ยน อ้า! กุ๊น ต้าย อ๊ะ. ต้าย ฒิบ ต้ง ฒิ่น ด่าง เหฒย ลู่ง เหฒย เดา วั้ว หฒั่น ทิน-ฮู่ง หลิ่ว เล์ย เหฒียง ปุน เม่ย บัว วั้ว นอม กั๊วะ,

35เหว่ย หฒุ เยีย หง่อ, เม่ย บัว ปุน เยีย หญั่น. จาง ฆ้าด, เม่ย บัว หย่า ปุน ววม เยีย ฮบ. เยีย โหฒว กั้น ฝีง เมี่ยน, เม่ย บัว หย่า ฒิบ เยีย เยียม เม่ย บัว เญย เปย๊า.

36ไม้ ม่าย ลุย-โหว ฒุ, เม่ย บัว หย่า ปุน เยีย ม่าย ฒุ. ปุ๊ด แป่ง, เม่ย บัว หย่า โก๋ว เยีย. เยีย หฒุ หววน เจี๊ยน โล่, เม่ย บัว หย่า ต้าย หมั่ง เยีย.’

37“วั้ว เต๋ย คู้ เมี่ยน ฯฒฯ เตา ฮู่ง เตี๋ย, ‘เฒี้ยว อ่า, เยีย บัว เฒี่ยง หาย ปวัด เม่ย หง่อ หย่า ปุน เม่ย หญั่น? ปวัด เม่ย จาง ฆ้าด หย่า ปุน เม่ย ฮบ?

38เฒี่ยง หาย ปวัด เม่ย โหฒว กั้น ฝีง เมี่ยน ฯฒฯ ฒิบ เม่ย เยียม เยีย บัว เญย เปย๊า? ไฟ ปวัด เม่ย ไม้ ม่าย ลุย-โหว ฒุ ฯฒฯ ปุน เม่ย ม่าย ฒุ?

39เยีย บัว เฒี่ยง หาย ปวัด เม่ย ปุ๊ด แป่ง ไฟ หฒุ หววน วั้ว โล่ หย่า มี่ง หมั่ง เม่ย?’

40“ฮู่ง เตี๋ย ฯฒฯ เตา นิ่น บัว, ‘เยีย ก๊อง เฒียน บั๋ว เม่ย บัว, เม่ย บัว โหฒว ปุน เหยียด เต้า เยีย เญย ก๋อ-โย์ว, ไม้ กุ๊น นิ่น โหฒว เก้า ไฝ เจี๋ย วั้ว เต้า, เม่ย บัว ฯฒฯ โหฒว ปุน เยีย อ๊ะ.’

41“ฮู่ง เตี๋ย ก๊อง บั๋ว เยียม หฒาย แหมง วั้ว เต๋ย เมี่ยน, ‘หฒุ ทิน-ฮู่ง เหฒียว เญย เมี่ยน อ้า! ซิ้ม ฆอย เยีย! มี่ง เปียะ หลิ่ว เล์ย เหฒียง ปุน เมี้ยน เญย ฮู่ง เหธา นิ่น เญย โปว เยียม วั้ว กว๋า เหยียด ลิ์ว ไม้ ไต่ เญย โต์ว.

42เหว่ย หฒุ เยีย หง่อ, เม่ย บัว ไม้ ปุน เยีย หญั่น. จาง ฆ้าด, เม่ย บัว ไม้ ปุน ววม เยีย ฮบ.

43เยีย โหฒว กั้น ฝีง เมี่ยน, เม่ย บัว หย่า ไม้ ฒิบ เยีย เปียะ เปย๊า. เยีย ไม้ ม่าย ลุย-โหว ฒุ, เม่ย บัว ไม้ ปุน ลุย-โหว เยีย ฒุ. เยีย ปุ๊ด แป่ง ไฟ หฒุ หววน โล่, เม่ย บัว หย่า ไม้ หมั่ง เยีย.’

44“นิ่น บัว ฯฒฯ เตา นิ่น, ‘เฒี้ยว อ่า, เยีย บัว เฒี่ยง หาย ปวัด เม่ย หง่อ ไฟ จาง ฆ้าด, ไฟ โหฒว กั้น ฝีง เมี่ยน ไฟ ไม้ ม่าย ลุย-โหว ฒุ, ไฟ ปุ๊ด แป่ง ไฟ หฒุ หววน เจี๊ยน โล่ หย่า ไม้ เถง เม่ย?’

45“ฮู่ง เตี๋ย ฯฒฯ เตา, ‘เยีย บั๋ว เฒียน เม่ย บัว, เม่ย บัว ไม้ เถง เหยียด เต้า น้าย เต๋ย โหฒว ไฝ เจี๋ย เญย เมี่ยน, เม่ย บัว หย่า ไม้ เถง เยีย.’”

46เยซู แอ๋ง ก๊อง เซ้ด เมว์ย หว่า, “ฮนั้ง หน่าย, น้าย เต๋ย อ๋อย หฒุ ธ้วด มี่ง เหยียด ลิ์ว เสี่ยว ฒุ์ย. มป่า คู้ เมี่ยน วั้ว เต๋ย ฯฒฯ ตุ๊ เหยียด ลิ์ว เญย แหม่ง.”

← Chapter 24 Jump to: Chapter 26 →