Matthew 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เยซู หฌาว ลิ์ว นิ่น เญย เหฒียบ เหญ่ย เต้า ไซ-ก๋อ, นิ่น ธ้วด วั้ว นอม ต๋อง มี่ง กาลิลี แซ้ง เญย มู้ง ฒุ่น โต์ หฌาว เมี่ยน.

2เถง เมี่ยน เจี๋ย ววม เญย เล์ย วั้ว เต้า โยฮัน หธ่อ หววน เจี๊ยน โล่ วั้ว หฒั่น, นิ่น ไฮ์ ก๊อง กีตู่ โหฒว เญย กง, ฯฒฯ พ้าย เต๋ย นิ่น เญย ไซ-ก๋อ มี่ง

3หน่าย เยซู, “เม่ย ต้ง โยฮัน ก๊อง อ๋อย ต้าย วั้ว เต้า ซ่าะ? ไฟ เยีย บัว หธ่อ อ๋อย หฒุ ฒั้ว กั้น เต้า?”

4เยซู เตา นิ่น บัว, “หฑวน มี่ง ก๊อง เม่ย บัว ไฮ์ เญย เหธา ปวัด เญย น้าย เต๋ย เจ๊า-โหล่ว ปุน โยฮัน หมวัง โอ่.

5บั๋ว นิ่น, มฒีง แม่ง มฒีง บั๊ว เญย เมี่ยน ไฮ่ หมั่ง ตุ๊ ปวัด, เหฒา ไบ เญย เมี่ยน ไฮ่ ยั่ง เจ๊า อ๊ะ. ปุ๊ด ก้ม ฮู้ แป่ง วั้ว เต๋ย หฒ่อ หลง เหฑ่ง. มน่อม ดูง เญย หย่า ไฮ่ หมวัง ตุ๊ ไฮ์. ไต่ มี่ง เญย เมี่ยน แอ๋ง นั่ง ต้าย. เมี่ยน จ่ม เมี่ยน หย่า ตุ๊ ไฮ์ คู้ เฝียน.

6หาย เต้า ไม้ เฆ่ม เยีย, วั้ว เต้า ม่าย เฌียน-โย่ว อ๊ะ.”

7โยฮัน เญย ไซ-ก๋อ หฑวน เญย เฒี่ยง โห่, เยซู ก๊อง โยฮัน เญย เจ๊า-โหล่ว บั๋ว หฒวัง เมี่ยน. นิ่น ก๊อง, “เม่ย บัว มี่ง เต่ย-ปูง-ฮวาง วั้ว หฒั่น, เม่ย บัว มี่ง หมั่ง หาย หญู่ง? มี่ง หมั่ง ติ้ว หลัวะ ติ แกว๊ง หฒุ หฑยาว ป่วน ต์ง ไฟ?

8เม่ย บัว มี่ง หมั่ง หาย หญู่ง? หมั่ง เต้า มจั่ง ตอน ฒุ เธี่ยว ฒุ ตุ่น ไฟ? ฒุ เธี่ยว ฒุ ตุ่น เญย เมี่ยน เยียม ฮู่ง ติ่น ฮนั้ง เหลาะ.

9วั้ว หญู่ง, เม่ย บัว ธ้วด มี่ง อ๋อย ปวัด หาย หญู่ง? อ๋อย ปวัด เต้า โต่ว หว่า เมี่ยน เฒ์ย เญย ซ่าะ? เฒ์ย เญย. มป่า เม่ย บัว อ๋อย ปวัด วั้ว เต้า, นิ่น ฒู้ง เก้า โฮล โต่ว หว่า เมี่ยน.

10โยฮัน เซ ต้ง กีง-โซว เฟี้ย เจี๊ยน ก๊อง, “ทิน-ฮู่ง ก๊อง, ‘เยีย อ๋อย พ้าย เยีย เญย โต่ว เฝียน เมี่ยน มี่ง ด่าง เม่ย, ลิ์ว เล์ย เม่ย เญย เจ๊า.’

11เยีย ก๊อง เฒียน บั๋ว เม่ย บัว, ตะฟ่าน เยียม เมี่ยน บุด๋ง เถง เมี่ยน เจี๋ย ววม เญย เล์ย วั้ว เต้า โยฮัน, เก้า โฮล เจี๋ย. มป่า เยียม ทิน-ต้อง เญย กั๊วะ โหฒว เก้า ไฝ เจี๋ย วั้ว เต้า, นิ่น หธ่อ เก้า โฮล เจี๋ย โยฮัน.

12เยียม น้าย เต้า โยฮัน เจี์ย กอน ฒุ่น โต์ เถา อี้ หฒั่น, ทิน-ฮู่ง เญย กั๊วะ หฒุ เมี่ยน โหฒว โตะ หย่า หฒุ เมี่ยน โตะ เมี่ยน อ๋อย ธ้าง.

13เถา โยฮัน เญย ลู่ง เดี๊ย, หฒวัง โต่ว หว่า เมี่ยน เหธา โมเซ เญย เล์ย-หลัด หย่า ก๊อง ทิน-ฮู่ง อ๋อย ต้าย โหฒว เฒี้ยว กุ๊น เมี่ยน เญย เจ๊า.

14สี ก๊อง เม่ย บัว หญุ่น เสียน วั้ว เต๋ย เมี่ยน เถง ทิน-ฮู่ง โต่ว ต้าย เญย หว่า, โยฮัน เซ ต้ง นิ่น บัว ก๊อง อ๋อย ต้าย วั้ว เต้า เอลียา.

15หาย เต้า ม่าย มน่อม อ๋อย หฒุ แปง มน่อม หมวัง หลง โอ่.

16“เยีย อ๋อย หฒุ หล่ง หาย หญู่ง เป๊ย อี้ จ๋า เมี่ยน? นิ่น บัว เซ ฮนั้ง ฝุเจว๊ย เฒว์ย เจี๊ยน เฮย-ห่อง, น้าย กวั้น เห่ว วั้ว กวั้น. นิ่น บัว ก๊อง,

17“‘เยีย บัว ปย๊ม เฮล้า-ด้ง หนู, เม่ย บัว หย่า ไม้ หธัง เหย. เยีย บัว ป๋าว ปย๊บ จั๋น-ไต่ เญย ฑูง, เม่ย บัว หย่า ไม้ เญี้ยม.’

18เถง เมี่ยน เจี๋ย ววม เญย เล์ย วั้ว เต้า โยฮัน ต้าย วั้ว หฒั่น, นิ่น เฒย ไม้ หญั่น หาย หญู่ง, หย่า ไม้ ฮบ อะหงุ่น ติ๊ว. หฒวัง เมี่ยน ก๊อง, ‘ม่าย เมี้ยน เยียม นิ่น เญย ซิน.’

19เยีย, ป้าม เมี่ยน เญย ตอน, ต้าย วั้ว หฒั่น, เยีย หญั่น หย่า ฮบ. เมี่ยน ฯฒฯ ก๊อง, ‘หมั่ง ก๋า, น้าย เต้า เมี่ยน ขูง เม้า หญั่น ฮบ ฆวิน ฮนั้ง. นิ่น หย่า เหธา เถง โลมา ฮู่ง จา เซียว โฑว-ฒิ่น เญย เมี่ยน เหธา เม่ง เต้า หว่าย เญย เมี่ยน โหฒว ต่อย.’ มป่า ธ้วด ต้าย เญย สี่ ปุน ธีง ทิน-ฮู่ง เญย ธง-เม่ง หฒะเก้ง หอบ เญย.”

20เยซู ฯฒฯ เจี์ย กอน ก๊อง วั้ว เต๋ย มู้ง เหว่ย หฒุ นิ่น เยียม วั้ว เต๋ย มู้ง โหฒว บัวะ ฮ่อง เญย สี่ เก้า ธั้ม เจี๋ย มป่า เมี่ยน ไม้ คั้ง ก๊อย เฮญี้ยว กวั่ง ฒุ์ย.

21นิ่น ก๊อง, “โคลาซิน มู้ง อ้า! เม่ย อ๋อย หฒุ โค้ว อ๊ะ. เบดไซดา มู้ง อ้า! เม่ย หย่า อ๋อย หฒุ โค้ว อ๊ะ. เยียม เม่ย บัว บุด๋ง โหฒว เจี๋ย วั้ว เต๋ย บัวะ ฮ่อง เญย สี่, สี ก๊อง เยียม ไทละ เหธา ไซดอน มู้ง โหฒว ธ้วด ต้าย นอ, วั้ว เต๋ย อี นอม มู้ง เญย เมี่ยน ฒู้ง ปุ๋ย เจี๊ยน ล่าม่า เดีย-โธว, เฒว์ย เจี๊ยน ซ้าย-ดุย, ปุน ธีง นิ่น บัว ก๊อย เฮญี้ยว กวั่ง ฒุ์ย เล่า อ๊ะ.

22เยีย ก๊อง เฒียน บั๋ว เม่ย บัว, เถา เซี้ยม ฒุ์ย วั้ว ฮนอย, ไทละ เหธา ไซดอน มู้ง ฒู้ง หฒุ ตี่ง ฒุ์ย เก้า เฮง เม่ย บัว.

23คาเปนาอุม มู้ง อ้า! เม่ย กั้น อ๋อย ท่าย เม่ย กั้น ฝาว ลู่ง ไฟ? เม่ย ฒู้ง อ๋อย หฒุ ต้อ เหฌี่ย เยี่ยม เกน อ๊ะโล่ะ! สี ก๊อง เยียม เม่ย หน่าย โหฒว เจี๋ย วั้ว เต๋ย บัวะ ฮ่อง เญย สี่ เยียม วั้ว โสโดม ฒี่ง โหฒว นอ, โสโดม ฒี่ง หธ่อ ไฮ่ เยียม เถา อี้ หฒั่น.

24เยีย ก๊อง เฒียน บั๋ว เม่ย บัว, เถา เซี้ยม ฒุ์ย วั้ว ฮนอย, โสโดม ฒี่ง ฒู้ง หฒุ ตี่ง ฒุ์ย เก้า เฮง เม่ย อ๊ะ.”

25วั้ว หฒั่น เยซู ก๊อง, “อา เตีย, ลู่ง เดา เญย เฒี้ยว อ้า! เยีย เธง เตีย เหว่ย หฒุ น้าย เต๋ย สี่ เตีย เกม เจี๊ยน ไม้ ปุน ม่าย ธง-เม่ง เญย เมี่ยน เหธา โหะ ฮลัง เญย เมี่ยน ฮิ้ว, มป่า เตีย ปุน ไม้ โหะ ฮลัง เญย เมี่ยน ฮิ้ว.

26อา เตีย อ้า! น้าย เซ โหฒว ตุ๊ หอบ เตีย กั้น เญย เฮญี้ยว.

27“อา เตีย เฒาะ หญู่งๆ จิว ปุน เยีย. ธ้วด ลิ์ว เตีย, ไม้ ม่าย หาย เต้า ฮิ้ว ตุ๊ ตอน. ธ้วด ลิ์ว ตอน, เหธา ตอน ปุน ฮิ้ว วั้ว เต๋ย, ไม้ ม่าย หาย เต้า ฮิ้ว ตุ๊ เตีย.”

28“เม่ย บัว หาย เต้า โค้ว ฮนั้ง เหญีย กะน้าย เฮนี้ย, กุ๊น ต้าย เยีย น้าย. เยีย อ๋อย ปุน เม่ย บัว ฮิด ขวน.

29เฒาะ เยีย เญย เดี๋ยง-ก์า ก์า เจี๊ยน, หฒวด เยีย เญย หญู่ง, เหว่ย หฒุ เยีย เฮญี้ยว ส่วน, ฮ่อ น่อ, เม่ย บัว ฯฒฯ ตุ๊ แป้ง ออน.

30เหว่ย หฒุ เยีย ปุน เม่ย บัว วั้ว นอม เดี๋ยง-ก์า คู่ ก์า เญย. เยีย ปุน เม่ย บัว เหญีย เญย กะน้าย หย่า เฮง.”

← Chapter 10 Jump to: Chapter 12 →