bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
Matthew 12
Matthew 12
Kamba (Mbivilia) 1956
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 13 →
1
Ĩvinda yĩu Yesũ nĩwaendie mũthenya wa savato, aivĩtĩla mĩũndanĩ ya nganũ; na amanyĩw’a make maĩ na nzaa na mambĩlĩlya ũtũla iia sya nganũ na kũya.
2
Ĩndĩ Avalisi moona ũu, mamwĩa, Sisya, amanyĩw’a maku nĩmekwĩka ũndũ ũtosana na ĩla mĩao ũkĩkwa mũthenya wa savato.
3
Ĩndĩ amea, Mũtyaasoma ũndũ Ndaviti wekie, yĩla waĩ na nzaa, we na ala maĩ nake;
4
ũndũ wavotie nyũmbanĩ ya Ngai, aya imũtũ ila syaiĩawa Ngai, naw’o ndwosana na ĩla mĩao akĩya we, o na ala maĩ nake, ate o athembi oka?
5
O na mũtyaasoma mĩaonĩ, ũndũ mũthenya wa savato ĩkalũnĩ athembi mavukasya savato, na matitalĩlawa ĩvĩtyo?
6
Ĩndĩ nĩngũmwĩa, kana vaa ve ũmwe mũnene kwĩ ĩkalũ.
7
Ĩndĩ kethĩwa nĩmwamanyie ũndũ ũtilyĩ ũndũ ũũ, Nendaa tei, na ti nthembo, mũiĩthĩwa mwasilĩla ala mate na ĩvĩtyo.
8
Nĩkwĩthĩwa Mwana wa mũndũ nĩ mwĩaĩi wa savato.
9
Na auma vau athi, na alika ĩsinakokenĩ yoo:
10
na sisya, kwaĩ mũndũ vo waĩ na kw’oko kwau. Na mamũkũlya, makyasya, Nĩkwosana na ĩla mĩao kũvosya andũ mũthenya wa savato? Nĩ kana mamũvinganĩsye.
11
Na mea, Nũũ kwenyu, ũla wĩthĩwa na ĩlondu yĩmwe, nayo yavalũka ĩimanĩ mũthenya wa savato, ndeyĩkwata ayumye?
12
Mũndũ ĩndĩ nde vata mũno kwĩ ĩlondu? Kwondũ wa ũu nĩkwosana na ĩla mĩao kwĩka nesa mũthenya wa savato.
13
Nĩvo ĩndĩ wamwĩie ũla mũndũ, Tambũũkya kw’oko kwaku. Nake atambũũkya; nakw’o kwavoa, kweethĩwa kũima ta kũla kũngĩ.
14
Ĩndĩ Avalisi maumaala, na mamũsamĩa ũndũ matonya kũmũaa.
15
Na Yesũ amanya ũu auma vau: na aingĩ mamũatĩĩa; na amavosya onthe,
16
na ameaĩa maikamũtavan’ye:
17
nĩ kana kwĩanĩw’e ũla waneeniwe nĩ mwathani Isaia, akyasya,
18
Sisya, mũthũkũmi wakwa ũla namũnyuvie; Mwendwa wakwa ũla ngoo yakwa yendeew’e nĩwe: Ngamwĩkĩa Veva wakwa, Nake akatavan’ya ũsilĩlo kwa Andũ‐ma‐mbaĩ‐ingĩ.
19
Ndakakananĩa, o na ndakokĩlya wasya; O na vai mũndũ ũkew’a wasya wake nzĩanĩ nene.
20
Mũangi mũkanyange ndakatũla, Na ũtambi ũtoaa syũki ndakavosya, Mũvaka yĩla wĩete ũsilĩlo kũvika ũkĩlyo.
21
Na Andũ‐ma‐mbaĩ‐ingĩ makeekwatya syĩtwa yake.
22
Nĩvo ĩndĩ waetewe mũndũ ũkwatĩtwe nĩ ndaimoni, ũtonaa na ũtaneenaa; na amũvosya, eethĩwa ũla ũtaneenaa aineena na kwona.
23
Na makomano onthe maseng’a, masya, Ũũ ti mwana wa Ndaviti?
24
Ĩndi Avalisi meew’a ũu, masya, Mũndũ ũũ ndaumasya ndaimoni, ate o na vinya wa Veelisevuli mũnene wa ndaimoni.
25
Na amanya mosũanĩo moo, amea, Kĩla ũsumbĩ wĩvathanĩtye nũetawe wanangĩkonĩ; na kĩla ndũa kana nyũmba ĩvathanĩtye ndĩkaũngama:
26
na ethĩwa Satani eumya Satani nĩwĩvathanĩtye; ũsumbĩ wake ĩndĩ ũkaũngama ata?
27
Nakwa ethĩwa numasya ndaimoni na vinya wa Veelisevuli, ana menyu masyumasya na vinya waũ? Kwondũ wa ũu mo makeethĩwa asilĩli menyu.
28
Ĩndĩ nyie ethĩwa numasya ndaimoni na Veva wa Ngai, nĩ w’o ĩndĩ ũsumbĩ wa Ngai nũmũkĩe.
29
Kana mũndũ atonya ata kũlika nyũmbanĩ ya mũndũ wĩ vinya, akamũvuta mĩio yake, atambĩte ũmwova ũla wĩ vinya? Na ĩndĩ aitava ila syĩ nyũmbanĩ yake.
30
Ũla ũte ngalĩ yakwa ũsu e ũndũ nakwa; na ũla ũtombanasya nakwa nũnyaĩĩkasya.
31
Kwondũ wa ũu nĩngũmwĩa, Kĩla naĩ na ũumano ikaekewa andũ; ĩndĩ ũumano wa kũmũuma ũla Veva ndũkaekewa andũ.
32
Na o ũla ũkamũneenea Mwana wa mũndũ ndeto, nũkaekewa; ĩndĩ o ũla ũkamũneenea Veva Mũtheu, ndakaekewa, o na nthĩ ĩno, o na ĩla ĩngĩ yũkĩte.
33
Seũvyai mũtĩ wĩthĩwe mũseo na ũsyao waw’o wĩthĩwe mũseo; kana seũvyai mũtĩ wĩthĩwe mũthũku na ũsyao waw’o wĩthĩwe mũthũku: nũndũ mũtĩ nũmanyĩkaa nĩ ũsyao waw’o.
34
Inyw’ĩ ũsyao wa nzoka mbai, mũtonya ata kũneena maũndũ maseo, mwĩ athũku? Nũndũ ũla wusũĩte ngoo nĩw’o kanyw’a ũneenaa.
35
Mũndũ mũseo nĩwumasya maũndũ maseo kyũmbanĩsyonĩ kyake kĩseo; na mũndũ mũthũku nĩwumasya maũndũ mathũku kyũmbanĩsyonĩ kyake kĩthũku.
36
Nakwa nĩngũmwĩa, kana kĩla ndeto ya mana ĩla andũ maneenaa, mũthenya wa sila makaumya ũtalo wayo.
37
Nũndũ kwa ndeto syaku ũkatalĩlwa ũlũngalu, na kwa ndeto syaku ũkethĩwa wĩ mũsilĩle.
38
Nĩvo amwe ma aandĩki na Avalisi mamũsũngĩie, makyasya, Mũmanyĩsya, nĩtũkwenda kwona kyama kwaku.
39
Ĩndĩ amasũngĩa, amea, Ũsyao mũthũku wa ũlaalai nũũmantha kyama; na ndwĩnengwa kyama ate o kyama kya mwathani Yona:
40
nũndũ o tondũ Yona waĩ nthĩnĩ wa ĩvu ya ĩkũyũ ĩnene mĩthenya ĩtatũ na matukũ atatũ; no ta ũu Mwana wa mũndũ akeethĩwa nthĩnĩ wa ngoo ya nthĩ mĩthenya ĩtatũ na matukũ atatũ.
41
Andũ ma Nineva makaũngama ũsilĩlonĩ vamwe na ũsyao ũũ, nao makoosilĩla: nũndũ nĩmaalyũlile ngoo ũtavan’yonĩ wa Yona; na sisyai, vaa ve ũla mũnene kwĩ Yona.
42
Mũsumbĩ, mũndũ mũka, wa ngalĩ ya ĩtheo nũkokĩla ũsilĩlonĩ vamwe na ũsyao ũũ, na akoosilĩla: nũndũ we nĩwokie kuma itulunĩ sya nthĩ nĩ kana ew’e ũĩ wa Solomoni; na sisyai, vaa ve ũla mũnene kwĩ Solomoni.
43
Ĩndĩ veva mũvuku wauma mũndũnĩ, ũvĩtĩlaa kũndũ kũte manzĩ, ũkĩmantha ũthũmũo, na ndũwonaa.
44
Na ĩndĩ ũkyasya, Nĩngũsyoka nyũmbanĩ yakwa ĩla naumie; naw’o wooka, weethĩa yĩ nthei, yĩ ndute, na yĩ mbanakavye.
45
Nĩvo ĩndĩ ũkĩthi, na ũkyosa vamwe naw’o maveva angĩ mũonza, mathũkũ kwĩ w’o, na mailika na kwĩkala vo: na mwĩkalĩle wa ĩtina wa mũndũ ũsu wĩtw’ĩka mũthũku kwĩ ũla wa mbee. No ta ũu naw’o kũkethĩwa kwa ũsyao ũũ mũthũku.
46
Akĩneena na ala makomano, sisya, inyia wake na ana‐a‐inyia, maũngama nza, makyenda kũneena nake.
47
Na mũndũ ũmwe amwĩa, Sisya, mwenyu na ana‐a‐mwenyu maũngeme nza, makyenda kũneena naku.
48
Asũngĩa, amwĩa ũla wamũtavya ũu, Mwaitũ nũũ? Na ana‐a‐ia naaũ?
49
Na amatambũũkĩsya amanyĩw’a make kw’oko, na asya, Sisyai, mwaitũ na ana‐a‐ia!
50
Nũndũ ũla wĩkaa kwenda kwa Asa wakwa ũla wĩ ĩtunĩ, ũsu nĩwe mwana‐a‐ia, na mwĩĩ‐tu‐a‐ia, na mwaitũ.
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 13 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28