bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
Matthew 27
Matthew 27
Kamba (Mbivilia) 1956
← Chapter 26
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 28 →
1
Na kwakya, athembi onthe anene na atumĩa ma andũ mamũsamĩa Yesũ, nĩ kana mamũae:
2
na mamwova, mamũtwaa, na mamũnengane kwa ũla ngavana Vilato.
3
Na ĩndĩ Yutasi, ũla wamũvũnyanie, oona kana nĩwasilĩlwa, eelila, na amatũngĩa athembi anene na atumĩa ila ilungu mĩongo ĩtatũ sya vetha,
4
akyasya, Nĩnĩvĩtĩtye nũndũ nĩnĩmũvũnyanie ũla nthakame yake ĩte ĩvĩtyo. Ĩndĩ mo masya, Ũu nĩ ũndũ witũ ata? Sisya eue.
5
Nake ekya ila ilungu sya vetha nthĩnĩ wa vala vandũ vatheu, na aumaala; na athi eesũsya.
6
Na athembi anene moosa ilungu sya vetha na masya, Kũtyosana na ĩla mĩao kũsia vala vaiawa nthembo, nĩkwĩthĩwa nĩ thooa wa nthakame.
7
Na masũanĩa na mathooa kĩsesi kya mũmbi nasyo, kĩthĩwe vandũ va kũthikaa aeni.
8
Kwondũ wa ũu kĩsesi kyu kyeetwa, Kĩsesi kya nthakame, kũvika ũmũnthĩ.
9
Nĩvo weanĩw’e ũla waneeniwe nĩ Yelemia, akyasya, Na nĩmoosie ilungu mĩongo ĩtatũ sya vetha, thooa wa ũsu ũla watw’ĩĩwe thooa, ũla amwe ma ana ma Isilaeli mamũtw’ĩĩe thooa;
10
na mainengane kwondũ wa kĩsesi kya mũmbi o ũndũ Mwĩaĩi wambĩaĩe.
11
Na Yesũ aũngama mbee wa ngavana: na ngavana amũkũlya, akyasya, We nue Mũsumbĩ wa Ayuti? Na Yesũ amwĩa, We nĩwaneena.
12
Na avinganĩw’a nĩ athembi anene na atumĩa, ndaasũngĩa ũndũ.
13
Nĩvo ĩndĩ Vilato wamwĩie, Ndũkwĩw’a maũndũ ũndũ meana ala meũkũkũsĩĩa?
14
Nake ndaamũsũngĩa ndeto o na ĩmwe: mũvaka ngavana aseng’a mũno.
15
Na ĩndĩ ĩvinda ya mboka ngavana akothaa kũyĩthaĩsya ĩkomano mwovwa ũmwe, o ũla mekwenda.
16
Na ĩvinda yĩu maĩ na mwovwa ũmwe wesĩkĩwe, wetawa Valava.
17
Na ĩndĩno mombanĩte vamwe, Vilato amea, Mwĩenda nĩmũthaĩsye ũũ? Valava, kana Yesũ ũla wĩtawa Klĩsto?
18
Nũndũ nĩwesĩ kana mamũnenganie nũndũ wa kĩwĩu.
19
Na akĩkalĩla kĩvĩla kya sila, kĩveti kyake kyamũtwaĩa ũtũmane, kĩkyasya, Ndũkethĩwe na ũndũ na mũndũ ũsu mũlũngalu; nũndũ ũmũnthĩ nĩthĩniw’e nĩ maũndũ maingĩ ndotonĩ nũndũ wake.
20
Na ala athembi anene na atumĩa mamathinga’ĩĩsya makomano nĩ kana mamwĩtye Valava, na kũmũaa Yesũ.
21
Ĩndĩ ngavana asũngĩa na amea, Andũ aa elĩ, mwĩenda nĩmũthaĩsye wĩva? Nao masya, Valava.
22
Vilato amea, Nĩmwĩke ata ĩndĩ Yesũ ũla wĩtawa Klĩsto? Onthe masya, Nĩambwe.
23
Nake asya, Nĩkĩ, nĩ ũthũku mwaũ wĩkĩte? Ĩndĩ maneena na mawasya manene mũno, makyasya, Nĩambwe.
24
Na ĩndĩ Vilato oona kana ndatonya ũndũ, ĩndĩ kĩtuu nĩkĩkwingĩva, oosa manzĩ, na athambĩsya moko make mbee wa ĩkomano, akyasya, Nyie ndi na ĩvĩtyo nthakamenĩ ya mũndũ ũũ mũlũngalu; sisyai ũndũ ũsu e inyw’ĩ.
25
Na andũ onthe masũngĩa, masya, Nthakame yake yĩthĩwe ĩũlũ waitũ, na ĩũlũ wa syana sitũ.
26
Nĩvo ĩndĩ wamathaĩsye Valava; ĩndĩ amũkũna Yesũ na kĩvoko kyatũange, na amũnengane ambwe.
27
Nĩvo asikalĩ ma ngavana mamũtwaie Yesũ kĩsilĩlonĩ, na mamũmbanĩsya nguthu yonthe ya asikalĩ.
28
Na mamumya ngũa mamwĩkĩa ngũa ndune mũno.
29
Na mavĩlangan’ya ngovia ya mĩw’a na mamwĩkĩa mũtwe wake, na mamũkwatĩthya mũangi kw’okonĩ kwake kwa aũme; na matulya ndu mbee wake na mamũthekeea na kĩvũthya, makyasya, Nũvoo, Mũsumbĩ wa Ayuti!
30
Na mamũtw’ĩla mata, na moosa ũla mũangi na mamũkũna mũtwe.
31
Na mamina ũmũthekeea, mamumya ĩla ngũa, na mamwĩkĩa ngũa syake, mamũtwaa kũmwamba ngelan’yonĩ.
32
Na makyumaala, mamwĩthĩa mũndũ wa Kulene, wetawa Simoni: ũsu mamũkwata na vinya athi nao, nĩ kana amũkuĩe ngelan’yo yake.
33
Na mavika vandũ vetawa Kolokotha, ũalyũlo wayo nĩ, Vandũ va kĩng’ala,
34
mamũnenga mbinyu ĩvulanĩtw’e na nyongo: nake amĩsama, ndaaĩtĩkĩla kũnyw’a.
35
Na mamwamba, maan’ya ngũa syake makĩlimana; nĩ kana kwĩanĩw’e ũla waneeniwe nĩ mwathani, Nĩmaanisye ngũa syakwa katĩ woo, na kwondũ wa kĩtonyeo kyakwa kĩasa nĩmalimanile.
36
Na mekala nthĩ vo mamũsyaĩĩsye.
37
Na meekĩa ũvingan’yo ĩũlũ wa mũtwe wake, ũandĩkĩtwe, ŨŨ NĨWE YESŨ MŨSUMBĨ WA AYUTI.
38
Nĩvo avutani elĩ mambiwe vamwe nake, ũmwe ngalĩ ya kw’oko kwake kwa aũme, na ũngĩ ngalĩ ya kw’oko kwake kwa aka.
39
Na ala mavĩtaa nzĩanĩ mamũuma, makĩthingithya mĩtwe yoo,
40
makyasya, We ũla wanangaa ĩkalũ, nokĩyaka na mĩthenya ĩtatũ, ĩtangĩĩe mwene: ethĩwa nue Mwana wa Ngai, theea wume ngelan’yonĩ.
41
No ta ũu ala athembi anene makĩmũthekeea, vamwe na aandĩki na atumĩa, masya,
42
Nĩwatangĩĩe angĩ; ndatonya kwĩtangĩĩa mwene. Nĩ mũsumbĩ wa Isilaeli; natheee yu aume ngelan’yonĩ, naitũ nĩtũũmwĩtĩkĩla.
43
Nũmũĩkĩĩaa Ngai; namũvonokye yu, ethĩwa nũmwendete: nũndũ aisye, Nyie nĩ Mwana wa Ngai.
44
Na avutani nao ala mambĩtwe vamwe nake mamũneenea ndeto ta isu.
45
Na kuma syũa yaũngama kwatulya kĩvindu nthĩ yonthe kũvika saa kenda.
46
Na ta saa kenda Yesũ aneena na wasya mũnene, akyasya, Eli, Eli, lama, savakathani? Ũalyũlo wayo nĩ, Ngai wakwa, Ngai wakwa, ũndekee kĩ?
47
Na amwe ma ala maũngeme vo, meew’a ũu, masya, Mũndũ ũũ emwĩta Eliya.
48
Na oyu ũmwe woo asemba, na oosa sivanzi, anyw’ĩthya siki yakola, na amĩkĩa mũanginĩ, na amũnenga avivite.
49
Na ala angĩ masya, Ekai; tũsisye kana Eliya nũnũkũka kũmũtangĩĩa.
50
Na Yesũ aneena ĩngĩ na wasya mũnene, na aumya veva wake.
51
Na sisya, ngũa ya tũtũ ya ĩkalũ yatembũka ilungu ilĩ kuma ĩũlũ kũvika nthĩ; na nthĩ yatetema; na mavia manene maatũka;
52
na mbũa syavingũka; na mĩĩ mingĩ ya atheu ala maĩ manakoma yathayũũkw’a;
53
na makyuma mbũanĩ ĩtina wa kũthayũũka kwake, malika ĩla ndũanĩ ntheu na mamaumĩlĩla aingĩ.
54
Na ĩndĩ ũla mũnene wa asikalĩ ĩana, na ala maĩ nake makĩmũsyaĩĩsya Yesũ, moona kĩtetemo kya nthĩ, na maũndũ ala meekĩka, makĩa mũno, makyasya, Nĩ w’o ũũ eĩ Mwana wa Ngai.
55
Na aka aingĩ maĩ vo makĩsisya me kũasa, ala mamũatĩĩe Yesũ kuma Kalilii, makĩmũtethya:
56
na amwe moo maĩ Meli Makatalene, na Meli inyia wa Yakovo na Yose, na inyia wa ana ma Sevetii.
57
Na kwavika wĩoo, kwathi mũndũ mũthwii wa nthĩ ya Alimathia, wetawa Yosevu, nake mwene aĩ mũmanyĩw’a wa Yesũ:
58
mũndũ ũsu athi kwa Vilato, amwĩtya mwĩĩ wa Yesũ. Na ĩndĩ Vilato eeaa anengwe.
59
Na Yosevu oosa mwĩĩ, na oolingĩla ngũa ntheu ya katane,
60
na awia mbũanĩ yake nzaũ, ĩla wasĩte ĩvianĩ ĩnene: na avingilitya ĩvia ĩnene mũomonĩ wa mbũa, na athi.
61
Na Meli Makatalene aĩ vo, na Meli ũla ũngĩ, mailyĩ nthĩ melekele ĩla mbũa.
62
Na ũnĩ ũsu, naw’o nĩ mũthenya waatĩĩe ũla wa Ũseũvyo, athembi anene na Avalisi mamũmbanĩa Vilato,
63
makyasya, Vwana, nĩtũlilikene kana mũkengani ũsu yĩla waĩ thayũ aisye, Ĩtina wa matukũ atatũ ngathayũũka.
64
Ĩae ĩndĩ kana mbũa isũvĩwe mũno kũvika mũthenya wa katatũ, amanyĩw’a make maikese kũka mamũye, na kũmatavya andũ, Nũthayũũkĩte kuma kwa akw’ũ: na ũkengani wa ĩtina ũkeethĩwa wĩ mũnene kwĩ ũla wa mbee.
65
Vilato amea, Mwĩ na asũvĩi: endai mũkamĩlũlũmĩlye mũno o ũndũ mũtonya.
66
Nao mathi, malũlũmĩlya mbũa, makĩkĩa ĩvia ũsiĩlo, ala asũvĩi me vamwe nao.
← Chapter 26
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 28 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28