Matthew 13

Kamba (Mbivilia) 1956

← Chapter 12 Jump to: Chapter 14 →

1Mũthenya ũsu Yesũ auma nyũmbanĩ, athi, ekala nthĩ ũtee wa ũkanga.

2Na makomano manene mamũmbanĩa, kwa ũu avota ngalawanĩ, ekala vo; na yĩla ĩkomano yonthe yaũngama ũtee wa ũkanga.

3Nake aneena nao maũndũ maingĩ na ngelekan’yo, akyasya, Sisyai, mũvuĩi nĩwaendie kũvuĩa;

4na akĩvuĩa, mbeke imwe syavalũka ũtee wa nzĩa, na nyũnyi syooka syaiya;

5na ĩngĩ syavalũka mavianĩ, vala ve mũthanga mũnini: na syamea na mĩtũkĩ, nĩkwĩthĩwa ityaĩ na mũthanga mũliku:

6na syũa yaaa, syavova; na nĩkwĩthĩwa ityaĩ na mĩi, syooma.

7Na ingi syavalũka mĩw’anĩ; na mĩw’a yeana na yainyita;

8na ingĩ syavalũka mũthanganĩ mũseo, na syasyaa ũsyao, imwe ĩana, na imwe mĩongo, thanthatũ, na imwe mĩongo ĩtatũ.

9Ũla wĩ matũ, nĩew’e.

10Na amanyĩw’a mooka, mamwĩa, Nĩkĩ ũũneena nao na ngelekan’yo?

11Nake asũngĩa, amea, Inyw’ĩ mũnengetwe kũmanya nzama sya ũsumbĩ wa ĩtu, ĩndĩ mo maiaanengwa.

12Nũndũ o ũla wĩ na kĩndũ, akanengwa, nake akaingĩvĩwa: ĩndĩ ũla ũte na kĩndũ, akoosewa o na kĩla wĩ nakyo.

13Kwondũ wa ũu nĩneenaa nao na ngelekan’yo; nĩkwĩthĩwa makĩsisya matikwona, na makĩw’a matikwĩw’a, o na maiũmanya.

14Na wathani wa Isaia nĩweanĩiw’e kwoo, ũla waĩtye, Kwĩw’a mũkeew’a, o na mũikamanya nongi; Na kũsisya mũkasisya, o na mũikona nongi:

15Nũndũ ngoo sya andũ aa nĩ nenevu, Na matũ moo mew’aa na vinya, Na metho moo nĩmalalĩtye; Maikese kwona na metho moo, Na kwĩw’a na matũ moo, Na kũmanya na ngoo syoo, Na kwĩalyũla, Na ngĩmavosya.

16Ĩndĩ nĩ maathime metho menyu, nĩkwĩthĩwa nĩmekwona; na matũ menyu, nĩkwĩthĩwa nĩmekwĩw’a.

17Nũndũ nĩ w’o nĩngũmwĩa, kana nĩ athani aingĩ na andũ alũngalu ala mendie kwona maũndũ ala mũkwona, na maiaamona; na kwĩw’a maũndũ ala mũkwĩw’a, na maiaamew’a.

18Ĩthukĩĩsyei inyw’ĩ ĩndĩ ĩla ngelekan’yo ya mũvuĩi.

19Mũndũ o na wĩva eew’a ndeto ya ũsumbĩ, na ndeũmĩmanya, nĩvo ĩndĩ wĩũka ũla mũthũku, akavulya kĩla kĩvuĩĩtwe ngoonĩ yake. Ũsu nĩwe ũla ũvuĩĩtwe ũtee wa nzĩa.

20Na ũsu ũvuĩĩtwe mavianĩ, nĩwe ũla wĩw’aa ndeto, na aiosa oyu na ũtanu;

21ĩndĩ nde na mĩi nthĩnĩ wake, ĩndĩ ekalanga ĩvinda ĩnini; na yĩla thĩna kana ũnyamao wookĩla kwondũ wa ĩla ndeto, oyu ailulutĩka.

22Na ũla ũvuĩĩtwe miw’anĩ, ũsu nĩwe ũla wĩw’aa ĩla ndeto; na kwĩmakĩa kwa nthĩ, na ũkengani wa ũthwii, ũinyita ĩla ndeto, nake ailea ũsyaa.

23Na ũla ũvuĩĩtwe mũthanganĩ mũseo, ũsu nĩwe ũla wĩw’aa ĩla ndeto, na aimĩmanya; ũsu nĩwe ũsyaa ũsyao, ũmwe aisyaa ĩana, na ũngĩ mĩongo thanthatũ, na ũngĩ mĩongo ĩtatũ.

24Amatavya ngelekan’yo ĩngĩ, akyasya, Ũsumbi wa ĩtu ũilyĩ ta mũndũ ũla wavuĩie mbeũ nzeo mũũndanĩ wake:

25ĩndĩ andũ makomete, mũmaitha wake ooka na avuĩĩa ĩthaaa nganũnĩ na athi.

26Ĩndĩ syamea na syamesya mathangũ na syasyaa iia, nĩvo ĩndĩ ĩthaaa yoonekie nayo.

27Na ngombo sya mwene nyũmba syathi na syamwĩa, Vwana, ndwaavuĩa mbeũ nzeo mũũndanĩ waku? Ĩthaaa ĩndĩ yumĩte va?

28Na asyĩa, Nĩ mũmaitha wekie ũu. Na ngombo syamwĩa, Nũkwenda tũthi tũkũe?

29Ĩndĩ asya, Aiee; mũikese ũkũanĩsya nganũ mũikũa ĩthaaa.

30Iekei syelĩ syĩane kũvika ngethanĩ: na ĩvinda ya ngetha ngatavya akethi, Mbee ũmban’yai ĩthaaa, mwove mĩio nĩ kana mũvĩvye; ĩndĩ nganũ ũmbanĩsyai ikũmbĩnĩ yakwa.

31Amatavya ngelekan’yo ĩngĩ, akyasya, Ũsumbĩ wa ĩtu ũtilyĩ ta mbeke ya kalatali, ĩla mũndũ wosie na aivanda mũũndanĩ wake:

32nayo nĩ nini kwĩ mbeũ syonthe; ĩndĩ yeana, yĩthĩawa yĩ nene mbee wa nyũnyi syonthe, na ĩkĩtw’ĩka kĩtĩ, ũndũ nyũnyi sya yayaya syũkaa na kwĩkala mbongenĩ syakyo.

33Amatavya ngelekan’yo ĩngĩ; Ũsumbĩ wa ĩtu ũilyĩ ta ĩlawa, yĩla mũndũ mũka wosie, na avitha mĩtanĩ ĩtatũ ya mũtu, na w’onthe wakaata.

34Maũndũ asu onthe Yesu amatavisye makomano na ngelekan’yo; na vate ngelekan’yo ndaaneena nao:

35nĩ kana kwĩanĩw’e ũla waneeniwe nĩ mwathani, akyasya, Ngaathamya kanyw’a wakwa na ngelekan’yo; Ngaweta maũndũ ala mavithiwe kuma nthĩ yoombwa.

36Na ĩndĩ atia makomano, athi nyũmba: na amanyĩw’a make mathi vala ũĩ, makyasya, Twon’ye ithyĩ ĩla ngelekan’yo ya ĩthaaa ya mũũndanĩ.

37Na asũngĩa, asya, Ũsu ũvuĩaa mbeũ ĩla nzeo nĩ Mwana wa mũndũ;

38na ũla mũũnda nĩ nthĩ; na mbeũ ĩla nzeo nĩ ana ma ũsumbĩ; na ĩthaaa nĩyo ana ma ũla mũthũku;

39na mũmaitha ũla waivuĩie nĩ ndevili: na ngetha nĩ wĩanĩu wa ĩvinda yĩĩ; na akethi nĩ alaĩka.

40Na ĩndĩ o ũndũ ĩthaaa yũmbanaw’a na kũvĩvw’a na mwaki; nĩw’o kũkethĩwa wĩanĩu wa ĩvinda yĩĩ.

41Mwana wa mũndũ akatũma alaĩka make, nao makoomban’ya molulutĩkyo onthe maumw’e ũsumbĩnĩ wake, na ala mekaa mothũku,

42na makamekya ikonĩ ĩnene yĩ mwaki: vo vakethĩwa kĩĩo na kũvevetan’ya maeo.

43Nĩvo ĩndĩ ala alũngalu makatisa ta syũa ũsumbĩnĩ wa Ĩthe woo. Ũla wĩ matũ, nĩew’e.

44Ũsumbĩ wa ĩtu ũilyĩ ta ũthwii mwie ũvithĩtwe mũũndanĩ; ũla mũndũ wonie, na oovithĩĩa; na kwondũ wa ũtanu wake athi na athoosya syĩndũ syonthe ila waĩ nasyo, na athooa mũũnda ũsu.

45Ĩngĩ, ũsumbĩ wa ĩtu ũilyĩ ta mũndũ mũtandĩthya, aimantha malũlũ maseo:

46na oona lũlũ ũmwe wa thooa mũnene, athi athoosya syĩndũ syonthe ila waĩ nasyo, oothooa.

47Ĩngĩ, ũsumbĩ wa ĩtu ũilyĩ ta kĩtei, kĩla kyekiw’e ũkanganĩ, na kyoomban’ya kĩla mũthemba:

48nakyo kyausũa, makĩkusya ũtee wa ũkanga; na mekala nthĩ, manyuvĩĩa ĩla mĩseo mĩionĩ, ĩndĩ ĩla mĩthũku mekya ũtee.

49Kũkeethĩwa ta ũu wĩanĩunĩ wa ĩvinda yĩĩ: alaĩka makooka, na makavathan’ya athũku na ala alũngalu,

50na makamekya ikonĩ ĩnene yĩ mwaki: vo vakethĩwa kĩĩo na kũvevetan’ya maeo.

51Nĩmwamanya maũndũ asu onthe? Mamwĩa, Ĩĩ.

52Nake amea, Kwondũ wa ũu kĩla mũandĩki watw’ĩkĩthĩtw’e mũmanyĩw’a wa ũsumbĩ wa ĩtu ailyĩ ta mũndũ mwene wa nyũmba, ũla wumasya kyũmbanĩsyonĩ kyake syĩndũ nzaũ na ila ngũũ.

53Na kweethĩwa, Yesũ amina ngelekan’yo isu, auma vo athi.

54Na avika nthĩ ĩla yake amamanyĩsya ĩsinakokenĩ yoo, mũvaka maseng’a, na masya, Mũndũ ũũ aumĩtye va ũĩ ũũ, na mavinya aa?

55Ũũ ti mwana wa mũseũvya wa mbwaũ? Inyia wake ndetawa Meli? Na ana‐a‐inyia ti Yakovo, na Yosevu, na Simoni, na Yutasi?

56Na eĩtu‐a‐inyia, mati kwitũ onthe? Ĩndĩ ũũ aumĩtye va maũndũ aa onthe?

57Na malulutĩkw’a nĩwe. Ĩndĩ Yesũ amea, Mwathani ndalea kwĩthĩwa na ndaĩa, ate o nthĩ yake mwene, na nyũmbanĩ yake mwene.

58Na ndaaĩka mavinya maingĩ vo nũndũ wa kũlea kwĩtĩkĩla kwoo.

← Chapter 12 Jump to: Chapter 14 →