Matthew 22

Kamba (Mbivilia) 1956

← Chapter 21 Jump to: Chapter 23 →

1Na Yesũ asũngĩa na aneena nao ĩngĩ na ngelekan’yo, akyasya,

2Ũsumbĩ wa ĩtu ũilyĩ ta mũsumbĩ ũmwe, ũla wamũvokee mwana wake mboka ya mũtwaano,

3na atũma ngombo syake kũmeta ala metĩtwe mbokanĩ ya mũtwaano moke: nao malea kũka.

4Atũma ĩngĩ ngombo ingĩ, akyasya, Matavyei ala metĩtwe, Sisyai, nĩnzeũvisye mboka yakwa: ndewa syakwa na indo syakwa nou nĩsyũaiwe, na syĩndũ syonthe nĩsyũmbanĩtw’e: ũkai mbokanĩ ya mũtwaano.

5Ĩndĩ malea kwona ta ũndũ, na meeendea, ũmwe mũũndanĩ wake, ũngĩ ũtandĩthyonĩ wake;

6na ala matialile makwata ngombo syake, masyĩka naĩ, na masyũaa.

7Ĩndĩ ũla mũsumbĩ athata; atũma ita syake, na aananga oaani asu, na avĩvya ndũa yoo.

8Na ĩndĩ aitavya ngombo syake, Mboka ya mũtwaano nĩ nzeũvye, ĩndĩ ala meĩtĩtwe mainaĩla.

9Endai ĩndĩ mataanĩsyonĩ ma malelũ, na onthe ala mũkwona, metei moke mũtwaanonĩ.

10Na ngombo isu syaumaala syathi malelũnĩ, na syoomban’ya onthe ala syoonie, ala athũku o na ala aseo: na mũtwaano wausũa aeni.

11Ĩndĩ ũla mũsumbĩ avota nthĩnĩ kũsisya aeni, oonie mũndũ vo ũtekĩĩte ngũa ya mũtwaano:

12na amũkũlya, Mũnyanyawa, ũlikile vaa ata, naku ndwĩ na ngũa ya mũtwaano? Nake avindya ki.

13Nĩvo ĩndĩ mũsumbĩ wameie athũkũmi, Mwovei moko na maũũ, mũmwĩkye kĩvindunĩ nza; vo vakethĩwa kĩĩo na kũvevetan’ya maeo.

14Nĩkwĩthĩwa nĩ aingĩ ala metawa, ĩndĩ ala anyuve nĩ avũthũ.

15Nĩvo ĩndĩ Avalisi maendie masũanĩa ũndũ matonya kũmũtea ndetonĩ syake.

16Na matũma amanyĩw’a moo kwake, vamwe na ala ma Elote, makyasya, Mũmanyĩsya, nĩtwĩsĩ kana wĩ wa w’o, na nzĩa ya Ngai nũmanyĩasya w’o, na ndũkĩaa mũndũ o na wĩva: nũndũ ndũsiasya ũthyũ wa mũndũ.

17Tũtavye ĩndĩ, Wĩona ata? Nĩkwosana na ĩla mĩao kũnenga Kaisali koti, kana ti w’o?

18Ĩndĩ Yesũ amanya ũthũku woo, na asya, Nĩkĩ mũũndata, inyw’ĩ angangan’ya?

19Mbon’yai mbesa ya koti. Na mamũetee silingi.

20Na amea, Mũvw’ano ũũ na ũandĩko ũũ nĩ waũ?

21Mamwĩa, Nĩ wa Kaisali. Na ĩndĩ amea, Mũnengei Kaisali syĩndũ sya Kaisali; na Ngai syĩndũ sya Ngai.

22Na meew’a ũu, maseng’a, na mamũeka, mathi.

23Mũthenya ũsu Asatukai mooka vala ũĩ, ala maasya kana kũi ũthayũũkyo; na mamũkũlya,

24makyasya, Mũmanyĩsya, Mose nĩwaisye, Mũndũ akw’a ate na syana, mwana‐a‐inyia wake namwose mũka wake, amũũngamĩsye mwana‐a‐inyia mbeũ.

25Yu ĩndĩ kwitũ kwaĩ aũme mũonza ma inyia ũmwe: na ũla wa mbee atwaa mũka na akw’a, na nĩkwĩthĩwa ndaĩ na mbeũ amũtiĩa mwana‐a‐inyia mũka wake;

26no ta ũu ũla wa kelĩ nake, na wa katatũ, kũvika onthe me mũonza.

27Na ĩtina wa onthe ũla mũndũ mũka akw’a.

28Ũthayũũkyonĩ ĩndĩ akethĩwa e mũka wa wiva wa asu mũonza? Nũndũ onthe maĩ nake.

29Ĩndĩ Yesũ asũngĩa na amea, Nĩmũkũvĩtya, nĩkwĩthĩwa mũtyĩsĩ maandĩko, o na vinya wa Ngai.

30Nũndũ ũthayũũkyonĩ maitwaanaa, o na maitwaawa, ĩndĩ mailyĩ ta alaĩka ala me ĩtunĩ.

31Ĩndĩ ũndũ wa ũthayũũkyo wa akw’ũ, mũtyaasoma ũndũ mwataviwe. Nĩ Ngai, akyasya,

32Nyie nĩ Ngai wa Avalaamu, na Ngai wa Isaka, na Ngai wa Yakovo? Ngai ti Ngai wa ala akw’ũ, ĩndĩ nĩ wa ala me thayũ.

33Na makomano meew’a ũu, maseng’w’a nĩ ũmanyĩsyo wake.

34Ĩndĩ Avalisi meew’a kana nĩwakilĩthya Asatukai, meeyũmban’ya vamwe.

35Na ũmwe woo, mũmanyĩsya wa mĩao, amũkũlya aimũtata:

36Mũmanyĩsya, mĩaonĩ, mwĩao ũla mũnene nĩ wĩva?

37Na amwĩa Mwende Mwĩaĩi Ngai waku na ngoo yaku yonthe, na thayũ waku w’onthe, na kĩlĩko kyaku kyonthe.

38Ũu nĩw’o mwĩao ũla mũnene na wa mbee.

39Na wa kelĩ ũvw’anene naw’o, nĩw’o ũũ, Mwende mũtũi waku o tondũ wĩyendete.

40Mĩao ĩsu ĩlĩ nĩyũmbanĩtye ĩla mĩao yonthe na athani.

41Na Avalisi mombene, Yesũ amakũlya,

42asya, Mwĩona ata inyw’ĩ ũndũ wa Klĩsto? Nĩ mwana waũ? Mamwĩa, Nĩ wa Ndaviti.

43Amea, Kũilyĩ ata ĩndĩ, Ndaviti e Vevanĩ kũmwĩta Mwĩaĩi, akyasya,

44Mwĩaĩi amwĩie Mwĩaĩi wakwa, Ĩkala nthĩ ngalĩ ya kw’oko kwakwa kwa aũme, Mũvaka nie amaitha maku ungu wa nyaĩĩ syaku?

45Ethĩwa ĩndĩ Ndaviti emwĩta Mwĩaĩi, nĩ mwana wake ata?

46Na vai ũmwe waatonya kũmũsũngĩa ndeto, o na kuma mũthenya ũsu vai mũndũ waatata kũmũkũlya ũndũ ĩngĩ.

← Chapter 21 Jump to: Chapter 23 →