bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
Matthew 26
Matthew 26
Kamba (Mbivilia) 1956
← Chapter 25
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 27 →
1
Na kweethĩwa, Yesũ amina ndeto isu syonthe, amea amanyĩw’a make,
2
Nĩmwĩsĩ kana ĩtina wa mĩthenya ĩlĩ kũkeethĩwa vasaka, na Mwana wa mũndũ akanenganwe nĩ kana ambwe ngelan’yonĩ.
3
Nĩvo athembi anene, na atumĩa ma andũ, mombanĩte nza ya nyũmba ya mũthembi mũnene wetawa Kaiava:
4
nao masaman’ya nĩ kana mamũkwate Yesũ na ũseleke, na kũmũaa.
5
Ĩndĩ masya, Ti ĩvinda ya mboka, kũikese kũkĩla kĩtuu andũnĩ.
6
Na yĩla Yesũ waĩ Vethania, nyũmbanĩ ya Simoni ũla ũwaĩte mangũ,
7
mũndũ mũka athi vala ũĩ e na sũva wa mauta, me vata mũnene mũno, nake amwĩtĩkĩsya mũtwenĩ wake, ailyĩ lĩunĩ.
8
Ĩndĩ amanyĩw’a moona ũu, maĩ na ũthatu, makyasya, Wanango ũũ nĩ wa kĩ?
9
Nũndũ mauta aa meĩ matonya kũtewa mbesa mbingĩ, ikanengwa ngya.
10
Ĩndĩ Yesũ eew’a ũu amea, Nĩkĩ mũũthĩn’ya mũndũ mũka? Nũndũ ambĩka wĩa mũseo.
11
Nĩkwĩthĩwa ngya mwĩ nasyo mavinda onthe; ĩndĩ nyie mũi nakwa mavinda onthe.
12
Nũndũ akĩmbĩtĩkĩsya mauta aa mwĩĩnĩ wakwa, eeka ũu kũnzeũvya ũndũ wa kũthikwa kwakwa.
13
Nĩ w’o nĩngũmwĩa, O kũla kũkatavanw’a ũvoo ũũ mũseo nthĩ yonthe, ũndũ ũũ naw’o weekwa nĩ mũndũ mũka ũũ ũkawetwa wĩthĩwe wa kũmũlilikana we.
14
Na ĩvinda yĩu ũmwe wa ala ĩkũmi na elĩ, ũla wetawa Yutasi Isikalioti, athi kwa athembi anene,
15
na amakũlya, Mwĩenda kũnenga kyaũ, nakwa ngamũnengane kwenyu? Na mamũthimĩa ilungu mĩongo ĩtatũ sya vetha.
16
Na kuma ĩvinda yĩu amantha mwanya wa kũmũnengane kwoo.
17
Na mũthenya wa mbee wa kĩmũtũ kĩte ĩlawa, amanyĩw’a mooka vala ve Yesũ, makyasya, Wĩenda tũkaũseũvĩsye va, ũye vasaka?
18
Na asya, Endai ndũanĩ kwa mũndũ mũna, mũkamwĩe, Mũmanyĩsya asya, Ĩvinda yakwa nĩyĩthengeee; ngaya vasaka nyũmbanĩ kwaku vamwe na amanyĩw’a makwa.
19
Na amanyĩw’a meeka ũndũ Yesũ wameaĩe; na maseũvya vasaka.
20
Na ĩndĩ kwavika wĩoo, ailyĩ lĩunĩ vamwe na ala ĩkũmi na elĩ;
21
na makĩya, asya, Nĩ w’o nĩngũmwĩa, kana ũmwe wenyu akambũnyanĩa.
22
Nao meew’a woo mũno, na mambĩlĩlya kũmũkũlya ũmwe na ũmwe, Mwĩaĩi, ninyie?
23
Na asũngĩa, asya, Ũla wekĩanĩa kw’oko ĩsaaninĩ vamwe nakwa, nĩwe wĩmbũnyanĩa.
24
Mwana wa mũndũ ethi o ũndũ waandĩkĩwe: ĩndĩ woo nĩ wa mũndũ ũsu ũla wĩmũvũnyanĩa Mwana wa mũndũ! Wĩthĩwa wĩ ũseo kwa mũndũ ũsu kethĩwa ndaasyawa.
25
Na Yutasi, ũla wĩmũvũnyanĩa, asũngĩa na asya, Lavai, ninyie? Amwĩa, We nĩwaneena.
26
Na makĩya, Yesũ oosa kĩmũtũ, akĩathima, na akĩtilanga; na anenga amanyĩw’a, na asya, Osai, mũye; kĩĩ nĩkyo mwĩĩ wakwa.
27
Na oosa kĩkombe, na atũnga mũvea, na amanenga, akyasya, Nyw’ai inyw’onthe;
28
nũndũ ĩno nĩyo nthakame yakwa ya ũtianĩo, ĩla ĩĩtĩkwa kwondũ wa aingĩ kwa ũekeo wa naĩ.
29
Ĩndĩ nĩngũmwĩa, Kuma yu ndikanyw’a ya ũsyao ũũ wa mũsavivũ, mũvaka mũthenya ũla ngamĩnyw’a yĩ nzaũ vamwe nenyu ũsumbĩnĩ wa Asa wakwa.
30
Na mamina kwina, maumaala nza mathi kĩĩmanĩ kya Mĩthata.
31
Nĩvo Yesũ wameie, Ũtukũ ũũ inyw’onthe nĩmũũlulutĩkw’a nũndũ wakwa: nũndũ nĩkũandĩkĩtwe, Ngakũna mũĩthi, na malondu ma ĩĩthya makanyaĩĩkw’a kũũ na kũũ.
32
Ĩndĩ ĩtina wa kũthayũũkw’a kwakwa, ngaenda mbee wenyu kũvika Kalilii.
33
Ĩndĩ Vetelo asũngĩa, amwĩa, Ethĩwa onthe makalulutĩkw’a nũndũ waku, nyie ndilulutĩkw’a nongi.
34
Yesũ amwĩa, Nĩ w’o nĩngũkwĩa, kana ũtukũ ũũ mbee wa nzamba ĩtanasya, ũkangaĩa katatũ.
35
Vetelo amwĩa, O na ethĩwa no mũvaka nĩkw’e naku, ndikakũkaĩa. Na amanyĩw’a onthe masya o ta ũu.
36
Na ĩndĩ Yesũ athi nao kũvika vandũ vetawa Ngesemanii, na amea amanyĩw’a make, Ĩkalai vaa, ĩvinda yĩla ngũthi vaya kũvoya.
37
Na athi e na Vetelo na ana elĩ ma Sevetii, na ambĩlĩlya kũmaka na kũũũya mũno.
38
Nĩvo ĩndĩ wameie, Ngoo yakwa nĩkũũũya mũno, o na kũvika kĩkw’ũ: ĩkalai vaa, mũsyaĩĩsye vamwe nakwa.
39
Nake aendanga mbee vanini, na avalũka na ũthyũ wake, na avoya, akyasya, Asa wakwa, ethĩwa ũũ nũtonyeka, kĩkombe kĩĩ nĩkĩnthonoke: ĩndĩ ti ũndũ ngwenda nyie, ĩndĩ ũndũ ũkwenda we.
40
Na athi vala ve amanyĩw’a make, na amethĩa makomete, na amwĩa Vetelo, Nĩkĩ, mũinatonya kũsyaĩĩsya vamwe nakwa o na saa ũmwe?
41
Syaĩĩsyai na voyai, nĩ kana mũikalike ũtatwanĩ: veva nĩw’o ũkwenda, ĩndĩ mwĩĩ ndwĩ na vinya.
42
Na ĩngĩ athi ĩvinda ya kelĩ, na avoya, akyasya, Asa wakwa, ethĩwa kĩkombe kĩĩ kĩitonya kũnthonoka ndanyw’ĩte, kwenda kwaku kwĩkwe.
43
Na athi ĩngĩ na amethĩa makomete, nũndũ metho moo maĩ na too.
44
Na amatia ĩngĩ, na athi, na avoya ya katatũ, aiasya o ĩla ndeto.
45
Na ĩndĩ athi vala ve ala amanyĩw’a, na amea, Komai yu, mũthũmũe: sisyai, saa nũthengeee, na Mwana wa mũndũ nũnũũnenganwe mokonĩ ma andũ athe.
46
Ũkĩlai, tũthi: sisyai, nũthengeee ũla ũnũũmbũnyanĩa.
47
Na akĩneena, sisya, Yutasi, ũmwe wa ala ĩkũmi na elĩ, ooka, na vamwe nake nguthu nene yĩ na mbyũ na mathimbũ, yumĩte kwa athembi anene na atumĩa ma andũ.
48
Na ũla ũmũvũnyanĩe amanengete wonan’yo, akyasya, O ũla nĩmũmumunya nĩwe ũsu: mũkwatei.
49
Na oyu ooka vala ve Yesũ, asya, Nũvoo, Lavai; na amũmumunya.
50
Na Yesũ amwĩa, Mũnyanyawa, ĩka ũndũ wakũete. Na ĩndĩ mooka matambũũkya moko, mamũkwata Yesũ.
51
Na sisya, ũmwe wa ala maĩ vamwe na Yesũ atambũũkya kw’oko kwake, akũa ũvyũ wake, na amĩtema ngombo ya mũthembi mũnene, amĩtila kũtũ.
52
Na ĩndĩ Yesũ amwĩa, Tũngĩa ũvyũ waku vandũ vaw’o: nũndũ onthe ala makwataa ũvyũ makaanangwa na ũvyũ.
53
Kana wĩasya nditonya kũmwĩsũva Asa wakwa, nake aindetee oyu nguthu sya alaĩka mbee wa ĩkũmi na ilĩ?
54
Ĩndĩ maandĩko ma atĩ nĩ mũvaka ũũ wĩthĩwe, makeanĩw’a ata?
55
Saa ũsu Yesũ amĩtavya nguthu, Nĩmwaumĩla tondũ mũvutani wumĩlĩlawa mwĩ na mbyũ na mathimbũ nĩ kana mũngwate? Kĩla mũthenya nekalaa ĩkalũnĩ ngĩmanyĩsya, na mũtyaangwata.
56
Ĩndĩ ũũ w’onthe ũtw’ikĩte, nĩ kana maandĩko ma athani meanĩw’e. Nĩvo ĩndĩ amanyĩw’a onthe mamũtiie, makĩa.
57
Na ala mamũkwatie Yesũ mamũtwaa kwa Kaiava mũthembi mũnene, vala aandĩki na atumĩa moombanĩte.
58
Ĩndĩ Vetelo amũatĩĩa e kũasa, kũvika nza kwa mũthembi mũnene, na avota nthĩnĩ, na ekala nthĩ vamwe na makanga, one mũminũkĩlyo.
59
Na ĩndĩ athembi anene na nzama yonthe mamũmanthĩa Yesũ ũkũsĩ wa ũvũngũ, nĩ kana mamũae;
60
na maiaawona, o na kau kwaumĩlile ngũsĩ nyingĩ sya ũvũngũ. Ĩndĩ ĩtina kwooka ilĩ,
61
na syasya, Mũndũ ũũ aisye, Nyie nĩndonya kwananga ĩkalũ ya Ngai, na ngĩyaka na matukũ atatũ.
62
Na mũthembi mũnene aũngama, na amwĩa, Ndũsũngĩa ũndũ? Aa makũkũsĩĩa ata?
63
Ĩndĩ Yesũ avindya. Na ũla mũthembi mũnene amwĩa, Nĩngũkwĩavĩthya kwa Ngai ũla wĩ thayũ, ũtũtavye kana nue Klĩsto, Mwana wa Ngai.
64
Yesũ amwĩa, We nĩwaneena: ĩndĩ nĩngũmwĩa, Kuma yu mũkamwona Mwana wa mũndũ ailyĩ ngalĩ ya kw’oko kwa aũme kwa Vinya, na akyũka e ĩũlũ wa mathweo ma ĩtu.
65
Na yu mũthembi mũnene atembũa ngũa syake, akyasya, Nĩwaumana: twĩ na vata ũngĩ mwaũ wa ngũsĩ? Sisyai, yu nĩmweew’a kũumana kwake:
66
mwĩona ata? Masũngĩa, masya, Aĩlwe nĩ kĩkw’ũ.
67
Na ĩndĩ mamũtw’ĩla mata ũthyũ, na mamũlumangya na ngundi: na amwe mamũmandũla,
68
makyasya, Twathanĩe, we Klĩsto, nũũ ũla wakũkũna?
69
Na Vetelo ailyĩ nza ku ũtee: na mwĩĩtu mũthũkũmi ooka vala ũĩ, akyasya, We naku ũnaĩ vamwe na Yesũ Mũkalilii.
70
Ĩndĩ akaĩa mbee wa onthe, akyasya, Ndyĩsĩ ũndũ ũkwasya.
71
Nake aumaala valasyanĩ, mwĩĩtu ũngĩ amwona, na amea ala maĩ vo, Mũndũ ũũ nake anaĩ vamwe na Yesũ wa Nasaleti.
72
Na akaĩa ĩngĩ na wĩvĩto, Ndimwĩsĩ mũndũ ũsu.
73
Na ĩtina vandũ vanini, ala maũngeme vakuvĩ, mathi na mamwĩa Vetelo, Nĩ w’o we wĩ ũmwe woo; nũndũ kĩthyomo kyaku nĩkĩũkumbũla.
74
Na ĩndĩ ambĩlĩlya kũumana na kwĩvĩta, akyasya, Nyie ndimwĩsĩ mũndũ ũsu. Na oyu nzamba yasya.
75
Na Vetelo alilikana ndeto ĩla ĩnaneeniwe nĩ Yesũ, Nzamba ĩtanamba kwasya, ũkangaĩa katatũ. Nake aumaala, na aĩa kĩĩo kĩ woo.
← Chapter 25
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 27 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28