Romans 13

Kamba (Mbivilia) 1956

← Chapter 12 Jump to: Chapter 14 →

1Kĩla mũndũ nĩethĩwe e mwĩwi wa ala me na ũkũmũ: nũndũ kũi ũkũmũ ũtaumite kwa Ngai; na mokũmũ ala me kw’o nĩmatwiwe nĩ Ngai.

2Kwondũ wa ũu ũla ũleaa kwĩw’a ũkũmũ ũsu, aleaa kwĩw’a ũtw’ĩo wa Ngai: na ala maleaa kwĩw’a makeeyoseaa ũsilĩlo ene.

3Nũndũ ala masumbĩkĩte maitĩsasya andũ kwondũ wa meko maseo, ĩndĩ no kwondũ wa meko mathũku. Na nũkwenda kwĩkala ũte na w’ĩa kwa ũla wĩ na ũkũmũ? Ĩkaa ũseo, na ũkoosaa nguma kuma kwake:

4nũndũ nĩ mũthũkũmi wa Ngai kwaku kwondũ wa ũseo. Ĩndĩ ethĩwa wĩkaa maũndũ ala mathũku, ĩthĩwa na w’ĩa; nũndũ ndakuaa ũvyũ mana: nũndũ nĩ mũthũkũmi wa Ngai mũĩvanĩsya wa ũthatu kwa ũla wĩkaa naĩ.

5Kwondũ wa ũu, mũvaka mwĩthĩwe ewi, ti ũndũ wa ũthatu w’oka, ĩndĩ naw’o kwondũ wa wasya wa ngoo.

6Nũndũ kwondũ wa ũu nĩmumasya kotĩ; nũndũ nĩ athũkũmi ma Ngai, mekalaa mavinda onthe ũndũnĩ o ũsu.

7Nengai onthe kĩla kyaĩle: koti kwa ũla waĩlwe nĩ kũmĩw’a kotĩ: kumya mũvothi kwa ũla waĩlwe nĩ kumĩw’a mũvothi; w’ĩa kwa ũla waĩlwe nĩ kũkĩwa; ndaĩa kwa ũla waĩlwe nĩ kũtaĩwa.

8Mũĩkethĩwe mwi thiĩ na mũndũ wa kĩndũ o na kĩva kyonthe, ate o kwendana inyw’ĩ kwa inyw’ĩ: nũndũ ũla ũmwendaa ũngĩ nĩwĩanĩsye ĩla mĩao.

9Kwondũ wa ũu, Ndũkalaalae, Ndũkoae, Ndũkoye, Ndũkakĩw’ĩe kĩndũ kya ũngĩ ĩtomo, na ethĩwa kwĩ mwĩao ũngĩ, ũtalanĩlwe ndetonĩ ĩno, Mwende ũngĩ ũndũ wĩyendete mwene.

10Wendo ndwĩkaa naĩ kwa ũngĩ; kwondũ wa ũu wendo nĩ wĩanĩsyo wa ĩla mĩao.

11Na ũu, tũkĩmanya ĩvinda, kana yuyu kyathĩ nĩ kĩviku kya kũamũka kuma toonĩ: nũndũ yu ũtangĩĩo wĩ vakuvĩ naitũ kwĩ yĩla tweetĩkĩlile mbee.

12Utukũ nĩ mũendu mũno, mũthenya nũthengeee: tumye ĩndĩ twĩkye kũasa mawĩa ma kĩvindu, na twĩkĩe mĩio ya kaũ ya kyeni.

13Tũkinyae ũndũ kwaĩle, ta twĩ mũthenya; ti mbokanĩ itaĩle na ũthenginĩ, ti mĩmeonĩ mĩthũku na ũlaalainĩ, ti kũtetanĩ na kĩwĩunĩ.

14Ĩndĩ ĩvw’ĩkei Mwĩaĩi Yesũ Klĩsto, na ũndũ wa mwĩĩ, mũikese kũlilikana kwĩka mawendi maw’o.

← Chapter 12 Jump to: Chapter 14 →