Romans 9

Kamba (Mbivilia) 1956

← Chapter 8 Jump to: Chapter 10 →

1Nĩneenaa w’o nthĩnĩ wa Klĩsto, ndiũneena ũvũngũ, wasya wa ngoo wakwa nũũkũsĩĩa vamwe nakwa nthĩnĩ wa Veva Mũtheu,

2kana nĩ na kyeva kĩnene na woo ũtathela ngoonĩ yakwa.

3Nũndũ nenda nyie mwene nĩthĩwe nĩ mũumanĩe na kũvetwa nthĩnĩ wa Klĩsto kwondũ wa ana‐a‐asa makwa, mbaĩ yakwa kwa mwĩĩ:

4nao nĩ Aisilaeli; kũtuwa ana nĩ kwoo, o na ĩla ndaĩa na motianĩo, na kũnengwa ĩla mĩao, na ũthũkũmi wa Ngai, na ala matho;

5nao, ala aasa nĩ moo, na Klĩsto aumie kwoo kwondũ wa mwĩĩ, ũla wĩ ĩũlũ wa onthe, ũtaĩĩtwe nĩ Ngai tene na tene. Ameni.

6Ĩndĩ ti kwĩthĩwa ndeto ya Ngai nĩyaemiwe. Nũndũ onthe ala masyaiwe nĩ Isilaeli, ti onthe Isilaeli:

7o na onthe ti syana, ala ma ũsyao wa Avalaamu: ĩndĩ, Nthĩnĩ wa Isaka ũsyao waku ũketwa.

8Kũilyĩ ati syana sya mwĩĩ ti syo syana sya Ngai: ĩndĩ o syana sya ũla watho italawa kwĩthĩwa nĩ ũsyao.

9Nũndũ ĩno nĩyo ndeto ya watho, Ĩvinda ta yĩĩ nĩngoka, na Sala akethĩwa na mwana.

10Na ti ũu w’oka; ĩndĩ Leveka aya ĩvu ya ũmwe, nake nĩ mũũme wake, asa waitũ Isaka,—

11na syana itanamba ũsyawa, o na itanamba kwĩka ũndũ ũseo kana ũthũku, nĩ kana kwenda kwa Ngai kwĩanana na kũnyuva kwake kwĩkale, ti kwa meko, ĩndĩ nĩ kwa ũla wĩtanaa,

12Leveka nĩwataviw’e, Ũla mũkũũ nũkathũkũma mũinae.

13O ũndũ kũandĩkĩtwe, Yakovo nĩnamwendie, ĩndĩ Esau nĩnamũmenie.

14Twĩasya ata ĩndĩ? Kwĩ ũte ũlũngalu kwa Ngai? Aiee, kũikethĩwe ũu.

15Nũndũ nĩwamwĩie Mose, Ngamwĩw’ĩa tei ũla nĩmwĩw’ĩaa, na ngamwĩw’ĩa ĩnee ũla nĩmwĩw’ĩaa.

16Na kwa ũu ti wa ũla wendaa, kana wa ũla ũsembaa, ĩndĩ nĩ wa Ngai ũla wĩw’ĩaa tei.

17Nũndũ maandĩko memwĩa Valao, Kwondũ wa ũu nĩnakũũngamisye, nĩ kana nonan’ye vinya wakwa nthĩnĩ waku, na nĩ kana syĩtwa yakwa yĩtavanw’e nthĩ yonthe.

18Kwa ũu amwĩw’ĩaa tei ũla ũkwenda kũmwĩw’ĩa, na ũla ũkwenda kũmya aiũmya.

19Ĩndĩ ũkambĩa Kũilyĩ ata kwĩkalaa aitwona na mavĩtyo? Nũndũ nũũ ũla wĩsiĩĩa kwenda kwake?

20Aiee, ĩndĩ we mũndũ, nue ũũ ũla ũmũkananĩsya Ngai? Kĩndũ kĩla kyoombiwe nĩkĩtonya kũmũtavya ũla wakyũmbie, Wambũmbĩe ũu kĩ?

21Kana mũmbi nde na vinya ĩũlũ wa yũmba, kuma mũndonĩ ũmwe, kĩlungu kĩmwe kũmba mũio wĩthĩwe na ndaĩa, na kilungu kĩngĩ kumba mũio ũte wa ndaĩa?

22Nata ethĩwa Ngai, akyenda kwonan’ya ũthatu wake, na kũmanyĩthan’ya vinya wake, nĩwomĩĩsye na wũmĩĩsyo mwingĩ mĩio ya ũthatu ĩla yombiwe ya wanangĩko:

23nĩ kana amanyĩthan’ye wĩngĩ wa ndaĩa yake ĩũlũ wa mĩio ya tei, ĩla waseũvisye mbee yĩthĩwe ya ũtaĩo,

24nayo nĩ ithyi, ala watwĩtie, ti kuma kwa Ayuti oka, ĩndĩ kuma kwa Andũ‐ma‐mbaĩ‐ingĩ nao?

25O ũndũ waisye ĩvukunĩ ya Osea, Ngameta asu andũ makwa, ala mataĩ andũ makwa; Na ngamwĩta mwendwa, ũla ũtaĩ mwendwa.

26Na kũkeethĩwa, vala meeiwe, Inyw’ĩ mũi andũ makwa, Vau makeetwa ana ma Ngai ũla wĩ thayũ.

27Na Isaia eumya wasya wake kwondũ wa Isilaeli, Ethiwa ũtalo wa syana sya Isilaeli ũkethiwa ta kĩthangathi kya ũkanga, nĩ ũtialo ũla ũkatangĩĩwa:

28nũndũ Mwĩaĩi akeanĩsya ndeto yake ĩũlũ wa nthĩ, aimĩminũkĩlya na kũmĩtila nguvi.

29Na, tondũ Isaia wambie ũneena, Keka Mwĩaĩi wa Savaothi watũtiĩe ũsyao, Twĩthiwa twatw’ĩkie ta Sotomo, na tũkavw’ananw’a na Ngomola.

30Twĩasya ata ĩndĩ? Kana Andũ‐ma‐mbaĩ‐ĩngĩ, ala mataaatĩĩa ũlũngalu, nĩmoonie ũlũngalu, naw’o nĩ ũlũngalu, ũla wa mũĩkĩĩo:

31ĩndĩ Isilaeli, maatĩĩa mwĩao wa ũlũngalu, matyaavikĩa mwĩao ũsu.

32Nĩ ũndũ wa kĩ? Nũndũ matyaamantha kwa kũĩkĩĩa, ĩndĩ kwa kwĩka. Nĩmalulutĩkilw’e nĩ yĩla ĩvia yĩlulutĩkasya;

33o tondũ kũandĩkĩtwe, Sisyai, nĩngwia nthĩnĩ wa Saioni ĩvia ya kũtulya na ĩvia ĩnene ya kũlulutĩkya: Na ũla ũmwĩtĩkĩlaa ndakasonokw’a.

← Chapter 8 Jump to: Chapter 10 →