Romans 5

Kamba (Mbivilia) 1956

← Chapter 4 Jump to: Chapter 6 →

1Ĩndĩ twatalĩlwa ũlũngalu nũndũ wa mũĩkĩĩo, twĩ an mũuo na Ngai kwondũ wa Mwĩaĩi waitũ Yesũ Klĩsto;

2na kwondũ wake nĩtwonete kwondũ wa kũĩkĩĩa ũthei wa kũvota nthĩnĩ wa mumo ũũ ũla tũũngeme nthĩnĩ waw’o; na nĩtũtanaa wĩkwatyonĩ wa ũtheu mũtisu wa Ngai.

3Na ti ũu w’oka, ĩndĩ nĩtũtanaa mathĩnanĩ maitũ namo: twĩsĩ kana mathĩna maetae wũmĩĩsyo;

4na wũmĩĩsyo ũetae ũlũmu; na ũlũmu ũetae wĩkwatyo;

5na wĩkwatyo ndũsonokasya; nũndũ wendo wa Ngai nĩwonoetwe ngoonĩ sitũ nĩ Veva Mũtheu ũla tũnengetwe.

6Nũndũ yĩla twaĩ onzu, ĩvinda yeanĩa Klĩsto amakw’ĩĩa ala matakĩaa Ngai.

7Nũndũ nĩ vinya mũndũ kũkw’a kwondũ wa mũndũ mũlũngalu: ĩndĩ no kwĩthĩwa ve ũmwe ũtonya kũkw’a kwondũ wa mũndũ mũseo.

8Ĩndĩ Ngai nĩwonanisye wendo wake mwene kwitũ, atĩ yĩla twaĩ athe, Klĩsto akw’a kwondũ witũ.

9Ĩndĩ mbee mũno, yu tũtalĩlwe ũlũngalu nũndũ wa nthakame yake, tũkatangĩĩwa nĩwe kuma ũthatunĩ wa Ngai.

10Nũndũ ethĩwa, yĩla twaĩ amaitha, twew’anĩthw’e na Ngai kwondũ wa kĩkw’ũ kya Mwana wake, mbee mũno ĩtina wa kwĩw’anĩthw’a, tũkatangĩĩwa nĩ thayũ wake;

11na ti ũu w’oka, ĩndĩ nĩtũtanaa nthĩnĩ wa Ngai nũndũ wa Mwĩaĩi waitũ Yesũ Klĩsto, ũla kwondũ wake yu nĩtwosete ũla wĩw’anĩthyo.

12Kwondũ wa ũu, nũndũ wa mũndũ ũmwe naĩ yalikile kũũ nthĩ, na kĩkw’ũ kwondũ wa naĩ; na kwa ũu kĩkw’ũ kyavikĩa andũ onthe, nĩkwĩthĩwa onthe nĩmeekie naĩ:—

13nũndũ ĩla mĩao ĩtanoka naĩ yaĩ kũũ nthĩ; ĩndĩ naĩ ndĩtalawa mĩao ĩte vo.

14Ĩndĩ kĩkw’ũ kyasumbikie kuma Atamu kũvika Mose, o na ĩũlũ wa ala matekĩte naĩ ya mũthemba wa ĩvĩtyo ya Atamu, nake nĩ ngelekan’yo ya ũla ũkoka.

15Ĩndĩ ũla mũthĩnzĩo ndũilyĩ ta yĩla ĩvĩtyo. Nũndũ ethĩwa aingĩ makwie nĩ ĩvĩtyo ya ũmwe, mbee mũno mumo wa Ngai, na ũla mũthĩnzĩo nũndũ wa mumo wa mũndũ o ũmwe, Yesũ Klĩsto, waingĩva kwa aingĩ.

16Na ũla mũthĩnzĩo ndũilyĩ ta ũndũ ũla waumie ĩvĩtyonĩ ya mũndũ ũmwe ũla wavĩtisye: nũndũ ũsilĩlo waumie kwa ũmwe waete ũsilĩlo ũtw’ĩtwe, ĩndĩ ũla mũthĩnzĩo nĩwookie kwondũ wa mavĩtyo maingĩ waete kũtalĩlwa ũlũngalu.

17Nũndũ ethĩwa kwondu wa ĩvĩtyo ya ũla ũmwe, kĩkw’ũ kyasumbĩkie ũndũ wa ũmwe; mbee mũno ala mosaa wingĩ wa mumo na wa mũthĩnzĩo wa ũlũngalu makasumbĩka thayũnĩ kwondũ wa ũmwe, Yesũ Klĩsto.

18Ĩndĩ o tondũ ũsilĩlo ũtw’ĩtwe wookie ĩũlũ wa andũ onthe kwondũ wa ĩvĩtyo yĩmwe; o ta ũu kwondũ wa wĩko ũmwe wa ũlũngalu ũla mũthĩnzĩo wookie kwa andũ onthe, waete kũtalĩlwa ũlũngalu wa thayũ.

19Nũndũ wa kũlea kwĩw’a kwa mũndũ ũmwe aingĩ matwiwe athe, o ta ũu kwondũ wa kwĩw’a kwa ũmwe, aingĩ makatuwa alũngalu.

20Na ila mĩao nayo nĩyalikile, nĩ kana yĩla ĩvĩtyo yingĩvw’e; ĩndĩ yĩla naĩ yaingĩvie, mumo waingĩvie mũno mbee:

21nĩ kana, o tondũ naĩ yasumbĩkie kũvikĩa kĩkw’ũ, o ta ũu mumo ũsumbĩke kwondũ wa ũlũngalu kũvikĩa thayũ ũtathela kwondũ wa Yesũ Klĩsto Mwĩaĩi waitũ.

← Chapter 4 Jump to: Chapter 6 →