Romans 3

Kamba (Mbivilia) 1956

← Chapter 2 Jump to: Chapter 4 →

1Mũyuti ĩndĩ akĩlanĩtye kyau? Kana kũuna kwa nzaĩko nĩ kwaũ?

2Yĩ vata mũno na nzĩa syonthe: mbee nĩ kũĩkĩĩĩka na ndeto ila syaneeniwe nĩ Ngai.

3Nata ĩndĩ o na ethĩwa amwe matyaĩ na mũĩkĩĩo? Kũlea kwĩtĩkĩla kwoo kũkatw’ĩkĩthya kĩthito kya Ngai ta kĩte na ũtonyi?

4Aiee, kũikethĩwe ũu: nĩkũmanyĩke Ngai nĩ wa w’o, ĩndĩ kĩla mũndũ nĩ mũkengani; o tondũ kũandĩkĩtwe, Kana we ũtonye kwĩthĩwa mũlũngalu ndetonĩ syaku, Na ũtonye ũkĩlya yĩla wĩlika silanĩ.

5Ĩndĩ ethĩwa ũte ũlũngalu witũ nĩwonanasya ũlũngalu wa Ngai, twĩasya ata? Ngai nĩ ũla ũte mũlũngalu ũla ũsilĩlaa na ũthatu? (Nĩngũneena ũndũ andũ maneenaa.)

6Aiee, kũikethĩwe ũu: nũndũ ethĩwa nĩ ũu Ngai akatonya ata kũmĩsilĩla nthĩ?

7Ĩndĩ ethĩwa ũla w’o wa Ngai nĩwingĩvaa kũvikĩa kũtaĩwa kwake kwondũ wa ũvũngũ wakwa, nĩkĩ ngũsilĩlwa ta nĩ mwathe?

8Na nĩkĩ tũikwasya, Twike naĩ nĩ kana ũseo wũke? (O tondũ tũsukawa, na tondũ amwe malũlũmĩlasya kwasya kana tũneenaa ũu,) ũsilĩlo woo kwĩthĩwa nĩ avĩtan’ya nĩ wa katĩ.

9Nĩkĩ ĩndĩ? Twĩ aseo kũvĩta ala angĩ? Aiee, o na vanini: nũndũ nĩtwambie kwonan’ya kana Ayuti na Akiliki onthe me ungu wa naĩ;

10o tondũ kũandĩkĩtwe, Kũi mũlũngalu, aiee, o na ũmwe;

11Kũi ũla wĩ na ũmanyi, Kũĩ ũla ũmũmanthaa Ngai;

12Onthe nĩmathũkĩte ũtee, matw’ĩkĩte mataĩle vamwe; Kũi ũla wĩkaa nesa, aiee, o na ũmwe:

13Mĩmeo yoo nĩ mbũa mbingũe; Nĩmaneenie ũkengani na nĩmĩ syoo: Ũoi wa syĩko wĩ ilomonĩ syoo:

14Makanyw’a moo nĩmausũĩte kĩumo na ũũ:

15Maũũ moo me mĩtũkĩ kwĩtĩkya nthakame;

16Wanangĩko na ũnyamao me moendelonĩ moo;

17Na nzĩa ya mũuo matyaamĩmanya:

18Kũmũkĩa Ngai kũi methonĩ moo.

19Na nĩtwĩsĩ maũndũ o na meva ala maneenawa nĩ ĩla mĩao, ĩmatavasya ala me mĩaonĩ; nĩ kana kĩla kanyw’a ũtumw’e, na nthĩ yonthe ĩetwe ũsilĩloni wa Ngai:

20nũndũ kwondũ wa meko ma ĩla mĩao vai mũndũ ũkatalĩlwa ũlũngalu mbee wake; nũndũ ũmanyi wa naĩ wũkaa kwondũ wa ĩla mĩao.

21Ĩndĩ yu ũlũngalu wa Ngai nĩwumĩlĩtw’e vate mĩao, naw’o ũkũsĩĩwe nĩ ĩla mĩao na athani;

22naw’o nĩ ũlũngalu wa Ngai ũla wosawa ũndũ wa kũĩkĩĩa Yesũ Klĩsto kwa onthe ala metĩkĩlaa; nũndũ kũi kĩvathũkan’yo;

23nũndũ onthe nĩmeekie naĩ, na maivikĩaa ũtaĩo wa Ngai;

24nĩ kũtalĩlwa ũlũngalu mana nĩ mumo wake kwondũ wa wovosyo ũla wĩ nthĩnĩ wa Klĩsto Yesũ:

25ũla Ngai wambie ũmwia ethĩwe nthembo ya wĩw’anĩthyo, kwondũ wa mũĩkĩĩo nthakamenĩ yake, kwonan’ya ũlũngalu wake nũndũ wa kũkĩla naĩ ila syeekiwe tene, nũndũ wa wũmĩĩsyo wa Ngai;

26kwa kwonan’ya ũlũngalu wake ĩvinda yĩĩ: nĩ kana ethĩwe mũlũngalu we mwene, na ĩngĩ ethĩwe mũnengani wa ũlũngalu kwa ũla ũmwĩtĩkĩlaa Yesũ.

27Kwĩkathĩĩa kũĩva ĩndĩ? Nĩ kũvingĩe nza. Kwondũ wa mwĩao wa mũthemba mwaũ? Wa meko? Aiee: ĩndĩ nũndũ wa mwĩao wa mũĩkĩĩo.

28Nĩtũkwona ĩndĩ kana mũndũ atalĩlwa ũlũngalu kwondũ wa kũĩkĩĩa vate meko ma ĩla mĩao.

29Kana Ngai nĩ Ngai wa Ayuti oka? Ti Ngai wa Andũ‐ma‐mbaĩ‐ingĩ nao? Ĩĩ, nĩ wa Andũ‐ma‐mbaĩ‐ingĩ nao:

30ethĩwa nĩ w’o Ngai nĩ ũmwe, na akamatalĩla ũlũngalu ala ma nzaĩko kwondũ wa kũĩkĩĩa, na ala mate ma nzaĩko kwondũ wa ũla mũĩkĩĩo.

31Na ĩndĩ nĩtũkũtw’ĩkĩthya ĩla mĩao ta ĩte na ũtonyĩ kwondũ wa mũĩkĩĩo? Aiee, kũikethĩwe ũu: aiee, nĩtũũlũlũmĩlya ĩla miao.

← Chapter 2 Jump to: Chapter 4 →