Romans 15

Kamba (Mbivilia) 1956

← Chapter 14 Jump to: Chapter 16 →

1Ĩndĩ ithyĩ ala twĩ na vinya nĩtwaĩlwe nĩ kũkua mawonzu ma ala mate na vinya, na tũikeyendeesye ene.

2Kĩla ũmwe wa ithyĩ namwendeesye ũngĩ kwa ũla ũseo, kwondũ wa kwakwa.

3Nũndũ Klĩsto nake ndaaĩyendeesya mwene; ĩndĩ, tondũ kũandĩkĩtwe, Ivũthya sya ala makũvũthisye nĩsyambalũkile.

4Nũndũ maũndũ o na meva ala mambie kũandĩkwa, nĩmaandĩkiwe nũndũ wa kũtũmanyĩasya, nĩ kana ũndũ wa wũmĩĩsyo na ũkiakisyo wa maandĩko twĩthĩwe na wĩkwatyo.

5Na Ngai wa wũmĩĩsyo na wa ũkiakisyo namũnenge kwĩthĩwa na kĩlilikano kĩmwe kwondũ wa Klĩsto Yesũ:

6nĩ kana kwa ngoo ĩmwe na kanyw’a ũmwe mũtonye kũmũtaĩa Ngai, Ĩthe wa Mwĩaĩi waitũ Yesũ Klĩsto.

7Kwondũ wa ũu ĩtĩkĩlanai ene kwa ene, o ũndũ Klĩsto nake wamwĩtĩkĩlile inyw’ĩ, nĩ kana Ngai ataĩwe.

8Nũndũ nĩneena atĩ Klĩsto nĩwatwiwe mũthũkũmi wa nzaĩko kwondũ wa ũla w’o wa Ngai, nĩ kana alũlũmĩlye ala matho manengiwe aasa,

9na nĩ kana Andũ‐ma‐mbaĩ‐ingĩ mamũkathe Ngai nũndũ wa tei wake; o ũndũ kũandĩkĩtwe, Kwondũ wa ũu ngakũtaĩa we kwa Andũ‐ma‐mbaĩ‐ingĩ, Na ngakumya syĩtwa yaku.

10Na ĩngĩ easya, Tanai, inyw’ĩ Andũ‐ma‐mbaĩ‐ingĩ, vamwe na andũ make.

11Na ĩngĩ, Mũkumyei Mwĩaĩi, inyw’onthe Andũ‐ma‐mbaĩ‐ingĩ; Na ngo syonthe sya andũ nimũtaĩe.

12Na ĩngĩ, Isaia easya, Kũkeethĩwa kĩtina kya Yese, Nake ũla wĩũkĩla kũsumbĩka Andũ‐ma‐mbaĩ‐ingĩ; Nĩwe Andũ‐ma‐mbaĩ‐ingĩ makamwĩkwatya.

13Na Ngai wa wĩkwatyo namusũsye inyw’ĩ na ũtanu w’onthe na mũuo kwondũ wa kwĩtĩkĩla, nĩ kana mwĩthĩwe na wĩkwatyo mwingĩ, vinyanĩ wa Veva Mũtheu.

14Nakwa mwene, ana‐a‐asa makwa, nĩniĩkũthĩtw’e ũvoo wenyu, kana inyw’ĩ ene mũsiwe nĩ ũseo, na musũĩtwe nĩ ũmanyi w’onthe, na ĩngĩ nĩmũtonya kũtaana ene kwa ene.

15Ĩndĩ namũandĩkĩa inywĩ na ũnyiau mũnene ilungunĩ ĩmwe sya valũa ũũ, ta kũmũlilikan’ya ĩngĩ, nũndũ wa mumo ũla nanengiwe nĩ Ngai,

16kana nĩthĩwe mũthũkũmi wa Klĩsto Yesũ kwa Andũ‐ma‐mbaĩ‐ingĩ, ngĩthũkũma ũla ũvoo mũseo wa Ngai wĩa wa ũthembi, nĩ kana kũthembwa kwa Andũ‐ma‐mbaĩ‐ingĩ kwĩtĩkĩlĩke, kwa kũvathanw’a nĩ Veva Mũtheu.

17Ĩndĩ nĩ na wĩkathĩĩi wakwa nthĩnĩ wa Klĩsto Yesũ maũndũnĩ ma Ngai.

18Nũndũ nditata kũneena ũvoo wa maũndũ o na meva onthe ate o ala Klĩsto wekĩle vala nĩĩ, kũtuma Andũ‐ma‐mbaĩ‐ingĩ methĩwa ewi kwondũ wa ndeto o na meko,

19vinyanĩ wa syama na moseng’yo, vinyanĩ wa Veva Mũtheu; o ũndũ kuma Yelusaleme, na kũũ ndee kũvika o na Iluliko, nĩtavanĩtye kw’onthe vyũ ũvoo mũseo wa Klĩsto;

20ĩĩ, nĩngwĩthangaasya kũtavan’ya ũla ũvoo mũseo, ti vala syĩtwa ya Klĩsto yambie kũtavanw’a, nĩ kana ndikake ĩũlũ wa wambĩlĩlyo wa wako wa mũndũ ũngi;

21ĩndĩ, o tondũ kũandĩkĩtwe, Nĩmakona, asu ala mataatavw’a ũvoo wake, Na asu ala mataaĩw’a nĩmakamanya.

22Maũndũ asu nĩmo manziĩĩe mavinda maingĩ ndikoke kwenyu:

23ĩndĩ yu, nũndũ vati ũtheĩ ũngĩ nthĩ ĩno, na kwa kwĩthĩwa myaka mingĩ nĩnaĩ na mea ma kũka kwenyu,

24ĩvinda o na yĩva yĩla ngathĩ Sivania (nũndũ nĩngwĩkwatya kũmwona inyw’ĩ kyalonĩ kyakwa, na kumaaw’a nĩ inyw’ĩ, namina kũya mea nenyu)—

25ĩndĩ yuyu nĩngũthi Yelusaleme, ngithũkũma ala atheu.

26Nũndũ andũ ma Masetonia na Akaia nĩmendeew’e nĩ kumya ũelo kwondũ wa atheu me Yelusaleme ala ngya.

27Ĩĩ, nĩmendeew’e; na ĩngĩ me thiĩ nao. Nũndũ ethĩwa Andũ‐ma‐mbaĩ‐ingĩ matw’ĩtwe osi vamwe nao ma syĩndũ syoo sya veva, me thiĩ nao kũmatethya syĩndũni ĩla sya mwĩĩ.

28Ĩndĩ yĩla nĩanĩsya ũndũ ũsu, namina kũtwaa mĩthinzĩo ĩla yaumĩtw’e ĩmavikĩe nesa, ngauma kw’o na ngavĩtĩla kwenyu nĩthĩ Sivania.

29Na nĩnĩsĩ kana, yĩla nĩũka kwenyu, ngooka na wĩanĩu wa ũathimo wa Klĩsto.

30Ĩndĩ nĩmwĩsũva mũno, ana‐a‐asa, kwondũ wa Mwĩaĩi waitũ Yesũ Klĩsto, na kwondũ wa wendo wa ũla Veva, kana mwĩthing’ĩĩsye vamwe nakwa mboyanĩ syenyu kwa Ngai kwondũ wakwa;

31kana ndangĩĩwe nyie kwa ala matew’aa ma Yutia, na nĩ kana ũthũkũmi wakwa ũla nĩ naw’o Yelusaleme wĩtĩkĩlĩke kwa atheu;

32nĩ kana nĩũka kwenyu na ũtanu kwondũ wa kwenda kwa Ngai, na kwona ũthũmũo vamwe nenyu.

33Na Ngai wa mũuo nĩethĩwe vamwe nenyu inyw’onthe. Ameni.

← Chapter 14 Jump to: Chapter 16 →