Romans 6

Kamba (Mbivilia) 1956

← Chapter 5 Jump to: Chapter 7 →

1Twĩasya ata ĩndĩ, Twĩkale naĩnĩ nĩ kana mumo wingĩve?

2Aiee, kũikethĩwe ũu. Ithyĩ ala twakwie kwa naĩ, tũkekala vo ĩngĩ ata?

3Kana mũiĩsĩ, ithyonthe ala twavatisiwe kũlikwa nthĩnĩ wa Klĩsto Yesũ, nĩtwavatisiwe kũlikwa nthĩnĩ wa kĩkw’ũ kyake?

4Twathikiwe ĩndĩ vamwe nake na nzĩa ya ũvatiso nthĩnĩ wa kĩkw’ũ kyake: nĩ kana o tondũ Klĩsto wathayũũkiw’e kuma kwa akw’ũ nũndũ wa ndaĩa ya Ĩthe, naitũ no ta ũu tũkinyae na thayũ mweũ.

5Nũndũ ethĩwa tũkwatanĩtw’e nake mũvw’anĩlenĩ wa kĩkwũ kyake, tũkeethĩwa o ta ũu mũvw’anĩlenĩ wa ũthayũũkyo wake;

6twĩsĩ ũũ, kana mũndũ mũkũũ waitũ nĩwambiwe vamwe nake, nĩ kana mwĩĩ wa naĩ wanangwe, nĩ kana tũikekale ĩngĩ ũkombonĩ wa naĩ;

7nũndũ ũla wakwie nũtalĩtwe ta ũte na naĩ.

8Ĩndĩ ethĩwa twakwie vamwe na Klĩsto, nĩtũkwĩtĩkĩla tũkeethĩwa thayũ vamwe nake;

9twĩsĩ Klĩsto nĩwathayũũkiw’e kuma kwa akw’ũ ndakakw’a ĩngĩ; kĩkw’ũ kĩikamũsumbĩka ĩngĩ.

10Nũndũ kĩkw’ũ kĩla wakwie akwie kwa naĩ o ĩmwe tũ: ĩndĩ thayũ ũla wĩ naw’o, e naw’o kwa Ngai.

11O ta ũu nenyu ĩtalei ene kwĩthĩwa mwĩ akw’ũ kwa naĩ, ĩndĩ mwĩ thayũ kwa Ngai nthĩnĩ wa Klĩsto Yesũ.

12Mũiketĩkĩle ĩndĩ nai ĩsumbĩke mĩĩnĩ yenyu ĩla ĩkusaa, kũvikĩa kwĩw’a mĩmeo yayo:

13o na mũikanengane mamutha menyu kwĩka naĩ, methĩwe mĩio, ya ũte ũlũngalu; ĩndĩ ĩnenganei ene kwa Ngai, ta ala me thayu maumite kikw’ũnĩ, na mamutha menyu methĩwe mĩio ya ũlũngalu kwa Ngai.

14Nũndũ naĩ ndĩkamũsumbĩka: nũndũ mũi ungu wa mĩao, ĩndĩ mwĩ ungu wa mumo.

15Nata ĩndĩ? Twĩke nai, nũndũ tũi ũngũ wa ĩla mĩao, ĩndĩ twĩ ungu wa mumo? Aiee, kũikethĩwe ũu.

16Mũiĩsĩ, kana kwa ũla mwĩnenganĩte ene mwĩthĩwe ngombo syake sya kwĩw’a, mwĩ ngombo syake ũla mũmwĩw’aa; ethĩwa nĩ ũkombo wa naĩ ũetae kĩkw’ũ, kana ethĩwa nĩ ũkombo wa kwĩw’a ũetae ũlũngalu?

17Ĩndĩ mũvea wĩthĩwe kwa Ngai, nũndũ, yĩla mwaĩ ngombo sya naĩ, nimweewie kuma ngoonĩ mũthemba wa momanyĩsyo asu ala mweekĩiwe nthĩnĩ wamo;

18na mũthaĩtw’e kuma nainĩ, mwatw’ĩka ngombo sya ũlũngalu.

19Nĩneena o tondũ andũ maneenaa nũndũ wa ũvũthũ wa mĩĩ yenyu: o ũndũ mweenenganie mamutha menyu methĩwe ngombo sya kwĩka ũvuku na ũthũku kũendeea ũthũkunĩ, o ta ũu yu, ĩnenganei mamutha menyu methĩwe ngombo sya ũlũngalu kũvika kũvathĩka.

20Nũndũ yĩla mwaĩ ngombo sya naĩ, mwaĩ athasye ngalĩ ĩla ya ũlũngalu.

21Mwaĩ na ũsyao mwaũ ĩvinda yĩu maũndũnĩ asu ala mũmew’ĩaa nthoni yu? Nũndũ mũminũkĩlyo wa maũndũ asu nĩ kĩkw’ũ.

22Ĩndĩ yu nĩmũthaĩtw’e kuma naĩnĩ, na mwatw’ĩka athũkũmi ma Ngai, mwĩ na ũsyao wenyu kũvika kũvathĩka, na mũminũkĩlyo nĩ thayũ ũtathela.

23Nũndũ ĩtuvi ya naĩ nĩ kĩkw’ũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.

← Chapter 5 Jump to: Chapter 7 →