Romans 4

Kamba (Mbivilia) 1956

← Chapter 3 Jump to: Chapter 5 →

1Twĩasya ata ĩndĩ ũndũ wa asa waitũ, Avalaamu, kwondũ wa mwĩĩ oonie kyau?

2Nũndũ ethĩwa Avalaamu atalĩlwe ũlũngalu kwondũ wa meko make, nũtonya, kwĩkathĩĩa; ĩndĩ ti vala ve Ngai.

3Nũndũ maandĩko measya ata? Na Avalaamu nĩwetĩkĩlile Ngai, na kwatalilwe kwake kwĩthĩwa ũlũngalu.

4Na ũla ũtethasya wĩa, ĩtuvi yake yĩitalawa ta ya mumo, ĩndĩ yĩtalawa ya thiĩ.

5Ĩndĩ ũla ũtatethasya wĩa, ĩndĩ nĩwĩtĩkĩlaa ũla ũmũtalĩlaa ũlũngalu ũla ũtakĩaa Ngai, mũĩkĩĩo wake nũtalawa kwĩthĩwa nĩ ũlũngalu.

6O tondũ Ndaviti wawetie ũathimo kwa mũndũ, ũla ũtalĩlawa ũlũngalu nĩ Ngai vate meko,

7aiasya, Nĩ aathime ala maekeawa mothũkũ moo, Na ala naĩ syoo ivw’ĩkĩtwe.

8Nĩ mũathime mũndũ ũtatalĩlawa naĩ nĩ Mwĩaĩi.

9Ũathimo ũsu nũwetawa kwa ala ma nzaĩko, kana o na kwa ala mate ma nzaĩko nao? Nũndũ twĩasya, Mũĩkĩĩo wa Avalaamu watalilwe kwĩthĩwa nĩ ũlũngalu kwake.

10Watalilwe ata? Yĩla waĩ mwaĩke, kana yĩla ũtaĩ mwaĩke? Ti yĩla waĩ mwaĩke, ĩndĩ nĩ yĩla ũtaĩ mwaĩke:

11na nĩwosie ũla ũvano wa kwaĩkwa, ũsiĩlo wa ũlũngalu wa mũĩkĩĩo ũla waĩ naw’o yĩla ũtaĩ mwaĩke: nĩ kana ethĩwe ĩthe wa onthe ala metĩkĩlaa, o na ethĩwa ti aĩke, nĩ kana matalwe kwĩthĩwa na ũlũngalu;

12na ethĩwe ĩthe wa nzaĩko tĩ wa ala maĩkawa oka, ĩndĩ o na wa ala makinyaa nyaĩĩnĩ sya ũla mũĩkĩĩo wa asa waitũ Avalaamu ũla waĩ naw’o yĩla ũtaĩ mwaĩke.

13Nũndũ ũla watho Avalaamu wanengiwe na ũsyao wake atĩ akeethĩwa mũtiĩwa wa nthĩ ndwaĩ kwondũ wa ĩla mĩao, ĩndĩ nĩ kwondũ wa ũlũngalu wa mũĩkĩĩo.

14Nũndũ ethĩwa ala ma ĩla mĩao nĩmo atiĩwa, mũĩkĩĩo nũtw’ĩkĩte wa mana, na ũla watho nũalyũkĩte kwĩthĩwa ti watho:

15nũndũ ĩla mĩao ĩetae ũthatu; ĩndĩ vala vate mĩao, vai ĩvĩtyo.

16Kwondũ wa ũu nĩ wa kũĩkĩĩa, nĩ kana ũtonye kwĩthĩwa wa mumo; nĩ kana ũla watho wĩthĩwe mũlũmu ũsyaonĩ w’onthe; ti kwa ala me na ĩla mĩao oka, ĩndĩ naw’o kwa ala me na mũĩkĩĩo wa Avalaamu, nake nĩ ĩthe wa ithyonthe

17(o tondũ kũandĩkĩtwe, Nakũtw’a we ĩthe wa mbaĩ mbingĩ) mbee wake ũla Avalaamu wamwĩtĩkĩlile, nake nĩ Ngai, ũla ũthayũũkasya akw’ũ, na ĩngĩ awetaa syĩndũ ite kw’o, ta syĩ kw’o.

18Ũla weyĩtũkĩte wĩkwatyo nĩwetĩkĩlile na wĩkwatyo, nĩ kana atw’ĩke ĩthe wa mbaĩ mbingĩ, kwĩanana na ũndũ ũla waneenĩwe, Ũsyao waku ũkeethĩwa o ta ũu.

19Nake ndaĩ mwonzu mũĩkĩĩonĩ wake, aililikana mwĩĩ wake ta mũkw’ũ (yĩla myaka yake yaĩ ta ĩana), na wũmũ wa ĩvu ya Sala;

20aisyaĩĩsya ũla watho wa Ngai, ndaaya nzĩka kwa kũlea kwitĩkĩla, ĩndĩ ongeleelwa vinya nĩ mũĩkĩĩo wake, aimũnenga Ngai ndaĩa,

21na nĩwamanyĩthĩtw’e vyũ, kana ũla wathaniwe nĩ Ngai nũtonya kũwĩka.

22Kwondũ wa ũu naw’o nĩwatalilwe kwake kwĩthĩwa nĩ ũlũngalu.

23Kũiaandĩkĩtwe kwondũ wake weka, kana nĩwatalĩlwe kwake ũu;

24ĩndĩ kwondũ witũ naitũ, ala tũkatalĩlwa o ta ũu, ithyĩ ala tũmwĩtĩkĩlaa ũla wamũthayũũkisye Yesũ Mwĩaĩi waitũ kũmumya kwa akw’ũ,

25ũla wanenganiwe kwondũ wa mavĩtyo maitũ, na athayũũkw’a nĩ kana tũtalĩlwe ũlũngalu.

← Chapter 3 Jump to: Chapter 5 →