bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
Romans 14
Romans 14
Kamba (Mbivilia) 1956
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 15 →
1
Ĩndĩ we ũla wĩ na mũĩkĩĩo mũnini mwĩtĩkĩlei, ĩndĩ ti kwa kũkananĩa maũndũ ala me nzika.
2
Mũndũ ũmwe e na mũĩkĩĩo wa kũya lĩu wa mĩthemba yonthe: ĩndĩ ũla mũvũthũ aĩsaa lĩu wa mũũndanĩ w’oka.
3
Ũla ũĩsaa ndakamũvũthye ũla ũtaĩsaa; na ũla ũtaĩsaa nake ndakamũsilĩle ũsu ũĩsaa: nũndũ Ngai nũmwĩtĩkĩlĩte.
4
We wĩ ũũ ũsilĩlaa mũthũkũmi wa ũngĩ? Kwa vwana wake mwene nũnũkũũngama kana nũnũũvalũka. Ni w’o, akaũngamw’a; nũndũ Mwĩaĩi e na vinya wa kũmũũngamya.
5
Mũndũ ũmwe nũtaĩaa mũthenya ũmwe kwi ũngĩ: mũndũ ũngĩ ataĩaa mĩthenya yonthe ũndũ ũmwe. Kĩla mũndũ namanyĩthw’e vyũ kĩlĩkonĩ kyake mwene.
6
Ũla ũsũvĩaa mũthenya, asũvĩaa kwondũ wa Mwĩaĩi: na ũla ũĩsaa, aĩsaa kwa Mwĩaĩi, nũndũ nũmũtũngĩaa Ngai mũvea; na ũla ũlea kũya, kwa Mwĩaĩi ndaĩsaa, na amũnengae Ngai mũvea.
7
Nũndũ vai ũmwe wa ithyĩ wĩkalaa thayũ kwondũ wake mwene, o na vai ũla ũkusaa kwondũ wake mwene.
8
Nũndũ ethĩwa nĩtũkwĩkala thayũ, twĩĩkala kwondũ wa Mwĩaĩi; kana ethĩwa nĩtũũkw’a, twĩkw’a kwondũ wa Mwĩaĩi: kwondũ wa ũu ethĩwa twĩĩkala thayũ, kana ethĩwa nĩ kũkw’a, twĩ ma Mwĩaĩi.
9
Nũndũ kwondũ wa ũu Klĩsto nĩwakwie na eethĩwa thayũ ĩngĩ, nĩ kana ethĩwe Mwĩaĩi wa ala akw’ũ na wa ala me thayũ.
10
Ĩndĩ we, wĩsilĩla mwana‐a‐au nũndũ wa ki? Kana ĩngĩ we, wĩvũthĩsya mwana‐a‐au kĩ? Nũndũ ithyonthe tũkaũngama mbee wa kĩvĩla kya sila kya Ngai.
11
Nũndũ nĩkũandĩkĩtwe, O ũndũ nĩ thayũ nyie, easya ũu Mwĩaĩi, mbee wakwa kĩla ĩu yĩkatulya ndu, Na kĩla ũĩmĩ ũkaumbũla mbee wa Ngai.
12
Kwa ũu ĩndĩ kĩla ũmwe waitũ akaumya ũvoo wake mbee wa Ngai.
13
Kwondũ wa ũu ĩndĩ kũikethĩwe ĩngĩ kũsilĩlana ithyĩ kwa ithyĩ: ĩndĩ nĩkwaĩle mũsile ũũ, kana mũndũ ndakamwiĩe mwana‐a‐ĩthe kya ũmũlulutĩkya, kana kya ũmũvalũkya.
14
Nĩnĩsĩ, na ndi na nzika nthĩnĩ wa Mwĩaĩi Yesũ, kana vai kĩndũ kĩvuku ũndũ wakyo kyoka: ate o kwa ũla wonaa kĩndũ nĩ kĩvuku, kwa ũsu kĩndũ kyu nĩ kĩvuku.
15
Nũndũ mwana‐a‐au eew’a woo kwondũ wa lĩu waku, ndũendaa ĩngĩ wendonĩ. Ndũkamwanange na lĩu waku ũla Klĩsto wakwie kwondũ wake.
16
Ndũkatume ĩndĩ ũseo waku ũwetwa naĩ:
17
nũndũ ũsumbĩ wa Ngai ti kũya na ti kũnyw’a, ĩndĩ nĩ ũlũngalu na mũuo na ũtanu nthĩnĩ wa Veva Mũtheu.
18
Nũndũ ũla ũmũthũkũmaa Klĩsto maũndũnĩ aa nũmwendeeasya Ngai, na nĩwĩtĩkĩlawa nĩ andũ.
19
Kwondũ wa ũu ĩndĩ, tũatĩĩe maũndũ ala ma mũuo, na maũndũ ala matumaa kĩla ũmwe aka ũngĩ.
20
Mũikanange wĩa wa Ngai kwondũ wa lĩu. Nĩ w’o syĩndũ syonthe nĩ ntheu; ĩndĩ nĩ ũthũku kwa ũsu ũĩsaa na ũlulutĩkyo.
21
Nĩ ũseo kũlea kũya nyama, kana kũnyw’a mbinyu, kana kwĩka ũndũ o na wĩva ũtuma mwana‐a‐au alulutĩka.
22
Mũĩkĩĩo ũla wĩ naw’o ĩthĩwa naw’o kwondũ waku mwene mbee wa Ngai. Nĩ mũtanu ũsu ũla ũtesilĩla mwene ũndũnĩ ũsu ũwĩtĩkĩlĩte.
23
Ĩndĩ ethĩwa mũndũ eya e na nzika nĩmũsilĩle kwĩthĩwa nĩ mũvĩtan’ya, nũndũ eya ate na mũĩkĩĩo; na ũndũ o na wĩva ũtaumaa mũĩkĩĩonĩ nĩ naĩ.
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 15 →
All chapters:
1
2
3
4
5
6
7
8
9
10
11
12
13
14
15
16