Zechariah 1

Kamba (Mbivilia) 1956

Jump to: Chapter 2 →

1Mwei wa nyanya, mwaka wa kelĩ wa kũsumbĩka kwa Ndalio, ndeto ya Yeova yamũkĩa mwathani Nzekalia mwana wa Mbelekia, mwana wa Ito, ĩkĩmwĩa,

2Yeova nĩwew’ĩthĩw’e woo nĩ aaĩthe menyu.

3Kwondũ wa ũu matavye, Ũũ nĩw’o Yeova wa nguthu ũnũkwasya: Nzyokeai, easya ũu Yeova wa nguthu, nakwa ngamũsyokea, easya ũu Yeova wa nguthu.

4Mũtikethĩwe ta aaĩthe menyu, ala manĩĩw’e nĩ athani ma tene, makyasya, Ũũ nĩw’o Yeova wa nguthu ũnũkwasya, Syokai yu kuma mĩendelenĩ yenyu mĩthũku, na kuma mekonĩ menyu mathũku: ĩndĩ matyaaĩw’a, kana kũmbĩthukĩĩsya, easya ũu Yeova.

5Maĩva, aaĩthe menyu? Na athani, nĩmekalaa ĩndĩ yonthe?

6Ĩndĩ ndeto syakwa na myamũlo yakwa, ila neeaĩe athũkũmi makwa athani, ityaamakwata aaĩthe menyu? Na masyoka na masya, O tondũ Yeova wa nguthu ũsũanĩĩte kũtwĩka, o kwĩanana na mĩendele yaitũ, na kwĩanana na meko maitũ, now’o ũtwĩkĩte.

7Mũthenya wa mĩongo ĩlĩ na ĩna wa mwei wa ĩkũmi na ũmwe, nĩw’o mwei wa Sevati, mwaka wa kelĩ wa kũsumbĩka kwa Ndalio, ndeto ya Yeova yamũkĩa mwathani Nzekalia mwana wa Mbelekia, mwana wa Ito, ĩkĩmwĩa,

8Ũtukũ nĩnoonie, na, sisya, mũndũ atũlĩte mbalasi ndune, na aũngama katĩ wa mĩtĩ ya mĩandasi ĩla yaĩ kaũlikunĩ; na ĩtina wake kwaĩ mbalasi, ndune, na ĩ mũkũyũ, na nzaũ.

9Nĩvo naisye, We mwĩaĩi wakwa, ii nĩ myaũ? Na mũlaĩka ũla waneenaa nakwa ambĩa, Nĩngũkũmanyĩthya syo.

10Na ũla mũndũ ũũngeme katĩ wa mĩandasi asũngĩa na asya, Ii nĩsyo Yeova ũtũmĩte syangange nthĩ kũũ na kũũ.

11Na syasũngĩa mũlaĩka wa Yeova ũla waũngyĩ katĩ wa mĩandasi, na syasya, Nĩtwangangĩte nthĩ kũũ na kũũ, na, sisya, nthĩ yonthe ĩkalĩte ĩuĩtye, na ĩthũmũĩte.

12Nĩvo mũlaĩka wa Yeova wasũngĩie na asya, Ame Yeova wa nguthu, nĩ veana ata ũtakew’ĩa Yelusaleme na ndũa sya Yuta tei, ila waithĩlĩkĩle myaka ĩno mĩongo mũonza?

13Na Yeova asũngĩa mũlaĩka ũla waneenaa nakwa ndeto nzeo, o ndeto sya ũkiakisyo.

14Na ĩndĩ mũlaĩka ũla waneenaa nakwa ambĩa, Anĩĩsya, ũkyasya, Ũũ nĩw’o Yeova wa nguthu ũnũkwasya: Nĩ na kĩwĩu nũndũ wa Yelusaleme na nũndũ wa Saioni o kĩwĩu kĩnene.

15Na nĩngwĩw’ĩthw’a woo mũno nĩ mbaĩ ila ithũmũĩte; nũndũ neew’ĩthiw’e woo o vanini, na makalaata thĩna wũke.

16Kwondũ wa ũu Yeova easya atĩĩ: Nĩnzyokete Yelusaleme nĩ na matei; nyũmba yakwa ĩkaakwa nthĩnĩ wayo, na ũlii wa kũthima ũkatambũũkw’a ũthime ku Yelusaleme, easya ũu Yeova wa nguthu.

17Anĩĩsya ĩngĩ, ũkyasya, Ũũ nĩw’o Yeova wa nguthu ũnũkwasya: O na ndũa syakwa ikausũa ũathimo wĩtĩkange; o na Yeova akakiakisya Saioni, o na akanyuva Yelusaleme.

18Na nookĩlya metho makwa, na noona, na, sisya, mbya inya.

19Na namwĩa mũlaĩka ũla waneenaa nakwa, Ii nĩ myaũ? Na anzũngĩa, Ii nĩ mbya ila syanyaĩĩkisye Yuta, na Isilaeli, na Yelusaleme.

20Na Yeova ambon’ya atwii ana.

21Nĩvo naisye, Aa mooka kwĩka ata? Na anzũngĩa, ambĩa, Ii nĩ mbya ila syanyaĩĩkisye Yuta, mũvaka vatyaĩ mũndũ waaũkĩlya mũtwe; ĩndĩ ii nĩsyooka kũmatĩsya, kwĩkya mbya sya i mbaĩ nthĩ, ila syookĩlilye ũvya wasyo ĩũlũ wa nthĩ ya Yuta imĩnyaĩĩkye.

Jump to: Chapter 2 →