Zechariah 4

Kamba (Mbivilia) 1956

← Chapter 3 Jump to: Chapter 5 →

1Na mũlaĩka ũla waneenaa nakwa ooka ĩngĩ, na anamũkya, o ta mũndũ ũla ũamũkaw’a toonĩ wake.

2Na ambĩa, Wĩona kyaũ? Nakwa nasya, Nĩnoona, na, sisya, kĩndũ kĩla kĩkĩawa mataa kya thaavu mũthei, kĩ na mbakũli yakyo ĩũlũ wakyo, na mataa makyo mũonza ĩũlũ wakyo; ve mĩtote mũonza ĩvikĩte kĩla taanĩ ũla wĩ ĩũlũ wakyo;

3na mĩthata ĩlĩ ũtee wakyo, ũmwe ngalĩ ya kw’oko kwa aũme ya mbakũli, na ũla ũngĩ ngalĩ ya kw’oko kwa aka kwayo.

4Na nasũngĩa ngĩneena na mũlaĩka ũla waneenaa nakwa, ngĩkũlya, Ii nĩ myaũ, mwĩaĩi wakwa?

5Nĩvo mũlaĩka ũla waneenaa nakwa wasũngĩie na ambĩa, Ii ndũsyĩsĩ? Na nasya, Aiee, mwĩaĩi wakwa.

6Nĩvo wasũngĩie akĩneena nakwa, akyasya, Ĩno nĩ ndeto ya Yeova kwa Nzeluvaveli, ĩkĩmwĩa, Ti kwondũ wa vinya mwingĩ, kana kwondũ wa ũtonyi, ĩndĩ nĩ kwondũ wa Veva wakwa, easya ũu Yeova wa nguthu.

7Nue ũũ, we kĩĩma kĩnene? Mbee wa Nzeluvaveli ũkatw’ĩka ũiĩ; nake akayumĩlya ĩvia ya ĩũlũ mũthya akĩyũkĩlĩlya wasya mũnene, Mumo, mumo.

8Na ĩngĩ ndeto ya Yeova yambũkĩa, ĩkĩmbĩa,

9Moko ma Nzeluvaveli nĩmakwatisye mwambĩlĩlyo wa nyũmba ĩno; na ĩngĩ moko make makamĩmina; na ũkamanya kana Yeova wa nguthu nũndũmĩte kwenyu.

10Nũndũ nũũ ũvũthĩtye mũthenya wa maũndũ manini? Nũndũ asu mũonza makatana, na makoona kavilũ ke kw’okonĩ kwa Nzeluvaveli; asu nĩ metho ma Yeova, ala masembaa kũũ na kũũ nthĩ yonthe.

11Nĩvo nasũngĩie, na namũkũlya, Mĩthata ĩsu ĩlĩ ĩ ngalĩ ya kw’oko kwa aũme kwa kĩla kĩndũ kĩkĩawa mataa na ngalĩ ya kw’oko kwa aka nĩ myaũ?

12Na nasũngĩa ĩvinda ya kelĩ, na namũkũlya, Mbonge ii ilĩ sya mũthata, ila syĩ ũtee wa mĩtote ĩlĩ ya thaavu, ĩla ĩyumasya mauta ma thaavu, nĩsyo kyaũ?

13Na anzũngĩa na asya, Ii ndũsyĩsĩ? Na nasya, Aiee, mwĩaĩi wakwa.

14Nĩvo waisye, Ii nĩsyo ala elĩ metĩkĩw’e mauta, ala maũngamaa ũtee wa Mwĩaĩi wa nthĩ yonthe.

← Chapter 3 Jump to: Chapter 5 →