Zechariah 3

Kamba (Mbivilia) 1956

← Chapter 2 Jump to: Chapter 4 →

1Na ambon’ya Yosua mũthembi mũnene aũngamĩte mbee wa mũlaĩka wa Yeova, na Satani aũngamĩte ngalĩ ya kw’oko kwake kwa aũme ethĩwe nthũ yake.

2Na Yeova amwĩa Satani, Yeova nakũkan’ye, we Satani; ĩĩ, Yeova ũla wanyuvie Yelusaleme nakũkan’ye: kĩĩ tĩ kĩsinga kĩvulĩtw’e mwakinĩ?

3Na ĩndĩ Yosua eekĩĩte ngũa mbuku, na aũngamĩte mbee wa mũlaĩka.

4Na asũngĩa akĩneena na ala maũngamĩte mbee wake, akyasya, Mumyei ngũa mbuku. Na amwĩa, Sisya, nĩnakũvetea ũthũku waku, na ngakwĩkĩa ngũa ya thooa mũnene.

5Na nasya, Nĩmamwĩkĩe ngũtw’a ntheu mũtwe. Na ĩndĩ mamwĩkĩa ngutw’a ntheu mũtwe, na mamwĩkĩa ngũa; na mũlaĩka wa Yeova aũngamĩte ũtee.

6Na mũlaĩka wa Yeova amũkũsĩĩa Yosua, akyasya,

7Ũũ nĩw’o Yeova wa nguthu ũnũkwasya: Ethĩwa ũkakinyaa nzĩanĩ syakwa, na ethĩwa ũkasũvĩaa wĩaĩo wakwa, nĩvo o naku wĩsilĩla nyũmba yakwa, o na ĩngĩ ũkasũvĩaa nza syakwa, na ngakũnenga vandũ va ũlikĩlaa katĩ wa aa maũngamĩte ũtee.

8Iw’a yu, we Yosua mũthembi mũnene, we na atindan’ya maku ala mekalaa nthĩ vala ũĩ; nũndũ andũ asu nĩmo wonan’yo: nũndũ, sisya, ngaumĩlya mũthũkũmi wakwa Ũvonge.

9Nũndũ, sisya, ĩvia yĩla naia mbee wa Yosua; ĩũlũ wa ĩvia yĩmwe ve metho mũonza: sisya, ngavana movano mayo, na ngaveta ũthũku wa nthĩ ĩsu mũthenya ũmwe, easya ũu Yeova wa nguthu.

10Mũthenya ũsu mũkathokanasya kĩla mũndũ na mũtũi wake ĩtina wa mũsavivũ na ĩtina wa mũkũyũ, easya ũu Yeova wa nguthu.

← Chapter 2 Jump to: Chapter 4 →