Zechariah 8

Kamba (Mbivilia) 1956

← Chapter 7 Jump to: Chapter 9 →

1Na ndeto ya Yeova wa nguthu yambũkĩa, ĩkĩmbĩa,

2Ũũ nĩw’o Yeova wa nguthu ũnũkwasya: Nĩ na kĩwĩu ũndũ wa Saioni o kĩwĩu kĩnene, na nĩ na kĩwĩu nũndũ wayo kĩ ũthilĩku mũnene.

3Ũũ nĩw’o Yeova ũnũkwasya: Nĩnasyoka Saioni, na ngatũa Yelusaleme katĩ: na Yelusaleme ĩkeetawa Ndũa ya w’o; na kĩĩma kya Yeova wa nguthu kĩkeetawa Kĩĩma kĩtheu.

4Ũũ nĩw’o Yeova wa nguthu ũnũkwasya: O na kũkeethĩwa atumĩa akũũ na iveti ngũũ mekalĩte nzĩanĩ nene sya Yelusaleme, kĩla mũndũ e na ndata yake kw’okonĩ kwake, nũndũ wa kũkũa mũno.

5Na nzĩa nene sya ndũa ikausũwa nĩ ivĩsĩ na eĩtu makĩthaũka nzĩanĩ nene syayo.

6Ũũ nĩw’o Yeova wa nguthu ũnũkwasya: Ethĩwa nĩ ũseng’yo methonĩ ma ũtialo wa andũ aa mĩthenya ĩsu, nĩwaĩle kwĩthĩwa ũseng’yo methonĩ makwa? Ekũlya ũu Yeova wa nguthu.

7Ũũ nĩw’o Yeova wa nguthu ũnũkwasya: Sisya, ngatangĩĩa andũ makwa kuma nthĩ ya wumĩlonĩ wa syũa, na kuma nthĩ ya ũthũĩlonĩ wa syũa;

8na ngamaete, na makatũa nthĩnĩ wa Yelusaleme; na makeethĩwa andũ makwa, na ngeethĩwa Ngai woo, nthĩnĩ wa w’o na nthĩnĩ wa ũlũngalu.

9Ũũ nĩw’o Yeova wa nguthu ũnũkwasya: Moko menyu nĩmethĩwe na vinya, inyw’ĩ ala mũkwĩw’a mĩthenya ĩno ndeto ii kuma kanyw’anĩ wa athani ala maĩ vo mũthenya ũla mwambĩlĩlyo wa nyũmba ya Yeova wa nguthu wakwatiw’e, nayo nĩ ĩkalũ, nĩ kana yakwe.

10Nũndũ mbee wa mĩthenya ĩsu kũtyaĩ ĩtuvĩ ya mũndũ kana ĩtuvi ya nyamũ; o na kũtyaĩ mũuo kwa ũla waumaalile kana ũla walikile, nũndũ wa nthũ: nũndũ nĩngũmaingĩanĩsya andũ onthe kĩla ũmwe na mũtũi wake.

11Ĩndĩ yu kwa ũtialo wa andũ aa ndikethĩwa ta mĩthenya ya tene, easya ũu Yeova wa nguthu.

12Nũndũ kũkeethĩwa ũsyao wa mũuo; mũsavivũ ũkasyaa ũsyao waw’o, na nthĩ ĩkaingĩvasya ũsyao wayo, na matu makaete ĩmwe yamo; na ngatuma ũtialo wa andũ aa ũtiĩwa maũndũ aa onthe.

13Na kũkeethĩwa, o tondũ mwaĩ kĩumo katĩ wa i mbaĩ, inyw’ĩ nyũmba ya Yuta na nyũmba ya Isilaeli, o ta ũu ngamũtangĩĩa, na mũkeethĩwa ũathimo. Mũikakĩe, ĩndĩ moko menyu nĩmethĩwe na vinya.

14Nũndũ ũũ nĩw’o Yeova wa nguthu ũnũkwasya: O tondũ nasũanĩĩte kũmwĩka ũthũku, yĩla aaĩthe menyu manthilĩkilye, easya ũu Yeova wa nguthu, na ndyaaĩtũnga;

15o ta ũu nĩnzũanĩĩte ĩngĩ mĩthenya ĩno kwĩka Yelusaleme na nyũmba ya Yuta nesa: mũikakĩe.

16Aa nĩmo maũndũ ala mwĩĩkaa: Neenaai w’o kĩla mũndũ na mũtũi wake; silĩlaai sila wa katĩ na wa mũuo mbingĩlonĩ syenyu;

17na kũtikethĩwe ũmwe wenyu ũsũanĩĩa mũtũi wake ngoonĩ ũndũ ũthũku; na mũikende wĩvĩto wa ũvũngũ: nũndũ aa onthe nĩmo maũndũ ala nĩmenaa, easya ũu Yeova.

18Na ndeto ya Yeova wa nguthu yambũkĩa, ĩkĩmbĩa,

19Ũũ nĩw’o Yeova wa nguthu ũnũkwasya: Kũtĩĩa kũya kwa mwei wa kana na, kũtĩĩa kũya kwa mwei wa katano, na kũtĩĩa kũya kwa mwei wa mũonza, na kũtĩĩa kũya kwa mwei wa ĩkũmi, kũkeethĩwa kwa nyũmba ya Yuta ũtanu na mũyo, na mboka sya ũtanu; kwondũ wa ũu endai w’o na mũuo.

20Ũũ nĩw’o Yeova wa nguthu ũnũkwasya: O na ĩngĩ kũkooka ngo sya andũ, o na ala matwĩe ndũanĩ mbingĩ;

21na ala matwĩe ndũanĩ ĩmwe makathi ĩla ĩngĩ, makyasya, Tũendei mĩtũkĩ tũkesũve Yeova atwĩke nesa, na kũmantha Yeova wa nguthu: o nakwa nĩngũthi.

22Ĩĩ, ngo mbingĩ sya andũ na mbaĩ syĩ vinya ikooka kũmantha Yeova wa nguthu Yelusaleme, na kwĩsũva Yeova asyĩke nesa.

23Ũũ nĩw’o Yeova wa nguthu ũnũkwasya: Mĩthenya ĩsu kũkeethĩwa, atĩ andũ ĩkũmi, kuma ithyomonĩ syonthe sya i mbaĩ, makakwata, ĩĩ, makakwata mũthya wa ngũa ya mũndũ Mũyuti, makyasya, Nĩtũkũthi nenyu, nũndũ nĩtwĩw’ĩte kana Ngai e vamwe nenyu.

← Chapter 7 Jump to: Chapter 9 →