Zechariah 5

Kamba (Mbivilia) 1956

← Chapter 4 Jump to: Chapter 6 →

1Na ĩndĩ nookĩlya metho makwa ĩngĩ, na noona, na, sisya, ĩvuku ĩkũnze yĩũlũkĩte.

2Na angũlya, Wĩona kyaũ? Nakwa nasũngĩa, Nĩona ĩvuku ĩkũnze yĩũlũkĩte; ũasa wayo nĩ mĩkono mĩongo ĩlĩ, na ũthanthau wayo mĩkono ĩkũmi.

3Nĩvo wambĩie, Kĩĩ nĩ kĩumo kĩla kyumite kĩthi ĩũlũ wa nthĩ yonthe: nũndũ kĩla ũmwe ũla wũyaa akavetwa aume ngalĩ ĩmwe kwĩanana na ũndũ kũandĩkĩtwe; na kĩla ũmwe wĩavaa akavetwa aume ngalĩ ĩla ĩngĩ kwĩanana na ũndũ kũandĩkĩwe.

4Ngatuma kyuma kĩthi, na kĩkalika nyũmbanĩ ya kĩng’ei, na nyũmbanĩ ya ũla wĩvĩtaa ũvũngũ na syĩtwa yakwa, easya ũu Yeova wa nguthu; na kĩkekala katĩ wa nyũmba yake, na kĩkamĩmina vamwe na mĩtĩ yayo na mavia mayo.

5Nĩvo mũlaĩka ũla waneenaa nakwa waumaalile, na ambĩa, Yu ũkĩlya metho maku, ũsisye kĩĩ nĩ kyaũ kyumĩte kĩthi.

6Na nakũlya, Nĩkyo kyaũ? Nake asũngĩa, Ĩno nĩ eva yumĩte ĩthi. Ambĩa ĩngĩ, Ũu nĩw’o mailyĩ ĩ nthĩ yonthe

7(na, sisya, vookĩlilw’e talendi ya ĩvulũ); na ũũ nĩ mũndũ mũka wĩkalĩte katĩ wa eva.

8Na asya, Ũũ nĩ Ũthũku: na amũng’uthanĩa vu nthĩnĩ wa eva; na ekya yĩla ĩvulũ kanyw’anĩ wayo.

9Nĩvo nookĩlilye metho makwa, na noona, na, sisya, kwaumĩlile aka elĩ, na kĩseve kyaĩ nthwaunĩ syoo; na ĩndĩ maĩ na nthwau ta nthwau sya ĩsaũ; na mookĩlya eva katĩ wa nthĩ na ĩtu.

10Nĩvo neeie mũlaĩka ũla waneenaa nakwa. Aa makua eva meelya nakũ?

11Nake anzũngĩa, Methi kũmwakĩa nyũmba nthĩ ya Sinali: na yamina kũseũvw’a, akekalw’a vo vandũ vake mwene.

← Chapter 4 Jump to: Chapter 6 →