Zechariah 9

Kamba (Mbivilia) 1956

← Chapter 8 Jump to: Chapter 10 →

1Ũito wa ndeto ya Yeova ĩũlũ wa nthi ya Atilaki, nayo Ndamasiku ikeethĩwa vandũ vayo va kwĩkala (nũndũ itho ya mũndũ na ya mbaĩ syonthe sya Isilaeli yelekele Yeova);

2o na Amathi, ĩla ĩvakanĩte nayo; o na Tile na Sitoni, nũndũ nĩ mbũĩ mũno.

3Na Tile nĩĩyakĩe ngome yĩ vinya, na kũmban’ya vetha ta kĩtoo, na kũmban’ya thaavu mũtheu ta ndaka nzĩanĩ nene.

4Sisya, Mwĩaĩi akamĩvuta, na akakũnĩa ũtonyi wayo ũkanganĩ; na ĩkaanangwa na mwaki.

5Asikeloni ĩkoona ũu, na ĩkĩkĩa: na Ngasa o ta ũu, na ĩkeethĩwa na kyalya kĩnene; o na Ekiloni, nũndũ wĩkwatyo wayo ũkasonokw’a; na Ngasa ĩkaaa mũsumbĩ, na Asikeloni ndĩkatũwa.

6Na mũndũ wasyaĩwe ũlaalainĩ akatũa Asitoti, na ngaveta ngathiĩo sya Avilisiti.

7Na ngaveta kũnyw’a nthakame kanyw’anĩ wake, na mothatyo make maume maeonĩ make; o nake akeethĩwa ũtialo kwa Ngai waitũ; na akeethĩwa ta mũnene nthĩnĩ wa Yuta, na Ekiloni ta Mũyevusĩ.

8Na ngamba maeema nĩthyũlũlũkĩtye nyũmba yakwa nĩsiĩĩe nguthu ya kaũ, nĩ kana kũtikethĩwe ũmwe wĩvĩta mũkuthũ kana kũsyoka; na kũtikavĩtĩla mũthĩn’ya katĩ wamo ĩngĩ: nũndũ yu nĩnonete na metho makwa.

9Tana mũno, we mwĩĩtu wa Saioni; ũkĩlya wasya, we mwĩĩtu wa Yelusaleme: sisya, mũsumbĩ waku nĩwũkĩte kwaku; nĩ mũlũngalu, na e na ũtangĩĩo; e na wĩnyivyo, na atũlĩte ĩng’oĩ, o ndena, ndena ya ĩng’oi.

10Na ngaveta ĩkasya ya kaũ kwa Evalaimu, na mbalasi Yelusaleme; na ũta wa kaũ ũkavetwa; na akaneena mũuo kwa ĩ mbaĩ: na ũsumbĩko wake ũkeethĩwa kuma ũkanga kũvika ũkanga, na kuma ũla Ũsĩ kũvika itulunĩ sya nthĩ.

11O na ĩngĩ ũndũ waku, nũndũ wa nthakame ya ũtianĩo waku nĩnĩthaĩtye ovwa maku maume ĩimanĩ yĩla yĩte kĩw’ũ.

12Syokai ĩla ngomenĩ yĩ vinya, inyw’ĩ ovwa me wĩkwatyo: o na ũmũnthĩ nĩngũtavan’ya kana nĩngũkũĩva kũndũ kwĩlĩ.

13Nũndũ nĩngootete Yuta nũndũ wakwa ta ũta, nĩvakĩĩsye Evalaimu; ngaingĩanĩsya ana maku, we Saioni, na ana maku, we Ngiliki, na ngakũtw’ĩkĩthya ta ũvyũ wa ngũmbaũ.

14Na Yeova akooneka ĩũlũ woo; na mũsyĩ wake ũkaumĩla ta ũtisi; na Mwĩaĩi Yeova akavuva soo, na akaendan’ya na ilingi sya ngalĩ ya ĩtheo.

15Yeova wa nguthu akamasesea; na makaya, na makakinyangĩa mavia ma kĩkũtha nthĩ; na makanyw’a, na makalonzan’ya ta manyw’ĩte mbinyu; na makausũa ta mbakũli, na kũkola o ta ikoto sya kĩthembeo.

16Na Yeova Ngai woo akamatangĩĩa mũthenya ũsu ta ĩĩthya ya andũ make; nũndũ makeethĩwa ta tũvila twa ngovia ya ũsumbĩ, tũkĩlĩtw’e mũno ĩũlũ wa nthĩ yake.

17A! Ũndũ ũseo wake ũnenevete, na ũndũ wanakavu wake ũnenevete! Lĩu wa mbaa ngetha ũkatuma anake meana, na mbinyu mbĩthĩ eĩtu atheu.

← Chapter 8 Jump to: Chapter 10 →