Zechariah 7

Kamba (Mbivilia) 1956

← Chapter 6 Jump to: Chapter 8 →

1Na kweethĩwa mwaka wa kana wa kũsumbĩka kwa mũsumbĩ Ndalio, ndeto ya Yeova yamũkĩa Nzekalia mũthenya wa kana wa mwei wa kenda, wĩtawa Kiselevu.

2Na yu ala ma Mbethi‐eli matũma Saleseli na Lekemimeleki, na andũ moo, kũvoya tei kwa Yeova,

3na kũneena na athembi ma nyũmba ya Yeova wa nguthu, na athani, akĩkũlya, Nĩnaĩle kũĩa mwei wa katano, ngĩvatha mwene, o tondũ nĩkĩte myaka ĩsu yingĩvĩte ũu?

4Nĩvo ndeto ya Yeova wa nguthu yambũkĩe, ĩkĩmbĩa,

5Neena na andũ onthe ma ĩ nthĩ, na athembi, ũkĩkũlya, Yĩla mwatĩĩie kũya na mwameta mwei wa katano na wa mũonza, o myaka ĩsu mĩongo mũonza, mwaatĩĩa nongi kũya nũndũ wakwa, nyie?

6Na yĩla mũĩsaa, na kũnyw’a, mũtiĩsaa nũndũ wenyu ene, na kũnyw’a nũndũ wenyu ene?

7Mũtyaĩle kwĩw’a ndeto ila Yeova waneenie na kanyw’a wa athani ma tene, yĩla Yelusaleme yatwĩwe nĩ andũ na ĩkaĩla, na ndũa syayo imĩthyũlũlũkĩte, na ngalĩ ya ĩtheo na nthĩ ndindimalu syatwĩwe?

8Na ndeto ya Yeova yamũkĩa Nzekalia, ĩkĩmwĩa,

9Ũũ nĩw’o Yeova wa nguthu ũneenete, akyasya, Silaai sila wa katĩ, na kĩla mũndũ akyon’ya mwanaa‐ĩthe ũseo na ĩnee;

10na mũtikathĩn’ye aka ndiwa, o na ala makw’ĩĩwe nĩ aaĩthe, o na mwĩkali wa ũeninĩ, o na ngya; na kũtikethĩwe ũmwe wenyu ũsũanĩĩa mwana‐a‐ĩthe ngoonĩ ũndũ ũthũku.

11Ĩndĩ nĩmaleile kwĩw’a, na mambatĩsya ituo, na makunĩka matũ moo, nĩ kana matikew’e.

12Ĩĩ, nĩmoomĩsye ngoo syoo ta ĩvia ya ũana, matikese kwĩw’a mĩao, na ndeto ila Yeova wa nguthu watwaie na Veva wake na kanyw’a wa athani tene: kwondũ wa ũu nĩkwaumie ũthilĩku mũnene kwa Yeova wa nguthu.

13Na kwĩkĩkĩte atĩĩ, o tondũ wetanie, nao matyaaĩtĩkĩla kwĩw’a, nao makeetana o ta ũu, nakwa ndikew’a, easya ũu Yeova wa nguthu;

14ĩndĩ ngamanyaĩĩkya na kĩlingi katĩ wa mbaĩ syonthe ila mataaimanya. O ta ũu ĩ nthĩ yatiiwe yĩ nthei itina woo, ũndũ vataĩ mũndũ waamĩvĩtĩla kana kũsyokela: nũndũ nĩmamĩtw’ĩkĩthĩtye nthĩ ya kwendeesya nthei.

← Chapter 6 Jump to: Chapter 8 →