Zechariah 11

Kamba (Mbivilia) 1956

← Chapter 10 Jump to: Chapter 12 →

1Vingũa mĩomo yaku, we Levanoni, nĩ kana mwaki ũvĩvye mĩtĩ yaku ya mĩkũũ.

2Kaya, we mũtĩ wa mũsonovali, nũndũ mũkũũ nĩ mũvalũku, nĩkwĩthĩwa ĩla mĩseo nĩ myanangĩku: kayai, inyw’ĩ mĩtĩ ya myaloni yĩ Mbasani, nũndũ mũtitũ wĩ vinya nĩ mũvalũku nthĩ.

3A! Wasya wa kũkaya kwa aĩthi! Nũndũ ndaĩa yoo nĩ mbanangĩku: a! Wasya wa kĩlumo kya mĩnyambũ ya mũika! Nũndũ ngathĩĩo sya Yolotani nĩsyanangĩtwe.

4Ũũ nĩw’o Yeova Ngai wakwa waisye: Ĩthya ĩĩthya ya kũthĩnzwa;

5yĩla ene mayo mayũaaa, na matyĩyonaa ene ta me na ĩvĩtyo; na ala mayĩthooasya maasya, Nataĩwe Yeova, nũndũ nyie nĩ mũthwii; na aĩthi mayo ene matiyĩw’ĩaa ĩnee.

6Nũndũ ndikew’ĩa ala matwĩe ĩ nthĩ ĩnee ĩngĩ, easya ũu Yeova; ĩndĩ, sisya, ngamanengane andũ asu kĩla ũmwe kw’okonĩ kwa mũtũi wake, na kw’okonĩ kwa mũsumbĩ wake; na makamĩkũna ĩ nthĩ, na ndikamatangĩĩa kw’okonĩ kwoo.

7Na ĩndĩ naĩthya ĩĩthya ya kũthĩnzwa, nĩ w’o, o ila mbonzu sya ĩĩthya. Na neeyosea ndata ilĩ; ĩmwe namĩta Ũseo, na ĩla ĩngĩ namĩta Mawĩw’ano; na naĩthya ĩĩthya.

8Na naveta aĩthi atatũ mwei ũmwe; nũndũ ngoo yakwa nĩyanoetw’e nĩmo, na ngoo syoo nasyo nĩsyangolete.

9Nĩvo naisye, Ndikamũĩthya: ũla ũnũũkw’a, nakw’e; na ũla ũnũkwaa, nĩae, na ala matiala nĩmaĩsane kĩla ũmwe na ũla ũngĩ.

10Na noosa ndata yakwa ĩla ĩtawa Ũseo, na namĩtilan’ya, nĩ kana nanange ũtianĩo ũla natianĩe na ngo syonthe sya andũ.

11Na waanangiwe mũthenya ũsu; na o ta ũu asu onzu ĩĩthyanĩ ala mambĩw’aa mamanya kana nĩ ndeto ya Yeova.

12Na namea, Ethĩwa nĩmũkwona nĩ ũseo, nengai ĩtuvi yakwa; na ethĩwa ti w’o, ekai. Na ĩndĩ manthimĩa ĩtuvi yakwa ilungu mĩongo ĩtatũ sya vetha.

13Na Yeova ambĩa, Mwĩkĩsye mũmbi wa mbisũ, thooa mũseo ũla natw’ĩĩwe nĩmo. Nakwa noosa ilungu isu mĩongo ĩtatũ sya vetha, na nasyĩkĩsya mũmbi, nyũmbanĩ ya Yeova.

14Nĩvo natilanilye ndata ĩla ĩngĩ yakwa, o Mawĩw’ano, nĩ kana nanange ũ‐ana‐a‐ĩthe katĩ wa Yuta na Isilaeli.

15Na Yeova ambĩa, Ĩyosee o ĩngĩ mĩio ya mũĩthi mũtumanu.

16Nũndũ, sisya, ngookĩlya mũĩthi ĩ nthĩ, ũla ũtakaisisya ila mbete, o na ndakamantha ila inyaĩĩkĩtw’e, o na kũvosya ila ndũlĩkangu, o na kũĩthya ila nima; ĩndĩ akaĩsaa nyama sya malondu manou, na akatembũanga mavũngũ mamo tũlungu.

17Woo nĩ wa mũĩthĩ ũte vata ũla ũtiaa ĩĩthya! Ũvyũ ũkeethĩwa ĩũlũ wa kw’oko kwake, na ĩũlũ wa itho yake ya ngalĩ ya kw’oko kwa aũme: kw’oko kwake kũkooma vyũ, na itho yake ya ngalĩ ya kw’oko kwa aũme yĩkatulya kĩvĩndu vyu.

← Chapter 10 Jump to: Chapter 12 →