Zechariah 14

Kamba (Mbivilia) 1956

← Chapter 13 Jump to:

1Sisya, mũthenya wa Yeova nĩwũkĩte, yĩla mũtavo waku ũkaaanw’a katĩ waku.

2Nũndũ ngoomban’ya mbaĩ syonthe ĩũlũ wa Yelusaleme syũkĩte; na ndũa ĩkooswa, na nyũmba ikatavwa mĩio, na aka makakindwa; na nyunzu ya ndũa ĩkatavwa, na ũtialo wa andũ ndũkavetwa ndũanĩ.

3Nĩvo Yeova ũkaumĩla, na kũkita na mbaĩ ĩsu, ta yĩla wokitie mũthenya wa kaũ.

4Na maũũ make makaũngama mũthenya ũsu ĩũlũ wa kĩla kĩĩma kya Mĩthata, kĩla kyelekele Yelusaleme ngalĩ ya wumĩlonĩ wa syũa: na kĩĩma kya Mĩthata kĩkaatũkanĩla katĩ kyelekele wumĩlonĩ wa syũa na kyelekele ũthũĩlonĩ wa syũa, na vakeethĩwa kyanda kĩnene mũno; na nyunzu ya kĩĩma ĩkathi yelekele ngalĩ ya ĩũlũ na nyunzu yakyo yelekele ngalĩ ya ĩtheo.

5Na mũkakĩĩla kyandanĩ kya iĩma syakwa; nũndũ kyanda kya iĩma kĩkavika Aseli; ĩĩ, mũkakĩa, o tondũ mwakĩie kĩtetemo kya nthĩ mĩthenya ya Usia mũsumbĩ wa Yuta; na Yeova Ngai wakwa akooka, na atheu onthe vamwe naku.

6Na kũkeethĩwa mũthenya ũsu, kũtikethĩwa kyeni; motisu makaoseea:

7ĩndĩ ũkeethĩwa mũthenya ũmwe ũla wĩsĩkĩwe nĩ Yeova; ti mũthenya, na ti ũtukũ; ĩndĩ kũkeethĩwa, atĩ wĩoo kũkeethĩwa kyeni.

8Na kũkeethĩwa mũthenya ũsu, atĩ manzĩ ma thayũ makaumĩla Yelusaleme; nyunzu yamo kwelekela ũkanganĩ wa wumĩlonĩ wa syũa, na nyunzu yamo kwelekela ũkanganĩ wa ũthũĩlonĩ wa syũa: kũkeethĩawa ũu ĩvinda ya syũa na ivĩnda ya mbevo.

9Na Yeova akethĩwa Mũsumbĩ ĩũlũ wa nthĩ yonthe: mũthenya ũsu Yeova akeethĩwa o ũmwe, na syĩtwa yake o yĩmwe.

10Ĩ nthĩ yonthe ĩkatw’ĩkĩthw’a ta Alava, kuma Ngeva kũvika Limoni ngalĩ ya ĩtheo ya Yelusaleme; nayo ĩkookĩlw’a, na kũtũa vandũ vayo, kuma mbingĩlonĩ ya Mbenyamini kũvika vandũ va mbingĩlo ya mbee, o kũvika mbingĩlo ya kĩkotonĩ, na kuma ũla mwako mũtũlu wa mũnyoolo wa Ananeli kũvika iangĩonĩ sya nzavivũ sya mũsumbĩ.

11Na andũ makatũa vo, na kũikethĩwa kĩumo ĩngĩ; ĩndĩ Yelusaleme ĩkatũa ĩte mũisyo.

12Na ũthĩn’yo ũla Yeova wĩkũna ngo syonthe sya andũ naw’o ila syũkitĩte na Yelusaleme ũkeethĩwa ũũ: mĩĩ yoo ĩkamomonyekaa o maũngyĩ na maũũ moo, na metho moo makaseekeaa me o maimanĩ mamo, na nĩmĩ syoo ikamomeonyekaa syĩ makanyw’anĩ moo.

13Na kũkeethĩwa mũthenya ũsu, kĩtuu kĩnene kuma kwa Yeova kĩkeethĩwa katĩ wamo; na makakwatana kĩla ũmwe kw’oko na mũtũi wake, na kw’oko kwake kũkookĩlĩĩla kw’oko kwa mũtũi wake.

14O na Yuta akokita ku Yelusaleme; na ũthwii wa mbaĩ syonthe ila ithyũlũlũkĩte kw’onthe ũkoombanw’a vamwe, thaavu, na vetha, na ngũa, mwingĩ mũno.

15Na now’o kũkeethĩwa ũthĩn’yo wa mbalasi, na wa nyũmbũ, na wa ngamĩle, na wa ĩng’oi, na wa nyamũ syonthe ĩla ĩkethĩwa myakonĩ ĩsu ya maeema, ũthĩn’yo ta ũsu.

16Na kũkeethĩwa, kĩla ũmwe ũtialĩte kwa mbaĩ syonthe ila syokĩlĩĩle Yelusaleme akambataa kĩla mwaka kũthaitha Mũsumbĩ, Yeova wa nguthu, na kũlilikana mboka ya malwanda.

17Na kũkeethĩwa, kana o ũla ũtakambataa Yelusaleme wa mĩvĩa yonthe ya nthĩ athaithe Mũsumbĩ, Yeova wa nguthu, kwoo kũtikethĩwa mbua.

18Na ethĩwa mũvĩa wa Misili ndũkambata, wũke, o na ndĩkaua kwoo; kũkeethĩwa ũthĩn’yo ũla Yeova wĩkũna i mbaĩ naw’o ila iteambata kũlilikana mboka ya malwanda.

19Ũu nĩw’o wĩĩthĩwa ũsilĩlo wa Misili, na ũsilĩlo wa mbaĩ syonthe ila iteambata kũlilikana mboka ya malwanda.

20Mũthenya ũsu kũkeethĩwa ndililinĩ sya mbalasi vaandĩkĩtwe, NTHEU KWA YEOVA; na mbisũ ila syĩ nyũmbanĩ ya Yeova ĩkeethĩwa itilyĩ ta mbakũli ila syĩ mbee wa kĩthembeo.

21Ĩĩ, kĩla mbisũ nthĩnĩ wa Yelusaleme na nthĩnĩ wa Yuta ĩkeethĩwa ntheu kwa Yeova wa nguthu; na onthe ala mathembaa makooka na makyosa, na kũtheũkĩsya nthĩnĩ wasyo: na mũthenya ũsu kũikethĩwa Mũkanaani nthĩnĩ wa nyũmba ya Yeova wa nguthu.

← Chapter 13 Jump to: