Zechariah 13

Kamba (Mbivilia) 1956

← Chapter 12 Jump to: Chapter 14 →

1Mũthenya ũsu nthongo ĩkeethĩwa yĩ mbingũĩe nyũmba ya Ndaviti na ala matwĩe Yelusaleme, ũndũ wa naĩ na ũndũ wa ũvuku.

2Na kũkeethĩwa mũthenya ũsu, easya ũu Yeova wa nguthu, ngaveta masyĩtwa ma mĩvw’anano kuma ĩ nthĩ, na ndĩkalilikanwa ĩngĩ; o na ĩngĩ athani na ũla veva mũvuku ngatuma mauma ĩ nthĩ.

3Na kũkeethĩwa, o yĩla ũmwe wĩkwatya kwathana, nĩvo ĩthe na nyinyia ala mamũsyaie makamwĩa, Ndwĩĩkala thayũ we; nũndũ nũkũneena movũngũ syĩtwanĩ ya Yeova; na ĩthe na nyinyia ala mamũsyaie makamũtonya mũkuthũ yĩla wĩĩthĩwa akyathana.

4Na kũkeethĩwa mũthenya ũsu, athani makasonoka kĩla ũmwe ũndũ wa woni wake, yĩla wĩathana; o na matikevw’ika ngũa ndasa yĩ w’ĩa makengane:

5ĩndĩ akasya, Ndi mwathani nyie, nyie nĩ mũĩmi; nũndũ natw’ĩwe ngombo kuma wana wakwa.

6Na ũmwe akamwĩa, Mawũkite aa me itaanĩ syaku nĩ ma kyaũ? Nĩvo wĩsũngĩa, Aa nĩ ala nokitĩwe nyũmbanĩ ya anyanyawa.

7Amũka, we ũvyũ, ĩũlũ wa mũĩthi wakwa, na ĩũlũ wa mũndũ ũla mũtindan’ya wakwa, easya ũu Yeova wa nguthu: mũkũne mũĩthi, na malondu makanyaĩĩka; ngathyũũĩa tũla tũnini kw’oko kwakwa.

8Na kũkeethĩwa, ĩ nthĩ yonthe, ilungu ilĩ syayo ikavetwa na kũkw’a, easya ũu Yeova; ĩndĩ kya katatũ kĩkatiwa nthĩnĩ wayo.

9Na kĩlungu kya katatũ ngakĩete mwakinĩ, na ngamathesya o tondũ vetha ũtheaw’a, na ngamatata o tondũ thaavu ũtatawa. Makeekaĩla syĩtwa yakwa, na ngamew’a: ngasya, Nĩ andũ makwa; namo makasya, Yeova nĩ Ngai wakwa.

← Chapter 12 Jump to: Chapter 14 →