Zechariah 10

Kamba (Mbivilia) 1956

← Chapter 9 Jump to: Chapter 11 →

1Ĩtyai Yeova mbua ĩvinda ya mbua ya uũa, o Yeova ũla ũseũvasya motisi; na akamanenga mĩono ya mbua, akanenga kĩla ũmwe nyeki kĩsesinĩ.

2Nũndũ telavimu nĩneenete ndeto sya mana, na ala maaũasya nĩmonete ũvũngũ; na nĩmatavanĩtye ndoto ite sya w’o, nĩmakiakiasya mana: kwondũ wa ũu nĩmeyĩendeaa ta malondu, nĩmathĩnaw’a, nĩkwĩthĩwa vati mũĩthi.

3Ũthatu wakwa nĩwakanĩe aĩthi, na ngasilĩla i nthenge; nũndũ Yeova wa nguthu nũsyaĩĩtye ĩĩthya yake, nyũmba ya Yuta, na akamatw’a o ta mbalasi yake nzeo kaũnĩ.

4Vamwe, kwake kũkauma ĩvia ya kĩkoto, kwake kũkauma mũsumaa, kwake kũkauma ũta wa kaũ, kwake kũkauma kĩla mũsumbĩki.

5Na makeethĩwa ta ngũmbaũ, maiangĩa amaitha moo nthĩ ndakanĩ sya nzĩa nene kaũnĩ; na makokita, nĩkwĩthĩwa Yeova e vamwe namo; na ala matũlĩte mbalasi makathokoanw’a.

6Na ngeekĩa nyũmba ya Yuta vinya, na ngatangĩĩa nyũmba ya Yosevu, na ngamatũnga; nũndũ nĩ na tei kwoo; na makeethĩwa ta ndaamba kũmaveta: nũndũ ninyie Yeova Ngai woo, na ngamew’a.

7Na ala ma Evalaimu makeethĩwa mailyĩ ngũmbaũ, na ngoo syoo ikatana o ta manyw’ĩte mbinyu; ĩĩ, syana syoo ikawona, na kwĩw’a mũyo; ngoo syoo ikatanĩa Yeova.

8Ngamauĩsya kĩlũli, na kũmomban’ya; nũndũ nĩnĩmovoetye; na makaingĩva o tondũ maingĩvĩte.

9Na ngamavuĩa katĩ wa ngo sya andũ; na makandilikanĩla nthĩ syĩ kũasa; na makekala thayũ na syana syoo, na makasyoka.

10Ngamaete o ĩngĩ kuma nthĩ ya Misili, na kũmomban’ya kuma nthĩ ya Asuli; na ngamaete nthĩ ya Ngileati na Levanoni; na vatikoneka vandũ vameanĩe.

11Na akavĩtĩla ũkanganĩ wa thĩna, na akakũna itulumo syĩ ũkanganĩ, na syũngũ syonthe sya Naelo ikang’ala; na ngathĩĩo sya Asuli ikatheew’a nthĩ, na ndata ya ũsumbĩ ya Misili ĩkathi.

12Na ngamekĩa vinya nthĩnĩ wa Yeova; na makaenda kũũ na kũũ syĩtwanĩ yake, easya ũu Yeova.

← Chapter 9 Jump to: Chapter 11 →