Zechariah 6

Kamba (Mbivilia) 1956

← Chapter 5 Jump to: Chapter 7 →

1Na ĩngĩ nookĩlya metho makwa, na noona, na, sisya, kwooka makasya ana ma kaũ kuma katĩ wa iĩma ilĩ; na iĩma isu syaĩ iĩma sya ũthuku.

2Ĩkasya ya mbee yaĩ na mbalasi ndune; na ĩkasya ya kelĩ mbalasi nziũ;

3na ĩkasya ya katatũ mbalasi nzaũ; na ĩkasya ya kana mbalasi syĩ vinya syĩ iumbĩ.

4Nĩvo nasũngĩie na neea mũlaĩka ũla waneenaa nakwa. Ii nĩ myaũ, mwĩaĩi wakwa?

5Na mũlaĩka asũngĩa na ambĩa, Ii nĩ iseve inya sya ĩtu, ila iendaa syumĩte vala iũngamaa mbee wa Mwĩaĩi wa nthĩ yonthe.

6Ĩkasya yĩla yĩ na mbalasi nziũ yumĩte yĩendete nthĩ ya ngalĩ ya ĩũlũ; na ila nzaũ syauma siatĩĩe; na ila syĩ ĩumbĩ syauma iendete nthĩ ya ngalĩ ya ĩtheo.

7Na ila syĩ vinya syaumĩla, na syenda kũthi syangange nthĩ kũũ na kũũ: na asya, Umai vaa, mwangange nthĩ kũũ na kũũ. Na ĩndĩ syanganga nthĩ kũũ na kũũ.

8Nĩvo wambanĩĩsye, na aneena nakwa, akyasya, Sisya, ila iendaa kwelekela nthĩ ya ngalĩ ya ĩũlũ nikilĩthĩtye veva wakwa ku nthĩ ya ngalĩ ya ĩũlũ.

9Na ndeto ya Yeova yambũkĩa, ĩkĩmbĩa,

10Osa kwa ala mataviwe, o kwa Elitai, na kwa Toviya, na kwa Yetaia; na ũkyũka mũthenya o ũsu, na ũivota nyũmbanĩ ya Yosia mwana wa Nzevania, ĩla malikile mauma Mbaviloni;

11ĩĩ, osa kwamo vetha na thaavu, na ũiseũvya ngovia sya ũsumbĩ, na ũisyĩkĩa mũtwenĩ wa Yosua mwana wa Yeosataki, mũthembi mũnene;

12na neena nake, ũkĩmwĩa, Ũũ nĩw’o Yeova wa nguthu ũnũũneena, akyasya, Sisya, mũndũ ũla wĩtawa syĩtwa yake Ũvonge: na akeana e o kwake; na akaaka ĩkalũ ya Yeova;

13o we akaaka ĩkalũ ya Yeova; na akakua ndaĩa, na akekala kĩvĩlanĩ kyake kya ũsumbĩ na kũsumbĩka; na akeethĩwa mũthembi kĩvĩlanĩ kyake kya ũsumbĩ; na nzama ya mũuo ĩkeethĩwa katĩ woo elĩ.

14Na ngovia sya ũsumbĩ ikeethĩwa ũlilikan’yo ĩkalũnĩ ya Yeova ũndũ wa Elemu, na Toviya, na Yetaia, na Eni mwana wa Nzevania.

15Na ala me kũasa makooka na makyaka ĩkalũnĩ ya Yeova: na mũkamanya kana Yeova wa nguthu nũndũmĩte kwenyu. Na ũu ũkeethĩwa, ethĩwa mũkeew’aa na kĩthing’ĩĩsyo wasya wa Yeova Ngai wenyu.

← Chapter 5 Jump to: Chapter 7 →