Leviticus 10

Kamba (MBIVILIA ŨVOO MŨSEO)

← Chapter 9 Jump to: Chapter 11 →

1Ana ma Alũni, Natavu na Aviu nĩmoosie syĩndũ syoo sya kũtoeesya ũvani, masyĩkĩa mwaki na ũvani. Nĩmathembeie Mwĩai Ngai nthembo ya ũvani na mwaki ũtetĩkĩlĩtw'e atameaĩĩte meke ũu.

2Vau kwa vau Mwĩai Ngai nĩwaetie mwaki wamavĩvya makw'a me vau mbee wake.

3Nĩvo ĩndĩ Mwose weeie Alũni atĩĩ, “Ũũ nĩw'o ũndũ ũla Mwĩai Ngai wawetaa yĩla waisye, ‘Andũ onthe ala manthũkũmaa no nginya manenge ũtheu wakwa ndaĩa. Nyie ngoonany'a ũtheu wakwa mũtisu kũla kwĩ andũ makwa.’ ” Alũni ndaaneena kĩndũ.

4Mwose nĩweetie Misaeli na Elisavani ana ma Usieli, mwendw'a-ĩthe wa Alũni na amea, “Ũkai vaa mũkue mĩĩ ya ana-a-ĩthe menyu mũmĩvetange Ĩeemanĩ ĩtheu ya kũkomanĩa na Ngai na mũithi mũkamie ũtee wa vala maeema mambĩtwe.”

5Kwoou nĩmookie makwata kanzũ ila andũ asu meekĩĩte na makua mĩĩ yoo mamĩtwaa ũtee wa vala maeema mambĩtwe kwĩanana na ũndũ Mwose wameaĩĩte.

6Nĩvo ĩndĩ Mwose weeie Alũni na ana make Eleasali na Ĩthamali atĩĩ, “Mũikatate kũekana na nzw'ĩĩ yenyu yĩkale ĩte nzanũe kana mũtembũange ngũa syenyu mwonany'e kana mwĩ na kyeva. Mweeka ũu nĩmũũkw'a, na Mwĩai Ngai aithatĩa andũ onthe ma Ĩsilaeli. Ĩndĩ andũ ala angĩ onthe ma Ĩsilaeli me na mwanya wa kwĩthĩwa na kyeva kwondũ wa andũ asu moaiwe nĩ mwaki ũla Mwĩai Ngai ũetie.

7Mũikaumaale mũthi nza wa Ĩeema ĩtheu ya kũkomanĩa na Ngai mũikese kũkw'a, nũndũ nĩmũvathĩtwe kwa kwĩtĩkĩw'a mauta ma Mwĩai Ngai.” Kwoou nĩmeekie kwĩanana na ũndũ Mwose wameie.

8Mwĩai Ngai nĩwaneenie na Alũni amwĩa atĩĩ,

9“We na ana maku mũikaalike Ĩeemanĩ ĩtheu ya kũkomanĩa na Ngai ĩtina wa kũnyw'a ndivai kana kĩndũ o na kĩva kĩla kĩmilaa; Mweeka ũu mũkakw'a. Mwĩao ũsu waĩlĩte kũatĩĩawa nĩ nzyawa syenyu syonthe.

10No nginya mũvathũkanasye syĩndũ ila ivathĩwe Ngai, na syĩndũ ila ingĩ; ila ntheu na ila ite ntheu.

11O ta ũu no nginya mũmanyĩasye andũ onthe ma Ĩsilaeli motw'ĩo onthe ala nyie Mwĩai Ngai nĩmanengete kwĩsĩla vala ve Mwose.”

12Mwose nĩweeie Alũni na ana make ala matialĩte Eleasali na Ĩthamali, “Osai nthembo ya ngetha ya mbaa mbeke ĩla ĩtialĩte kuma nthembonĩ ya kũvĩvw'a na mwaki ĩla ĩthembewe Mwĩai Ngai, na mũiua mĩkate ĩte mbota na mũtu wayo na mũiĩĩa mĩkate ĩsu ũtee wa kĩthembeo, nũndũ nthembo ĩsu nĩ ntheu mũno.

13Yai mĩkate ĩsu mwĩ vandũnĩ vatheu; kĩu nĩkyo kĩlungu kyaku na kya ana maku kuma nthembonĩ ya kũvĩvw'a ĩla ĩthembeetwe Mwĩai Ngai. Ũu nĩw'o Mwĩai Ngai ũmbĩaĩĩte.

14Ĩndĩ we na andũ ma mũsyĩ waku nĩmũtonya kũya nyama ya kĩng'eng'eeto na ya kũũ ila syumĩw'e Mwĩai Ngai. Nĩmũtonya kũĩĩa nyama isu vandũ o na va vatheu. Nthembo isu inenganĩtwe kwaku na kwa ana maku syĩthĩwe kĩlungu kyenyu kuma nthembonĩ sya ngwatanĩo ila syumaw'a nĩ andũ ma Ĩsilaeli.

15Makaetae nyama ya kũũ na ya kĩng'eng'eeto ĩvindanĩ yĩla mekumĩsya Mwĩai Ngai mathunya methĩwe nthembo ya kũvĩvw'a. Ĩvindanĩ yonthe yĩla yũkĩte, ilungu isu sya nyama ikeethĩawa syĩ syaku na ana maku, o tondũ Mwĩai Ngai wĩaĩte.”

16Mwose nĩwakũlĩĩilye na kĩthing'ĩĩsyo amanye ĩũlũ wa mbũi yaumĩtw'e yĩthĩwe nthembo kwondũ wa ũekeo wa naĩ, na eethĩa kana mbũi ĩsu yaĩ ĩnamina kũvĩvw'a. Ũndũ ũsu nĩwatumie Mwose ew'ĩa Eleasali na Ĩthamali woo, na amakũlya,

17“Mũnaleile kũĩĩa nyama sya nthembo ĩla yumĩtw'e kwondũ wa ũekeo wa naĩ mwĩ vandũnĩ vatheu nĩkĩ? Nthembo ĩsu nĩ ntheu mũno, na Mwĩai Ngai nũmĩnenganĩte kwenyu nĩ kana ĩtonye kũveta naĩ sya andũ ma Ĩsilaeli.

18Nthakame ya nyamũ ĩsu yumĩtw'e nthembo kwondũ wa ũekeo wa naĩ ndĩnaetwe vandũnĩ vatheu, na kwoou mwĩĩaĩlĩte kũĩĩa nyama sya nthembo ĩsu vau o tondũ nĩneeaĩte.”

19Alũni nĩwasũngĩie Mwose amwĩa atĩĩ, “Kethĩwa ũmũnthĩ nĩnĩĩe nthembo ĩla yumĩtw'e kwondũ wa ũekeo wa naĩ, Mwĩai Ngai ethĩwa endeeiw'e. Ũmũnthĩ andũ ma Ĩsilaeli nĩmaumĩisye Mwĩai Ngai nthembo kwondũ wa ũekeo wa naĩ, na maete nthembo syoo sya kũvĩvw'a. Ĩndĩ ũu wĩ o vo, maũndũ aa ma kũtelemya nĩmeekĩka kũla nĩĩ.”

20Mwose amina kwĩw'a ũndũ Alũni waisye, nĩweanĩiwe.

← Chapter 9 Jump to: Chapter 11 →