Leviticus 23

Kamba (MBIVILIA ŨVOO MŨSEO)

← Chapter 22 Jump to: Chapter 24 →

1Mwĩai Ngai nĩwaneenie na Mwose amwĩa atĩĩ,

2“Neena na andũ ma Ĩsilaeli ũmanenge motw'ĩo aa kwondũ wa mboka sya Mwĩai Ngai ila itw'ĩtwe, maatĩĩae yĩla moombana mathaithe.

3Mwĩ na mĩthenya thanthatũ ya kũtethya wĩa wenyu, ĩndĩ lilikanai kana mũthenya wa mũonza ũla nĩ mũthenya wa Savato nĩ wa kũthũmũa. Mũthenyanĩ ũsu mũikatethasye wĩa, ĩndĩ ũmbanaai kwondũ wa kũthaitha. Mũthenya wa Savato nĩ wakwa nyie Mwĩai Ngai, kwoou mwĩũlilikanaa mwĩ kw'onthe kũla mũkatũa.

4Mboka ila ingĩ itw'ĩtwe ila mwaĩlĩte kũtavanasya ĩũlũ wasyo ĩvinda yasyo yavika nĩsyo ii iatĩĩe.

5“Mboka ya Vasaka ĩla ĩtanĩawa kwondũ wa kũnenga nyie Mwĩai Ngai ndaĩa, yambĩĩaa syũa yĩithũa mũthenyanĩ wa ĩkũmi na inya wa mwei wa mbee.

6Mũthenyanĩ wa ĩkũmi na itano wa mwei ũsu, nĩw'o Mboka ya Mũkate ũte Mbota yaĩlĩte kwambĩĩa; vandũ va mĩthenya mũonza mũyaĩlĩte kũya mĩkate ĩuĩtwe yĩkĩĩtwe mbota.

7Mũthenyanĩ wa mbee wa Mboka ĩsu ũmbanaai mũkathaitha na mũyaĩlĩte kũtethya mawĩa menyu ma kĩla mũthenya.

8Vandũ va mĩthenya mũonza umĩsyai Mwĩai Ngai nthembo sya kũvĩvw'a, na mũthenyanĩ wa mũonza mũyũmbana nĩ kana mũthaithe, na mũyaĩlĩte kũtethya mawĩa menyu ma kĩla mũthenya.”

9Mwĩai Ngai nĩwaneenie na Mwose amwĩa atĩĩ,

10“Neena na andũ ma Ĩsilaeli ũmee kana mwamina kũlika nthĩ ĩla ngũmũnenga na kũketha ngetha yenyu, no nginya mũtwaĩe mũthembi iia sya mbee sya ngetha yenyu ila mwĩovany'a.

11Mũthembi akookĩlya iia isu mbovany'e mbee wa Mwĩai Ngai syĩthĩwe nthembo ya kũkĩlw'a nĩ kana nyie Mwĩai Ngai nĩmwĩtĩkĩle inyw'ĩ. Mũthembi akookĩlya nthembo ĩsu mũthenya ũla ũatĩĩe mũthenya wa Savato.

12Mũthenyanĩ o ũsu mũkumya nthembo ĩsu ya ngetha o ta ũu mbumĩsyei nyie Mwĩai Ngai nthembo ya kũvĩvw'a ya katena kaũme ka ĩlondu kena ũkũũ wa mwaka ũmwe na kate kĩema.

13Umanĩsyai nthembo ĩsu vamwe na kĩlo ilĩ sya mũtu ũvulanĩtw'e na mauta syĩthĩwe nthembo ya kũvĩvw'a. Mũuke wa nthembo ĩsu nũmbendeeasya nyie Mwĩai Ngai. O ta ũu nthembo ĩsu yumanĩw'e na nthembo ya kũnyuwa ya lita ũmwe wa ndivai.

14Mũikaye ngetha yenyu ya ũsyao wa mbee wa mbaa mbeke syĩ mbĩthĩ, kana syĩ mbĩvye kana iuĩtwe mĩkate nginya yĩla mwĩete nthembo isu kũla nĩĩ nyie Ngai wenyu. Ũtw'ĩo ũsu no nginya ũatĩĩawe nĩ nzyawa syenyu syonthe ĩvindanĩ yonthe yĩla yũkĩte mwĩ kw'onthe kũla mwĩtũa.

15“Talaai syumwa mũonza kuma mũthenya ũla ũatĩĩe mũthenya wa Savato, ũla mwaete iia mbovany'e sya ngetha ya mbaa mbeke, ila syumĩtw'e ta nthembo ya kũkĩlw'a.

16Mũthenyanĩ wa mĩongo ĩtano, naw'o nĩw'o ũatĩĩe Savato ya mũonza, mbumĩsyei nyie Mwĩai Ngai nthembo ĩsu ya ngetha ya ũsyao wa mbee wa mbaa mbeke.

17Kĩla mũsyĩ nĩũete mĩkate ĩlĩ na maimbumĩsya nyie Mwĩai Ngai yĩthĩwe nthembo ya kũkĩlw'a. Kĩla mũkate nĩwĩthĩwe ũuĩtwe na mũtu mũvinyu wa kĩlo ilĩ ũvulanĩtw'e na mbota, na ndyumĩwa nyie Mwĩai Ngai mũkate ũsu wĩthĩwe nthembo ya ngetha ya ũsyao wa mbee wa mbaa mbeke.

18Vamwe na nthembo ĩsu ya mũkate, mbaĩ yonthe ya andũ ma Ĩsilaeli mambumĩsye tũtena mũonza tũũme twa ĩlondu twĩ na ũkũũ wa mwaka ũmwe, kasalũ kamwe, na ndũũme ilĩ. Vaikethĩwe ĩmwe ya nyamũ isu yĩna kĩema. Nyie Mwĩai Ngai numĩw'e nyamũ isu syĩthĩwe nthembo ya kũvĩvw'a na iyumanĩw'a na nthembo ya ngetha ya mbaa mbeke, na nthembo ya kũnyuwa ya ndivai. Mũuke wa nthembo ĩsu nũmbendeeasya nyie Mwĩai Ngai.

19O ta ũu mbumĩsyei nthenge ĩmwe yĩthĩwe nthembo kwondũ wa ũekeo wa naĩ, na tũtena twĩlĩ tũũme twa ĩlondu twĩ na ũkũũ wa mwaka ũmwe twĩthĩwe nthembo ya ngwatanĩo.

20Mũthembi nĩaumye ũla mũkate vamwe na tũtena tũu twĩlĩ twa ĩlondu syĩthĩwe nthembo ya kũkĩlw'a ĩla numĩw'e nyie Mwĩai Ngai kwondũ wa athembi. Nthembo isu nĩ ntheu.

21Mũthenyanĩ ũsu mũikatethasya mawĩa menyu ma kĩla mũthenya ĩndĩ ũmbanaai na kũthaitha. Ũtw'ĩo ũsu no nginya ũatĩĩawe nĩ nzyawa syenyu syonthe ĩvindanĩ yonthe yĩla yũkĩte, syĩ kw'onthe kũla ikatũa.

22“Yĩla mwaketha syĩndũ ila mũvandĩte mĩũndanĩ yenyu, mũikakethae syĩndũ ila mũvandĩte ndeenĩ sya mĩũnda ĩsu, na mũikasyokae kũtila iia sya ngetha ya mbaa mbeke ila itialĩte. Ekanaai nasyo kwondũ wa ngya na kwondũ wa aeni. Ninyie Mwĩai Ngai, Ngai wenyu.”

23Mwĩai Ngai nĩwaneenie na Mwose amwĩa atĩĩ,

24“Neena na andũ ma Ĩsilaeli ũmee mũthenyanĩ wa mbee wa mwei wa mũonza mũkeethĩawa na mũthenya wa kũthũmũa, mũthenya wa ũlilikany'o ũla mũkamanyĩthaw'a ĩũlũ waw'o mweew'a masoo maivuvw'a na mũyũmbana mũthaithe.

25Mũthenyanĩ ũsu mwĩmbumĩasya nyie Mwĩai Ngai nthembo ya kũvĩvw'a, na mũikatethasye wĩa wenyu wa kĩla mũthenya.”

26O ta ũu Mwĩai Ngai nĩweeie Mwose atĩĩ,

27“Mũthenya wa ĩkũmi wa mwei wa mũonza nĩ Mũthenya wa Ũekeo waĩ naĩ. Mũthenyanĩ ũsu mũkoombanaa mũthaithe na mũitĩĩa kũya, na kũmbumĩsya nyie Mwĩai Ngai nthembo ya kũvĩvw'a.

28Mũthenyanĩ ũsu mũikatethye wĩa, nũndũ ũsu nĩ mũthenya wa kwĩka maũndũ ala maĩlĩte kwĩkwa nĩ kana mũekewe naĩ.

29Mũndũ o na wĩva ũla wĩya kĩndũ o na kĩva mũthenyanĩ ũsu akaeka kũtalwa ta ũmwe wa andũ makwa.

30Nyie Mwĩai Ngai ngooaa mũndũ o na wĩva ũla wĩtethya wĩa mũthenyanĩ ũsu.

31Ũtw'ĩo ũsu no nginya ũatĩĩawe nĩ nzyawa syenyu syonthe ivindanĩ yonthe yĩla yũkĩte, syĩ kw'onthe kũla ikatũa.

32Mũthenya wa kenda wa mwei wa mũonza kuma ĩa mawĩoo kũthi kũvika ĩa mawĩoo mũthenya ũla ũatĩĩe wa ĩkũmi, ũkeethĩawa mũthenya wa mwanya wa kũthũmũa na kũtĩĩa kũya.”

33Mwĩai Ngai nĩwaneenie na Mwose amwĩa atĩĩ,

34“Neena na andũ ma Ĩsilaeli ũmee kana mũthenyanĩ wa ĩkũmi na itano wa mwei wa mũonza, nĩw'o Mboka yakwa nyie Mwĩai Ngai ya Tũsũmba twa Matũ yĩambĩĩaa, na kũendeea vandũ va mĩthenya mũonza.

35Mũthenyanĩ wa mbee wa mĩthenya ĩsu mũonza mũkoombanaa na kũthaitha, na mũikatethasye wĩa wenyu wa kĩla mũthenya.

36Kĩla mũthenya vandũ va mĩthenya mũonza mũkambumĩasya nyie Mwĩai Ngai nthembo ya kũvĩvw'a na mwaki. Mũthenyanĩ wa nyanya ũmbanai ĩngĩ mũthaithe na mũyumya nthembo ya kũvĩvw'a na mwaki. Ũsu nĩ mũthenya mũnene wa kũthaitha, na mũikatethye wĩa wenyu wa kĩla mũthenya.

37“Ithi nĩsyo mboka ila itw'ĩtwe sya Mwĩai Ngai ila iminĩte kũnyuvwa kwondũ wa kũmũnenga ndaĩa, yĩla mwĩũmbanaa mũthaithe na kumya nthembo ivĩvaw'a na mwaki, nthembo sya kũvĩvw'a, nthembo sya ngetha ya mbaa mbeke, nthembo ingĩ, na nthembo sya kũnyuwa sya ndivai, kĩla ĩmwe ĩyumw'a mũthenyanĩ ũla wayo.

38Mboka isu ikeethĩawa vamwe na mboka ya Savato ya kĩla ĩvinda na nthembo isu nasyo o ta ũu iyumaw'a vamwe na nthembo sya kĩla ĩvinda, ila ingĩ sya kwĩanĩsya wĩvĩto, na ila ingĩ syenyu sya kumw'a na ngoo ya kwenda ila mũmbumĩasya nyie Mwĩai Ngai.

39“Mwamina kũketha syĩndũ mĩũndanĩ yenyu, tanĩaai mboka ĩsu vandũ va mĩthenya mũonza kuma mũthenyanĩ wa ĩkũmi na itano wa mwei wa mũonza. Mũthenya wa mbee na mũthenya wa nyanya nĩ mĩthenya ya mwanya ya kũthũmũa.

40Mũthenyanĩ ũsu wa mbee tw'ai matunda amwe ala maseo kuma mĩtundanĩ yenyu, na mũitũla mbonge sya mĩtĩ ya mĩkĩndũ, mbonge sya mĩtĩ mĩthungu, na mbonge sya mĩtĩ ĩla ĩmeaa ũtee wa ũsĩ, na mũitanĩa mboka ya kĩ-ũthaithi ya Mwĩai Ngai vandũ mĩthenya mũonza.

41Tanĩaai mboka ĩsu ya kũnenga Mwĩai Ngai ndaĩa vandũ va mĩthenya mũonza kĩla mwaka. Ũtw'ĩo ũsu ũkaatĩĩawa nĩ nzyawa syenyu syonthe ĩvindanĩ yonthe yĩla yũkĩte. Mboka ĩsu ĩkatanĩawa mweinĩ wa mũonza.

42Andũ onthe ma Ĩsilaeli makekalaa tũsũmbanĩ twa matũ vandũ va mĩthenya mũonza,

43nĩ kana nzyawa syenyu imanye kana nyie Mwĩai Ngai nĩnatumie andũ ma Ĩsilaeli mekala tũsũmbanĩ twa matũ yĩla namaumisye nthĩ ya Misili. Ninyie Mwĩai Ngai, Ngai wenyu.”

44Kwoou ĩndĩ asu nĩmo motw'ĩo ala Mwose watavisye andũ ma Ĩsilaeli maatĩĩae yĩla mekũtanĩa mboka ila itw'ĩtwe kwondũ wa kũnenga Mwĩai Ngai ndaĩa.

← Chapter 22 Jump to: Chapter 24 →