Leviticus 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1“Yĩla mũndũ ũkũthembea Mwĩai Ngai ĩmwe ya ng'ombe syake yĩthĩwe nthembo ya ngwatanĩo, nĩyĩthĩwe kasalũ kana moi ĩte kĩema.

2Mũndũ ũsu ailĩĩle kw'oko kwake mũtwenĩ wa nyamũ ĩsu na aimyũaĩa mũvĩanĩ wa Ĩeema ĩtheu ya kũkomanĩa na Mwĩai Ngai. Ana ma Alũni ala nĩ athembi nĩmaminzangĩsye nthakame ya yo ngalĩkonĩ inya sya kĩthembeo.

3Kuma nthembonĩ ĩsu ya ngwatanĩo ya kũvĩvw'a na mwaki yumĩw'e Mwĩai Ngai, mũndũ ũsu nĩathembe mathunya onthe ala me ĩũlũ wa nyama sya nda,

4mbio syelĩ na mathunya ala me ĩũlũ wasyo vakuvĩ na kĩnyunyu, na ayumya kĩlungu kĩla kĩseo kya ĩtema.

5Athembi nĩmavĩvĩsye syĩndũ isu syonthe kĩthembeonĩ syĩ vamwe na nthembo ila ingĩ sya kũvĩvw'a. Mũuke wa nthembo ĩsu ya kũvĩvw'a nũmbendeeasya nyie Mwĩai Ngai.

6“Ethĩwa mũndũ ũsu nĩwaumya mbũi kana ĩlondu yĩthĩwe nthembo ya ngwatanĩo, mbũi ĩsu kana ĩlondu nĩtonya kwĩthĩwa yĩ nga kana nũme, na no nginya yĩthĩwe ĩte kĩema.

7Ethĩwa mũndũ ethembea Mwĩai Ngai ĩlondu,

8nĩailĩĩle kw'oko kwake ĩũlũ wa mũtwe wayo, na aiyũaĩa mbee wa Ĩeema ĩtheu ya kũkomanĩa na Ngai. Ana ma Alũni ala nĩ athembi nĩmaminzangĩsye nthakame ya yo ngalĩkonĩ inya sya kĩthembeo.

9Kuma nthembonĩ ĩsu ya ngwatanĩo ya kũvĩvw'a na mwaki yumĩw'e Mwĩai Ngai, mũndũ ũsu nĩathembe mathunya ma mwĩthe wa ĩlondu yĩu ũtilĩlwe vakuvĩ na ĩvĩndĩ ya mũongo, mathunya onthe ala me ĩũlũ wa nyama sya nda,

10mbio syelĩ na mathunya ala me ĩũlũ wasyo vakuvĩ na kĩnyunyu, na ayumya kĩlungu kĩla kĩseo kya ĩtema.

11Mũthembi nĩavĩvĩsye syĩndũ isu syonthe kĩthembeonĩ nĩ kana syĩthĩwe nthembo ya lĩu ĩthembewe Mwĩai Ngai.

12“Ethĩwa mũndũ ethembea Mwĩai Ngai mbũi,

13nĩailĩĩle kw'oko kwake mũtwenĩ wayo na aimyũaĩa mbee wa Ĩeema ĩtheu ya kũkomanĩa na Ngai. Ana ma Alũni ala nĩ athembi nĩmaminzangĩsye nthakame ya yo ngalĩkonĩ inya sya kĩthembeo.

14Kuma nthembonĩ ĩsu ya ngwatanĩo ya kũvĩvw'a na mwaki yumĩw'e Mwĩai Ngai, mũndũ ũsu nĩathembe mathunya onthe ala me ĩũlũ wa nyama sya nda,

15mbio syelĩ na mathunya ala me ĩũlũ wasyo vakuvĩ na kĩnyunyu, na ayumya kĩlungu kĩla kĩseo kya ĩtema.

16Mũthembi nĩavĩvĩsye syĩndũ isu syonthe kĩthembeonĩ syĩthĩwe nthembo ya lĩu ĩla mũuke wayo nũmbendeeasya nyie Mwĩai Ngai. Mathunya onthe nĩ ma Mwĩai Ngai.

17Vai mũndũ wa mbaĩ ya Ĩsilaeli o na ũmwe waĩlĩte kũya mathunya na nthakame. Ũsu ũkeethĩawa mwĩao wa kũatĩĩawa nĩ andũ onthe ma Ĩsilaeli ĩvindanĩ ya thayũ woo kũvika tene na tene.”

← Chapter 2 Jump to: Chapter 4 →