Leviticus 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1“Ethĩwa mũndũ nĩweetwa nĩ kana anengane ũkũsĩ kotinĩ na ailea kũweta ũndũ ũkũkũlw'a ĩũlũ wa ũndũ wonete kana akew'a, no nginya aĩvĩe naĩ yake.

2“Ethĩwa mũndũ ateĩvangĩte nĩwakiita kĩndũ kĩvuku, o na ethĩwa nĩ nyamũ ngw'ũ ya mũsyĩ kana ya kĩthekanĩ kana o kasamũ kangĩ kakw'ũ katĩ wa ila itambaa kũũ nthĩ, mũndũ ũsu nĩwavukw'a na e na ĩvĩtyo.

3“Ethĩwa mũndũ nĩwakiita kĩndũ o na kĩva kĩvuku kyumĩte mũndũnĩ ateĩvangĩte kwĩka ũu o na ethĩwa nĩ kyaũ, mũndũ ũsu wakiita e na ĩvĩtyo amina kũmanya naĩ ĩla wĩkĩte.

4“Ethĩwa mũndũ nĩwaneena ndeto sya kwĩvĩta ateũsũanĩa ũndũ ũkũneena, o na ethĩwa nĩ wĩvĩto wa kwĩka nesa kana kwĩka ũthũku, mũndũ ũsu e na ĩvĩtyo amina kũmanya naĩ ĩla wĩkĩte.

5“Mũndũ eeka ũmwe wa maũndũ asu no nginya aumbũle naĩ yake ĩla wĩkĩte.

6Kwondũ wa naĩ yake no nginya aĩvĩe kwa kũthembea Mwĩai Ngai nthembo ya ĩlondu ĩka kana mbaika. Mũthembi nĩathembe nthembo ya kũvĩvw'a kwondũ wa ũekeo wa naĩ ya mũndũ ũsu.

7“Ethĩwa mũndũ ũsu ndatonya kwona mbũi kana ĩlondu kwondũ wa naĩ yake, nĩathembee Mwĩai Ngai ndumbũ ilĩ kana maswii elĩ ma ĩvũĩ; nyũnyi ĩmwe yĩthĩwe nthembo kwondũ wa ũekeo wa naĩ na ĩla ĩngĩ kwondũ wa nthembo ya kũvĩvw'a.

8Nĩaetee mũthembi nyũnyi isu nake mũthembi aithemba mbee nyũnyi ĩla yumĩtw'e kwondũ wa ũekeo wa naĩ. Nĩamile ngingo ya nyũnyi ĩsu ateũtila mũtwe wayo.

9Mũthembi ũsu nĩaminzangĩsye nthakame ĩmwe ya yo ndeenĩ sya kĩthembeo. Nĩete nthakame ĩla ĩkũtiala ĩtinanĩ ya kĩthembeo; ĩsu nĩ nthembo yumĩtw'e kwondũ wa ũekeo wa naĩ.

10Nĩvo ĩndĩ ĩtina wa ũu mũthembi ũkũthemba nyũnyi ĩla ya kelĩ yĩthĩwe nthembo ya kũvĩvw'a aatĩĩe maũndũ ala matw'ĩtwe. Kwa nzĩa ĩsu nake mũndũ ũsu nũkũekewa naĩ yake.

11“Ethĩwa mũndũ ndatonya kwona ndumbũ ilĩ kana maswii elĩ ma ĩvũĩ, nĩaete kĩlo kĩmwe kya mũtu kĩthĩwe nthembo kwondũ wa ũekeo wa naĩ ĩla wĩkĩte. Ndakavulany'e mũtu ũsu na mauta kana ũvani, nũndũ ĩsu nĩ nthembo kwondũ wa ũekeo wa naĩ.

12Nĩaete mũtu ũsu vala ve mũthembi, nake mũthembi ayĩuta ngundi ĩmwe yaw'o nĩ kana wĩthĩwe kĩlungu kya ũlilikany'o, na kũũvĩvĩsya kĩthembeonĩ wĩ ĩũlũ wa nthembo sya kũvĩvw'a na mwaki ila ithembewe Mwĩai Ngai; ĩsu nĩ nthembo kwondũ wa ũekeo wa naĩ.

13Kwa nzĩa ĩsu mũthembi eĩthĩwa aumya nthembo ya kũvĩvw'a kwondũ wa ũekeo wa naĩ ya mũndũ ũsu, nake ũ mũndũ ayĩthĩwa aekewa naĩ yake. Mũtu ũla ũũtiala nĩ wa mũthembi, o ũndũ kwĩthĩawa nthembonĩ ya ngetha ya mbaa mbeke.”

14Mwĩai Ngai nĩwaneenie na Mwose amwĩa atĩĩ,

15“Ethĩwa mũndũ o na wĩva nĩweeka naĩ atesĩ kwa kũlea kũmbumĩsya nyie Mwĩai Ngai syĩndũ ila ntheu naĩlĩte kumĩw'a, no nginya anthembee nyie ndũũme kana nthenge ĩte kĩema kuma ndĩthyanĩ yake yĩthĩwe nthembo kwondũ wa ũekeo wa ĩvĩtyo yake. Thooa wa nyamũ ĩsu ũkamanyĩka kwĩanana na kĩthimo kya mbesa kĩla kĩtũmĩawa Ĩeemanĩ ĩtheu.

16O ta ũu no nginya aĩve syĩndũ ila ũleete kumya, na ayongela kĩlungu kĩmwe kya itano na kũinengane kũla kwĩ mũthembi. Mũthembi nake nĩathembe nyamũ ĩsu kwondũ wa ũekeo wa ĩvĩtyo ya mũndũ ũsu, nake ũ mũndũ nũkũekewa ĩvĩtyo yake.

17“Ethĩwa mũndũ nĩweeka naĩ kwa kũtũla ũmwe wa mĩao ya Mwĩai Ngai atesĩ, nũvĩtĩtye na no nginya aĩvĩe naĩ yake.

18No nginya aetee mũthembi ndũũme kana nthenge ĩte kĩema kuma ndĩthyanĩ yake yĩthĩwe nthembo kwondũ wa ĩvĩtyo yake. Thooa wa nyamũ ĩsu ũkamanyĩka kwĩanana na kĩthimo kya mbesa kĩla kĩtũmĩawa Ĩeemanĩ ĩtheu. Mũthembi nĩathembe nyamũ ĩsu kwondũ wa naĩ ya mũndũ ũsu, nake ũ mũndũ nũkũekewa naĩ yake.

19Ĩsu nĩ nthembo kwondũ wa ũekeo wa ĩvĩtyo yĩla mũndũ ũsu ũvĩtĩsye Mwĩai Ngai.”

← Chapter 4 Jump to: Chapter 6 →