Leviticus 9

Kamba (MBIVILIA ŨVOO MŨSEO)

← Chapter 8 Jump to: Chapter 10 →

1Mũthenyanĩ wa nyanya Mwose nĩweetie Alũni, ana make, na atongoi ma andũ ma Ĩsilaeli.

2Nĩweeie Alũni atĩĩ, “Osa kasalũ na ndũũme, na syelĩ iyĩthĩwa ite kĩema, ũithembee Mwĩai Ngai. Kasalũ kau keĩthĩwa nthembo kwondũ wa ũekeo wa naĩ, nayo ndũũme ĩyĩthĩwa nthembo ya kũvĩvw'a.

3Tavya andũ ma Ĩsilaeli ũmee nĩmose nthenge ĩmwe yĩthĩwe nthembo kwondũ wa ũekeo wa naĩ, kasalũ kena ũkũũ wa mwaka ũmwe, na katena ka ĩlondu kena ũkũũ wa mwaka ũmwe, na syelĩ iyĩthĩwa ite kĩema, syumw'e ta nthembo ya kũvĩvw'a.

4O ta ũu nĩmose kasalũ na ndũũme syumw'e syĩthĩwe nthembo ya ngwatanĩo. Nĩmaumĩsye Mwĩai Ngai nthembo isu vamwe na nthembo ya ngetha ya mbaa mbeke ĩvulanĩtw'e na mauta. No nginya meke ũu, nũndũ Mwĩai Ngai nũkũmaumĩlĩĩla ũmũnthĩ.”

5Nĩmaetie syĩndũ syonthe ila Mwose wameaĩĩte mũvĩanĩ wa Ĩeema ĩtheu ya kũkomanĩa na Ngai, na andũ onthe ma Ĩsilaeli moombanĩa vau mamũthaithe Mwĩai Ngai.

6Mwose nĩwaneenie asya atĩĩ, “Mwĩai Ngai nĩwe ũmwĩaĩĩte mwĩke maũndũ aa onthe nĩ kana ũtheu wake mũtisu ũmumĩlĩĩle.”

7Nĩvo ĩndĩ Mwose weeie Alũni atĩĩ, “Thengeea kĩthembeonĩ na ũyumya nthembo yaku ya ũekeo wa naĩ, na ĩla ya kũvĩvw'a nĩ kana naĩ yaku na naĩ sya andũ ma Ĩsilaeli iekewe. Themba nthembo ya andũ ma Ĩsilaeli nĩ kana maekewe naĩ syoo, o tondũ Mwĩai Ngai wĩaĩte.”

8Kwoou Alũni nĩwathengeeie kĩthembeonĩ na ooaa kala kasalũ kethĩwe nthembo ya ũekeo wa naĩ kwondũ wake mwene.

9Ana make nĩmamũeteie nthakame ya kasalũ kau, nake amĩtola na kyaa kyake na avaka nthakame ĩmwe mĩthyanĩ ĩla yaĩ konanĩ sya kĩthembeo, na eta ĩla yatialĩte ĩtinanĩ ya kĩthembeo.

10Nĩwavĩvĩisye kĩthembeonĩ kĩu mathunya, mbio, na kĩlungu kĩla kĩseo kya ĩtema, kwĩanana na ũndũ Mwĩai Ngai weeaĩĩte Mwose.

11Ĩndĩ nĩwavĩvĩisye nyama na kĩthuma kya kasalũ kau ũtee wa vala maeema mambĩtwe.

12Nĩwooaie nyamũ ĩla yaĩ kwondũ wa nthembo yake ya kũvĩvw'a. Ana make nĩmamũeteie nthakame ya yo, nake oosa nthakame ĩsu amĩminzangĩsya ngalĩkonĩ inya sya kĩthembeo.

13Nĩmamũnengie mũtwe na ilungu ila ingĩ sya nyama ya nyamũ ĩsu, na aivĩvĩsya kĩthembeonĩ.

14Nĩwathambisye nyama sya nda na maũũ ma nyamũ ĩsu na aivĩvĩsya kĩthembeonĩ syĩ vamwe na ĩla nthembo ya kũvĩvw'a.

15Ĩtina wa ũu Alũni nĩwaumisye nthembo kwondũ wa andũ. Nĩwoosie mbũi ĩla yaaĩlĩte kumw'a nthembo kwondũ wa naĩ sya andũ; nĩwamyũaie na amyumya yĩthĩwe nthembo ya ũekeo wa naĩ o ta ĩla ya mbee.

16O ta ũu nĩwaetie ĩla nyamũ yaaĩlĩte kumw'a yĩthĩwe nthembo ya kũvĩvw'a na amĩthemba kwĩanana na motw'ĩo ala manenganĩtwe.

17Alũni nĩwaetie nthembo ya ngetha ya mbaa mbeke na auta ngundi ĩmwe ya mũtu na aũvĩvĩsya kĩthembeonĩ. Aũvĩvisye vamwe na nthembo ya kũvĩvw'a ĩla yaumaw'a kĩla mũthenya.

18Nĩwooaie kala kasalũ na ndũũme syĩthĩwe nthembo ya ngwatanĩo kwondũ wa andũ. Ana make nĩmamũeteie nthakame yasyo, nake amĩminzangĩsya ngalĩkonĩ inya sya kĩthembeo.

19Mathunya ma kasalũ kau na ndũũme ĩsu; mathunya ma mwĩthe, na mathunya ala me ĩũlũ wa nyama sya nda, mbio, na kĩlungu kĩla kĩseo kya ĩtema,

20nĩsyailĩĩilwe ĩũlũ wa nyama sya kĩng'eng'eeto sya nyamũ isu. Alũni nĩwavĩvĩisye mathunya asu kĩthembeonĩ.

21Alũni nĩwookĩlilye nyama isu sya kĩng'eng'eeto na sya maũũ ma ngalĩko ya kw'oko kwa aũme syĩthĩwe nthembo ya kũkĩlw'a yumĩw'e Mwĩai Ngai, kwĩanana na ũndũ Mwose wamwĩaĩĩte.

22Alũni amina kumya nthembo ya kũvĩvw'a, nthembo kwondũ wa ũekeo wa naĩ, na nthembo ya ngwatanĩo nĩwookĩlilye moko make amelekelye kũla kwĩ andũ na amaathima, na atheea kuma kĩthembeonĩ vala waumĩasya nthembo.

23Mwose na Alũni nĩmalikile Ĩeemanĩ ya kũkomanĩa na Mwĩai Ngai, na yĩla maumaalile nĩmaathimie andũ, na ũtheu mũtisu wa Mwĩai Ngai waumĩlĩĩla andũ onthe.

24Kwa mĩtũkĩ Mwĩai Ngai nĩwaetie mwaki, naw'o wavĩvya ila nthembo sya kũvĩvw'a na mathunya ala maĩ kĩthembeonĩ. Yĩla andũ moonie ũu nĩmookĩlilye mawasya moo kwa ũtanu na makumana matina nthĩ na mothyũ mathaithe Ngai.

← Chapter 8 Jump to: Chapter 10 →