Leviticus 14 — Kamba (MBIVILIA ŨVOO MŨSEO)

6Nĩose nyũnyi ĩla ĩngĩ na aimĩindanĩsya vamwe na kĩla kĩlungu kya mũtĩ wa mũkũũ, ũla mũkumbũ mũtune, na ũla ũvonge wa mũtĩ wa ĩsovo nthakamenĩ ya nyũnyi ĩla ĩminĩte kũaĩwa mbakũlinĩ yĩ kĩw'ũ.

7Nĩaminzangĩsye nthakame ĩsu mavinda mũonza mũndũnĩ ũla ũkũthew'a kuma ũwaunĩ wake wa mangũ, na ĩtina wa ũu aitavany'a asye kana mũndũ ũsu nĩ mũtheu. Nĩalekye nyũnyi ĩsu yĩ thayũ ĩũlũke ĩthi.

8Mũndũ ũla ũkũthew'a no nginya avũe ngũa syake, enze nzw'ĩĩ yake yonthe na aithamba; nĩvo ĩndĩ ũkwĩthĩwa e mũtheu. Ĩtina wa ũu nũtonya kũthi vala maeema mambĩtwe ĩndĩ no nginya ekale nza wa Ĩeema yake vandũ va mĩthenya mũonza.

9Mũthenyanĩ wa mũonza nĩenze nzw'ĩĩ yake yonthe ĩngĩ; nĩenze mũtwe wake, kĩng'ee kyake, syĩnzakuva, na nzw'ĩĩ ĩla ĩngĩ yonthe yĩ mwĩĩnĩ wake. Nĩavũe ngũa syake na aithamba, na kwa nzĩa ĩsu ayĩthĩwa e mũtheu.

10“Mũthenyanĩ wa nyanya, no nginya mũndũ ũsu aete tũtena twĩlĩ tũũme twa ĩlondu na ĩlondu yĩmwe ĩka yĩna ũkũũ wa mwaka ũmwe. Nyamũ isu syĩthĩwe ite kĩema. O ta ũu nĩaete mũtu wa kĩlo itatũ mũvulany'e na mauta wĩthĩwe nthembo ya ngetha ya mbaa mbeke, na mauta ma mililita maana atatũ.

11Mũthembi nĩatwae mũndũ ũsu vamwe na nthembo isu mũvĩanĩ wa Ĩeema ĩtheu ya kũkomanĩa na Mwĩai Ngai.

12Ĩtina wa ũu mũthembi nĩose kamwe ka tũla tũtena twĩlĩ tũũme twa ĩlondu vamwe na ala mauta asyumye syĩthĩwe nthembo kwondũ wa ĩvĩtyo. Nĩasyũkĩlye kũla kwĩ Mwĩai Ngai nĩ kana syĩthĩwe nthembo ya kũkĩlw'a.

13Nĩoaĩe katena kau ka ĩlondu vandũnĩ vatheu vala nyamũ sya nthembo kwondũ wa ũekeo wa naĩ na nthembo sya kũvĩvw'a syũaĩawa. No nginya eke ũu nũndũ nthembo kwondũ wa ũekeo wa mavĩtyo nĩ sya mũthembi na nĩ ntheu o tondũ nthembo kwondũ wa ũekeo wa naĩ iilyĩ.

14Mũthembi nĩose ĩmwe ya nthakame ya katena kau na aimĩvaka mũthyanĩ wa kũtũ kwa ngalĩko ya kw'oko kwa aũme kwa mũndũ ũsu ũkũthew'a, kyaanĩ kyake kĩla kĩnene kya kw'oko kwake kwa aũme, na kyaanĩ kyake kĩla kĩnene kya kũũ kwake kwa aũme.

15Nĩvo ĩndĩ mũthembi wĩosa amwe ma ala mauta amatulũle ũvĩnĩ wa kw'oko kwake kwa aka,

16na aitola mauta na kyaa kyake kya kw'oko kwa aũme na kũmaminzangĩsya mavinda mũonza vau mbee wa Mwĩai Ngai.

17Nĩatole mauta ala me ũvĩnĩ wake na aimavaka mũthyanĩ wa kũtũ kwa ngalĩko ya kw'oko kwa aũme kwa mũndũ ũsu ũkũthew'a, kyaanĩ kyake kĩla kĩnene kya kw'oko kwa aũme, na kyaanĩ kyake kĩla kĩnene kya kũũ kwake kwa aũme vala nthakame ya katena ka nthembo kwondũ wa ũekeo wa mavĩtyo ĩvakĩtwe.

18Mauta ala meũtiala ũvĩnĩ wake nĩametĩkĩsye mũtwenĩ wa mũndũ ũsu. Kwa nzĩa ĩsu mũthembi eĩthĩwa eeka maũndũ ala maĩlĩte kwĩkwa nĩ kana mũndũ ũsu athew'e.

19“Ĩtina wa ũu mũthembi nĩaumye nthembo kwondũ wa ũekeo wa naĩ, na ayĩka maũndũ ala maĩlĩte kwĩkwa nĩ kana mũndũ athew'e. Amina kwĩka ũu nĩoae kala katena kangĩ ka ĩlondu kethĩwe nthembo ya kũvĩvw'a,

20na aikathemba vamwe na ĩla ngetha ya mbaa mbeke. Kwa nzĩa ĩsu mũthembi eĩthĩwa eeka maũndũ ala maĩlĩte kwĩkwa nĩ kana mũndũ athew'e, na kwoou mũndũ ũsu ayĩthĩwa e mũtheu.

21“Ethĩwa mũndũ ũsu nĩ ngya na ndatonya kwona syĩndũ isu kwondũ wa kũthew'a kwake, nĩaete katena o kamwe kaũme ka ĩlondu kethĩwe nthembo kwondũ wa ĩvĩtyo, ĩla ĩkũkĩlw'a nĩ kana avetewe naĩ. O ta ũu nĩaete kĩlo o kĩmwe kya mũtu ũvulanĩtw'e na mauta wĩthĩwe nthembo ya ngetha ya mbaa mbeke na aiete mauta ma mililita maana atatũ.

22Nĩaete ndumbũ ilĩ kana maswii elĩ ma ĩvũĩ, yĩmwe yĩthĩwe nthembo kwondũ wa ũekeo wa naĩ, na yĩla yĩngĩ yĩyĩthĩwa nthembo ya kũvĩvw'a.

23Mũthenyanĩ wa nyanya wa kĩthew'a kwake, mũndũ ũsu nĩaete syĩndũ isu vala ve mũthembi, mũvĩanĩ wa Ĩeema ĩtheu ya kũkomanĩa na Ngai.

24Mũthembi nĩose katena kau kaũme ka ĩlondu ka nthembo kwondũ wa mavĩtyo, na ala mauta na aisyũkĩlya nĩ kana syĩthĩwe nthembo ya kũkĩlw'a kwondũ wa Mwĩai Ngai.

25Mũthembi nĩoae katena kau na ayosa nthakame ĩmwe yako na aimĩvaka mũthyanĩ wa kũtũ kwa ngalĩko ya kw'oko kwa aũme kwa mũndũ ũsu ũkũthew'a, kyaanĩ kyake kĩla kĩnene kya kw'oko kwake kwa aũme, na kyaanĩ kyake kĩla kĩnene kya kũũ kwake kwa aũme.

26Mũthembi nĩose ala mauta na aitulũla amwe ũvĩnĩ wake wa kw'oko kwa aka,

27na aimatola na kyaa kyake kya kw'oko kwa aũme na kũmaminzangĩsya mavinda mũonza vau mbee wa Mwĩai Ngai.

28Nĩavake amwe ma mauta asu me ũvĩnĩ wake mũthyanĩ wa kũtũ kwa ngalĩko ya kw'oko kwa aũme kwa mũndũ ũsu ũkũthew'a, kyaanĩ kyake kĩla kĩnene kya kw'oko kwa aũme, na kyaanĩ kyake kĩla kĩnene kya kũũ kwake kwa aũme.

29Mauta ala meũtiala ũvĩnĩ wake nĩametĩkĩsye mũtwenĩ wa mũndũ ũsu. Kwa nzĩa ĩsu mũthembi eĩthĩwa eeka maũndũ ala maĩlĩte kwĩkwa nĩ kana mũndũ athew'e.

30Ĩtina wa ũu mũthembi nĩaumye ĩmwe ya ila ndumbũ kana yĩmwe ya ala maswii ma ĩvũĩ

31yĩthĩwe nthembo kwondũ wa ũekeo wa naĩ na yĩla yĩngĩ yĩyĩthĩwa nthembo ya kũvĩvw'a na aiyĩthemba vamwe na ĩla nthembo ya ngetha ya mbaa mbeke. Kwa nzĩa ĩsu mũthembi eĩthĩwa eeka maũndũ ala maĩlĩte kwĩkwa nĩ kana mũndũ athew'e.”

32Ũsu nĩw'o mwĩao ũla waĩlĩte kũatĩĩwa nĩ mũndũ ũla wĩ na ũwau mũthũku wa kĩkonde na ũtatonya kwona nthembo ila syathĩĩwe kumw'a kwondũ wa kũthew'a kwake.

33Mwĩai Ngai nĩwaneenie na Mwose na Alũni amea atĩĩ,

34“Mwamina kũlika nthĩ ya Kanaani ĩla nĩmũnenga yĩthĩwe ng'ũndũ yenyu, nakwa ngĩete mbuka ĩkũnyaĩĩkĩa nyũmba mwĩ nthĩ ĩsu,

35mwene wa nyũmba ĩsu no nginya athi kũla kwĩ mũthembi na aimwĩa, ‘Nĩnonie kĩndũ kĩilyĩ mbuka nyũmba kwakwa.’

36Mũthembi nĩeyĩae syĩndũ syonthe ila syĩ nyũmbanĩ ĩsu syumaalw'e mbee wa atanamĩlika asisye mbuka ĩsu. Ũu walea kwĩkwa syĩndũ syonthe ila syĩ nyũmbanĩ ĩsu syĩtalwa kwĩthĩwa mbuku. Syĩndũ isu syamina kumaalw'a, mũthembi nĩalike nyũmbanĩ ĩsu

37na aisisya mbuka ĩsu. Ethĩwa nĩkũkwoneka kũndũ kwa langi ũilyĩ ta wa ĩtũ yĩũ kana mũtune kũendee kwĩnzĩka ũkũtanĩ,

38mũthembi nĩaume nyũmbanĩ ĩsu na aimĩvinga vandũ va mĩthenya mũonza.

39Mũthenyanĩ wa mũonza nĩasyoke nyũmbanĩ ĩsu na aimĩsisya ĩngĩ. Ethĩwa mbuka ĩsu nĩnyaĩĩkĩte ngũtanĩ sya nyũmba ĩsu,

40mũthembi nĩeyĩae mavia ala makwatĩtwe nĩ mbuka ĩsu maumw'e na mayĩkw'a vandũnĩ vavuku nza wa ndũa.

41Ĩtina wa ũu mũthembi nĩeae ngũta sya nthĩnĩ sya nyũmba ĩsu syonthe ikũlũtwe, na mũthanga ũla ũkuma ngũtanĩ isu ũikuwa ũkekw'e vandũnĩ vavuku nza wa ndũa.

42Nĩvo ĩndĩ mavia angĩ meoswa matũmĩwe vandũ va ala maumiw'e, na ngũta isu iitendew'a ĩngĩ na ndaka.

43“Ethĩwa mbuka ĩsu nĩyasyoka ĩngĩ nyũmbanĩ ĩsu ĩtina wa mavia ala me mbuka kumw'a, na ngũta sya nyũmba ĩsu kũkũlũtwa na kũtendew'a ĩngĩ,

44mũthembi nĩathi na aimĩsisya. Eethĩa kana mbuka ĩsu nĩnyaĩĩkĩe nyũmbanĩ ĩsu, ĩsu nĩ mbuka ya kwananga na nyũmba ĩsu nĩ mbuku.

45Nyũmba ĩsu no nginya ĩombowe, na mavia mayo, mbwaũ syayo, na mũthanga ũla ũnamĩtendeetye no nginya ivetangwe na kũtwawa vandũnĩ vavuku nza wa ndũa.

46Mũndũ o na wĩva ũla walika nyũmbanĩ ĩsu ĩvinda yĩla ĩvingĩtwe, akeethĩawa e mũvuku nginya ĩa mawĩoo.

47Na mũndũ o na wĩva ũla wĩkoma kana kũĩĩa kĩndũ nyũmbanĩ ĩsu, no nginya avũe ngũa syake.

48“Ĩndĩ ethĩwa mũthembi nĩwooka kũsisya nyũmba ĩsu na ayĩthĩa mbuka ĩtananyaĩĩkĩa nyũmbanĩ ĩsu ĩtina wa ngũta syayo kũtendew'a ĩngĩ, nĩvo ĩndĩ mũthembi wĩtavany'a asye kana nyũmba ĩsu nĩ ntheu, nũndũ mbuka ĩsu nĩnathelile.

49Kwondũ wa kũthew'a kwa nyũmba ĩsu mũthembi nĩose nyũnyi ilĩ, kĩlungu kya mũtĩ wa mũkũũ, mũkumbũ mũtune, na ũvonge wa mũtĩ wĩtawa ĩsovo.

50Nĩoaĩe ĩmwe ya nyũnyi isu mbakũlinĩ ĩseũvĩtw'e na yũmba, yĩna kĩw'ũ kuma kĩthimanĩ kĩna kĩw'ũ kĩvĩtĩte.

51Ĩtina wa ũu, mũthembi nĩose kĩla kĩlungu kya mũtĩ wa mũkũũ, ũvonge wa ĩsovo, ũla mũkumbũ mũtune, na nyũnyi ĩla ĩngĩ yĩ thayũ, na ayĩinda syĩndũ isu nthakamenĩ ya ĩla nyũnyi ĩminĩte kũaĩwa mbakũlinĩ yĩ kĩw'ũ kya kuma kĩthimanĩ kĩna kĩw'ũ kĩvĩtĩte, na aiminzangĩsya nyũmba ĩsu mavinda mũonza.

52Kwa nzĩa ĩsu eĩthĩwa athesya nyũmba ĩsu aitũmĩa nthakame ya nyũnyi ĩsu, kĩw'ũ kya kuma kĩthimanĩ kĩna kĩw'ũ kĩvĩtĩte, ĩla nyũnyi yĩ thayũ, kĩlungu kya mũtĩ wa mũkũũ, ĩsovo, na ũla mũkumbũ mũtune.

53Nĩvo ĩndĩ mũthembi wĩlekya nyũnyi ĩsu yĩ thayũ ĩũlũke ĩthi nza wa ndũa. Kwa nzĩa ĩsu mũthembi akeethĩawa eeka maũndũ ala maĩlĩte kwĩkwa nĩ kana nyũmba ĩthew'e, nayo ĩ nyũmba ĩyĩthĩwa yathew'a.”

54Asu nĩmo motw'ĩo ĩũlũ wa ũwau mũthũku o na wĩva wa kĩkonde, ũnyeeo,

55mbuka ĩla ĩkwatĩte ngũa kana yĩ nyũmba,

56tũtalu, mũimũ, kana vandũ vaimbu.

57Mĩao ĩsu nĩyo ĩkavathũkanasya kana kĩndũ nĩ kĩtheu kana nĩ kĩvuku. Ũsu nĩw'o mwĩao kwondũ wa ũwau wa mangũ.