Leviticus 16

Kamba (MBIVILIA ŨVOO MŨSEO)

← Chapter 15 Jump to: Chapter 17 →

1Ĩtina wa kũkw'a kwa ana elĩ ma Alũni, ala makwie maumĩsya Mwĩai Ngai nthembo ya ũvani na mwaki ũtetĩkĩlĩtw'e, Mwĩai Ngai nĩwaneenie na Mwose.

2Nĩweeie Mwose atĩĩ, “Tavya mwana-a-inyia waku Alũni ũmwĩe ndaĩlĩte kũlika Vandũnĩ vala Vatheu Mũno ĩtina wa suka o yĩla wenda, nũndũ vau nĩvo numĩlĩĩlaa nĩ mũumbĩnĩ ĩũlũ wa ĩla ngunĩko ya Ĩsandũkũ ya Ũtianĩo. Alea kwĩthĩwa e mwĩwi akakw'a.

3Alũni ailika Vandũ vau Vatheu Mũno akaetae kasalũ kethĩwe nthembo ya ũekeo wa naĩ, na ndũũme yĩthĩwe nthembo ya kũvĩvw'a.”

4Nĩvo ĩndĩ Mwĩai Ngai weeaĩie Mwose aimwĩa atĩĩ, “No nginya Alũni athambe na ayĩkĩa ngũa sya kĩ-ũthembi; ngũa ĩla ndaasa, ngũa ya nthĩnĩ, mũsivi na ngovia. Syonthe syĩthĩwe itumĩtwe na ndii nzeo ndũmu. Nĩekae ũu mbee wa atanalika vala Vandũ Vatheu Mũno.

5“Nĩose kuma andũnĩ ma Ĩsilaeli nthenge ilĩ syĩthĩwe nthembo kwondũ wa ũekeo wa naĩ, na ndũũme ĩmwe yĩthĩwe nthembo ya kũvĩvw'a.

6Alũni nĩaumye kala kasalũ kethĩwe nthembo kwondũ wa ũekeo wa naĩ syake na sya andũ ma mũsyĩ wake.

7Ĩtina wa ũu nĩose ila nthenge ilĩ aitwae mũvĩanĩ wa Ĩeema ya kũkomanĩa na Mwĩai Ngai.

8E vau nĩakũne kula kwondũ wa mbũi isu aitũmĩa mavia elĩ; yĩmwe yĩandĩkĩtwe, ‘Kwondũ wa Mwĩai Ngai’ na yĩla yĩngĩ ‘Kwondũ wa Asaseli.’

9Alũni nĩaete mbũi ĩla ĩkũvalũkĩlwa nĩ kũla yĩthĩwe ya Mwĩai Ngai amyumye nthembo kwondũ wa ũekeo wa naĩ.

10Ĩndĩ mbũi ĩla ĩkũvalũkĩlwa nĩ kula yĩthĩwe yĩ ya Asaseli nĩ ĩetwe mbee wa Mwĩai Ngai yĩ thayũ, na ĩndĩ ĩilekw'a ĩthi weũnĩ kũla kwĩ Asaseli nĩ kana ĩvetange naĩ sya andũ ma Ĩsilaeli.

11“Alũni amina kũthemba kala kasalũ kethĩwe nthembo kwondũ wa ũekeo wa naĩ syake na sya andũ ma mũsyĩ wake,

12nĩose kĩndũ kya kũtoeesya ũvani kyusĩe makaa me mwaki kuma kĩthembeonĩ, na ayĩuta ngundi ilĩ sya ũvani ũla mũseo vyũ, na aiete syĩndũ isu Vandũnĩ vala Vatheu Mũno.

13E vau mbee wa Mwĩai Ngai nĩekĩe ũvani ũsu mwakinĩ ũsu wa makaa nayo syũki ĩkamu ya ũvani ũsu yĩivw'ĩka ngunĩko ĩsu ya Ĩsandũkũ ya Ũtianĩo wĩthĩe ndayene nĩ kana ndakakw'e.

14Alũni nĩose nthakame ĩmwe ya kasalũ kau na aimĩminzangĩsya na kyaa kyake ngalĩkonĩ ya wumĩlonĩ wa syũa ya ngunĩko, na o ta ũu aiminzangĩsya nthakame ĩmwe mavinda mũonza ngalĩkonĩ ya wumĩlonĩ wa syũa ya Ĩsandũkũ ya Ũtianĩo.

15“Ĩtina wa kwĩka ũu, nĩoae ĩla nthenge yumĩtw'e yĩthĩwe nthembo kwondũ wa ũekeo wa naĩ sya andũ. Nĩaete nthakame ya mbũi ĩsu Vandũnĩ vala Vatheu Mũno na aimĩminzangĩsya ngunĩkonĩ, na o ta ũu ngalĩkonĩ ya wumĩlonĩ wa syũa ya Ĩsandũkũ ya Ũtianĩo o ũndũ weekana na nthakame ya kala kasalũ.

16Kwa nzĩa ĩsu, Alũni akeethĩawa eeka maũndũ ala maĩlĩte kwĩkwa kwondũ wa kũthesya vala Vandũ Vatheu Mũno kuma ũvukunĩ wa andũ ma Ĩsilaeli, na kuma naĩnĩ syoo. No nginya akekana na Ĩeema ĩtheu ya kũkomanĩa na Ngai ũu nũndũ yambĩtwe katĩ wa vala vambĩtwe maeema ala angĩ namo nĩ mavuku.

17Kuma ĩvindanĩ yĩla Alũni walika Vandũnĩ vala Vatheu Mũno nĩ kana eke maũndũ ala maĩlĩte kwondũ wa kũthew'a nginya yĩla ũkaumaala, vai mũndũ o na ũmwe waĩlĩte kwĩthĩwa nthĩnĩ wa Ĩeema ĩtheu ya kũkomanĩa na Ngai. Alũni amina kwĩka maũndũ ala maĩlĩte kwondũ wa kũthew'a kwake, kwa andũ make, na kwa andũ onthe ma Ĩsilaeli

18nĩaumaale athi kĩthembeonĩ kĩla kyumĩaw'a nthembo sya kũvĩvw'a na aikĩthesya. Nĩose nthakame ĩmwe ya kala kasalũ na nthakame ĩmwe ya ĩla mbũi, na kũmĩvaka mĩthyanĩ ĩla yĩ konanĩ sya kĩthembeo.

19Nĩaminzangĩsye nthakame ĩsu mavinda mũonza kĩthembeonĩ aitũmĩa kyaa kyake. Kwa nzĩa ĩsu akeethĩawa athesya kĩthembeo kuma naĩnĩ sya andũ ma Ĩsilaeli na aituma kithĩwa kĩ kĩtheu.

20“Alũni amina kwĩka maũndũ ala maĩlĩte kwondũ wa kũthesya vala Vandũ Vatheu Mũno, Ĩeema ĩtheu ya kũkomanĩa na Mwĩai Ngai, na kĩthembeo, nĩatwae mbee wa Mwĩai Ngai ĩla mbũi yĩ thayũ ĩminĩte kũnyuvwa kwondũ wa Asaseli.

21Nĩailĩĩle moko make elĩ mũtwenĩ wa mbũi ĩsu, na ayumbũlĩla ĩũlũ wayo mavĩtyo onthe, mothũku onthe, na naĩ syonthe sya andũ ma Ĩsilaeli. Kwa kwĩka ũu eĩthĩwa athamĩĩsya maũndũ asu onthe mũtwenĩ wa mbũi ĩsu. Ĩtina wa ũu mbũi ĩsu ĩingwe ĩthi weũnĩ nĩ mũndũ ũla ũnyuvĩtwe kwĩka ũu.

22Mbũi ĩsu yĩĩthĩwa yakua naĩ sya andũ asu syonthe na kũitwaa weũnĩ vandũ vatatũaa andũ, na aimĩlekya kũu weũnĩ.

23Ĩtina wa ũu Alũni nĩathi Ĩeemanĩ ĩtheu ya kũkomanĩa na Ngai na ayumya ngũa sya kĩ-ũthembi ila weekĩie mbee wa atanamba kũlika vala Vandũ Vatheu Mũno, na ayitia vau.

24No nginya athambe e vandũnĩ vatheu, na ayĩkĩa ngũa ila syake mwene. Amina kwĩka ũu, nĩaumaale athi akathembe nthembo ya kũvĩvw'a nĩ kana aekewe naĩ syake, na o ta ũu andũ ma Ĩsilaeli maiekewa naĩ syoo.

25Nĩavĩvĩsye kĩthembeonĩ mathunya ma ĩla nyamũ yumĩtw'e nthembo kwondũ wa ũekeo wa naĩ.

26Mũndũ ũla ũnaingie ĩla mbũi amĩtwaa weũnĩ kũla kwĩ Asaseli no nginya avũe ngũa syake na aithamba atanamba kũsyoka vala maeema mambĩtwe.

27Kala kasalũ na mbũi, ila syumiw'e syĩthĩwe nthembo kwondũ wa ũekeo wa naĩ, na nthakame yasyo yatwawa vala Vandũnĩ Vatheu Mũno nĩ kana ivete naĩ sya andũ, no nginya ikuwe itwawe ũtee wa vala maeema mambĩtwe na kũvĩvw'a; ithuma syasyo, nyama sya nda na mũyoo no nginya ivĩvw'e.

28Mũndũ ũla ũkũvĩvya kasalũ kau na mbũi ĩsu no nginya avũe ngũa syake na aithamba atanamba kũsyoka vala maeema mambĩtwe.

29“Motw'ĩo aa maatĩĩe no nginya maatĩĩawe ĩvindanĩ yonthe yĩla yũkĩte; mũthenyanĩ wa ĩkũmi wa mwei wa mũonza, andũ ma Ĩsilaeli na aeni ala matwĩe katĩ woo no nginya matĩĩe kũya, na mayaĩlĩte kũtethya wĩa o na ũmwe.

30Mũthenyanĩ ũsu, maũndũ ala maĩlĩte kwĩkwa kwondũ wa ũekeo wa naĩ syoo mekwe nĩ kana methĩwe me atheu.

31Mũthenya ũsu waĩlĩte kwĩthĩwa wĩ mũthenya mũtheu mũno, mũthenya ũla andũ maĩlĩte kũtĩĩa kũya, na mataĩlĩte kũthũkũma. Motw'ĩo aa maĩlĩte kũatĩĩawa ĩvinda yonthe yĩla yũkĩte.

32Mũthembi ũla Mũnene wĩtĩkĩw'e mauta na akavathwa nĩ kana aendeesye wĩa wa ĩthe wake, nĩwe waĩlĩte kwĩka maũndũ ala mathĩĩwe kwĩkwa kwondũ wa ũekeo wa naĩ. Akeekĩaa ngũa sya kĩ-ũthembi,

33na ayĩka maũndũ ala maĩlĩte kwĩkwa kwondũ wa kũthesya vala Vandũ Vatheu Mũno, Ĩeema ĩtheu ya kũkomanĩa na Mwĩai Ngai, kĩthembeo, athembi, na andũ onthe ma Ĩsilaeli.

34Motw'ĩo asu no nginya maatĩĩawe ĩvindanĩ yonthe yĩla yũkĩte. Maũndũ asu no nginya mekawe ĩvinda yĩmwe kwa mwaka nĩ kana andũ ma Ĩsilaeli matheaw'e naĩ syoo.” Kwoou maũndũ asu onthe nĩmeekiwe kwĩanana na ũndũ Mwĩai Ngai weeaĩie Mwose.

← Chapter 15 Jump to: Chapter 17 →